James 1:27 - The New Testament in Islander Creole

²⁷ Memba, di kain a rilijan weh God luk pan az kliin ahn porfek dah laik dis: ih luk afta dehn pikniny weh no gat non muma nar pupa, ahn di uman dem weh dehn hozban ded. Ahn dat kain a rilijan wi kiip wi frii fahn get doty fahn di worl tu.

James 1:27 Iomraidhean Croise

Matthew 12:32

Ahn enybady weh seh bad tingz gens di Son a Man kyan get paadn, bot enybady weh seh bad tingz gens di Holy Spirit ahn spail ihn niem, no gwain get paadn ataal, niida now nar nontaim.

Matthew 5:8

Dem weh dehn haat kliin, bles; bikaaz dehn gwain si God.

Luke 1:6

God si seh di two a dem wehn raichos, bikaaz evry die dehn du aal weh ihn tel dem fi du iina ihn Laa.

Romans 12:2

Unu no fi liv laik demde pipl iina disya worl. No du weh dehn du nontaim. Insida dat, unu fi mek God chienj di wie unu tink, so dat evryting weh unu du, kyan chienj tu. Den, dat gwain mek unu nuo weh God waahn, weh gud ahn weh gwain pliiz im. Ahn unu gwain nuo egzakly how unu shuda liv.

Romans 2:13

Jos bikaaz som pipl get fi hier weh di Laa seh, dat no mek dem rait wid God. Bot dem weh du weh di Laa seh, dah dem weh stan rait iina God sait.

Galatians 1:4

Dah him weh wehn gi wi ihn laif fi pie fi wi sin dem, jos laik weh God wi Faada wehn waahn him fi du. Ihn du dat fi ihn kuda frii wi fahn di wikidnis a disya worl.

Galatians 3:11

Now, ih klier fi si seh nonbady kyaahn get rait wid God jos bikaaz dehn trai fi kiip di Laa, bikaaz ih rait iina di Skriptyo tu seh, “Di porsn weh rait wid God, dah di wan weh gat fiet iina him.”

Galatians 5:6

Bikaaz, wen wi dah wan wid Jesus Christ, ih no mata if wi sorkomsaiz or no sorkomsaiz. Weh riily impuotant dah wi fiet iina Christ, ahn dah dat fiet weh mek wi gat lov.

Galatians 6:14

Bot, az faar az Ai kansaan, Ah huop seh Ah neva buos bout enyting eksep weh fi wi Laad Jesus Christ du pahn di kraas. Ahn sieka dat kraas, dis worl no miin notn tu mii ataal, ahn Ai no miin notn tu dis worl niida!

Ephesians 2:2

Demde taim, unu yuuztu fala di bad wie a disya worl. Unu wuda lisn tu wat di Wikid Wan tel unu fi du. Dah him weh ruul uova aala di spirit dem iina di skai, ahn now ihn kanchruol aala demya pipl weh no lisn tu God.

1 Timothy 1:5

Insida dat, unu fi tiich di biliiva dem how dehn kyan get riil lov fi wan anada. Ahn datde lov kom fahn wan kliin haat, wan klier kanshans, ahn wan chruu fiet.

1 Timothy 5:4

Bot, if wan wido gat pikniny or granpikniny, dah dem fi tek kier a im di wie God waahn dem fi du. Ahn iina dah wie, demya pikniny gwain pie bak som a weh dehn huo tu dehn muma ahn pupa, or dehn granmada ahn granfaada. Ahn wen dehn du dat, dehn gwain mek God hapy wid dem.

Titus 2:12

Dat gries tiich wi seh: wi fi stap deh liv laik if non God no deh, ahn wi fi gi'op di plezha dem fahn di worl weh sinful. Ahn, wii fi liv wi laif deh kanchruol wiself —wan laif weh diisent ahn aanes —wan laif weh gwain pliiz God!

James 3:17

Bot di fos ting bout di pipl dem weh gat di wizdom weh kom fahn God, dah dem liv wan uova kliin laif. Dehn lov piis ahn dehn kansidariet; dehn nuo dehn plies ahn dehn ful a morsy ahn dehn du kain tingz fi di pipl dem. Dehn triit evrybady di siem wie, ahn dehn neva two-fies!

James 3:9

Lisn, wii deh yuuz wi tong fi priez fi wi Laad ahn Faada, ahn den aftawod, wi ton roun ahn yuuz dah siem tong fi kos di pipl dem weh God don mek laik ihn uonself!

James 4:4

Main, unu wotlis pipl weh no fietful tu di Laad, unu no nuo seh, wen unu deh ton fren wid di worl unu kyaahn bii God fren no muo? So enybady weh mek'op dehn main fi jain wid di worl ahn du fi dehn wikidnis, dah porsn mek demself wan a God enimy!

2 Peter 1:4

Iina dis wie, ihn don gi wi aala ihn rich ahn wandaful gif dem weh ihn wehn pramis wi. Ahn demya gif gwain help unu fi eskiep fahn aal di koropshan a disa worl —aal demya wikid ting roun wi weh di hyuuman haat waahn. Ahn so, wid God gif dem unu kyan kom fi bii muo ahn muo laik di Laad imself evry die.

2 Peter 2:20

Bot, if som pipl kom fi nuo bout fi wi Laad ahn Sievya Jesus Christ, ahn so eskiep fahn dehn wikid wie weh deh distrai pipl iina disa worl, ahn den aftawod ton bak ahn go liv dah kain a bad laif agen, den dehn laif gwain ton muo wosa an how ih wehn yuuztu bii at fos!

2 Peter 3:14

Ahn so unu, weh dah mi gud fren dem, wail unu deh wiet fi Dat Die, du unu bes fi mek di Laad fain unu deh liv kliin, so nonbady kyaahn paint dehn finga pahn unu ahn so unu deh iina piis wid God.

1 John 5:18

Wi nuo seh, dehn pipl weh dah God pikniny dehn no mek'ih wan habit fi sin, bikaaz di Son a God kiip dem sief ahn di Wikid Wan kyaahn toch dem ataal.