1 Peter 2:5 - The New Testament in Islander Creole

⁵ Ahn unu dah stuon weh livin tu, so mek God yuuz unu fi bil wan spiritwal hous. Unu dah priis weh huoly, so di Laad Jesus gwain help unu fi aafa sakrifais tu God weh ihn gwain aksep.

1 Peter 2:5 Iomraidhean Croise

Romans 12:1

So den, bredrin, sieka weh God gat so moch morsy pahn wi, Ah deh beg unu fi gi aala unu laif tu him laik wan laiv sakrifais, wan sakrifais weh huoly, ahn wan sakrifais weh gwain pliiz him. Dat dah di chruu wie how wi shuda waaship di Laad.

Romans 15:16

God wehn sen mi fi work laik wan sorvant a Christ Jesus mongs unu weh dah no Jew. Di Laad mek Ah work laik wan priis fi tel unu di Gud Nyuuz weh ihn wehn gi wi, so dat unu Gentile pipl kuda chros iina Christ, ahn bii laik wan sakrifais weh pliiz God. Di Holy Spirit don mek unu haat kliin, ahn mek unu God uon pipl dem tu.

1 Corinthians 3:16

Bredrin, unu no nuo seh unu dah God templ, ahn fi him Holy Spirit deh liv iina unu?

1 Corinthians 3:9

Memba seh: mii ahn Apollos dah paadna weh deh work tugeda fi God. Ahn unu dah God gyaadn, ahn ihn hous weh him deh bil.

1 Corinthians 6:19

Unu no nuo seh unu bady dah di templ weh di Holy Spirit liv iina? Ahn dah God ihnself gi unu ihn Spirit, so unu dah no fi unu uonself no muo. Unu dah fi God!

2 Corinthians 6:16

Eny aidal bizniz fi deh, iina God Templ? No sah, bikaaz dah wii dah God Templ weh liv! Dah laik weh di Laad ihnself wehn seh: “Ai gwain mek mi huom wid mai pipl dem; ahn Ah gwain waak mongs dem. Ah gwain bii dehn God, ahn dehn gwain bii mai pipl.”

Galatians 6:10

So enytaim wi get di chaans, mek wi triit evrybady gud, speshaly demde pipl weh dah fi wi uon Kristyan breda dem.

Philippians 1:11

Ahn Ah prie fi Jesus Christ mek unu kantinyo deh du di rait ting dem, fi unu kyan get aal di gud weh ongl kom fahn him. Dis gwain mek di pipl dem ana God muo ahn muo ahn priez im tu!

Philippians 2:17

Sieka unu fiet, unu deh sofa fi sorv God. Ahn mieby Ai gwain hafy sakrifais mi uon laif pahn tapa aal weh unu deh du fi di Laad. Bot iivn if dat hapm, Ah gwain ongl glad, ahn Ah deh shier dah jai wid aala unu.

Philippians 4:18

Ai don get pie uova ahn uova aredy. Di chruut dah seh, Ai gat muo an nof sieka di gud help weh unu wehn sen wid Epaphroditus. Unu gif dah wehn laik wan sakrifais tu God weh smel gud tu him! Ahn Ah shuor seh di Laad wehn aksep dah sakrifais ahn ihn wehn pliiz wid ih.

Colossians 3:17

So den, bredrin, iina evryting weh unu du or seh, unu fi du'ih iina di niem a di Laad Jesus, wail unu gi tanks tu God di Faada chruu him!

1 Timothy 3:15

Bot if Ah get huol'op, dis leta gwain mek unu nuo di wie how God famaly fi bihiev demself. God famaly dah di chorch weh dah fi di Laad, weh gat laif weh neva gwain don nontaim. Ahn God chorch dah di foundieshan fi di chruut!

Hebrews 3:6

Bot Christ, az God Son, wehn inchaaj a God hous ihself! Ahn wii dah God hous if wi kiip'op wi korij ahn gat kanfidens iina di huop weh wi gat iina Christ Jesus.

1 Peter 2:9

Bot unu dah di speshal pipl dem weh God wehn pik out. Unu dah priis weh dah fi God, di King. Unu dah wan nieshan weh God set wan-said fi ihnself. God bring unu fahn outa daaknis ahn put unu iina fi him wandaful lait. Now unu hafy tel evrybady aal di wandaful tingz weh God wehn du.

1 Peter 4:11

So, if unu gat di gif fi priich; wel, priich God Wod gud. If unu gat di gif fi help ada pipl; wel, du'ih wid aala di strent weh God gi'yo. Unu fi du evryting so dat ih kyan bring ana tu God chruu Jesus Christ weh gat aal di gluory ahn powa iina him fareva ahn eva. Amen!

1 Peter 4:17

Unu pipl: Main, di taim fi jojment deh yah, ahn ih gwain staat fos mongs God uon pipl dem! Ahn if God jojment staat wid wii, unu kyan imajin how teribl ih gwain bii teribl fi demde pipl weh rifyuuz fi biliiv di Gud Nyuuz fahn God! Dah laik weh di Skriptyo seh:

Revelation 1:6

Den, ihn mek wi ruul az king ahn sorv ihn Faada God az priis. So den, mek wi gi'im aal di gluory ahn aal di powa fareva ahn eva. Amen!

Revelation 20:6

So, aal demya pipl weh shier iina di fos rezorekshan, dehn get hapy ahn uova bles, bikaaz di sekant det no gwain gat non powa ataal uova dem. Dehn gwain bii priis fi God ahn fi Christ Jesus tu. Ahn demde pipl gwain ruul wid im fi wan thousand yierz!

Revelation 3:12

Demde pipl weh stil stan strang afta Satan don trai dem, Ah gwain mek dem stan strang jos laik di big puos weh deh iina God Templ. Ahn dehn gwain stie deh fareva. Ah gwain rait di niem a fi mi God ahn di niem a God sity pahn dem. Dis sity dah di Nyuu Jerusalem, weh kom dong outa hevn fahn mai Faada God. Ahn Ah gwain rait mi uon nyuu niem pahn dem tu.

Revelation 5:10

Yuu don mek dem paat a God Kingdom, ahn demde pipl gwain bii priis weh gwain sorv God, ahn dehn gwain ruul iina disya worl.”