San Lucas 8:13 - Wounaan Meu

¹³ Maagwai mokpor jojoodog ee nemjĩir dau burrmarr, ar maach khapeenau Ẽwandam iek ũurwai onee ʉkhaajem khʉʉnaugui ajim anʉm. Mamʉ thãraucha ʉkha nʉm khaba aawai, nemjĩir dau pod khaar khaba aajemjo khũchpai ʉkhawia iseg pʉajem. Maagwai ʉkha nʉm anʉmta mag iek ajapham gaaimua meperau khaigba aicheewai deeu Ẽwandam iekta isegwia warr amach naajerrjo wenʉrram khõsi nʉmgui ajim anʉm.

Woun Meu

¹³ Maagwai mokpör jojoodög hee nemjĩir dau burrmarr, har maach k'apeenau Hẽwandam hiek hũurwai honee hʌ̈k'aajem k'ʌʌnaugui hajim hanʌm. Mamʌ t'ãraucha hʌ̈k'a nʌm k'aba haawai, nemjĩir dau pöd k'aar k'aba haajemjö k'ũchpai hʌ̈k'awia hiseg pʌajem. Maagwai hʌ̈k'a nʌm hanʌmta mag hiek hajap'am gaaimua meperau k'aigba haicheewai deeu Hẽwandam hiekta hisegwia warr hamach naajerrjö wënʌrram k'õsi nʌmgui hajim hanʌm.

San Lucas 8:13 Iomraidhean Croise

San Marcos 6:20

Mag nʉm dʉi chi rey Erodeeujã Juan okho aajeejim anaabá, irua oowai Juanau chadcha Ẽwandam dau na nem agcha waunaa ãba i iekpai jaaujerr aawai. Maguata Juanau ichigcha ikhʉaba iekhamamjã magʉmjã igba, warag ũrm khõsi i iek ũrnaa sĩi ich odegpai, “¿Jãgata akhiina?” aajeejim anʉm.

San Lucas 8:12

Maagwai chi nemjĩir dau khʉdjã ee burrmarr, õor Ẽwandam iek sĩi par jʉ̃gʉupai ũurjem khʉʉnaugui ajim anʉm. Amau Ẽwandam iek jaau nʉm ũr nʉm, mamʉ meperau beewia khũgurbaicheewai ũrba arrjo thãar ee Ẽwandam iek chukhu thʉba nʉm, khʉdjã eem nemjĩir dau nemchaainau khopʉitarrjo.

San Lucas 8:14

Maagwai nemjĩir dau sirphʉg dʉi oberwia õt khaba bãautarr, jũrr ar maach khapeen ihãsisisdom khʉʉnta jaau simgui ajim anʉm. Amau Ẽwandam iek ũrm khõsi ũr nʉm, mamʉ deeu amach khĩirjug eepai, “Jãgʉm gaaimua pod mʉ phatkhon auba khãijã chitaju,” wa magbam khai, “Mua chadcha ʉkhakhiinjã pod parhooba mʉchdeu ampierr abaju” a khĩirjuajem. Mag gaaimua mag nemjĩirdam aphʉʉ bãauwia pod cheba arrjo ĩchab Ẽwandam athee nem ajapha wawaagjã podba, sĩi serbiibata nʉmgui ajim anʉm.

San Juan 15:2

Pãar sĩi mʉ khãu nenergau. Wajapcharan pãran mʉ Ayau khõsi simjo nem wawaagta mʉ denkha nʉmgui ajim. Pari mag mʉ khãu nenergkha nʉmta khãu ãb khãijã pod jopba simʉn, mʉ Ayau warag thʉapnaa barpʉiju. Pari ʉuta chewia jop simʉn, warag wajaphata irua jar khekher ajugui ajim, warag chemkhĩir.

San Juan 15:6

Chi mʉ dʉi narr khʉʉnta amach garmua mʉ kha ogdʉ nʉm khʉʉnan warag uva khãu bʉ̃ʉrjã cheba aajemjo isegpʉijugui ajim, mʉ gaaita khaar khaba naawai. Magʉm khʉʉnan mʉ Ayau oowaijã, chi khãu thʉrrptarr phuabaadeewai orpäaijemjota nʉmgui ajim, i athee nem wauba sĩi parta naawai.

San Juan 5:35

Juanan chadcha lámpara dau wajaug phuu dʉnʉmjo sĩejim, muata õor peerdʉ auju aai chirʉm a jawaag. Mag irua jaau nʉrrarr ũurwai pãach jʉ̃gaagaa arr aawai khũchpain pãar onee ajierramgui ajim.

1 Corintios 13:2

Maimua khanim nemjo ãbmua mʉg atag Ẽwandamau nem oopipig majujã thumaa ag nawe khaphʉnaa, mʉg eegarm khʉʉnau khaphʉ nʉm khĩirjugjã thumaa khaphʉ sim dʉi ich Ẽwandamau khĩirju sim khĩirjugjã khaphʉ sim; pari mag simta bʉ̃ʉrjã ich khapeen kha khõchkhaba sim chan, magan Ẽwandamau oowai mag wounan parta mag sim. Wa magba ichdeu nem mag abaawai Ẽwandamau ichdeu jaautarrjo apiju khaphʉnaa, durrsĩig khãijã wounagamjo “Chum dʉnʉʉubaimá” abaawai, i ipierr chadcha ichdeu jaautarrjo mam mapi sim; pari mag nem wau simta bʉ̃ʉrjã ich khapeen kha khõchkhaba sim chan, magan Ẽwandamau oowai parta mag nem khĩir pogkhe khãijã wau sĩeju.

1 Corintios 15:2

Ich mag iek mʉchdeu pãrag jaautarr gaaimua ʉu pãar peerdʉwi nʉm, majã chadcha ʉkhatarr khai mamʉ. Ich agtha pãar ag iek pʉaba ich mag i dʉi ubʉ nʉm khai, ʉu pãar chadcha peerdʉ nʉm.

Gálatas 3:1

Galaciapien, pãarta chadcha khĩirjugjã chukhuta nʉmá. Pãrag khabá warre marau Cristo maach kõit pakuls gaai meetarrjã dawaa pãach daúachata oo nʉmjo jaaumajima. Magtarrta ¿jãgwi ʉdʉraata parhoobam khʉʉnag pãach khũgurpijierrá?

Gálatas 3:4

Magan warr pãachdeu ʉkhaawaijã, ¿parta maach peerdʉajem iek ʉkhanaa Ẽwandam Akhaarjã aujierrab? ¡Ʉ̃khabam!

Efesios 3:17

pãachdeu ʉkha nʉm gaaimua Cristojã pãar thãar eeta sĩepim khõsi chiraajem; irigta pãar kõit jeeu chiraajem, mag Cristo gaaita ubʉ naawai agdaujo dich khapeen kha khõsi ajujã khaphʉnaa,

Colosenses 1:23

Pari mag bʉ̃ʉrjã kulp chukhu ich aar pãach phe aupiegan, ich mag pãachdeu ʉkhatarr iek gaaita ubʉnaa ĩchab pãachdeu maach peerdʉajem iek ʉkhatarr edwe ich dʉi ich mag nʉisijujã khaphʉ nʉisierr khĩirjugta khĩir okhooba wai wenʉrraju aai nʉm. Ich mʉg maach peerdʉajem pãrau ũrtarr iekpaita ĩchab durrpierr jaau nʉm; mʉchdeujã ich ag iekta jaau khitaajem.

Colosenses 2:7

Mag i kha ogdʉba aagan, pa jẽb ee ajap khaarkhamaajemjota warag i gaai ubʉ ajuuta ẽkhanaa warrcha pãachig jaautarr iek ogdʉba ʉkha nʉmuata i gaai thierrkhabat. Mamʉ mag nʉmjã nem thumaam paar Ẽwandamagta ʉu ajim abat.

1 Tesalonicenses 3:5

Mag pãar jãga nʉ a khap am khõchag chirʉm tag mʉchdeu ãwatba aadeewaita mua Timoteo pʉijim, jãga pãrau Ẽwandam iek pãachdeu ʉkhatarr ee wenʉrrʉ́ a khap jeeumkhĩir. Mua pãar khĩirju chirajim, eeu degolp dosãtau khãijã pãrag nem khaigba waupibarm gaaimua deeu khãijã ewag ereu phobaadeewai sĩi parta maach phidkhabarmjo aju khĩirjuwia.

1 Timoteo 1:19

Pua khaphʉ chirʉm, maach khapeen ãaur khʉʉnau amachdeu nem ajapham wauju aai nʉm khaphʉ narrta warag chaaur khĩirjuwia ya ĩs parhoobata wenʉrrʉm.

Hebreos 10:39

Mamʉ maachig chan mag irua oobam abaju, eem khʉʉnjo ewag wetwi okhooju khʉʉn khaba naawai. Okhooju khãai, maachdeun chad thãrauchata i iek ʉkha naawai maachin peerdʉwi ich dʉicha wenʉrraju khʉʉnau. Ich jãgta ʉkhanaat keena.

Santiago 2:26

Ajapcharan jãan mʉgta sim keena. Jãg maach meebaadeewai ya maach gaai tag maach akhaar chukhu aadem aig, ¿maach chi meemkha sĩsiba aajẽ? Ich jãgta sim ĩchab thãraucha Ẽwandam iek ʉkha nʉm anʉmjã. Dichdeu ʉkha chirʉm anʉmjo bigaaum khʉʉndam dʉijã nem ajapha waubam chan, magan maan chi thõmjo simta iiu sim a sim, thãraucha ʉkhaba simta mag ʉkha sim a sĩewai.

2 Pedro 2:20

Ar maach Por anaa maach peerdʉajem Jesucristo khaugwi amachdeu nem khaigbam waaujerrjã isegpʉiwi ʉu ajapha nʉisierrta, deeu ũwaai warram khĩirjug khaigbam auwia magʉmʉgta ʉdʉraa amach ʉ̃rpapiewain, warr Cristo khaugba aajeewai amach naajerr khãaijã warag athuuchata nʉisiejem.

2 Pedro 2:22

Jãgʉm khʉʉnan, õrau jaaujem iekhõoin, saakiu ich chʉgappaita deeu khobaimamjo nʉm. Wa magbam khai, khũs ajapha domeerpinaa sĩubarm bʉrre deeu ich khathajemeerjem ee pʉʉrbaba khabaimamjota sĩsidʉm, Ẽwandam iekta isegwi warr amachdeu nem khaigbam waaujerr eeta deeu nʉisiewai.

1 Juan 2:19

Pari jãg nʉrrjeem khʉʉnan maach eem arr khʉʉnpaita ĩs jãg Cristo igar khaba iekha nʉrrjeem; mag maach eem khʉʉn ajieb mamʉ, am chadcha maachjo Cristo den khabajierram. Am chadcha maachjo Cristo den arr akhiin agtha maach dʉi ogdʉba wenʉrrakham. Pari juaujo ich Ẽwandamau jãgpi simʉn, jãan maach ee maach khapeen anʉm khʉʉnjã chadcha Cristo den chaar khaba nʉmta jãg nʉrrjeemjã merag chukhu khap amkhĩrau.

Judas 1:12

Jãgʉm khʉʉnan Cristo maach kõit meetarr khĩir eyaa aag biirdʉnaa pãar dʉi ãba thach khoowaijã, atcha thach pom waibeenaa dodojo pomjã waibee nʉm gaaimua sĩi pãar khĩir naaupiejem, mag waibeenaa khoowaijã warm khʉʉn dakhĩir jũrr amachta atchapai aawai. Jãgʉm khʉʉnau chan bigaaum khʉʉndamjã khĩirjuba sĩi amachpaita khĩirju sĩsidʉm. Jãg chadam iekjo nem jaau wenʉrrʉm khʉʉnan par noseg chebamta sĩi edjã noseg chejujo thʉnarr phũu aaisirbapäaiwai cheba sĩi õor khũguurjemjota sĩsidʉm. Jãgʉm khʉʉnan ĩchab nemjĩir bʉ̃ʉrjã cheba aajemjota sĩsidʉm, amau nem jaau nʉm ũrwia õrau bʉ̃ʉrjã khĩirjug wajaphamjã auba naawai. Amach mag sĩsidʉm gaaimua ya biek numí khechwia nʉmjota nʉm, amach khaibag ee ich mag thaabatarr gaaimua maimua Cristo iekjã isegwi i ichaaurta nem jaau nʉm gaaimua. Maigta ya pa chi khaarpa jẽunaa orbapʉimjo aju Ẽwandamau am dʉi.