Lúkas 16:24 - Esaa-líat ɛ́ péná

²⁴ Váŋ nɛ́ a tɛ́ɛ́ nlón a byɛ́ nɛ́: ‹Etāa Áblaháam, kɔnlé ma ŋgɔ́ɔ́, ɔ óm Lásalo a cág ɔnu-ví-wɔ á míndīm a vɔ́lɛ́ ma ɔlémb, átɔm nɛ́ mag taka ŋgandag mú á nyí nzáan.›

Lúkas 16:24 Iomraidhean Croise

Matéus 25:41

Ámbúh náŋ, káísa ag kɛ hɔ́ lí laga lí ɓot bí ŋga ɓɛ́ nyɛ́ á m̀ɓɛ́ŋgáa nɛ́: ‹Nɛŋlán la ma, á mílɔgɔ́g mí ɓot mí! Kɛnán á éɓēl-nzáan nyí ɛ́ ŋgá dím ɓé, yé lɛ́ m̀ɓoŋhágan ányúū ǹsɔhɔ la áŋgɛl yɛ́ɛ́.

Matéus 3:9

ndí miníh laglág ɓé la ɓɛ́nɛ-mɛ̄n nɛ́: ‹Bi byɛ́ɛ Áblaháam ákaa ɛtáŋɛ wahá›. Átɔm nɛ́, mag laga ɓɛ́nɛ nɛ́, Ɔlolómɛ̄ ag la li yaanɛ lí yí ŋgɔg ɓɔɔ́n bí Áblaháam.

Matéus 5:22

Ndí ma, mag laga ɓɛ́nɛ nɛ́: tɔ nzáá a ŋga álye mɔɔ́nyāŋ, bíg kɛ la nyɛ́ á bíkááhɛ́nɛ́. Nyɔ́ la nyɔ́ a ŋga kɛ́ li óŋo lí mɔ́ɔ̄nyāŋ nɛ́: ‹Ejóŋ-mut›! Bíg kɛla nyɛ́ á ŋkál á ɔ́ku-vicɛ́ŋ-ví-bíkāāhɛ́nɛ́. Nyɔ́ ki a ŋga óŋo nyɛ́ nɛ́: ‹Mut-a-nzeg›, a kɔ́ɔ́ nɛ́ bí léé nyɛ́ á éɓēl yé nzáan.

Lúkas 16:30

Ndí nyɛ́ ɔ tímānɛ̄ nɛ: ‹Kɛ́m etāa Áblaháam, náŋ ah kɔ́ɔ́ ɓé, ndí kíyáɓɛ́nɛ mut a ɓógyé mú á ŋkɔŋ á ɓádūgu, a kwɛ́lɛ́ ɓɔ́, bíg kɛ li veŋhan.›

Lúkas 19:9

Váŋ nɛ́ Yésus a pɔ́t likɔlɓan la Sakíyo nɛ́: «Nyí lɛn, lisuŋga la níŋgí mú á nyú nlɛ́ɛ́, átɔm nɛ́ nyɛ́g a lɛ já mɔɔ́n Áblaháam wa.

Lúkas 3:8

Tíán hɔ́ mitám míláám mí ŋga étɛ nɛ́ maná veŋé bílɛ̄m; ndí miníh laglág ɓé la ɓɛ́nɛ-mɛ̄n nɛ́: ‹Bi byɛ́ɛ Áblaháam ákaa etāa wahá.› Átɔm nɛ́, mag laga ɓɛ́nɛ nɛ́, Ɔlolómɛ̄ ag la li yaanɛ lí yí ŋgɔg ɓɔɔ́n bí Áblaháam.

Yohánɛs 4:10

Yésus ɔ pélē hɔ́ nyɛ nɛ́: «Ki ɓɔŋ nɛ́ ɔg yí likaale lí Ɔlolómɛ̄, la nzáá a ŋga lága wa nɛ́ tí ma mindím mí lí nyú, kí wa nɛ́ ɔ ŋgɔ yága nyɛ́ mɔ́, la nyɛ́ a tí wa míndīm mí éniŋ.»

Yohánɛs 4:14

ndí tɔ nzáá a ŋga kɛ́ li nyú lí míndīm mi ŋga kɛ́ nyɛ́ lí tíi, m̀ɓá-mɓá evéhé ɛ́ ŋga kɛ ɓé pɛ nyɛ́ lí byee; á mveŋghanɛ́ mindím mi ŋga kɛ́ nyɛ́ lí tíi, á até wɛ́ɛ̄ míg kɛ li yaan lí líŋgɛ̄n ápah eniŋ éɓem ɛ́ ŋga pámle.»

Yohánɛs 7:37

Á ɔlɔ́ ví ŋgand vá tiile, ví ví ɓɛ́ɛ́ ki m̀bya ǹcɛ́ŋ, Yésus ɔ tɛ́lɛ, ɔ ɓōtlé li lɛgɛ nɛ́: «Kíyáɓɛ́nɛ evéhé ɛ́ byɛ́ɛ́ mut, a sɔ́ a ɛ́n ma, a nyū.

Elōg-Lóma 4:12

Áblaháam ɔ ɓɛ́ ki esáŋɛ́ a ɓot ɓá kwɛɛɓɛ, ɓá bí lɛ́ nɛ, amáh sig lí ɓɛ́ á elɔŋ ɓot ɓá kwɛɛɓɛ, bí lɛ́ ki ɓot ɓá bí ŋga ōŋ mikoo mí ŋyéɓé mí nyɛ́ étāa wahá sɔ́kágánɛ́ ag kwɛɛɓɛ.

Elōg-Tésaloníka 2 1:8

Ag kɛ li sɔ́ átē a lindombo lí nzáan, á lí kɔ́ghɛ lí ɓot bí ŋgá yí ɓé Ɔ́lolómɛ̄ tɔ li ógle lí Pɔ́l M̀ɓɛɛŋ nyí nyɛ́ Ɛtáŋɛ wahá Yésus.

Yákop 2:13

Ákaa ɛ́sɛ, á eceg bikááhɛ́nɛ́, Ɔlolómɛ̄ a ŋgá kɛ ɓé lí kɔnle lí mut āh kɔnle ɓé nyɔ́ŋɔ́ ntám ŋgɔ́ɔ́. La mbálɛ, mut a ŋga kɔnle ɓot ŋgɔ́ɔ́ a ŋgá kɔn ɓé bíkāāhɛ́nɛ́ woŋ.

Yákop 3:6

Ɔɔ, ɔlémb vɔ́g ví lɛ́ nzáan, etɔ yé míɓē. Vɔ́g ví lɛ́ á nsɔŋgí á bíjo byáhá bí nyúū, ví lɛ́ njɔm miɓé máhá. Ɔlémb víg koo nzáan á éniŋ yáhá ɛ́sɛ, nyíŋ nzáan ɛg sɔ́le ja á éɓēl ɛ́ nzáan yɔ́-mɛ̄n.

Biyɛ́ɛ́léné 19:20

La tít yu byéelɓɛ́ ŋkómá, bú byeé ki m̀pɔ́tle-a-Ɔlolómɛ̄ a minaa nyɔ́ a ɓɔŋɔ́ɔ́ mínɛ́ŋ ɔ́sū ví tít, ányúū li jáŋɛ lí ɓot bí kuhúú ndembye nyí tít la li ɓégɛ lí edíŋgɛ́-díŋgɛ yɛ́ɛ́. Tít la m̀pɔ́tle-a-Ɔlolómɛ̄ a minaa bú lééɓɛ́ bíg vɛɛɓan átē á éɓēl-nzáan nyí ɛ ŋgá dím ɓé, nyí nzuhú ɛ ŋga lóŋɛ.

Biyɛ́ɛ́léné 20:15

Ndí nyɔ́ la nyɔ́ jóō líh cíiɓɛ ɓé á kálati nyí eniŋ ɔ lɛ̄ŋgɓɛ́ á yéŋ ébúle yé nzáan.

Biyɛ́ɛ́léné 22:1

Ámbúh náŋ, áŋgɛl yu étɛ́ ma Yohánɛs lɔm lí míndīm mí éniŋ, mí ŋga páa ákaa elembán. Míŋ mindím míg pámléne á étɔɓé-líkanʼyɛ yé Ɔ́lolómɛ̄ la yé mɔ́ɔ̄n ntómbɛ́.