1 Peter 4:3 - The New Testament in Islander Creole

³ Unu don spen nof taim bak den deh du dehn tingz weh di pipl dem weh non nuo God du. Unu yuuztu spen unu taim deh go dah wail paaty, unu jrink ahn get jronk, unu liv wan slak laif, ahn unu ful a los. Unu yuuztu du di muos disgostin tingz dem, ahn unu yuuztu waaship di aidal dem tu.

1 Peter 4:3 Iomraidhean Croise

Mark 7:22

groj, wikidnis, tel lai fi get somting, ak on'manaly, kiip malis, bring dong sombady repyutieshan, self priez, ahn aal ada kain a fuulishnis weh mek man sin.

Acts 17:30

Fahn lang taim abak til now God talariet wi ignaransy, bot now ihn komaan aala wi fi put-weh wi aidal dem, ahn waaship ongl him wan.

Romans 13:13

Mek wi liv wan kliin laif laik pipl weh deh iina di die-lait. Wi no fi liv wan slak laif ahn sliip roun. Wi no fi bii jronkin man. Wi no fi deh go dah non wail paaty ahn du aala demde kain a wikid tingz niida. Ahn wi no fi fait wid pipl, nar groj weh ada pipl gat.

1 Corinthians 12:2

Unu nuo seh, wen unu neva nuo God yet, di aidal dem —weh kyaahn iivn taak— wende liid unu astrie.

1 Corinthians 6:11

Ahn, som a unu yuuztu bii jos laik demde kain a pipl. Bot now, unu sin dem don get wash weh ahn God wehn set unu asaid fi him uonself. Ahn sieka weh di Laad Jesus Christ ahn God Spirit du fi unu, evryting now deh rait bitwiin unu ahn God.

2 Corinthians 12:21

Yees, Ah fried seh di neks taim wen Ah go tu unu, mai God gwain mek Ah fiil shiem fronta unu; ahn Ah gwain baal fi plenty a unu weh wende liv iina sin, ahn weh no waahn stap sliip roun, ahn weh deh liv slak laif, ahn weh deh los ahn aal dem ada kain a bad livin.

Galatians 5:19

Ih plien fi si weh pipl gwain end'op deh du, wen dehn deh fala dehn uon sinful hyuuman nietyo: demde kain a pipl sliip roun, dehn no gat kliin tinkin, ahn dehn get iina wail livin;

Galatians 5:21

Dehn groj wan anada, dehn jrink lika ahn get jronk, dehn gat plenty wail paaty, ahn dehn du ada uova bad tingz laik demde. Unu nuo seh Ah don waan unu aredy, ahn Ah deh waan unu agen: Demde kain a pipl weh liv dah kain a laif no gwain gat non paat iina God Kingdom ataal!

Ephesians 5:18

Ahn unu no fi jrink so moch wain til unu get jronk, bikaaz if unu du dat, unu ongl gwain du weh di fuul dehn du, ahn mes'op unu laif! Insida dat, unu fi liv ful'op wid di Holy Spirit ihnself!

1 Thessalonians 4:5

Unu no fi bii wan sliev tu unu los, ahn no fi liv laik di pipl dem weh no nuo God.

Titus 3:3

Bikaaz wii yuuztu bii fuulish tu. Wi neva yuuztu obie God, ahn wi neva pie im non main. Wi dah wehn sliev tu evryting weh wi gat di fiilin fi du ahn weh mek wi fiil gud. Wi liv wi laif deh huol malis gens pipl, ahn deh groj weh dehn wehn gat. So, di pipl dem wehn hiet wi, ahn wii wehn hiet dem bak!

1 Peter 1:14

Obie God, bikaaz unu dah fi him pikniny. Ahn no go bak, go liv dehn uol wikid wiez weh unu yuuztu liv —demde taim unu neva nuo no beta.

Jude 1:4

Ah seh dis bikaaz Ah hier seh som pipl, weh deh gens God, don sniik iin mongs unu ahn chienj di mesij a God gries! Dehn deh seh how unu kuda liv slak laif, bikaaz God don paadn aala wi sin aredy! Demde kain a pipl iivn seh wi no hafy obie Jesus Christ az fi wi Maasta ahn Laad! Bot, fahn lang taim abak di Skriptyo wehn seh God gwain joj demde kain a pipl ahn ponish dem!