Levitico 7:2 - Jiñi Tsiji' bʌ Wen T'añ cha'añ Estudio

² Ya' ti ajñibʌl ba' mi' tsʌnsʌntel jiñi pulbil bʌ majtañʌl, ya' yom mi la' tsʌnsan jiñi majtañʌl cha'añ mulil, yom mi la' tsijcʌben i ch'ich'el ti' joytʌlel jiñi pulʌntib.

Levitico 7:2 Iomraidhean Croise

Levitico 1:11

Mi caj i tsʌnsañob ya' ti norte ya' ti' t'ejl i pulʌntib tic tojlel. Jiñi motomajob yic'ot i yalobilob Aarón mi caj i tsijcañob ti ch'ich' ti' joytʌlel jiñi pulʌntib.

Levitico 1:3

“Mi jiñi pulbil bʌ majtañʌl mu' bʌ la' wʌq'ueñon, mi wacax, yom mi la' yajcan juncojt i tat mach bʌ añic i c'am-ʌjel. Yom mi la' pʌy tilel ti ti' jiñi Tabernáculo ba' mi la' tempan la' bʌ, cha'añ mic ch'ʌm.

Levitico 1:5

Jiñi motomajob i yalobilob Aarón mi caj i tsʌnsañob jiñi alʌc'ʌl tic tojlel. Mi caj i ch'ʌmob jiñi ch'ich' cha'añ mi' tsijcañob ti' joytʌlel i pulʌntib jiñi majtañʌl am bʌ ti' tojel i ti' jiñi Tabernáculo ba' mi la' tempan la' bʌ.

Levitico 14:13

Mi caj i tsʌnsan jiñi tʌñʌme' ba' mi' tsʌnsʌntel jiñi alʌc'ʌl cha'añ i tojol mulil yic'ot mu' bʌ i laj pulel, ya' ti Tabernáculo. Come jiñi majtañʌl cha'añ i tojol mulil yic'ot jiñi majtañʌl cha'añ i ñusʌntel mandar i cha'añʌch motomaj. Jiñʌch wen ch'ujul bʌ majtañʌl.”

Levitico 3:2

La' i c'ʌcchocon i c'ʌb ti' jol jiñi alʌc'ʌl, la' i tsʌnsan ya' ti ti' jiñi Tabernáculo ba' mi la' tempan la' bʌ, ti wi'il jiñi motomajob, i yalobilob Aarón mi caj i tsijcañob ti' ch'ich'el jiñi alʌc'ʌl ti' joytʌlel jiñi pulʌntib.”

Levitico 3:8

Mi caj i yʌc' i c'ʌb ti' jol jiñi alʌc'ʌl, ti wi'il mi caj i tsʌnsan ya' ti ti' jiñi Tabernáculo ba' mi la' tempan la' bʌ. Ti wi'il i yalobilob Aarón mi caj i tsijcʌbeñob i ch'ich'el jiñi alʌc'ʌl ti' joytʌlel jiñi pulʌntib.”

Levitico 4:24

Mi caj i c'ʌcchocon i c'ʌb ti' jol jiñi chivo, che' jiñi mi caj i tsʌnsan ya' baqui mi' tsʌnsʌntel jiñi pulbil tac bʌ majtañʌl ya' tic tojel. Jiñʌch majtañʌl cha'añ i ñusʌntel mulil.

Levitico 4:29

Yom mi' c'ʌcchocon i c'ʌb ya' ti' jol jiñi alʌc'ʌl jiñʌch jiñi ofrenda cha'añ i ñusʌntel mulil. Che' jiñi mi caj i tsʌnsan ya' ti ajñibʌl ba' mi' tsʌnsʌntel jiñi alʌc'ʌl ba'añ jiñi pulʌntib.

Levitico 4:33

Mi caj i c'ʌcchocon i c'ʌb ya' ti' jol jiñi tʌñʌme' cha'añ i ñusʌntel mulil, che' jiñi mi caj i tsʌnsan jiñi tʌñʌme' cha'añ i mul ya' ba'añ jiñi pulʌntib.

Levitico 5:16

Jiñi wiñic mi caj i yʌq'ueñ i q'uexol jiñi ch'ujul tac bʌ tsa' bʌ i yʌsi, yic'ot mi caj i yʌc' i cha'yajlel i diezmojlel cha'añ mi' yʌq'ueñ jiñi motomaj. Ti wi'il jiñi motomaj mi caj i yʌc' ti ñusʌntel jiñi mulil che' bʌ mi yʌq'ueñon jiñi tʌñʌme'. Jiñʌch tsʌnsʌbil bʌ c majtañ cha'añ mulil, che' jiñi mi' taj i ñusʌntel i mul.”

Levitico 5:7

“Mi ma'añic mi' tajben i tojol cha'añ mi' mʌn jiñi tʌñʌme', che' jiñi mi caj i yʌq'ueñon cha'cojt xpurwoc o cha'cojt x'ujcuts cha'añ mi' ñusʌbentel i mul tsa' bʌ i mele, juncojt jiñʌch majtañʌl cha'añ i ñusʌntel mulil, jiñi yam bʌ jiñʌch majtañʌl mu' bʌ i pulel.

Levitico 5:9

Ti wi'il mi caj i tsijcan jiñi junwejl i pulʌntib majtañʌl ti' ch'ich'el jiñi majtañʌl cha'añ bʌ i ñusʌntel mulil, i colojbal jiñi ch'ich' mi caj i bec' ti ye'bal jiñi pulʌntib. Jiñʌch tsʌnsʌbil bʌ majtañʌl cha'añ i ñusʌntel mulil.

Levitico 6:25

“Su'ben Aarón yic'ot i yalobilob jiñʌch jiñi mandar cha'añ mi' ñusʌntel mulil: Ya' ba' mi' tsʌnsʌntel jiñi alʌc'ʌl mu' bʌ i pulel, ya' yom mi' tsʌnsʌntel jiñi majtañʌl cha'añ i tojol mulil; come ch'ujulʌch.

Levitico 6:7

Jiñi motomaj mi caj i yʌq'ueñon tsʌnsʌbil bʌ c majtañ cha'añ i tojol i mul jiñi wiñic. Che' jiñi mi caj i taj i ñusʌbentel pejtelel i mul.”,

Numeros 6:12

mi' caj i sʌc-esʌntel tic tojlel cha'añ mi' ts'ʌctesan i ye'tel ti nazareo che' bajche' jayp'ejl q'uiñ tsi' wʌn ña'ta, mi' caj i pʌy tilel juncojt tʌñʌme' am bʌ jump'ejl i ja'bilel cha'añ mi' ñusʌbentel i mul. Jiñi ñaxan bʌ q'uiñ tac che' bʌ tsa' ochi ti nazareo ma'añix mi' ch'ʌjmel ti' wenta, come tsa' bi'b-esʌnti.”

Hebreos 11:28

Cha'añ tsi' ñopo Dios, tsi' teche Pascua, yic'ot tsijcʌbil bʌ i ch'ich'el ti ti' i yotot, cha'añ mi' coltʌntel jiñi ñaxan bʌ alʌlob i cha'añ israelob, ba' ora mi' ñumel jiñi ángel cha'añ mi' jisan jiñi ñaxan bʌ i yalobil Egiptojob.

Hebreos 12:24

tsa'ix c'otiyetla ba'añ Jesús, jiñi tsa' bʌ i yʌq'ueyonla jiñi tsijib xuc'ul bʌ t'añ tsijcʌbil ti' ch'ich'el cha'añ mi' ñusʌntel lac mul, ñumen uts'at i ch'ich'el che' bajche' i ch'ich'el Abel.

1 Pedro 1:2

yajcʌbiletla che' bajche' tsi' wʌn ña'ta Dios lac Tat, jiñi Espíritu woli' sʌc-esañetla cha'añ mi la' jac'ben Jesucristo, yic'ot ja'el cha'añ mi la' tsijcʌntel ti' ch'ich'el Jesucristo. La' p'ojlesʌntic i yutslel yic'ot i ñʌch'tʌlel la' pusic'al.