Matthew 23:39 - The New Testament in Islander Creole

³⁹ Ah deh tel unu: unu no gwain si mi agen til di taim kom wen unu seh, ‘Bles dah di Wan weh kom iina di Laad niem.’ ”

Matthew 23:39 Iomraidhean Croise

Matthew 21:9

Ahn di pipl dem weh wende hed a him, ahn dem weh wende kom bihain, staat baal out: “Huzaana tu David Son! God bles di wan weh kom iina di niem a di Laad! Huzaana! Priez di Laad iina hevn!”

Luke 17:22

Den Jesus seh tu ihn disaipl dem, “Di die gwain kom wen unu gwain lang fi spen iivn wan die wid di Son a Man, bot unu gwain kyaahn du'ih.

John 14:19

Wan likl wail muo ahn di pipl dem iina disa worl no gwain si mi no muo, bot unu gwain si mi duo. Ahn bikaaz Ah gwain liv agen, unu gwain liv tu.

John 14:9

Jesus ansa ahn seh, “Philip, Ah deh wid yu dis huol taim ahn stil yet yu no nuo mi? Enybady weh don si mii, don si di Faada tu. So dah how yu kyan seh, ‘Mek wi si di Faada wid wi uon ai dem’?

John 8:21

Jesus tel dem agen, “Ah gwain weh ahn unu gwain luk fi mi, bot unu kyaahn go weh paat Ah gwain; unu gwain ded ahn unu sin stil no gwain get fargiv.”

John 8:24

Dat dah wai Ah deh tel unu seh unu gwain ded, ahn unu sin stil no gwain get fargiv, if unu no biliiv seh mii dah di Wan weh Aalwiez Egzis.”

John 8:56

Fi unu ansesta Abraham wehn get hapy wen ihn get fi nuo seh fi mi taim fi kom wehn kom'in, so ihn wehn glad.”

Romans 11:25

Bredrin, Ah waahn unu andastan bout wan plan fi di Jew dem weh God neva mek evrybady nuo bout til tudeh. Ahn ih gud fi nuo disya plan now fi mek unu no tink tuu moch pahn unuself. Di plan dah dis: di pipl fahn Israel no gwain stie haad-hedid fareva. Dehn ongl gwain stan so, til aala demde pipl weh dah no Jew weh God don pik, kom tu him.