Danieli 12:10 - Sura Magasaꞌ: Bahangapa sura Pototowiá to Sae hai Pototowiá to Woꞌu

¹⁰ Handaꞌ tauna ina rapampehukáꞌi pepoináláiraꞌ bona mewaliꞌheꞌ magasaꞌ. Upu-upu tauna to kadake bábehiáraꞌ, tiꞌara ina raisá tunggáiána Pueꞌ Ala i pampopeahiahiꞌ iti, onoꞌ miꞌi haneꞌi ina mobábehi peheꞌ oaꞌ bábehiá to kadake. Agáiáná tauna to kaladu pekiriraꞌ ina moisáheꞌ tunggáiána Pueꞌ Ala iti.

Danieli 12:10 Iomraidhean Croise

Danieli 11:33

Upu-upu tauna to kaladu pekiriraꞌ hangko i oloꞌraꞌ taunána Pueꞌ Ala, ina mampoweꞌiheꞌ laluita i tauna bona moisáheꞌ lempóna apa to mewaliꞌ iti. Agáiáná bahangapa kamaruena hangko ionoꞌ, ara bahanoumbáheꞌ to ina mate ánti pombeala, hai ara to ina rahunu haweꞌ mate. Araheꞌ woꞌo to ina rarámpáki, hai to ina ratawani.

Danieli 11:35

Hanggááꞌheꞌ hangko i taunána Pueꞌ Ala to kaladu pekiriraꞌ iti ina rapapateheꞌ, agáiáná upu-upuna iti ina mewaliꞌ pampehukáꞌ i taunána Pueꞌ Ala bona mewaliꞌheꞌ magasaꞌ. Upu-upuna iti ina mewaliꞌ duuꞌna haweꞌ i kahópóꞌána duniáꞌ, ia miꞌi tempó to napakanótó miꞌi ami Pueꞌ Ala.”

Danieli 12:3

Tauna to manótó laluraꞌ ina mewangkaꞌheꞌ nodo pewangkaꞌna langiꞌ. Hira to ina mopaturoꞌ handaꞌ tauna bona mobábehiheꞌ apa to manótó i peitána Pueꞌ Ala. Peisáheꞌ woꞌo rapándiriꞌ nodo betue to mewangkaꞌ haweꞌ i rue-ruena.”

Marakusi 4:11

Nauliꞌ Iesu, “Hangkoia, tewuniángi mani paturoꞌ kana i popárentána Pueꞌ Ala. Deꞌe-deꞌe naweꞌimokou Pueꞌ Ala pekiri bona niꞌisá lempóna paturoꞌ iti. Agáiáná ane tauna to tiꞌara meuláꞌ i Kódóꞌ, Kupaturoꞌheꞌ moliu ngkóráꞌ pándiriꞌ,

Lukasi 24:25

Roo onoꞌ, Iesu mohángáꞌáheꞌ, “Moapa riꞌi haneꞌi noꞌonoꞌ gaga pekirimi, haneꞌi tiꞌara niꞌisá lempóna apa to mewaliꞌ? Tiꞌara paꞌi nipoinálái upu-upu to rauliꞌ nabiꞌ-nabiꞌ hangkoia?

Iohane 18:37

Nauliꞌ wopiꞌi Pilatu, “Ane noꞌonoꞌi, toꞌu mpuꞌu paꞌi kaꞌIona datu?” Nauliꞌ Iesu, “Toꞌu mpuꞌu kanuꞌuliꞌna, Kódóꞌ deꞌe datu. Onoꞌ haneꞌi rapoánákaꞌAꞌ i duniáꞌ deꞌe, bona Kupahaweꞌ apa to toꞌu. Tauna to moundeꞌ mampeuláꞌi apa to toꞌu, mampehádingiheꞌ laluitaNgkuꞌ.”

Iohane 7:17

Heáná to mampoinao mampeuláꞌi peundeꞌána Pueꞌ Ala ina raisá kahangko iumbáꞌána paturoꞌKuꞌ deꞌe, ba hangko i Pueꞌ Ala mpuꞌu, ba laluitaNgkuꞌ peá haduduáNgkuꞌ.

Iohane 8:47

Taunána Pueꞌ Ala moundeꞌ mampehádingi hai mampeuláꞌi laluitana Pueꞌ Ala. Agáiáná kómu, tiꞌara niundeꞌ mampehádingi laluitaNgkuꞌ, láwiꞌ tiꞌarakou hangko i Pueꞌ Ala.”

1 Korintu 6:11

Arakou to noꞌonoꞌ hangkoia, agáiáná Pueꞌ Ala mobahoꞌimokou hangko i dósámi, Napopewaliꞌmokou taunáNa, hai Napakanótómokou i peitáNa ánti pohintuwuꞌmi hai Pueꞌ Iesu Kerisitu hai ánti kuasaꞌna Inaona Pueꞌ Ala Pueꞌtaꞌ.

2 Korintu 7:1

Mewaliꞌ, halalungkuꞌ to kupokaꞌahiꞌ, ánti kanaweꞌintaꞌ Pueꞌ Ala dándiNa iti, onoꞌ miꞌi haneꞌi hangaa-ngaa takábáhá hinángkáꞌna to mopakadakekeꞌ, maroꞌa i wátántaꞌ, maroꞌa i laluntaꞌ. Hangaa-ngaa tapeuláꞌi peundeꞌána Pueꞌ Ala hangko i laluntaꞌ ntepuꞌu, hai hangaa-ngaa malááꞌkeꞌ mobábehi apa peá to tiꞌara hintotoꞌ hai peundeꞌáNa.

Titu 2:14

Iesu iti to mampehuhuꞌá wátáNa rapapate mosulewátáikeꞌ, bona Nakábáhákeꞌ hangko i upu-upu bábehiántaꞌ to kadake, hai Napopewaliꞌkeꞌ taunáNa to magasaꞌ to moundeꞌ mobábehi apa to maroꞌa.

Iberani 12:10

Tosaentaꞌ i duniáꞌ mopaturoꞌkeꞌ bahangapa peá parena kamaruena. Paturoꞌraꞌ iti ara támpáꞌna, láwiꞌ peisá peheꞌ moweꞌikeꞌ laluita mouláꞌ apa to maroꞌa i peitáraꞌ. Agáiáná paturoꞌ hangko i Pueꞌ Ala tiꞌara ara kamakuraꞌna, láwiꞌ Ia mopaturoꞌkeꞌ bona mewaliꞌkeꞌ tauna to maroꞌa, hai magasaꞌkeꞌ woꞌo hibali hai Ia.

1 Peturuꞌ 1:22

Deꞌe-deꞌe, láwiꞌ magasaꞌkou ánti pepoináláimi i paturoꞌ to toꞌu {ia miꞌi Ngkóráꞌ Marasa}, niꞌisá miꞌi mampokaꞌahiꞌ halalu hampepepoináláimi i katoꞌu-toꞌuána. Onoꞌ miꞌi haneꞌi kuweꞌikou laluita bona mombepokaꞌahiꞌkou hadua hai hadua hangko i lalumi ntepuꞌu.

1 Peturuꞌ 1:7

Narampekou kapári bona tongawaꞌ kamaróhóna pepoináláimi. Pepoináláimi iti peisá rapándiriꞌ nodo buláwá to rapáresáꞌ hai api. Ina tongawaꞌ kabuláwána ba tiꞌara, hai ina rapamagasaꞌ. Agáiáná masuliꞌ mani pepoináláimi haneꞌi buláwá, láwiꞌ buláwá tiꞌara ina ara duuꞌna i rue-ruena. Buláwá hangaa-ngaa rapáresáꞌ i lalu api. Noꞌonoꞌ woꞌo pepoináláimi hangaa-ngaa rapáresáꞌ moliu kapári. Mewaliꞌ ane mantahakou i lalu kapári, lempóna maróhó ntepuꞌu pepoináláimi, hai kómu ina ratóiá, rabiláꞌ hai rapomahile i kahaweꞌna huleꞌ Iesu Kerisitu i duniáꞌ.

1 Iohane 5:20

Taisá woꞌo, haweꞌ miꞌi Ánáꞌna Pueꞌ Ala i duniáꞌ, hai Ia to mampoweꞌikeꞌ kanótó lalu bona moisákeꞌ Pueꞌ Ala to toꞌu. Mohintuwuꞌmokeꞌ hai Pueꞌ Ala to toꞌu ánti pohintuwuꞌtaꞌ hai Iesu Kerisitu ÁnáꞌNa. Ia miꞌi Pueꞌ Ala to toꞌu. Hangko i Hia talámbiꞌ miꞌi katueꞌ to maroꞌa to tiꞌara mokahópóꞌá.

Pampetudeꞌá 16:11

Motitibeiheꞌ Pueꞌ Ala to i surugáꞌ ánti kamapárina pehádiraꞌ hai kamaháina bihuraꞌ, agáiáná tiꞌaraheꞌ mau menosoꞌ hangko i bábehiáraꞌ to kadake.

Pampetudeꞌá 19:14

Handaꞌ surudadoꞌ hangko i surugáꞌ to meuláꞌ i bókóꞌNa, mesaweꞌheꞌ woꞌo i dárá to bulá. Waruꞌraꞌ hangko i báná to meálu hai bulá ntepuꞌu.

Pampetudeꞌá 19:8

Pueꞌ Ala mopatimamaꞌámoheꞌ waruꞌ to meálu, to bulá ntepuꞌu hai mengkilaꞌ.” Waruꞌna tauna to mepoinálái iti lempóna bábehiáraꞌ taunána Pueꞌ Ala to maroꞌa.

Pampetudeꞌá 22:11

Heáná tauna to moundeꞌ oaꞌ mobábehi salaꞌ, patodáhi miꞌi mobábehi oaꞌ to salaꞌ. Heáná tauna to moundeꞌ oaꞌ mobábehi to kadake, patodáhi miꞌi mobábehi oaꞌ to kadake. Heáná tauna to moundeꞌ mobábehi oaꞌ to manótó, patodáhi miꞌi mobábehi oaꞌ apa to manótó. Heáná tauna to moundeꞌ oaꞌ mewaliꞌ magasaꞌ, patodáhi miꞌi mobábehi oaꞌ apa to magasaꞌ.”

Pampetudeꞌá 3:18

Onoꞌ miꞌi haneꞌi Kuweꞌikou laluita deꞌe: Mohólókou i Kódóꞌ buláwá to rapamagasaꞌ miꞌi i api, waruꞌ to bulá nipopoháláꞌ wátámi bona tiꞌarakou mahili, hai mohólókou pákupu mata bona peisákou meita. Ane iti to nibábehi, ina pebukukou i pepoináláimi.