James 5:11 - The New Testament in Islander Creole

¹¹ Wii kaal demde pipl hapy ahn bles, bikaaz dehn gaan chruu plenty trobl ahn neva gi'op. Ahn Ah shuor seh unu wehn hier bout Job tu, how ihn huol aan aal chruu fi him troblz ahn neva gi'op nontaim. Si weh God du far im pahn di en? Ihn bles im plenty. So wi si how di Laad lov wi bad; him haat ongl saaf tuwaadz wi weh wiet pahn im.

James 5:11 Iomraidhean Croise

Matthew 10:22

Ahn evrybady gwain hiet unu sieka unu chros ahn fala mii. Bot enywan a unu weh kiip ihn fiet tu di en, gwain get siev.

Luke 1:50

ahn ihn kainis dah fi evry jinarieshan weh rispek im.

Luke 11:10

Bikaaz evrybady weh aks, gwain get; dem weh luk, gwain fain weh dehn deh luk fah; ahn dem weh nak pan di duo, ih gwain uopm fi dem.

Luke 6:36

Gat morsy, jos laik unu Faada gat morsy!”

Romans 2:4

Or, unu tink seh God kainis tu unu no miin notn ataal? Nuo man! God gat pieshens wid unu ahn ihn put'op wid unu fi wan lang taim, ongl bikaaz ihn deh trai fi get unu fi ton fahn unu sin dem!

Ephesians 1:6

So, mek wi priez fi wi God fi dis frii gif weh ihn wehn gi wi chruu ihn preshos Son!

Ephesians 2:4

Bot, bikaaz God wehn ful'op a morsy ahn ihn lov wi so moch,

Hebrews 10:39

Bot, bredrin, wii dah no pipl weh deh ton bak ahn den get distrai. Wii dah di Laad pipl weh deh chros God, so him gwain siev wi fi chruut!

Hebrews 3:14

Bikaaz, if wi fietful tu di en, ahn chros God jos laik how wi wehn chros im strang fahn di biginin, wi gwain gat wi shier iina aal weh dah fi Christ!

Hebrews 3:6

Bot Christ, az God Son, wehn inchaaj a God hous ihself! Ahn wii dah God hous if wi kiip'op wi korij ahn gat kanfidens iina di huop weh wi gat iina Christ Jesus.

James 1:12

Memba seh: di biliiva weh go chruu plenty troblz bitout gi'op, him dah di wan weh gwain bii hapy; bikaaz di kroun weh demde kain a pipl gwain get, dah laif weh neva gwain don nontaim ataal. Ahn dat dah di praiz weh God wehn pramis evrybady weh lov im.

James 1:2

Bredrin, unu fi fiil glad enytaim unu ron iina eny kain a troblz ahn haad taim,

1 Peter 1:13

So den, bredrin, get unu main redy fi akshan ahn kiip unuself aanda kanchruol aal taim. Set unu huop pahn dah speshal gries weh unu gwain get wen Christ kom bak.

1 Peter 3:14

Bot iivn if unu sofa wen unu deh du gud, unu hapy, bikaaz God gwain bles unu far ih! So den, no fried fi nonbady; nar unu fi dedeh deh wory bout weh dehn maita du tu unu.

2 Peter 2:9

So unu si, di Laad nuo how fi siev fi him pipl dem fahn di haad taim dem weh dehn deh go chruu. Ahn ihn nuo how ihn gwain ponish pahn di Die a Jojment aala demya pipl weh deh liv slak laif tu. Iivn now, God jojment deh heng uova dehn hed!