1 Peter 4:7 - The New Testament in Islander Creole

⁷ Bredrin, unu main! Di en a di worl suun kom, so unu hafy get siiryos ahn kanchruol unuself, so dat unu kyan prie gud.

1 Peter 4:7 Iomraidhean Croise

Matthew 24:42

So unu beta kiip unu ai uopm, bikaaz unu no nuo pahn wish die yo Laad deh kom.

Matthew 25:13

Den Jesus seh tu dem, “So, unu beta kiip unu ai uopm, bikaaz unu no nuo wish die nar wish owa Ah deh kom bak.

Luke 21:34

“Unu main, unu no mek unu haat get hevy wid sin, laik di man weh wies ihn laif wid jronkinis, ahn di woriz a dis laif; ahn den, wen unu fain out, Dah Die kech unu aafa gyaad. Ih gwain kom aalava sodn laik wan trap;

Luke 21:36

So unu fi gat op unu gyaad aal di taim, ahn prie seh unu gat di strent fi get-weh fahn aal dem tingz weh gwain hapm, ahn di strent fi stan op fronta di Son a Man bitout fried nar shiem.”

Luke 22:46

Ihn aks dem, “Wai unu deh sliip? Get'op ahn prie fi di devl no temp unu ahn mek unu sin.”

Romans 12:12

Sieka di huop weh unu gat, unu fi bii hapy fi weh God gwain du fi unu. Ahn wen unu deh go chruu troblz, unu fi gat pieshens ahn bier'op aanda dem; ahn unu fi prie aal di taim tu!

1 Corinthians 15:24

Den afta dat, di en gwain kom. Christ gwain win out uova aala demde ruula, ahn spiritwal atarity ahn di powa dem weh deh pahn ort. Ahn afta ihn win out, ihn gwain han uova di Kingdom tu God di Faada!

1 Corinthians 7:29

Unu weh dah mi fren dem, dis dah weh Ah miin: Di taim shaat ahn di Laad suun kom bak. So iivn if unu marid, unu no ongl gat unu main set pahn unu marij, bot pahn di Laad tu, wen ih muo beta fi set'ih ongl pahn di Laad.

Ephesians 6:18

So, prie aal di taim ahn aks God fi help unu; ahn aks ihn Spirit fi help unu prie. Stie pahn unu gyaad aal di taim ahn neva stap deh prie fi aala God pipl dem!

Philippians 4:5

Ahn unu fi mek evrybady si seh unu dah wan jentl set a pipl. Memba seh: di Laad deh nier!

Colossians 4:2

Aala unu fi kiip aan deh prie aal di taim. Ahn wen unu prie, nuotis gud weh unu deh seh tu God, ahn no fi farget fi aafa op unu tanks tu im.

2 Timothy 4:5

Bot yuu, Timothy, yu fi kiip yo hed wid yu aalwiez. No fried fi sofa fi di Laad. Du di work a wan ivanjelis ahn finish di jab weh God wehn gi'yo fi du.

Titus 2:12

Dat gries tiich wi seh: wi fi stap deh liv laik if non God no deh, ahn wi fi gi'op di plezha dem fahn di worl weh sinful. Ahn, wii fi liv wi laif deh kanchruol wiself —wan laif weh diisent ahn aanes —wan laif weh gwain pliiz God!

Hebrews 10:25

Ahn no mek wi mek'ih wan habit fi no miit tugeda, laik weh som a dem du. Insida dat, wi shuda inkorij wan anada muo ahn muo, now dat wi si Dat Die deh kom kluosa!

Hebrews 9:26

Bikaaz, if ihn wehn du dat, den Christ wehn gwain hafy sofa plenty taim fahn di taim wen God don mek di worl! Bot insida dat, now —wen di worl suun taim fi kom tu wan en— Christ kom ongl wan taim, ahn wid dah one sakrifais weh ihn wehn mek, ihn put-weh aala wi sin fareva ahn eva!

1 Peter 1:13

So den, bredrin, get unu main redy fi akshan ahn kiip unuself aanda kanchruol aal taim. Set unu huop pahn dah speshal gries weh unu gwain get wen Christ kom bak.

1 Peter 3:7

Iina di siem wie, unu hozban fi ana unu waif ahn aalwiez triit im wid rispek wail unu liv tugeda. Memba seh: shii dah di wiika wan, bot siem taim shii dah wan iikwal paadna iina di gif a wan nyuu laif weh God wehn gi wi! If unu triit im di rait wie, den unu praya dem no gwain get hinda nontaim.

1 Peter 5:8

Stie pahn unu gyaad tu, ahn wach out! Unu enimy —weh dah di devl— him dah laik wan laiyan weh deh ruor. Him deh waak roun fahn plies tu plies deh si huu ihn kyan iit'op!

Revelation 16:15

Di Laad seh, “Lisn tu mi! Ah gwain kom wen yo no deh espek'ih —jos laik wen wan tiif kom iin pahn yo— ahn dah porsn bles fi chruu weh no deh sliip ahn weh kiip ihn kluoz wid im redy fi wier, so dat ihn no gwain hafy waak roun niekit ahn fiil shiem fronta di pipl dem.”