2 Peter 2:1 - The New Testament in Islander Creole

¹ Bot, jos laik how dehn wehn yuuztu gat dehn faals prafit iina Israel lan, dah di siem wie unu gwain gat faals tiicha mongs unu tu. Ahn dehn gwain kom wid som faals tiichin weh gwain mek demde pipl, weh hier ahn biliiv'ih, mash'op dehn fiet! Demya kain a tiicha gwain ton dehn bak pahn Christ, dehn Maasta, weh wehn set dem frii fahn di powa a sin. Ahn so, dehn gwain bring kwik distrokshan pahn dem uonself!

2 Peter 2:1 Iomraidhean Croise

Matthew 10:33

Bot di wan weh seh ihn no nuo mi fronta ada pipl, Ai gwain seh Ah no nuo im niida fronta mi Faada iina hevn.

Matthew 24:11

Ahn plenty faals prafit gwain kom ahn fuul'op plenty pipl.

Matthew 24:24

Bikaaz plenty faals Christ ahn faals prafit gwain kom op. Ahn dehn gwain trai trik di pipl dem deh shuo dem som uova big mirakl ahn wandaz tu. Dehn gwain iivn trai trik di pipl weh God don chuuz, if dehn kyan fuul dem tu.

Matthew 24:5

bikaaz plenty pipl gwain kom deh yuuz mai niem deh seh, ‘Ai dah di Mesaya!’ Ahn dehn gwain fuul'op plenty a unu.

Matthew 7:15

“Luk out fi di faals prafit dem weh kom tu yo deh luk gud dres op, bot iina dehn haat dehn jos laik wan kraas wulf.

Mark 13:22

Bikaaz plenty faals Christ ahn faals prafit gwain kom op. Ahn dehn gwain trai trik di pipl deh shuo dem som big mirakl ahn wandaz tu. Dehn gwain iivn trai trik di pipl weh God don chuuz, if dehn kyan fuul dem tu.

Luke 12:9

Bot di wan weh seh ihn no nuo mi fronta ada pipl, Ai gwain seh Ah no nuo im niida fronta God ienjel dem tu.

Luke 21:8

Ahn Jesus seh, “Unu wach out ahn no mek nonbady fuul unu op; bikaaz plenty pipl gwain kom deh yuuz mai niem deh seh, ‘Ai dah di Mesaya!’ ahn ‘Di taim deh nier!’ Unu no fi fala dem.

Luke 6:26

Ahn trobl gwain kom pan unu wen evrybady taak gud bout unu; far, dat dah how dehn ansesta dem wehn triit di uol taim faals prafit dem.

Romans 16:18

Demya pipl weh du demde kain a tingz, no deh du di Laad Jesus Christ work. Dehn deh work fi satisfai fi dehn uonself. Dehn gat swiit mout ahn dehn taak prity fi kanfyuuz'op di main a di pipl dem weh no nuo seh dehn deh du bad.

1 Corinthians 11:19

Ah nuo tu seh unu gwain gat divizhan mongs unu, bikaaz dat dah how unu gwain nuo huu dah di wan dem weh dah di chruu biliiva ahn huu no.

1 Corinthians 6:20

Ahn God don pie wan hai prais fi unu aredy. So den, unu shuda ana God wid unu bady evry die.

1 Corinthians 7:23

Memba seh: God don pie wan dier prais fi unu aredy, so no go bii sliev fi nonbady els!

Galatians 2:4

Bot lietaraan dehn wehn gat som neks man, weh wende priten fi bii Kristyan ahn weh wehn sniik iina fi wi gruup, so dehn kuda spai pahn wi, fi si weh kain a friinis wii gat sieka wi biliiv iina Jesus Christ. Dehn wehn waahn wi stie sliev tu aala demya ruul ahn regyulieshan fahn di Jewish Laa tu.

Galatians 3:13

Bot, Jesus Christ frii wi fahn di kandemnieshan weh di Laa kom wid. Sieka weh Jesus heng pahn di kraas, him tek aan di ponishment fi aala wi sin dem pan ihnself. Az di Skriptyo seh, “Enybady weh heng pahn wan trii, deh aanda wan kandemnieshan.”

Galatians 4:17

Unu main! Demde pipl, weh deh trai chienj di Gud Nyuuz, dehn riily waahn win unu uova tu fi dem said! Bot weh dehn waahn du, no gud fi unu. Aal dehn waahn du dah kiip unu weh fahn wii, so dehn kuda get aala unu tu demself!

Galatians 5:20

dehn waaship di aidal dem ahn dehn du uobya tu. Dehn ton enimy wid wan anada, dehn kyaahn grii wid nonbady; dehn jalas afta wan anada, dehn get beks, ahn dehn selfish bitwiin demself. Den, dehn split'op iina fi dehn uon likl gruup dem, ahn aala dem gruup deh gens wan anada.

Ephesians 1:7

Dah bai di blod a Jesus Christ wi get fi bii frii ahn God don paadn aala wi sin dem. Bredrin, God gries riily griet!

Ephesians 4:14

Den, iina dah taim deh, wi no gwain bii laik likl pikniny no muo, weh iizy fi chienj weh dehn biliiv az kwik az dehn hier enyting weh nyuu. Dehn dah laik wan likl buot weh di wiev dem kyan fling bout, wen di strang briiz kiip aan deh chienj ahn bluo di buot dis wie ahn dah neks wie. Demde pipl weh deh trai fi fuul wi op wid dehn rang tiichin, dah jos laik demde win. Dehn liid som biliiva astrie wid dehn triky tiichin dem, weh dehn mek'op dehn uonself!

Philippians 3:19

Ahn demde kain a pipl deh hed striet fi hel! Dehn ongl tink pahn wat dehn kyan put iina dehn bely, ahn dehn proud a dehn shiemful, doty wiez. Ahn aal weh deh pahn dehn main dah di tingz dem weh deh iina disya worl.

Colossians 2:18

So, wen di pipl dehn go tu unu deh seh dehn nuo muo beta an unu bikaaz dehn kuda si vizhan ahn dehn waaship di ienjel dem, no mek dehn fuul unu op! Demde kain a pipl ongl go aan laik dehn ombl, bot dat dah no so! Dehn ful'op a dehn uon selfish hyuuman wiez!

Colossians 2:8

So den, no mek nonbady fuul unu op wid dehn aagyoment weh no gat non sens ahn no wot notn ataal. Dehn maita soun waiz, bot dehn dah faals tiicha weh ongl han dong demde tingz fahn hyuuman bi'in ahn fahn di faals spirit dem, weh ruul uova disya worl. Dehn no kom fahn Christ!

1 Timothy 5:8

Evrybady fi tek kier a dehn uon relativ dem —speshaly demya pipl weh deh iina dehn uon famaly. Bot, if dehn no du dat, den demya pipl weh seh dehn biliiv iina God, no miin notn ataal. Dehn wosa an dem weh no chros iina Christ iina di fos plies!

2 Timothy 4:3

Bikaaz di taim deh kom, wen di pipl dem no gwain waahn hier gud, soun tiichin. Insida dat, demde pipl gwain go afta weh dehn waahn. Ahn so, dehn gwain bring iin plenty pipl weh gwain tiich dem weh fi dehn uon iez deh iich dem fi hier.

Titus 1:11

Sombady hafy stap dem man! Bikaaz aal dehn deh du dah fuul'op wan paila famaly, deh tiich demde kain a tingz weh dah no chruut. Main, aal dehn waahn, dah yo mony!

Titus 3:10

So, kansaanin demde kain a pipl weh laik mek trobl ahn kaaz divizhan, waan dem at liis wan or two taim; ahn afta dat, no gat notn muo fi du wid dem.

Hebrews 10:29

Wel den, unu tink dah ho moch muo wosa di ponishment gwain bii fi demde pipl weh stamp'op pahn di Son a God ahn triit ihn blod bad —dah siem blod weh ihn shed az paat a di pramis— laik if dah somting chiip! Pipl weh du dat, riily insolt di Holy Spirit weh bring God morsy!

1 Peter 1:8

Alduo unu neva si Jesus Christ yet, unu stil yet lov him, ahn alduo unu no deh si'im now niida, unu chros iina him. So, unu no gat di wod dem fi eksplien di griet jai weh unu fiil iina unu haat.

2 Peter 2:3

Ahn sieka weh dehn so griidy, dehn faals tiicha dem gwain tel unu plenty stuory weh dehn mek'op. Bot dehn jojment deh heng rait uova dehn hed, bikaaz God neva deh sliip, ahn ihn sii aal weh dehn deh du fahn lang-lang taim!

1 John 2:26

Ah hafy rait demya tingz tu unu bout dehn pipl weh deh trai fi fuul unu op.

1 John 4:1

Mi dier fren dem, unu no fi chros evrybady weh seh, dah God Spirit deh taak chruu dem. Bot unu fi tes out di spirit dem fos, fi si if dehn dah fahn God fi chruut, bikaaz wan paila faals prafit deh iina di worl.

Jude 1:18

“Wen di laas diez kom, plenty pipl weh deh gens God ahn deh fala dehn uon wikid wiez, gwain apier'op!”

Jude 1:4

Ah seh dis bikaaz Ah hier seh som pipl, weh deh gens God, don sniik iin mongs unu ahn chienj di mesij a God gries! Dehn deh seh how unu kuda liv slak laif, bikaaz God don paadn aala wi sin aredy! Demde kain a pipl iivn seh wi no hafy obie Jesus Christ az fi wi Maasta ahn Laad! Bot, fahn lang taim abak di Skriptyo wehn seh God gwain joj demde kain a pipl ahn ponish dem!

Revelation 13:14

Ahn sieka demya mirakl weh di sekant biis, weh wehn gat di powa fi du fronta di fos biis, ihn fuul'op aal di pipl dem pahn di ort. Ahn dah sekant biis aada dem fi mek wan statyo fi shuo ana tu di fos biis —weh wehn kot bad wid wan suod, bot ihn alaiv stil.

Revelation 2:13

Ihn seh: Ai nuo weh unu liv. Unu deh, weh Satan gat ihn chruon. Bot Ai nuo tu seh unu kiip aan deh fala mi fi chruu. Unu neva wehn stap chros iina mi, iivn wen Antipas —weh dah wehn mi fietful wiknis— get kil sieka mi iina yo sity weh paat Satan liv. Ahn iivn wen dat hapm, unu neva gi'op ahn stap chros iina mi!

Revelation 2:9

Ah nuo unu work; Ah nuo how unu sofa ahn how unu puor —bot unu rich! Ah nuo bout dem weh kaal demself Jew ahn taak bad bout unu. Bot dem dah no non Jew ataal! Dem dah Satan sinigag!

Revelation 3:8

Ai nuo di tingz dem weh unu deh du! Ah don uopm wan duo fi unu ahn nonbady kyaahn shet'ih op. Ah nuo seh unu no gat plenty strent. Stil yet unu wende du weh Ah tel unu fi du, ahn unu neva yet seh unu no nuo mii.

Revelation 5:9

Den, di four kricha dem ahn di twenty-four elda dem sing wan nyuu sang, weh seh: “Yuu dah di Lam weh gat di rait fi tek di skruol, ahn brok uopm di siil dem weh wehn faasn shet. Bikaaz dehn don kil yu, bot wid yo blod yu don bai bak pipl fi God. Demde pipl rait yah kom out fahn aal di difrent traib dem, ahn fahn aal di difrent nieshan dem, ahn fahn aal di difrent langwij dem.

Revelation 6:10

Ahn dehn hala out seh, “Uo Laad, yuu deh uova evrybady ahn evryting! Yu huoly ahn yu chruu! How lang, Laad, wi fi wiet bifuor yu joj di pipl dem weh wehn kil wi? How lang wi fi wiet bifuor yu ponish dem?”