Matthew 10:15 - The New Testament in Islander Creole

¹⁵ Ah deh tel unu di chruut: di pipl dem fahn Sodom ahn Gomorrah sity gwain gat'ih muo iiziya an fi di pipl dem fahn daty toun, di die fi jojment!

Matthew 10:15 Iomraidhean Croise

Matthew 12:36

“Ah deh tel unu: pahn di Jojment Die evrybady gwain gi akount tu God fi evry ogly ting weh dehn seh bout sombady.

Matthew 5:18

Bikaaz Ah deh tel unu di chruut: til hevn ahn ort no disapier, nat iivn wan a di smaalis spek gwain don weh wid outa di Laa, til evryting God waahn du chruu'ih, don hapm.

Matthew 7:22

Plenty pipl gwain tel mi pahn Dat Die, ‘Laad, Laad, wii neva priich God mesij iina yo niem? Ahn iina yo niem wii neva tek out bad spirit? Ahn iina yo niem wii neva du plenty mirakl tu?’

Mark 6:11

Bot if unu kom tu wan plies weh di pipl no aksep unu, nar pie main tu weh unu deh seh, wen unu lef outa dah toun, kliin aaf di dos aafa unu fut, fi shuo di pipl dem seh dehn iina dienja. [Hier dis chruut weh Ah deh tel unu: ih gwain bii muo iiziya fi Sodom ahn Gomorrah pipl dem di die a God jojment an fi demde pipl.]”

John 12:48

Dem weh rijek mii ahn no waahn hier mi mesij, don gat wan joj aredy; pahn di laas die, fi dem joj gwain bii di siem tingz weh Ah don tiich dem aredy.

John 6:39

Dis dah weh di Wan weh sen mi tel mi fi du: ihn no waahn Ah laas non a dem weh him gi mi, bot ihn waahn Ah fi riez dem op pahn di laas die.

John 6:40

Aala dem, weh si di Son ahn chros iina im, gwain liv wid God fareva; ahn Ah gwain riez dem op fahn di ded pahn di laas die. Dat dah weh mi Faada waahn.”

Acts 17:31

Bikaaz him don fiks wan die wen ihn gwain joj di huol worl wid jostis, chruu wan man weh ihn don gi di jab tu. Ahn God wehn shuo pruuf tu aal man seh ihn gwain du dis wen ihn riez dah siem man bak fahn mongs di ded dem.”

1 Corinthians 3:13

Bot, wen Dat Die kom wen God gwain joj aal di pipl dem, evrybady gwain kyan si weh kain a work iich porsn wende du. Pahn Dat Die faiya gwain tes evrybady work, ahn ih gwain shuo jos weh kain a work iich porsn wende du.

1 Thessalonians 5:4

Bot, bredrin, unu no iina di daak. Unu aredy nuo weh gwain hapm. So den, Dat Die a di Laad no shuda kom op pahn unu laik wan tiif.

Hebrews 10:25

Ahn no mek wi mek'ih wan habit fi no miit tugeda, laik weh som a dem du. Insida dat, wi shuda inkorij wan anada muo ahn muo, now dat wi si Dat Die deh kom kluosa!

2 Peter 2:6

Neks, iina di diez a Abraham, God kandem di sity a Sodom ahn Gomorrah dem, wen dehn neva waahn pie im no main. Ahn den, ihn wehn bon dem op wid faiya. Ihn wehn mek wan egzampl outa dem bout weh gwain hapm tu demde kain a pipl weh no waahn obie im!

2 Peter 2:9

So unu si, di Laad nuo how fi siev fi him pipl dem fahn di haad taim dem weh dehn deh go chruu. Ahn ihn nuo how ihn gwain ponish pahn di Die a Jojment aala demya pipl weh deh liv slak laif tu. Iivn now, God jojment deh heng uova dehn hed!

2 Peter 3:7

Ahn siem wie, God don aada aredy fi mek aal di pipl dem weh no du wat ihn seh fi get bon'op wid wan big faiya!

1 John 4:17

Ahn wail wi liv iina God, ihn lov gwain gruo plenty muo stranga iina wii til'ih get weh ih shuda bii. Den, wen Jojment Die kom, wi no gwain hafy fried, bikaaz wi deh liv iina dis worl jos laik how Christ deh liv.

Jude 1:6

Ahn unu shuda tink bout di ienjel dem tu, weh neva satisfai wid di amount a atarity weh God wehn gi dem, bot dehn paas di limit weh ihn wehn set fi dem! Sieka dat, God chien dem op fareva diip dong iina wan daak plies weh dehn gwain wiet fi wen Dat Die kom, wen ihn gwain joj aala dem!

Jude 1:7

Ahn di siem kain a ting hapm iina Sodom ahn Gomorrah, ahn di ada sity dem weh wende nier tu dem. Dehn wende go aan wid aal kain a wotlisnis, ahn dehn wende gat seks iina aal kain a doty wie. Sieka dat, God distrai dem wid faiya weh gwain laas fareva. Ahn dis dah wan waanin fi aala demde kain a pipl weh du demde siem ting!