Matthew 5:37 - The New Testament in Islander Creole

³⁷ So, yuu fi ongl seh wan simpl ‘yees,’ ahn miin ‘yees,’ or seh wan simpl ‘nuo,’ ahn miin ‘nuo.’ Bikaaz enyting muo an dat, dah fahn di Bad Wan.

Matthew 5:37 Iomraidhean Croise

Matthew 13:19

Di siid wi bii laik God Wod, ahn som taim, laik di siid weh drap pan di trak ruod, wan man hier di mesij bout di Kingdom, bot laik di bord weh iit'op di siid, di devl kom ahn tek weh di mesij, so di man neva andastan ih ahn kiip'ih iina ihn haat.

Matthew 13:38

ahn di grong dah laik di worl. Di gud siid dah laik dem weh dah paat a God Kingdom, bot di prikl dah laik dem weh deh fala di devl.

Matthew 15:19

Bikaaz dah fahn iinsaida di porsn haat aal di doty tinkin kom out weh mek im du aal di bad ting dem, laik kil, komit adolchry, gat seks bitout marid, tiif, tel lai fi get somting, ahn bring dong sombady repyutieshan.

Matthew 5:36

Niida tek uot iina yo hed niem, bikaaz yo kyaahn mek nat iivn wan straan a hier pan yo hed get wait nar blak.

Matthew 6:13

Ahn kiip wi weh fahn temtieshan, ahn fahn di Bad Wan weh waahn liid wi astrie. [Bikaaz yu dah di ongli'is wan weh gat aal di Kingdom atarity, di powa ahn di gluory fi aal di taim, Amen!]’

John 17:15

“Faada, Ah no deh aks yo fi tek dem outa di worl, bot Ah deh aks yo fi protek dem fahn di Wan weh Bad.

John 8:44

Unu dah fi unu uon faada weh dah di devl; ahn dah unu waahn du weh him waahn unu fi du. Him dah wehn wan mordara fahn di fos, ahn him neva waahn gat notn fi du wid di chruut, bikaaz nat wan piis a chruut deh iina him. Wen di devl tel lai, ihn deh du'ih bikaaz dah so him fi lai, sieka him dah di faada ah aal di lai dem.

Ephesians 4:25

So den, bredrin, evry wan a unu fi stap tel lai! Unu fi tel di chruut tu wan anada —az breda ahn sista iina Christ— bikaaz aala wi tugeda dah fi Christ! Aala wii dah wan bady iina him!

Ephesians 6:16

Den, mek unu fiet iina Jesus Christ stie strang laik di shiil weh dah suoldya ker. Ahn wid dah shiil unu gwain kyan blak aal di aruo dem wid faiya, weh di Wikid Wan deh shuut tu unu.

Colossians 3:9

Ahn unu hafy stap lai tu wan anada tu, bikaaz unu don gi'op dat wie a laif wid demde uova bad habit.

Colossians 4:6

Wen unu deh taak wid dem, taak tu dem iina wan nais ahn intrestin wie weh gwain mek dem waahn hier muo. Ahn den unu gwain kom fi nuo how fi gi di rait ansa tu evrybady.

2 Thessalonians 3:3

Bot, az fi di Laad Jesus, him wehn aalwiez fietful. Ahn ihn gwain mek unu iivn muo stranga ahn kiip unu sief fahn di Wikid Wan.

James 5:12

Ahn muo an eva, bredrin, unu no fi swie, nat bai hevn nar bai ort, nar bai notn ataal! Aal unu hafy seh dah wan plien, “Yees sah,” or “Nuo sah” —or els God gwain joj unu.

1 John 2:13

Ahn tu unu pupa, Ah deh rait tu unu, bikaaz unu don nuo Christ, di Wan weh deh fahn di biginin. Ahn unu yong pipl, Ah deh rait tu unu tu, bikaaz unu don win uova di Wikid Wan.

1 John 3:12

Wi no fi bii laik Cain, weh dah wehn fi di Bad Wan, ahn weh kil ihn breda. Ahn wai Cain wehn kil im? Bikaaz evryting weh Cain wehn du, wehn wikid; ahn evryting weh ihn breda wehn du, wehn rait iina God sait!

1 John 5:18

Wi nuo seh, dehn pipl weh dah God pikniny dehn no mek'ih wan habit fi sin, bikaaz di Son a God kiip dem sief ahn di Wikid Wan kyaahn toch dem ataal.