1 Peter 4:11 - The New Testament in Islander Creole

¹¹ So, if unu gat di gif fi priich; wel, priich God Wod gud. If unu gat di gif fi help ada pipl; wel, du'ih wid aala di strent weh God gi'yo. Unu fi du evryting so dat ih kyan bring ana tu God chruu Jesus Christ weh gat aal di gluory ahn powa iina him fareva ahn eva. Amen!

1 Peter 4:11 Iomraidhean Croise

Matthew 6:13

Ahn kiip wi weh fahn temtieshan, ahn fahn di Bad Wan weh waahn liid wi astrie. [Bikaaz yu dah di ongli'is wan weh gat aal di Kingdom atarity, di powa ahn di gluory fi aal di taim, Amen!]’

John 13:31

Wen ihn gaan, Jesus seh, “Now dah di taim wen di Son a Man get gluorifai, ahn ihn gwain mek aal di pipl dem si God gluory chruu weh ihn gwain du!

Acts 7:38

Ahn Moses dah di siem wan weh wende wid di traib a Israel iina di dezart rait dehso wid di ienjel, weh wehn taak tu im pahn Mount Sinai, ahn wid wi ansesta dem, wen dehn wende get di mesij weh gi laif fi paas aan tu wi.

Romans 11:36

Bikaaz, dah God wehn mek evryting. Dah Him weh dah di Wan weh kiip evryting deh work jos laik how ih shuda work. Ahn evryting egzis sieka him ahn fi him gluory tu. So den, mek aala wi priez fi wi Laad God fareva ahn eva. Amen!

Romans 12:3

Az fi mii, sieka di gries weh God wehn gi mi, Ah deh tel evry wan a unu seh unu no fi get swel-hed ahn tink seh unu dah somting. Insida dat, unu fi bii sensabl wen unu tink bout unuself. Iich wan a unu shuda joj unuself akaadn tu ho moch fiet God gi unu fi chros im.

Romans 3:2

Ah deh tel unu di chruut: dah wan gud ting fi bii wan Jew iina evrywie. Fos ting, God wehn chros wii Jew wid ihn mesij.

1 Corinthians 10:31

Bot Ai ansa seh: “Evryting weh unu du, weda dah iit or jrink, or enyting els, unu fi du evryting iina soch a wie, weh God get di gluory far ih!”

1 Corinthians 12:4

Now, unu gat aal kain a spiritwal gif, bot aala dem kom fahn di siem Spirit a God.

1 Corinthians 3:10

Bai God gries Ai kom fi bii wan waiz maasta bilda. Ai aredy don put dong wan strang foundieshan ahn sombady els deh bil pahn tapa it. Bot evrybady hafy wach out how dehn deh bil pahn ih.

1 Corinthians 6:20

Ahn God don pie wan hai prais fi unu aredy. So den, unu shuda ana God wid unu bady evry die.

2 Corinthians 2:17

Unu si, wi dah no laik plenty pipl weh waahn get rich aafa priich God mesij. Bot wi fi priich God Wod wid di atarity weh Christ gi wi, ahn wid wan kliin haat fronta God, bikaaz dah him sen wi fi du ihn work.

2 Corinthians 9:13

Memba: unu gwain deh bring gluory ahn priez tu God sieka dah gif weh unu gi. Ahn dat pruuv seh unu deh obie di Gud Nyuuz a Jesus Christ.

Ephesians 1:19

No ongl dat, bot Ah prie seh unu andastan how griet ihn powa griet, weh deh work iina wi now a diez. Ahn dis siem powa, weh deh work iina wi,

Ephesians 4:29

Ahn unu no fi seh notn hietful niida, weh no gwain du nonbady non gud. Insida dat, unu fi seh di wod dem weh gwain help ada pipl, so dat weh unu seh gwain kom fi bil dem op akaadn tu weh dehn niid fi hier. Iina dah wie, unu gwain bii wan blesin tu di pipl dem weh deh hier unu!

Ephesians 5:20

Ahn no farget fi seh tanks tu wi Faada God aal di taim fi evryting, iina di niem a di Laad Jesus Christ!

Ephesians 6:10

Now, mek Ah tel unu dis laas ting: Unu fi mek di Laad mek unu muo stranga evry die chruu ihn maity powa!

Philippians 1:11

Ahn Ah prie fi Jesus Christ mek unu kantinyo deh du di rait ting dem, fi unu kyan get aal di gud weh ongl kom fahn him. Dis gwain mek di pipl dem ana God muo ahn muo ahn priez im tu!

Philippians 2:11

Ahn aala dem gwain hafy seh aal bout wid dehn uon mout seh Jesus Christ dah Laad uova aal, fi God di Faada kyan get aala di gluory. Amen!

Colossians 4:6

Wen unu deh taak wid dem, taak tu dem iina wan nais ahn intrestin wie weh gwain mek dem waahn hier muo. Ahn den unu gwain kom fi nuo how fi gi di rait ansa tu evrybady.

1 Thessalonians 2:4

Insida dat, weh wi wende seh dah aalwiez weh God wehn waahn wi seh, bikaaz him wehn si seh ihn kuda wehn chros wi wid fi him Gud Nyuuz. Wi no fi trai pliiz nonbady —ongl God— bikaaz dah him dah di Wan weh nuo ahn tes wi haat.

1 Timothy 1:17

So mek wi ana ahn priez di King fi huu Kingdom dah fareva —di Wan weh wi kyaahn si, ahn weh gwain neva ded. Him dah di ongli'is God fi chruut. So, mek wi gi'im aal di ana ahn priez fareva ahn eva. Amen!

1 Timothy 6:16

Ahn God dah di ongli'is wan weh gwain neva ded. Him liv iina di lait weh nonbady kyan iivn get nier tu. Nonbady wehn eva si'im iina di paas, ahn nonbady kyaahn si'im now. So, mek wi gi'im aal di ana, bikaaz dah him weh gat di powa fi ruul fareva ahn eva. Amen!

Titus 2:1

Bot yuu, Titus, yu fi tiich ongl dehn soun tiichin dem weh no gwain chienj nontaim!

Titus 2:15

So den, Titus, yu fi tiich demya tingz tu di biliiva dem. Ahn wid aal yo atarity yu fi inkorij dem fi du dem. Bot yu fi taak haad tu dem weh no deh du dem, ahn no mek nonbady disrispek yu niida.

Hebrews 13:7

Ahn unu no fi farget unu liida dem weh wehn fos tiich unu God Wod. Memba weh kain a laif dehn wehn liv, ahn trai gat fiet laik dem wehn gat.

Hebrews 5:12

Hier mi now! Di taim don kom wen unu shuda staat tiich ada pipl, bot stil yet unu hafy gat sombady fi tiich unu agen di fos lesn dem weh unu wehn don laan bout fiet! Unu dah laik likl pikniny weh hafy jrink jos milk, bikaaz unu no redy yet fi di haad fuud.

James 1:19

Ahn memba dis tu, bredrin: iich wan a unu shuda hory fi lisn. Bot tek unu taim bifuor unu taak, ahn no hory fi get beks niida.

James 1:26

Bot if unu biliiv seh unu dah gud chorch pipl, ahn stil yet unu kyaahn huol unu tong, unu ongl deh fuul'op unuself, ahn unu rilijan no gud fi notn ataal!

1 Peter 2:12

Unu fi liv iina soch a wie mongs di pipl dem weh no nuo God, dat iivn wen dehn deh akyuuz unu seh, unu deh du di tingz dem weh wikid, demya pipl hafy uon'op ahn seh dah neva chruu. Ahn di gud tingz weh unu du, gwain liid dem fi biliiv ahn gi God ana pahn Dat Die wen ihn kom bak fi joj di worl!

1 Peter 2:5

Ahn unu dah stuon weh livin tu, so mek God yuuz unu fi bil wan spiritwal hous. Unu dah priis weh huoly, so di Laad Jesus gwain help unu fi aafa sakrifais tu God weh ihn gwain aksep.

1 Peter 4:10

Memba seh: God wehn bles evry wan a unu wid wan a ihn speshal gif dem, so unu kyan yuuz ih fi sorv ada pipl.

1 Peter 4:16

Bot, if unu sofa bikaaz unu dah wan chruu Kristyan, unu no hafy shiem den. Insida dat, tank di Laad seh unu sofa fi him siek.

1 Peter 5:11

Memba tu seh: aal powa dah fi wi Laad Jesus Christ fareva ahn eva. Amen!

Jude 1:25

Mek wi gi gluory chruu wi Laad Jesus Christ, tu di Wan ahn ongl God, wi Sievya, weh gat aal di gluory, ahn ana, ahn powa, ahn aal atarity fahn di biginin, now, ahn fareva. Amen!