San Lucas 24:47 - Wounaan Meu

⁴⁷ Mag mʉch chi Cristo iiu phiidʉbarm ootarr khʉʉnauta amachdeu ootarr nacha Jerusalenpienag jaaunaa ĩchab durrpierram khʉʉnagjã jaaujugui ajim anʉm, jãgata khĩirjug ajapham jʉrbaawai Ẽwandamau amach khaibag chugpaaju aai sim thumaam khʉʉnag khap amkhĩir.

Woun Meu

⁴⁷ Mag mʌch chi Cristo hiiu p'iidʌbarm hootarr k'ʌʌnauta hamachdëu hootarr nacha Jerusalenpienag jaaunaa hĩchab durrpierram k'ʌʌnagjã jaaujugui hajim hanʌm, jãgata k'ĩirjug hajap'am jʌrbaawai Hẽwandamau hamach k'aibag chugpaaju haai sim t'umaam k'ʌʌnag k'ap hamk'ĩir.

San Lucas 24:47 Iomraidhean Croise

San Mateo 28:19

Magua mua pãragan, mʉ matarr khur pãach ap paaukhabaadee durrpierr aaidʉbaadet a chirʉmgui ajim; magnaa thumaam khʉʉnag amach meupierr mʉg pãach peerdʉtarr iekta jaaunaa chi ʉkhamam khʉʉnagjã pãach denjo mʉchta amach Porkhapibat ajim. Magnaa ĩchab Ẽwandam chi Aai thʉ̃r gaai, chi Iewaa thʉ̃r gaai maimua ich Ẽwandam Akhaar thʉ̃r gaai por choopetat ajim, mag chi ʉkhamam khʉʉn.

San Mateo 3:2

“Pãach khaibag ãsie ewag khĩirjuwia Ẽwandamagta chugpaapi jeeubathʉ̃” aajeejim anʉm. Magnaa ĩchab, “Ya mʉigmua jopcha ich Ẽwandamau maach thumaam khʉʉn Porkhapiju maach ee pʉiju” aajeejim anaabá.

San Mateo 9:13

Maimua magjim ĩchab: —Wajapha khĩirjunaa Ẽwandam iek phã sim gaaim mua jawaagpam khap abat. Chi phã sim iek gaai Ẽwandamau mag sim: “Muan pãragan sĩi nemchaainta khechnaa mʉrʉg jeeu nʉʉ aju khãai, pãach khapeenta ʉ̃rcha dau aug khaug paraa apim khõsi chirʉm” a simgui ajim Jesuu. Maguata muajã am pekau pom nʉmjã igba, am dʉi thach kho chirʉmgui ajim. Mʉ chan bʉ̃ʉrjã pekau chukhu wajapha khitheem aajem khʉʉn jʉraanjã beeba, mʉʉn õor pekau pooma khitheem khʉʉn peerdʉ awaanta beejimgui ajim, khĩirjug iiur aumkhĩir. Maguata mag õor pekau pom nʉmjã igba, am dʉi thach kho chirabahab ajim, amjã Ẽwandam denkha awaag.

San Lucas 13:34

Maimua Jerusalenpienta warag ʉaperwia magjim anʉm: —¡Eh! ¡Aay, Jerusalenpien! Pãraun chadcha warrgarweta Ẽwandamau ich i jaaumkhĩir chogpʉi nʉm khʉʉnjã kha khõchkhaba, pãrau warag mokoujã am bar wai nʉmua khechpʉimaajemgui ajim anʉm. Biek khapan mua pãrag jaaujeejim, ãthãrr ʉʉirau ich chaaindam thumaa ich ich eegar thʉa wai juupjemjo, pãar thʉa wai chitaag. Mamʉ magtarrjã pãachdeuta bʉ̃ʉrjã mag khõchkhabajierramgui ajim anʉm.

Hechos 10:43

Mag, warrgar Ẽwandam i jaaujerr khʉʉnaujã ĩchab Jesús igwia, “Thum i iek ʉkhawia ãba irigpaita amach peerdʉ aumkhĩir jeeu nʉm khʉʉn khaibagan Jesús gaaimua Ẽwandamau chadcha chugpaapʉiju” a jaaumajim aajem Pedroou, warr Ẽwandam i jaaumienau jaaujerr igwia.

Hechos 11:18

Pedroou mag jaaumam ũrwia, Jerusalenpien chi ʉkha narr khʉʉn sĩi warag khĩuu nʉisiwi, Ẽwandamag jeeuphoo thʉnʉmua, “Ʉuchata jãgbarm Ẽwandam” ajierram aajem. “Magan judionaan khabam khʉʉnaujã amach khaibag thumaa ãsie ewag khĩirjuwia pʉrʉgta chugpaapi jeeu nʉm khʉʉnan ʉu ĩchab ʉ̃gthar ober wenʉrrajugui” ajierram aajem, mag warag Ẽwandamag jeeumamua.

Hechos 13:46

Magbaawai ĩchab Pabloou Bernabé dʉimua warag thãar phĩiuwia iek khẽgkha amag, —Ũrbat keena ajierram anʉm. Chadcha pãragta nacha marau mʉg Ẽwandam iek jaauju aai naajim, mamʉ pãar jãg ʉ̃gthar obermaphamjo Ẽwandamagjã ʉdʉʉr pãach peerdʉ aupiba i isegamjo naawai marau judionaan khabam khʉʉnagpa jaau wenʉrrʉmgui ajim aajem,

Hechos 2:38

Magbaawai Pedroou amag magjim aajem: —Thum agdaujo pãach mor ewag khĩirjuwia Ẽwandamag pãach khaibag chugpaapi jeeubat ajim anʉm. Magnaa chadcha Jesucristo iek ʉkhanaa pãach por choopibat ajim anʉm. Pãrau magmʉn, Ẽwandamau pãar khaibag chugpaapʉiwia jũrr ich Akhaarta pãrag deejugui ajim aajem, ichdeu deeju a jaautarrjo.

Hechos 20:21

Judionaanag jaaunaa maimua judionaan khabam khʉʉnagpa jaaujeejim, jãga amach khaibag thum ãsie ewag khĩirjuwia isegju aai nʉ, Ẽwandamau khõsi simjota wenʉrraag; magnaa jãga maach Por Jesucristo iekta ãba ogdʉba ʉkha wenʉrraju, magʉm thum mua jaaujeejimgui ajim.

Hechos 26:18

Mua am ee pʉ pʉi chirʉmgui ajim, am sĩi dau khĩsumjota naawai; pua mʉ iek jaaubaadeewai, dau egdʉtkha phobaademjo wajapha oophobaadeewai, tag amach pekau eepai khĩchag eemjo ich mag wenʉrram ugua. Mua pʉ pʉi chirʉmʉn, jãg sĩi dosãt ipierraa wenʉrraju khãai, Ẽwandamau khõsi simjota wenʉrramkhĩrau. Mag mʉ iek ʉkha phobaadeewai, Ẽwandamau amach khaibag chugpaabapäaiwain chadau, amjã judionaan chi ʉkha wenʉrrʉm khʉʉn dʉi ãba Ẽwandam chaainkha nʉisijugui” ajim. Maga maach Por Jesuu mʉrʉg iekhajimgui ajim anʉm Pabloou Agripaag, mag Damasco phoborog mamua khʉd ee Jesuu ichig iekhatarr jaaumamua.

Hechos 26:20

Nacha Damascopienagta mua jaaujim maach peerdʉajem iek. Magtarr khur Jerusalenpienag jaauwi, Judea durram khʉʉnagjã jaauwi, ĩchab judionaan khabam khʉʉnagpa thum jaau phʉʉrdʉ chitʉmgui ajim anʉm. Mag jaau chitʉmʉn, amag amach khaibag ãsie ewag khĩirjuwia isegnaa, Ẽwandamagta mag khaibag chugpaapi jeeumkhĩir jaaunaa, ĩchab thumaam khʉʉn daar nem wajaphata waupi jaau chitaajemgui ajim anʉm, bigaaum khʉʉnau mag oowai amach eugar, “Jãkhʉʉnan chadcha khĩirjug iiur wai nʉisim” amkhĩir.

Hechos 28:28

’Magtarr aawai mʉg pãachdeu ʉkhaba abarm gaaimua, warre khaphʉ abat ajim Pabloou: Ĩsmua atag Ẽwandamau judionaan khabam khʉʉnagta mʉg maach peerdʉajem iek jaaupi sim, amjã peerdʉju aai amkhĩir. Mag amachig jaaubaawai amaun chadcha ʉkhajugui ajim. [

Hechos 3:19

Pãachdeu i dʉi magtarr jũrr pãach khaibag thumaa ãsie ewag khĩirjunaa Ẽwandamag chugpaapi jeeubat ajim aajem, mag khaibag chugpamkhĩir. Pãach thum israelnaanau magta jeeukhiin, mag Jesús warrgarwe Ẽwandamau jʉr auwi pʉiju aajerr deeu pʉibarm gaaimua Ẽwandamauta pãar kha oneg chukhu narrjã kha onee apijugui ajim aajem.

Hechos 4:12

Magtarr aawai deeum woun mʉg jẽb gaai maach peerdʉju ayaam chan tag chukhumgui ajim anʉm. Mag Ẽwandamau maach peerdʉ aumkhĩir deeum khʉʉnagjã jaauba arr aawai ãba ich Jesuupai khabam chan pod õor amach pekau eemua peerdʉbamgui ajim aajem Pedroou.

Hechos 5:31

Pãrau i mag thõopʉijieb mamʉ, Ẽwandamau jũrr ichta thumaam khʉʉn khãyaujã ʉ̃rʉʉcha apiwia, ĩchab chi Porkhanaa õor peerdʉajem khapijimgui ajim anʉm, magbaawai i gaaimua Israel durram khʉʉnau amach khaibag ãsie ewag khĩirjuwia Ẽwandamag chugpaapi jeeubaawai irig warre mag khaibag chugpaapʉimkhĩir.

Romanos 5:20

Warrcha Ẽwandamau ley deewain, õrag amach pekau wau nʉm khap amkhĩirta deejim. Pari magbaawai mag amach pekau wau nʉmjã khaphʉ nʉmta warag athuuchata khaibag aphobaadem ãba, ich Ẽwandamaujã ich jãg õor dau aug khaug paraa khitaawai, ĩchab amag wajapcha khaphʉ apijim, ichdeu am peerdʉ auju aai sim.

Efesios 1:6

Mag gaaimuata chadcha ich mag Ẽwandam ajaug phenaa i tho iekhaajem, mag ich ajaug sĩerrʉm gaaimua ichdeu ich Iewaa daupii aajemta ʉu maach athee pʉitarr aawai.

Efesios 3:8

Ajapcharan mʉʉn thum mʉg Ẽwandam iek ʉkha nʉm gaaimua i denkha thʉnʉm eejã mʉchta serbiibacha chirʉm. Mag chirab mamʉ ich Ẽwandamauta pãar maar meeun khabam khʉʉn eejã mʉg maach peerdʉajem iek jaaupitarr aawai mag Cristo gaaimua maach dʉi nem ajapha aajem pooma maadeu chi jaaujujã khaugba aajemjã ʉu jaau chitʉm.

Colosenses 1:27

Magta pãarjã i denkha nʉm khʉʉn aawai maar meeun judionaan khaba awiajã Ẽwandamau pãragjã khaphʉ apibarm, jãga mag Cristo maach thãar ee sĩejemta mʉg atag ʉ̃gthar paaukhawijã oo wai wenʉrraju.

1 Juan 2:12

Keena, ar ewaa Ẽwandam iek ʉkha nʉm gaaimua agtha chaainjo khitheem khʉʉn, Ẽwandamau Jesucristo gaaimua ya pãach pekau perdonaabarm pãrau khaphʉ naawaita mʉg ẽsap pãrag phã deepʉi chirʉm.