Pilipi 1:11 - Sura Magasaꞌ: Bahangapa sura Pototowiá to Sae hai Pototowiá to Woꞌu

¹¹ Mekakaeaꞌ bona ina mobábehikou oaꞌ apa to manótó i peitána Pueꞌ Ala, hai bábehiámi iti ina mentóáꞌ hangko i kuasaꞌna Iesu Kerisitu i lalu katueꞌmi, álána Pueꞌ Ala ina ratóiá hai rapomahile. Ami.

Pilipi 1:11 Iomraidhean Croise

Iberani 12:11

Tangaꞌtaꞌ rapaturoꞌ ba rakámbáróá, tiꞌara maroꞌa pehádintaꞌ, masusa laluntaꞌ. Agáiáná, ane tapeuláꞌi paturoꞌ iti, katueꞌtaꞌ ina maroꞌa, hai bábehiántaꞌ ina manótó.

Iohane 15:8

Ane handaꞌ powuaꞌmi, UmáNgkuꞌ rapomahile hai tongawaꞌ kómu topeguruNgkuꞌ mpuꞌukou.

Kolose 1:10

Mekakaeangkaiꞌ noꞌonoꞌ bona bábehiámi ina hiolaꞌ hai peundeꞌána Pueꞌ. Ane noꞌonoꞌi, upu-upu bábehiámi ina mopagóeꞌ Pueꞌ Ala, hai kamoisámi woꞌo Pueꞌ Ala ina mantámbái i lalu katueꞌmi.

Pilipi 4:17

Kuꞌuliꞌ noꞌonoꞌ, tiꞌara ánti kamampoinaongkuꞌ ina molámbiꞌ wopiꞌi kabulá lalumi. Ngkáliꞌna riꞌi, peundeꞌángkuꞌ bona ina nitarima handaꞌ pewátiꞌ to hangko i Pueꞌ Ala ánti petulungimi iti i kódóꞌ.

Kolose 1:6

Ngkóráꞌ Marasa iti tebámbári i humalele duniáꞌ, álána katetátámbáiá tauna to mepoinálái i Pueꞌ Iesu hai mobábehiheꞌ apa to maroꞌa. Nodo woꞌo to mewaliꞌ i kómu halalu-halalu. I kanihádina miꞌi Ngkóráꞌ Marasa iti, liu-liumokou mepoinálái i Pueꞌ Iesu, álána moisá ntepuꞌumokou kabulána laluna Pueꞌ Ala i kómu.

Roma 6:22

Agáiáná deꞌe-deꞌe, tekábáhámokou hangko i kuasaꞌ dósá, hai napohawiꞌmokou Pueꞌ Ala. Iti to moánti pewátiꞌ i kómu, álána magasaꞌ katueꞌmi, hai ina molámbiꞌkou katueꞌ to maroꞌa duuꞌna i rue-ruena.

1 Peturuꞌ 2:9

Agáiáná kómu halalu-halalu, napileꞌimokou Pueꞌ Ala mewaliꞌ taunáNa, bona peisákou mampopolumao bágóꞌna tadulako menómbá motangaꞌ-tangaꞌi tauna hai Pueꞌ Ala Datuntaꞌ. Napataniꞌmokou mewaliꞌ taunáNa to magasaꞌ. Napileꞌikou hai Nakióꞌkou hangko i kakáindiána mesuaꞌ i lalu kamabaaꞌáNa to meawaꞌ ntepuꞌu. Upu-upuna iti Nabábehi bona nipahaweꞌ i upu-upu tauna bábehiáNa to maroꞌa.

2 Tesalonika 1:12

Tunggáiángkiꞌ mekakae noꞌonoꞌ, bona ánti bábehiámi to maroꞌa iti, hangaꞌna Pueꞌtaꞌ Iesu rapomahile, hai bona kómu woꞌo ina napomahilekou Pueꞌ Iesu. Upu-upuna iti hangaa-ngaa mewaliꞌ ánti kabulána laluna Pueꞌ Ala Umántaꞌ hai Pueꞌ Iesu Kerisitu.

Epesu 5:9

Hangko i lalumi to mabaa, mesupaꞌ upu-upu bábehiá to maroꞌa, to toꞌu, hai to hintotoꞌ.

Epesu 1:14

Hai Pueꞌ Ala mampoweꞌikeꞌ Inao to Magasaꞌ tandaꞌ kamaróhóna dándiNa i kitaꞌ, duuꞌna talámbiꞌ ntepuꞌu apa to Nadándiákeꞌ to mewaliꞌ taunáNa, ia miꞌi katehómpóꞌ. Onoꞌ miꞌi haneꞌi hintotoꞌ ntepuꞌu Pueꞌ Ala tatóiá hai tapomahile.

1 Korintu 10:31

Agáiáná kuꞌuliꞌ: ane mandeꞌkeꞌ ba mainukeꞌ, ba apa peá to tabábehi, hangaa-ngaa tabábehi bona Pueꞌ Ala rapomahile.

Matiu 5:16

Noꞌonoꞌ woꞌo pewangkaꞌ to ara i lalumi hangaa-ngaa mewangkaꞌ, bona bábehiámi to maroꞌa iti ina raita upu-upu tauna, álána motóiáheꞌ Umámi to ara i surugáꞌ.”

1 Peturuꞌ 4:14

Halalu-halalu, morasiꞌkou ane rasasalaꞌikou ánti peuláꞌmi i Kerisitu, láwiꞌ Inao to Magasaꞌ to meawaꞌ to hangko i Pueꞌ Ala ara oaꞌ i lalumi.

1 Peturuꞌ 2:12

Toroꞌkou i oloꞌraꞌ tauna to tiꞌara moisá Pueꞌ Ala, onoꞌ miꞌi haneꞌi hangaa-ngaa nipakaroꞌa-roꞌa bábehiámi, bona ane rápáꞌna hira mopakóiꞌ ba mosalaꞌikou nodo tauna to tiꞌara maroꞌa, marue-rue ina tongawaꞌ i hira kamaroꞌana bábehiámi, álána ina motóiáheꞌ Pueꞌ Ala i alo kahaweꞌáNa.

1 Peturuꞌ 2:5

Nipakaróhó pepoináláimi bona Napopewaliꞌkou nodo watu to tueꞌ to rapakeꞌ moaró támbi penómbáꞌá i Pueꞌ Ala. Napopewaliꞌkou tadulako menómbá to magasaꞌ, bona mohuhuꞌkou popenómbá i Pueꞌ Ala, ia miꞌi katueꞌmi haduduámi. Hai ánti kanatangaꞌ-tangaꞌintaꞌ Iesu Kerisitu, popenómbámi iti bateꞌna mopagóeꞌ Pueꞌ Ala.

Epesu 2:10

Tiꞌara haweꞌ hadua to peisá manguliꞌ noꞌonoꞌ, láwiꞌ Pueꞌ Ala mampopewaliꞌmokeꞌ tauna to woꞌu ánti pohintuwuꞌtaꞌ hai Kerisitu Iesu. Napopewaliꞌkeꞌ tauna to woꞌu bona tabábehi bábehiá to maroꞌa. Hai bábehiá iti Napatimamaꞌámokeꞌ ami hangkoia.

Epesu 1:12

Nabábehi noꞌonoꞌ bona kaiꞌ toIahudiꞌ to rungu-runguna mehárungá i Kerisitu motóiá hai mampomahile Pueꞌ Ala.

2 Korintu 9:10

Pueꞌ Ala mampoweꞌi tinudaꞌ i topohawuꞌ, hai hangko i tinudaꞌ iti, Ia mampoweꞌikeꞌ pandeꞌ. Noꞌonoꞌ woꞌo, Pueꞌ Ala ina motámbái apa to ara i kómu, bona tetámbái woꞌo kamaroꞌana lalumi motulungi tauna.

Iohane 15:16

Tiꞌara kómu to mopileꞌiAꞌ, agáiáná Kódóꞌ riꞌi to mopileꞌikou, hai Kupakanótó miꞌi bona laokou mampopolumao bágóꞌKuꞌ; hai wuaꞌ pobágóꞌmi iti tiꞌara ina matántá, agáiáná ina mobunduꞌ duuꞌna i rue-ruena. Mewaliꞌ, apa to nipembiáꞌ i UmáNgkuꞌ i lalu hangaꞌKuꞌ, bateꞌna mpuꞌu ina Naweꞌikou.

Iohane 15:2

Upu-upu dáꞌáNgkuꞌ to tiꞌara mowuaꞌ, Nawehángi, hai upu-upu dáꞌáNgkuꞌ to mowuaꞌ, Nakadiri hai Nakádipurá bona tetámbái powuaꞌna.

Roma 15:28

Mewaliꞌ, ina laoaꞌ sieruꞌ i Ierusale moánti dóiꞌ petulungi to rarámpu miꞌi, hangko laoraꞌaꞌ i tampoꞌ Sapanio, hai ina mehupeꞌaꞌ i kótámi.

Titu 3:14

Kupembiáꞌ woꞌo bona halalu hampepepoináláintaꞌ madotaheꞌ mampopolumao bágóꞌ to maroꞌa, bona molámbiꞌheꞌ apa to raparaluu alo-alona, hai bona katueꞌraꞌ tiꞌara ina mbero-mbero.