Efesios 1:18 - Jiñi Tsiji' bʌ Wen T'añ cha'añ Estudio

¹⁸ la' i yʌq'ueñet la' ch'ʌmben isujm chuqui woli la' pijtan, come jiñi cha'añ tsi' pʌyʌyetla cha'añ mi la' cʌn jiñi uts'at tac bʌ mu' bʌ caj i yʌq'ueñ i cha'año' bʌ,

Chol de Tumbalá Bible

¹⁸ La' i yʌq'ueñet la' ch'ʌmben isujm chuqui woli la' pijtan, come jini cha'an tsi' pʌyʌyetla cha'an mi la' cʌn jini uts'at tac bʌ mu' bʌ caj i yʌq'uen i cha'año' bʌ.

Jiñi Tsiji' bʌ Wen T'añ cha'añ Estudio

¹⁸ la' i yʌq'ueñet la' ch'ʌmben isujm chuqui woli la' pijtan, come jiñi cha'añ tsi' pʌyʌyetla cha'añ mi la' cʌn jiñi uts'at tac bʌ mu' bʌ caj i yʌq'ueñ i cha'año' bʌ,

Chol Tila

¹⁸ Mij c'ajtiben Dios cha'an mi yʌq'ueñetla la' wen ña'tyan chʌ bʌ yes chʌncol bʌ i pijtyañob jini tsa' bʌ pʌjyiyob cha'an i ch'ujbiñob Dios. Yic'ot cha'an mi la' ña'tyan yoque ñuc, yoque c'otyajax jini mu' bʌ i yʌq'uen Dios jini i cha'año' bʌ ya' ti panchan yic'ot.

Chol: I T’an Dios

¹⁸ La' i yʌq'ueñet la' ch'ʌmben isujm chuqui woli la' pijtan, come jini cha'an tsi' pʌyʌyetla cha'an mi la' cʌn jini uts'at tac bʌ mu' bʌ caj i yʌq'uen i cha'año' bʌ.

Efesios 1:18 Iomraidhean Croise

Mateo 13:15

Come jiñi wiñicob x'ixicob tsa' ochiyob ti tonto i pusic'al. Mach yomic i chʌn u'biñob t'añ, tsi' muts'uyob i wut ame i q'uelob ti' wut, tsi' mʌcʌyob i chiquin ame i yu'biñob ti' chiquin, ame i ch'ʌmbeñob isujm ti' pusic'al, ame i cha' sutq'uiñob i bʌ cha'añ mij c'oq'uesañob”, che'en Jesús.

Marcos 10:17

Che' bʌ tsa' loq'ui majlel ti bij, tsa' tili wiñic ti ajñel. Tsa' ñocle ba'añ Jesús. Tsi' c'ajtibe: —Wen bʌ Maestro, ¿chuqui yom mic mel cha'añ mic taj j cuxtʌlel mach bʌ añic mi' jilel? —Che'en.

Lucas 24:45

Ti jim bʌ ora tsi' jambeyob i ña'tʌbal cha'añ mi' ch'ʌmbeñob isujm i Ts'ijbujel Dios.

Hechos 16:14

Ya'añ juntiquil x'ixic i c'aba' Lidia, ch'oyol bʌ ti Tiatira, jiñʌch mu' bʌ i chon chʌccojan bʌ pisil. Lidia tsi' bʌc'ña Dios, che' bʌ tsi' ñʌch'tʌbe i cʌntesa Pablo. Lac Yum tsi' jambe i pusic'al cha'añ mi' jac'ben i t'añ.

Hechos 26:18

cha'añ ma' cambeñob i wut, cha'añ mi' sutq'uiñob i bʌ jiñi año' bʌ ti ic'yoch'an bʌ pañimil, cha'añ mi' yajñelob ti' sʌclel pañimil; mic choquet majlel cha'añ mi' loq'uelob ti' p'ʌtʌlel Satanás, cha'añ mi' yochelob ti' p'ʌtʌlel Dios; cha'añ mi' ñusʌbentelob i mul che' mi' ñopoñob, cha'añ i tem cha'añob jach jiñi mu' bʌ caj i yʌq'ueñtelob yic'ot jiñi sʌc-esʌbilo' bʌ”.

Romanos 11:29

Dios ma'añic mi' q'uextan i pusic'al che' mi' yʌq'ueñonla lac majtañ, yic'ot ma'añic mi' q'uextan i pusic'al che' mi' pʌyonla.

Romanos 2:4

¿Mach ba añic ma' ña'tan woli a ñusʌben i yutslel i pusic'al Dios, che' jal woli i cuchbeñet a mul? ¿Mach ba a wujilic cha'añ ti' yutslel i pusic'al Dios woli pʌyet majlel cha'añ ma' cʌy a mul?

2 Corintios 4:4

Satanás, jiñʌch i dios jiñi jontolo' bʌ ti pañimil, tsa'ix i mʌcbeyob i ña'tʌbal jiñi mach bʌ añic mi' ñopob Cristo, ame i q'uelob i sʌclel jiñi wen t'añ ba' tsiquil i ñuclel Cristo i yejtal bʌ Dios.

2 Corintios 4:6

Come Dios tsa' bʌ i yʌc'ʌ mandar cha'añ mi' tsictiyel i sʌclel pañimil ti ic'ch'ipan bʌ, jiñʌch i sʌclel tsa' bʌ i yʌc'ʌ ti tsictiyel ti lac pusic'al cha'añ mi lac ch'ʌmben isujm woli' pʌsbeñonla i ñuclel Dios ti Jesucristo.

Gálatas 5:5

Joñonla tsa' bʌ lac ñopo Dios woli lac pijtan laj coltʌntel ti' p'ʌtʌlel jiñi Espíritu cha'añ mi laj q'uejlel ti toj,

Efesios 1:11

Tsi' yajcayonla ti Cristo che' bajche' tsi' wʌn ña'ta i mel, cha'añ mi yʌq'ueñonla pejtelel tsa' bʌ i wʌn alʌ come Dios mi' mel che' bajche' yom i pusic'al,

Efesios 1:7

Tsi' mʌñʌyonla ti' ch'ich'el Cristo, tsi' ñusʌbeyonla lac mul come oñ i yutslel i pusic'al,

Efesios 2:12

Ti yam bʌ ora ma'añic Cristo la' wic'ot, mach la' pi'ʌlobic jiñi israelob, mach la' cha'añic jiñi xuc'ul bʌ t'añ albil bʌ i cha'añ Dios, ma'añic la' pijtaya, ma'añic la' Dios wʌ' ti pañimil.

Efesios 3:16

mij c'ajtiben Dios, cha'añ mi yʌq'ueñetla jiñi ñumen ñuc bʌ i ñuclel lac Yum, yic'ot cha'añ mi' p'ʌt-esʌbeñetla la' pusic'al yic'ot jiñi Espíritu,

Efesios 3:8

Anquese joñon mach ñucoñic che' bajche' yaño' bʌ i cha'año' bʌ Dios, pero tsa' aq'uentiyon que'tel ti' yutslel Cristo cha'añ mic su'beñob gentilob jiñi wen t'añ, cha'añ mi' cʌmbeñob i ñuclel Cristo maxto bʌ laj cʌmbilic lac cha'añ,

Efesios 4:1

Joñon xñujp'elon cha'añ lac Yum, ti wocol t'añ mic su'beñetla cha'añ mi la' wajñel che' bajche' yom Dios, come jiñi cha'añ tsi' pʌyʌyetla,

Efesios 4:4

jump'ejlʌch i bʌc'tal Cristo ba' ochemonla, juntiquil Espíritu, pʌybiletla cha'añ mi la' wajñel ti junsujm jach la' pijtaya come jiñi cha'añ tsi' pʌyʌyetla Dios;

Efesios 5:8

ti yam bʌ ora añetla ti ic'ch'ipan bʌ pañimil, pero wʌle añetla ti' sʌclel pañimil yic'ot lac Yum, i sʌcleletla pañimil yic'ot lac Yum; ajñenla che' bajche' jiñi año' bʌ ti' sʌclel pañimil.

Filipenses 3:14

woli c cha'len wersa cha'añ mij c'otel ya' ba' jaxʌl c bijlel, cha'añ mic taj jiñi c'ax uts'at bʌ ti' tojlel Dios jiñi tsa' bʌ i pʌyʌyon ti Cristo Jesús.

Colosenses 1:12

ti' tijicñʌyel la' pusic'al su'benla wocolix i yʌlʌ lac Tat, come tsi' cha' meleyonla ti uts'at cha'añ mi lac taj lac wenlel yic'ot i cha'año' bʌ Dios woli bʌ i yajñelob ti' sʌclel pañimil;

Colosenses 1:23

pero yom chʌn xuc'uletla ti isujm, mi p'ʌtʌletla ti jiñi mu' bʌ la' ñop, mach mi la' cʌy la' pijtaya tsa' bʌ la' wu'bi ti jiñi t'añ woli bʌ i sujbel ti pejtelel pañimil ti' ye'bal panchan; joñon, Pablo, aq'uebilon que'tel cha'añ jiñi wen t'añ.

Colosenses 1:27

Dios tsi' ña'ta i yʌc' ti cʌjñel ti' tojlel pejtelel wiñicob x'ixicob jiñi c'ax ñuc bʌ isujmlel mach bʌ tsictiyemic ti yam bʌ ora; jiñi ñuc bʌ ti cʌñol jiñʌch Cristo woli bʌ i yajñel ti la' pusic'al, jiñʌch mu' bʌ i yʌq'ueñetla la' pijtan la' ñuclel.

Colosenses 1:5

come woli la' pijtan chuqui tac lotbebiletla ya' ti panchan, che' bajche' tsa' la' wu'bi ti isujm jiñi wen t'añ,

Colosenses 2:2

mic cha'len wersa cha'añ mi' cha' ñuq'uesʌntel la' pusic'al yic'ot cha'añ mi la' c'uxbin la' bʌ ti jump'ejl la' pusic'al, com mi la' laj ch'ʌmben isujm pejtelel jiñi c'ax ñuc tac bʌ isujmlel maxto bʌ tsictiyemic ti yam bʌ ora, cha'añ mi la' cʌn isujmlel Dios lac Tat yic'ot Cristo,

Colosenses 3:15

La' tsictiyic i ñʌch'tʌlel la' pusic'al ch'oyol bʌ ti Dios, jiñi cha'añ, tsa' tem pʌjyiyetla ti jump'ejl la' bʌc'tal; su'benla Dios wocolix i yʌlʌ.

1 Tesalonicenses 2:12

tsa' c xic'beyet lojon cha'añ mi la' wajñel ti uts'at che' bajche' yom Dios tsa' bʌ i pʌyʌyetla ochel ti' yumʌntel ti panchan.

1 Tesalonicenses 5:8

Pero ñumeñix ac'ʌlel, añoñixla ti q'uiñil, jiñi cha'añ yom yʌxʌl la coj, la' lac xuc'chocon lac pusic'al ti jiñi woli bʌ lac ñop yic'ot c'uxbiya ame i tajonla laj contra, la' lac p'is ti' wenta laj coltʌntel woli bʌ lac pijtan ame cajiconla ti tsic pusic'al;

2 Tesalonicenses 1:11

Jiñi cha'añ woli c chʌn ña'tañet lojon ti oración, cha'añ uts'at mi la' q'uejlel ti Dios tsa' bʌ i pʌyʌyetla, cha'añ mi' ts'ʌctesan pejtelel wen tac bʌ ti la' tojlel yic'ot jiñi wen bʌ e'tel che' bajche' woli la' ñop Dios ti' p'ʌtʌlel.

2 Tesalonicenses 2:16

Jiñi lac Yum Jesucristo, yic'ot Dios lac Tat tsa' bʌ i c'uxbiyonla, jiñi tsa' bʌ i yʌq'ueyonla i ñuclel lac pusic'al mach bʌ añic mi' jilel yic'ot wen bʌ lac pijtaya ti' yutslel i pusic'al,

1 Timoteo 6:12

Cha'len wen bʌ guerra cha'añ chʌn xuc'ul ma' ñop, ch'ʌmʌ ti a wenta a cuxtʌlel mach bʌ añic mi' jilel, come jiñi cha'añ tsi' pʌyʌyet, come jiñi cha'añ tsa' su'bu a bʌ ti Cristo ti' tojlel ca'bʌlob.

Tito 2:13

che'ʌch yom mi la cajñel che' woli to lac pijtan jiñi c'ax uts'at bʌ mu' bʌ caj laj q'uel che' mi' pʌs i ñuclel jiñi ñuc bʌ Dios yic'ot Jesucristo xColtaya lac cha'añ.

Tito 3:7

cha'añ mi lac ch'ʌjmel ti' wenta cha'añ ti' yutslel i pusic'al, tsi' yotsayonla ti yalobil cha'añ mi la cʌq'uentel i yumʌntel yic'ot laj cuxtʌlel woli bʌ lac pijtan.

Hebreos 10:32

Cha' ña'tanla bajche' tsa' la' mele ti yam bʌ ora, che' bʌ tsa' la' ch'ʌmbe isujm, chʌn xuc'uletla yic'ot lac Yum anquese ca'bʌl jax tsa' la' ñusa wocol,

Hebreos 6:4

Jiñi mu' bʌ i cha' cʌyob Dios, ¿bajche' mi caj i cha' ñopob? Tsa'ix i cʌn q'ueleyob i sʌclel, tsa'ix i cʌn tajayob i wenlel ti Dios yic'ot ti Ch'ujul bʌ Espíritu,

1 Pedro 1:3

La' sujbic i ñuclel Dios i Tat lac Yum Jesucristo, come ca'bʌl tsi' p'untayonla che' bʌ tsi' yʌq'ueyonla lac cha' ilan pañimil cha'añ jiñi cuxul bʌ lac pijtaya, cha'añ tsa' cha' tejchi ch'ojyel Jesucristo ba'añ chʌmeño' bʌ.

1 Pedro 3:9

Mach yomic mi la' q'uextan jontolil, mi a'leya. Yom mi la' wʌq'ueñob i yutslel la' t'añ la' pi'ʌlob, come ña'tʌbil la' cha'añ pʌybiletla cha'añ mi la' wʌq'uentel la' wenlel.

1 Pedro 5:10

Pero jiñi Dios am bʌ ca'bʌl i yutslel i pusic'al, tsi' pʌyʌyetla cha'añ temel mi la' wajñel yic'ot Cristo ti' ñuclel i yumʌntel mach bʌ añic mi' jilel, jiñi cha'añ che' bʌ tsa'ix la' jumuc' ñusa wocol, mi caj i ñuq'uesan la' pusic'al ya' ti' tojlel, mi caj i xuc'chocoñetla, mi caj i p'ʌt-esañetla.