Mark 4:20 - The New Testament in Islander Creole

²⁰ Som taim, laik di siid weh drap pan gud grong demya ada pipl dah di wan dem weh hier di mesij ahn aksep ih, ahn put'ih iina praktis, ahn bring op gud tingz aal di taim, laik di trii weh bier fruut thirty taim, sixty taim, ahn one hundred taim, dehn gwain deh du beta ahn beta aal di taim.”

Mark 4:20 Iomraidhean Croise

Matthew 13:23

Bot laik di siid weh drap pan gud grong, dis ada man dah di wan weh hier di mesij ahn andastan weh ih miin. Den ihn put'ih iina praktis, ahn bring op gud tingz aal di taim. Laik di trii weh bier fruut one hundred taim, sixty taim or thirty taim, evrybady weh du laik him gwain du beta ahn beta aal di taim.”

Matthew 13:8

Ahn som ada siid drap pan gud grong; ahn dem sprout op, ahn gruo strang ahn bier plenty fruut. Som a di trii dem wehn gat aan one hundred, som sixty, ahn som a dem thirty taim muo an weh ihn wehn plaant!

Mark 4:8

Ahn som ada siid drap pan gud grong. Ahn di siid dem sprout op ahn gruo strang ahn bier plenty fruut; som a di trii dem wehn gat aan thirty; som a dem wehn gat aan sixty; ahn som a dem wehn gat aan one hundred muo an weh ihn wehn plaant!”

Luke 8:15

Ahn di siid weh faal pahn gud grong, dah laik dem weh hier di mesij ahn kiip'ih iina dehn haat ahn du aal weh God seh. Ahn den dehn kiip aan deh du gud tingz, no mata wat.”

John 15:16

“Unu neva pik mii, bot dah mii weh pik unu ahn sen unu fi bier fruut, di kain a fruut weh gwain laas lang taim. Sieka dat, mi Faada gwain gi unu enyting weh unu aks im fah iina mi niem.

John 15:2

Evry lim weh jain aan tu mi ahn no deh bier fruut, him chap aaf, bot aala dem weh bier, ihn trim dem uova kliin so dehn kyan bier muo fruut.

Romans 7:4

Ahn dat dah di siem wie wid unu, bredrin, bikaaz unu don ded tu di Laa tu. Ahn dah Laa no gat non powa uova unu no muo wen unu ded wid Christ pahn di kraas. Weh Ah miin dah now unu dah fi Him weh God wehn mek riez'op bak fahn di ded fi liv agen. Ahn dat dah how wi kyan du plenty gud tingz fi sorv di Laad.

Philippians 1:11

Ahn Ah prie fi Jesus Christ mek unu kantinyo deh du di rait ting dem, fi unu kyan get aal di gud weh ongl kom fahn him. Dis gwain mek di pipl dem ana God muo ahn muo ahn priez im tu!

Colossians 1:10

Den, unu gwain kyan liv iina wan wie weh ana di Laad, ahn du aal demde tingz weh gwain pliiz im. Unu gwain waahn du demde tingz weh gud ahn kain tu ada pipl. Ahn iina dis wie, unu gwain gruo fi nuo God muo ahn muo evry die.

1 Thessalonians 4:1

Bredrin, mek Ah shier dis laas wod wid unu: Ah deh beg unu iina di niem a di Laad Jesus fi liv iina wan wie weh gwain pliiz God. Liv jos laik how wi wehn tiich unu. Ahn dat dah weh unu deh du aredy, bot wi deh inkorij unu fi liv wan huoly laif iivn muo ahn muo;

2 Peter 1:8

Demya dah di tingz dem weh unu niid. Ahn if unu gat plenty a dem, dehn gwain mek unu gruo muo beta, ahn nuo muo bout di Laad Jesus Christ. Unu gwain kount fi somting iina ihn Kingdom!