Luke 24:44 - The New Testament in Islander Creole

⁴⁴ Afta dat, ihn seh tu dem, “Demya dah di siem tingz Ah wehn tel unu bout wen Ah stil wende wid unu: evryting weh Moses, di prafit dem, ahn weh wehn rait dong iina di Psalms bout mii wehn hafy hapm.”

Luke 24:44 Iomraidhean Croise

Matthew 1:22

Aal demya tingz wehn hafy hapm, so wat di Laad wehn tel di prafit kuda kom chruu:

Matthew 16:21

Ahn fahn daty taim, Jesus staat shuo ihn disaipl dem seh him hafy go Jerusalem ahn sofa plenty, sieka di Jewish rilijos liida, ahn di chiif priis, ahn di tiicha a di Laa dem. Dehn gwain kil im, bot afta three diez ihn gwain kom bak tu laif.

Matthew 26:54

If dat hapm, how weh wehn rait dong iina di Skriptyo gwain kom chruu?”

Matthew 26:56

Bot wat hapm now dah weh di prafit dem wehn rait dong iina di Skriptyo, ahn ih mos hapm how ih seh.” Den aal di disaipl dem lef im deh ahn ron gaan weh.

Mark 9:31

bikaaz ihn wende tiich ihn disaipl dem, ahn ihn tel dem, “Di Son a Man gwain get sel out tu di pipl weh hiet im, ahn dehn gwain kil im. Bot three diez afta, ihn gwain riez bak op fahn mongs di ded dem.”

Luke 21:22

bikaaz demde gwain bii di die dem wen God gwain tek rivench jos laik how ih wehn rait dong iina di Skriptyo.

Luke 22:37

Ah deh tel unu: weh di prafit dem wehn rait dong iina di Skriptyo bout mii hafy hapm: ‘Dehn gwain tink seh him wende mongs dem weh brok di Laa.’ Yees, Ah seh tu unu, weh dehn rait dong bout mii, deh hapm now.”

Luke 24:46

Ihn tel dem, “Dis dah weh dehn wehn rait iina di Skriptyo: ‘Di Mesaya gwain sofa, ahn den riez bak op fahn mongs di ded dem pan di third die.

Luke 9:22

Ihn seh, “Di Son a Man fi sofa plenty, bikaaz di Jewish rilijos liida, ahn di chiif priis, ahn di tiicha a di Laa dem neva gwain aksep im. Dehn gwain kil im, bot afta three diez, ihn gwain kom bak tu laif.”

Luke 9:44

“Lisn gud pan weh Ah deh tel unu: di Son a Man gwain get sel out tu di pipl weh hiet im.”

John 3:14

Ahn laik how Moses wehn lif op di braas sniek pahn wan puos iina di dezart, dah jos laik so dehn gwain lif op di Son a Man,

John 5:39

“Unu stody di Skriptyo bikaaz unu tink seh unu gwain fain out how fi liv fareva; ahn dah demde siem Skriptyo weh taak bout mii.

John 5:46

If unu wehn biliiv Moses, den unu shuda biliiv mii tu, bikaaz him dah di siem wan weh wehn rait bout mii.

Acts 13:33

now ih kom chruu fi wii, weh dah fi dem pikniny, seh God wehn gwain bring Jesus bak tu laif. Dis dah weh di sekant Psalm taak bout Jesus, wen ih seh: ‘Yuu dah mi son, tudeh mii dah yo Faada.’

Acts 13:40

“So unu beta wach out; no mek weh di prafit dem seh hapm tu unu. Dehn seh:

Acts 2:27

bikaaz yuu, Laad, no gwain lef mi iina Hades, nar lef yo Holy One fi ratn iina di griev.

Acts 3:18

Bot fahn awie-wie abak God wehn tel aal di prafit dem seh dis wehn gwain hapm: di Mesaya weh ihn wehn pik wehn gwain hafy sofa; ahn di siem ting weh ihn wehn seh tu dem wehn kom chruu fi chruut!

Acts 7:37

Dis dah di siem Moses weh seh tu di son a Israel dem, ‘God gwain sen wan prafit tu unu, jos laik how ihn sen mi, ahn him gwain kom rait fahn mongs unu.’

Hebrews 10:1

Laik how di Laa weh God gi Moses dah wehn ongl wan pitya ah aal di ting dem weh wehn gwain kom —ahn no di riil ting— di sakrifais weh dehn yuuztu du yier afta yier kuda neva mek dehn pipl, weh yuuztu kom fi waaship God, bii weh dehn wehn supuoz fi bii.

Hebrews 3:5

So den, Moses dah wehn wan fietful sorvant uova God hous —weh dah God pipl— ahn ihn wende shuo aal weh God wehn gwain seh iina di fyutyo.

Hebrews 7:1

Now, dis Melchizedek dah wehn di King a Salem ahn di Priis a di muos hai God. Dah him wehn gaan out, gaan miit Abraham ahn bles im wen ihn wende kom bak huom afta ihn wehn don win di waar gens di king dem.

Hebrews 9:8

Wen wi tink bout demya tingz, di Holy Spirit deh shuo wi seh Di Muos Huoly Plies neva wehn gwain uopm tu di pipl dem az lang az dehn stil wende yuuz di fos ruum wid aala di ruul ahn regyulieshan dem fi waaship.

1 Peter 1:11

Dehn wende wanda dah wat di Spirit a Christ —weh deh iina dem— wende taak tu dem bout. Ihn tel dem fahn bifuor ih hapm bout how Christ wuda sofa ahn bout ihn gluory aftawod. Den, dehn wende wanda dah wen aala dis gwain hapm ahn dah huu ih gwain hapm tu.

Revelation 19:10

Den, Ah faal dong fronta di ienjel dah ihn fut dem fi waaship im. Bot ihn tel mi seh, “Yo no fi du dat! Ai dah God sorvant jos laik yu ahn di ada biliiva dem —aal demde pipl weh deh fala di chruu wod weh Jesus tel wi! Yuu fi waaship God aluon! Bikaaz evrybady weh tel di chruut bout Jesus, du'ih chruu di powa fahn di Holy Spirit laik di prafit dem.”