1 Peter 1:21 - The New Testament in Islander Creole

²¹ Dah bikaaz a Christ unu kyan chros iina God. Ahn bikaaz God riez'op bak Christ fahn di ded ahn gi'im gluory, unu kyan put unu fiet ahn huop wid kanfidens iina God!

1 Peter 1:21 Iomraidhean Croise

Matthew 28:18

Den Jesus kom op tu ihn falowa dem ahn tel dem, “God gi mi aal di atarity iina hevn ahn pahn ort;

John 12:44

Den Jesus baal out uova haad, “Enybady weh biliiv iina mii no ongl deh biliiv iina mii, bot dehn deh biliiv iina di Wan weh sen mi.

John 14:1

Jesus seh, “No mek unu haat get uova hevy; chros iina God ahn chros iina mii tu.

John 14:6

Jesus ansa ahn seh, “Mii dah di Wie, di Chruut, ahn di Laif; nonbady kyaahn kom tu di Faada eksep chruu mi.

John 17:1

Wen Jesus don seh demde tingz, ihn luk op dah hevn ahn prie seh, “Faada, di taim don kom. Mek di pipl dem si di gluory weh yo Son gat, so ihn kyan shuo dem yo gluory tu;

John 17:24

“Faada, weh Ah waahn dah fi yo mek dem falowa, weh yu don gi mi aredy, deh dah di siem plies weh Ah gwain deh, so dehn kyan si mi gluory. Dah yuu wehn gi mi disa powa, bikaaz yuu wehn lov mi fahn bifuor di worl wehn iivn mek.

John 17:5

Ahn now, Faada, gi mi di siem gluory —aal di ana weh yo wehn gi mi wen Ah wende wid yo— fahn bifuor di worl wehn iivn staat mek.

John 3:34

Bikaaz di Wan weh God sen seh, aala weh God waahn im fi seh, sieka God gi'im ihn Spirit ahn ihn neva huol bak notn ataal.

Acts 2:24

Ihn sofa bad wen ihn ded, bot God neva lef im deh; ihn riez im bak op! Det neva gat non powa uova im agen; ih kudn huol im bak laik wan prizna.

Acts 3:13

Nuo sah, dah di God a Abraham, Isaac ahn Jacob, ahn fi wi ada ansesta dem weh du dis fi bring gluory tu ihn sorvant Jesus. Bot unu wehn waahn him ded; unu ker im ahn disuon him fronta Pilate, di Roman govana, iivn wen Pilate wehn disaid fi let im go.

Acts 3:15

Unu kil di Wan weh gi laif; bot God riez'im op fahn di ded, ahn wii wiself dah wiknis tu dat.

Acts 4:10

den mek aala unu ahn evrybady els mongs fi wi Israel pipl nuo dis: chruu di powa weh deh iina di niem a Jesus fahn Nazareth —huu unu wehn kruusifai, bot God riez'op fahn di ded— dis man rait yahso get kyuor!

Romans 10:9

So, if unu seh wid unu uon mout seh, “Jesus dah di Laad,” ahn if unu chros iina unu haat seh God riez'im op fahn di ded, den God gwain siev unu.

Romans 4:24

Demde wodz wehn rait fi wii tu! Bikaaz, if wi gat fiet iina God weh wehn riez'op Jesus bak fahn di ded, den evryting gwain get rait bitwiin wi ahn God tu!

2 Corinthians 6:15

How Christ ahn Satan kuda eva grii? Dah weh egzakly sombady weh chros iina Christ, ahn sombady weh no biliiv, gat fi du wid wan anada?

Ephesians 1:15

So den, bredrin, dis dah wai, fahn di taim Ah wehn hier bout unu fiet iina di Laad Jesus ahn unu lov fi aala God pipl dem,

Colossians 1:27

God du dis bikaaz ihn wehn waahn unu pipl weh dah no Jew fi andastan disya wandaful ahn griet ahn rich siikrit. Ahn disya siikrit dah Christ liv iina unu —ahn dat gi unu di huop ahn kanfidens seh unu gwain shier iina God gluory tu!

1 Timothy 1:1

Dis leta dah fahn mii, Paul, weh dah wan apasl a Christ Jesus. Dah wehn God, fi wi Sievya, ahn ihn Son, Christ Jesus —di Wan weh wi put wi huop iina— weh pik mi fi bii wan apasl.

1 Timothy 3:16

Dis dah di siikrit bout fi wi fiet, ahn nonbady kyaahn aagyo gens ih: Christ wehn kom iina di worl az wan hyuuman, ahn God Spirit pruuv seh him wehn raichos. Di ienjel dem si'im, ahn di pipl dem wehn taak bout im iina aal di difrent nieshan dem. So dat, iina di worl plenty pipl kom fi chros iina him —di Wan weh God wehn tek op dah hevn.

Hebrews 2:9

Wat wi deh si dah Jesus, weh God wehn mek likl luowa an di ienjel dem fi wan likl wail. Ahn now, ihn gi'im ana ahn gluory jos laik wan king, bikaaz ihn sofa ahn ihn wehn ded fi aala wi! Yees, chruu di gries a God, ihn gaan chruu det fi evrybady iina di worl!

Hebrews 6:1

Bredrin, mek wi gruo'op ahn stap deh laan demde fos tingz agen, weh wi don laan bout Christ aredy! Wii no hafy deh staat aal uova agen deh laan dat pipl hafy ton weh fahn di bad tingz weh dehn du —weh ongl bring det— ahn den laan agen how fi chros iina God. Wii shuda aredy nuo dat!

Hebrews 7:25

So, now ahn fareva, him gwain kyan siev evrybady weh kom tu God chruu im, bikaaz him liv fareva fi pliid wid God fi di pipl dehn siek!

1 Peter 1:11

Dehn wende wanda dah wat di Spirit a Christ —weh deh iina dem— wende taak tu dem bout. Ihn tel dem fahn bifuor ih hapm bout how Christ wuda sofa ahn bout ihn gluory aftawod. Den, dehn wende wanda dah wen aala dis gwain hapm ahn dah huu ih gwain hapm tu.

1 Peter 1:3

Bredrin, mek wi gi tanks tu God, di Faada a wi Laad Jesus Christ, bikaaz dah fi him griet morsy dah wai ihn mek wi kyan baan agen. Ahn siem taim ihn gi wi wan huop weh alaiv, sieka weh Jesus Christ riez'op bak fahn di ded!

1 Peter 3:22

Den, Christ gaan op iina hevn weh paat ihn deh sidong pahn di rait han saida God. Ahn now ihn deh ruul uova aal di ienjel, ahn di atarity, ahn di powa dem —aala dem hafy du weh ihn seh dehn fi du!