James 1:12 - The New Testament in Islander Creole

¹² Memba seh: di biliiva weh go chruu plenty troblz bitout gi'op, him dah di wan weh gwain bii hapy; bikaaz di kroun weh demde kain a pipl gwain get, dah laif weh neva gwain don nontaim ataal. Ahn dat dah di praiz weh God wehn pramis evrybady weh lov im.

James 1:12 Iomraidhean Croise

Matthew 10:22

Ahn evrybady gwain hiet unu sieka unu chros ahn fala mii. Bot enywan a unu weh kiip ihn fiet tu di en, gwain get siev.

Matthew 25:34

Den di king gwain seh tu dem pahn di rait, ‘Kom, unu weh mi Faada wehn bles; kom get di Kingdom weh di Laad pripier fi unu fahn wen ihn fos mek di worl.

Luke 6:22

“Ahn unu gwain get bles wen dehn hiet unu, ahn rijek unu, ahn insolt unu, ahn dehn seh unu uova bad jos sieka unu chros iina di Son a Man.

Romans 5:4

Ahn, wen wi wilin fi bier enyting weh kom, dat gwain mek wi get muo stranga iinsaid. Ahn sieka weh wi get muo stranga iinsaid, dat gwain gi wi muo huop fi weh God gat fi wi.

Romans 8:28

So, wi nuo seh fi demde pipl weh lov God, him mek evryting work fi dehn uon gud; ihn du dat fi demde pipl weh him don pik fi du weh ihn plan.

1 Corinthians 2:9

Bot jos laik how di Skriptyo gat'ih rait dong ahn seh: “Nonbady neva si, ahn nonbady neva hier, ahn nonbady neva yet imajin, aal weh God gat plan fi demde pipl weh lov him.”

1 Corinthians 8:3

Bot, if dah man lov God, den God gwain nuo dah porsn fi chruut.

1 Corinthians 9:25

Evrybady weh deh ron iina di ries gwain du aal weh dehn kyan du fi mek dehn bady fit, so dehn kyan ron muo beta. Dehn du aala dat fi get wan kroun outa liif —weh no gwain laas lang. Bot, wii gwain get wan kroun weh gwain laas fareva!

2 Timothy 2:15

Ahn du aal weh yu kyan fi mek God satisfai wid yu, laik wan workman weh no gat notn fi bii shiem fah; ahn weh tiich di pipl dem di chruu Wod a God iina di rait wie, jos laik yu shuda tiich'ih.

2 Timothy 4:8

Ahn now, di kroun weh yu get wen yu liv rait, deh wiet fi mi. Dat dah weh di Laad weh dah di Raichos Joj, gwain gi mi pahn Dat Die wen him kom bak. Ahn dah kroun deh, dah no ongl fi mii, bot dah fi evrybady huu deh lang wid aal dem haat, fi mek him kom bak!

Hebrews 10:32

Ahn unu no fi farget demde haad taim weh unu gaan chruu wen unu wehn fos get fi andastan di Gud Nyuuz bout Jesus. Memba how unu wehn stie fietful, iivn duo ih wehn miin seh unu wehn gwain sofa som teribl ting?

Hebrews 11:17

Ahn, dah wehn bikaaz a Abraham fiet, mek ihn wehn wilin fi aafa op ihn ongl son, Isaac, laik wan sakrifais tu God, wen God wehn tes'im out, iivn duo Isaac dah wehn di son weh God wehn pramis im.

Hebrews 12:5

Ah aks unu: Unu don farget weh God wehn seh tu unu aredy, wen him wehn taak tu unu laik fi him uon pikniny dem, fi inkorij unu? Yees, dah him weh seh; “Mi son, no tek'ih lait wen di Laad ponish yo, ahn no get diskorij wen ihn kaal yo atenshan.

Hebrews 6:15

Ahn so, afta Abraham wiet ahn chros God fi wan lang-lang taim, ihn get weh God wehn pramis im!

James 2:5

Hier dis, bredrin: God don pik demde pipl weh ada pipl luk pan az puor, fi bii rich iina fiet! Ahn ihn wehn pramis demde pipl weh lov im, wan plies iina fi him Kingdom.

James 5:11

Wii kaal demde pipl hapy ahn bles, bikaaz dehn gaan chruu plenty trobl ahn neva gi'op. Ahn Ah shuor seh unu wehn hier bout Job tu, how ihn huol aan aal chruu fi him troblz ahn neva gi'op nontaim. Si weh God du far im pahn di en? Ihn bles im plenty. So wi si how di Laad lov wi bad; him haat ongl saaf tuwaadz wi weh wiet pahn im.

1 Peter 3:14

Bot iivn if unu sofa wen unu deh du gud, unu hapy, bikaaz God gwain bles unu far ih! So den, no fried fi nonbady; nar unu fi dedeh deh wory bout weh dehn maita du tu unu.

1 Peter 4:13

Insida dat, unu fi glad seh, unu deh get di chaans fi shier iina Christ sofarin, bikaaz aftawod unu gwain get di jai fi shier iina ihn gluory tu, wen di taim kom fi dehn shuo ih tu di pipl a disya worl.

1 Peter 4:14

So den, kount'ih wan blesin wen dehn insolt unu bikaaz unu dah wan biliiva iina Christ. Dis shuo seh God Spirit deh wid unu!

1 Peter 5:10

Bot, afta unu don sofa fi wan likl wail, di God a Gries —weh kaal unu fi bii wan wid Christ Jesus fi shier ihn gluory weh gwain laas fareva— him gwain mek unu bii aal weh unu supuoz fi bii. Ahn ihn gwain mek unu strang, ahn ihn gwain help unu so unu no gwain shieky iina unu fiet.

1 Peter 5:4

so dat wen di Chiif Shepad kom bak, unu gwain get wan kroun a gluory weh gwain neva fied-weh.

1 John 4:19

Ahn di riizn wai wi lov dah bikaaz God wehn lov wii fos.

Revelation 2:10

Unu no fried fi weh unu gwain sofa. Di devl gwain put som a unu iina jiel fi trai unu out, fi si if unu riily chros God, fi chruut. Fi ten diez unu gwain sofa plenty. Bot unu no fi stap chros iina mi, iivn if ih ker unu tu unu det; ahn den, Ah gwain gi unu di kroun a laif!

Revelation 3:19

Di pipl dem weh Ai lov, demde dah di wan weh Ai deh kaal dehn atenshan ahn den karek dem. So den, wid aala unu haat unu fi du weh rait ahn ton fahn unu sin dem.

Revelation 3:21

Ahn demde pipl weh stil yet stan strang afta Satan don trai dem, Ah gwain gi dem di rait fi sidong fi ruul wid mi pahn mi chruon —jos laik how Ah don win di viktry, ahn aftawod kom ahn sidong wid mi Faada pahn fi him chruon.