1 Peter 1:7 - The New Testament in Islander Creole

⁷ Ahn dehn traiyalz dah fi pruuv seh unu fiet dah di chruu ting. Memba: iivn guol, weh kyaahn laas, dehn tes wid faiya, ahn fi unu fiet wot plenty muo an guol! So unu fiet hafy tes wid faiya, so dat ih kyan laas lang. Den, pahn Dat Die wen Jesus Christ kom bak, unu gwain get priez ahn gluory ahn ana.

1 Peter 1:7 Iomraidhean Croise

Matthew 19:28

Jesus seh tu dem, “Ah deh tel unu di chruut: wen di Son a Man kom sidong pahn ihn gluoryos chruon fi ruul, wen God mek aal tingz nyuu, aala unu weh wehn fala mi gwain sidong pahn twelve chruon fi joj di twelve traib a Israel.

Matthew 25:21

So ihn maasta seh tu im, ‘Gud work man, yuu dah wan gud sorvant weh Ah kyan chros iina! Sins Ah kuda chros yo wid so likl bit a mony, Ah gwain put yo inchaaj a wan big amount now. Kom so selibriet yo maasta hapinis!’

Matthew 25:23

So ihn maasta seh tu im, ‘Gud work man, yo dah wan gud sorvant weh Ah kyan chros iina! Sins Ah kuda chros yo wid so likl bit a mony, Ah gwain put yo inchaaj a wan big amount now. Kom so selibriet yo maasta hapinis!’

Luke 12:33

Sel aal weh unu gat ahn gi di puor dem di mony, ahn unu gwain get mony bag weh no gwain wier out. Put unu richiz iina hevn weh paat ih no gwain don, ahn weh non tiif kyaahn kom nier dem ahn non wud-lais kyaahn distrai niida,

Luke 17:30

Ih gwain bii jos so pan di die wen di Son a Man kom bak.

John 12:26

Enybady weh waahn sorv mii hafy fala mii, so dehn kyan deh di siem plies weh Ah deh tu. Ahn di Faada gwain ana enybady weh sorv mii.

John 5:44

Unu luk fi di priez weh kom fahn pipl, bot unu no luk fi di priez weh kom fahn di Wan ahn ongl God. Das wai unu kyaahn biliiv mi!

Acts 8:20

Bot Peter ansa ahn seh, “Mek yuu ahn yo mony kom tu notn fi deh iivn tink seh yo kuda get dis gif fahn God wid yo mony!

Romans 2:10

Bot aala dehn pipl weh deh du gud, God gwain priez ahn ana aala dem ahn gi iich wan a dem ihn piis. Ihn gwain du'ih fi di Jew dem fos; ahn den, fi dehn pipl weh dah no Jew tu.

Romans 2:29

Nuo sah. Di chruu Jew dah di wan weh God don put ihn maak iina ihn haat. Ahn dah God Spirit huu du dat; no Moses Laa weh rait dong! Wan porsn laik dat gwain get priez fahn God, no fahn non man.

Romans 2:7

Now, fi demde pipl weh kiip aan deh du gud ahn deh luk tu God fi ihn priez ahn ana —fi demde pipl weh waahn laas fareva— dah tu demde kain a pipl, God gwain gi laif weh neva gwain en nontaim.

Romans 8:19

Bikaaz, di huol a God kriyieshan deh wiet ahn deh luk ahed wid iiganis fi di taim wen God gwain shuo huu dah fi him pikniny dem.

1 Corinthians 3:13

Bot, wen Dat Die kom wen God gwain joj aal di pipl dem, evrybady gwain kyan si weh kain a work iich porsn wende du. Pahn Dat Die faiya gwain tes evrybady work, ahn ih gwain shuo jos weh kain a work iich porsn wende du.

1 Corinthians 4:5

So unu no fi joj nonbady bifuor di rait taim kom. Unu fi wiet til di Laad kom. Dah him dah di wan weh gwain bring out dehn tingz weh deh iina di daak now. Ahn den ihn gwain mek evrybady nuo weh deh iina evrybady haat. Dat dah wen God gwain priez evrybady akaadn tu how dehn dizorv fi get priez.

James 1:12

Memba seh: di biliiva weh go chruu plenty troblz bitout gi'op, him dah di wan weh gwain bii hapy; bikaaz di kroun weh demde kain a pipl gwain get, dah laif weh neva gwain don nontaim ataal. Ahn dat dah di praiz weh God wehn pramis evrybady weh lov im.

1 Peter 1:13

So den, bredrin, get unu main redy fi akshan ahn kiip unuself aanda kanchruol aal taim. Set unu huop pahn dah speshal gries weh unu gwain get wen Christ kom bak.

1 Peter 1:5

God gwain protek unu wid ihn griet powa til unu get dis salvieshan, bikaaz unu chros iina him. Ahn dis salvieshan gwain redy fi evrybady pahn dah Laas Die wen taim en.

1 Peter 2:4

So den, kom tu di Laad. Dah him dah di Stuon weh Livin, weh ihn pipl wehn rijek bot weh God don pik, bikaaz Christ wehn uova preshos tu im!

1 Peter 2:7

Yees, him preshos tu aala demde pipl weh chros iina him; bot tu dehn pipl weh no chros, di Skriptyo seh: “Di stuon weh di bilda dem neva tink wehn wot notn, ton out fi bii di muos impuotant wan outa aala dem!”

1 Peter 4:12

Mi dier fren dem, wan neks ting: unu no fi fraitn wen unu deh go chruu dehn traiyalz weh bon unu laik faiya, laik if dah somting strienj deh hapm tu unu.

1 Peter 4:13

Insida dat, unu fi glad seh, unu deh get di chaans fi shier iina Christ sofarin, bikaaz aftawod unu gwain get di jai fi shier iina ihn gluory tu, wen di taim kom fi dehn shuo ih tu di pipl a disya worl.

1 Peter 5:1

Now, Ah deh taak tu di chorch elda dem mongs unu. Mii dah wan elda tu ahn Ah dah wan wiknis ah weh Christ sofa, so Ah gwain shier iina ihn gluory weh ihn gwain shuo wi. Unu chorch eldaz, Ah deh beg aala unu

2 Peter 1:1

Dis leta dah fahn mii, Simon Peter, weh dah wan sorvant ahn wan apasl a Jesus Christ. Ah deh rait dis leta tu aala unu weh shier di siem preshos fiet weh wi gat. Ahn dah fiet wehn kom fahn Jesus Christ, wi God ahn Sievya, bikaaz him dah di Wan weh mek wi kliin iina ihn sait.

2 Peter 1:4

Iina dis wie, ihn don gi wi aala ihn rich ahn wandaful gif dem weh ihn wehn pramis wi. Ahn demya gif gwain help unu fi eskiep fahn aal di koropshan a disa worl —aal demya wikid ting roun wi weh di hyuuman haat waahn. Ahn so, wid God gif dem unu kyan kom fi bii muo ahn muo laik di Laad imself evry die.

2 Peter 3:14

Ahn so unu, weh dah mi gud fren dem, wail unu deh wiet fi Dat Die, du unu bes fi mek di Laad fain unu deh liv kliin, so nonbady kyaahn paint dehn finga pahn unu ahn so unu deh iina piis wid God.

Jude 1:24

Now, mek wi gi fi wi God aal di gluory, bikaaz dah ongl him huu kyan huol wi op, ahn den bring wi tu ihn gluoryos plies bitout non faalt ataal, ahn wid plenty jai.

Revelation 1:7

Ah deh tel unu seh Jesus gwain kom iina di kloud dem, ahn di pipl dem fahn aal di nieshan iina di worl gwain si'im —iivn dem weh straik im iina ihn said wid wan lans! Dehn gwain muon ahn hala fi weh dehn du im. Dah so ih gwain bii. Amen!

Revelation 2:10

Unu no fried fi weh unu gwain sofa. Di devl gwain put som a unu iina jiel fi trai unu out, fi si if unu riily chros God, fi chruut. Fi ten diez unu gwain sofa plenty. Bot unu no fi stap chros iina mi, iivn if ih ker unu tu unu det; ahn den, Ah gwain gi unu di kroun a laif!

Revelation 3:10

Bikaaz unu bier'op ahn stan strang deh du weh Ah tel unu fi du; Ah no gwain mek unu sofa, wen haad taim ahn trobl kom fi trai aal di pipl dem weh deh pahn ort.

Revelation 3:18

So den, Ah deh tel unu seh: Unu fi kom tu mii ahn bai pyuor guol, so dat unu kyan bii rich iina God sait. Ahn Ah deh tel unu seh: unu fi kom ahn bai wait kluoz fi wier, so dat unu no gwain paas shiem bikaaz unu niekit. Ahn kom, kom bai aintment fi put iina unu ai, fi unu kyan si.