Philemon 1:6 - The New Testament in Islander Creole

⁶ So, Ah prie seh di fiet weh yu gat iina di Laad Jesus gwain help ada pipl fi andastan muo beta bout aal di blesin dem weh God gi wi, wen wi dah wan wid Christ.

Philemon 1:6 Iomraidhean Croise

Matthew 25:16

“Di wan weh wehn get five talent gaan out siem taim ahn staat put'ih tu work ahn ihn gien five muo talent.

Matthew 5:16

Dah di siem wie, unu fi mek pipl si di lait iina unu, so dehn wi si aal di gud ting weh unu du, ahn dehn wi priez unu Faada iina hevn.

1 Corinthians 14:25

Den, wen evryting iina ihn haat kom out iina di uopm, dah man gwain niil dong ahn waaship God, ahn tel di chorch seh, “God deh wid unu fi chruut!”

1 Corinthians 16:9

bikaaz wan uova gud chaans deh yah fi du wan big work fi God, iivn duo plenty pipl deh gens mi tu.

Philippians 4:8

Ahn now bredrin, demya dah di laas ting dem weh Ah gwain seh tu unu: Enyting weh aanes ahn chruu, enyting weh gud, enyting weh rait, enyting weh kliin, enyting weh lovly, enyting weh gud fi unu admaya ahn demde tingz weh riily gud nof fi unu priez God fah —dem dah di kain a ting dem weh unu fi aalwiez deh tink bout.

Colossians 1:9

Dat dah wai wi neva stap deh prie fi unu fahn di fos die wi wehn hier bout unu. Di chruut dah seh, wi aalwiez prie seh God wi shuo unu evryting ihn waahn unu fi du, ahn dat unu gwain gat aal di wizdom ahn andastandin weh di Spirit gi tu ihn pipl dem.

Colossians 3:10

Unu wehn put aaf di uol self ahn put aan di nyuu wan. Ahn dis ton unu laik wan nyuu porsn weh God deh mek muo beta evry die, so dat unu kom fi bii muo laik di Laad evry die.

Titus 3:14

Di biliiva dem dah Crete hafy laan how fi yuuz dehn taim fi du plenty gud tingz tu, so dehn kyan help ada pipl get weh dehn niid. Iina dah wie deh, demya pipl gwain liv wan laif weh wortwail.

Hebrews 6:10

Bikaaz, God dah wan fier God, ahn him no gwain farget how haad unu wehn work fi im. Ihn no gwain farget how unu shuo unu lov tu im wen unu wehn help out ihn pipl dem, ahn how unu deh kiip aan deh help dem.

James 2:14

Bredrin, weh gud ih gwain du if sombady seh ihn chros iina God, bot ihn no shuo ihn fiet bai di wie ihn liv? Unu tink dat kain a fiet kyan siev im?

James 2:17

Siem wie, if unu no du notn fi shuo seh unu gat fiet iina God chruu wat unu deh du fi help wan anada, den di fiet weh unu gat riily ded ahn ih no wot notn ataal!

1 Peter 2:12

Unu fi liv iina soch a wie mongs di pipl dem weh no nuo God, dat iivn wen dehn deh akyuuz unu seh, unu deh du di tingz dem weh wikid, demya pipl hafy uon'op ahn seh dah neva chruu. Ahn di gud tingz weh unu du, gwain liid dem fi biliiv ahn gi God ana pahn Dat Die wen ihn kom bak fi joj di worl!

1 Peter 3:1

Siem wie, evry wan a unu marid uman fi put unu hozban fos. Den, if som a unu hozban no biliiv God Wod, unu kyan win im uova fi biliiv jos bai di wie unu bihiev. Unu no gwain iivn hafy seh wan wod tu im,

1 Peter 3:16

Bot unu fi du'ih iina wan nais wie ahn wid rispek, so dat unu kyan stie wid wan kliin kanshans. Den, if som pipl taak bad bout unu, dehn gwain fiil shiem wen dehn si di gud laif unu liv, bikaaz unu dah fi Christ.

2 Peter 1:8

Demya dah di tingz dem weh unu niid. Ahn if unu gat plenty a dem, dehn gwain mek unu gruo muo beta, ahn nuo muo bout di Laad Jesus Christ. Unu gwain kount fi somting iina ihn Kingdom!