San Lucas 18:43 - Wounaan Meu

⁴³ Jesuu magbarm bʉrre chadcha dau eerdʉ sĩsiwia ich bi eem daujo daujã ajaug sĩsijim anaabá. Magbaawai warag i dʉi mamua onee Ẽwandamag jeeumamua, —Ẽwandam, ĩsin chadau pua mʉ ʉuta abarm. Pʉjo jua theegkham chan mʉg jẽb gaai chukhum a ijẽjẽbag majim aajem. Jesuu mag woun dau monaaubarm oobaawai ĩchab mag õor khapan thʉnarr khʉʉnaujã Ẽwandamag jeeumamua irig “Ʉu ajim” ajierram aajem.

Woun Meu

⁴³ Jesuu magbarm bʌ̈rre chadcha dau heerdʌ sĩsiwia hich bi heem daujö daujã hajaug sĩsijim hanaabá. Magbaawai warag hi dʌ̈i mamua honee Hẽwandamag jëeumamua, —Hẽwandam, hĩsin chadau pua mʌ hʌ̈uta habarm. Pʌjö jua t'eegk'am chan mʌg jẽb gaai chuk'um ha hijẽjẽbag majim haajem. Jesuu mag woun dau monaaubarm hoobaawai hĩchab mag hõor k'apan t'ʌnarr k'ʌʌnaujã Hẽwandamag jëeumamua hirig “Hʌ̈u hajim” hajierram haajem.

San Lucas 18:43 Iomraidhean Croise

San Mateo 11:5

Irig, “Dau khaugba khekhed arr khʉʉn dau wajapha thʉnʉm” abat. “Bʉ wedʉ wedʉ sĩsid arr khʉʉnjã ya wajapha nʉrrjeem. Kach khĩsu sĩsid arr khʉʉnjã wajapha ũr sĩsidʉm. Chi meem arr khʉʉnjã deeu iiu nʉrrjeem, maimua aphʉʉm khʉʉnagjã ĩchab õor peerdʉajem iek jaau chirʉm” a jaaubaimat ajim.

San Mateo 21:14

Mag õor dawag jʉrkhʉʉipʉiwi, ichta ag ee sĩsiewai, dau khaugba khitheem khʉʉn dʉi bʉ wedʉ wedʉ khitheem khʉʉnpa ich aig beemam Jesuu monaaupʉi maajeejim.

San Mateo 9:8

Magbarm oowia aig narr khʉʉn dauderraa nʉisijim anʉm. Mag nʉm iekhau warag Ẽwandamagta, “Ʉuhcha jãgbarm, Ẽwandam. Jãan pʉch jua theegauta mʉg wounag jãgpibarm” ajierram aajem.

San Lucas 13:17

Jesuu mag amach obeerbapʉim ũrwia i oomapha aajem khʉʉn thum chigaa aphobaadejim anaabá, amachta. Mag am chigaa nʉm ee, tagam khʉʉn thum aig narr khʉʉnau amach daúa Jesuu mag nem wau sim oo nʉm gaaimua onee nʉm iekhau Ẽwandamag, “Ʉu chadcha pua marag pʉch jua theeg oopibarm Ẽwandam; ag na marau mʉgjo chan nem ooba aajemgui” a iekha naajim aajem.

San Lucas 19:37

Maimua ya durrsĩ Olivo anʉm aigmua ʉʉrba nʉm dakha aadem ee, õor pom i ẽudee onee pos wedurum khʉʉnau amachdeu ag na mag nem ooba aajempa Jesuu waumaajem oojem khĩirjunaa Ẽwandamag jeeu nʉmua ĩchab “Ʉu ajim” a serereu khaphobaadejim aajem.

San Lucas 4:39

Magbaawai i werba jẽer sim bigaau dʉnʉʉuwimawia chi khʉʉumieg khĩesir iekhabaawai warre chi khʉʉumie meeudʉbaadejim anaabá. Mag khʉʉumie meeudʉbaadeewai ag bʉrre phiidʉwia am jãhogaagpajim aajem.

San Lucas 5:26

Mag chi woun phiidʉbaadem oowia aig narr khʉʉn thum dauderraa nʉm iekhau, “Jãan ich iiuta jãgbarm” anaa ĩchab, “Ĩs Ẽwandamauta maadeu mʉg ooju khĩirjuba narrjã oopibarm” anaajim aajem, amach ap pawiajã.

San Lucas 9:43

Mag Jesuu chaai monaaubarm oowia thum aig narr khʉʉn dauderraa nʉisiwia Ẽwandamagta, “Ẽwandam, pʉchta chadcha mepeen khãyaujã chi jua thierriu. Mepeenau chan pod pʉ dʉi barbam” ajierram aajem. Tagam khʉʉn mag dauderraa thʉnʉm ee, Jesuu ich khapeenag magjim aajem:

Hechos 11:18

Pedroou mag jaaumam ũrwia, Jerusalenpien chi ʉkha narr khʉʉn sĩi warag khĩuu nʉisiwi, Ẽwandamag jeeuphoo thʉnʉmua, “Ʉuchata jãgbarm Ẽwandam” ajierram aajem. “Magan judionaan khabam khʉʉnaujã amach khaibag thumaa ãsie ewag khĩirjuwia pʉrʉgta chugpaapi jeeu nʉm khʉʉnan ʉu ĩchab ʉ̃gthar ober wenʉrrajugui” ajierram aajem, mag warag Ẽwandamag jeeumamua.

Hechos 26:18

Mua am ee pʉ pʉi chirʉmgui ajim, am sĩi dau khĩsumjota naawai; pua mʉ iek jaaubaadeewai, dau egdʉtkha phobaademjo wajapha oophobaadeewai, tag amach pekau eepai khĩchag eemjo ich mag wenʉrram ugua. Mua pʉ pʉi chirʉmʉn, jãg sĩi dosãt ipierraa wenʉrraju khãai, Ẽwandamau khõsi simjota wenʉrramkhĩrau. Mag mʉ iek ʉkha phobaadeewai, Ẽwandamau amach khaibag chugpaabapäaiwain chadau, amjã judionaan chi ʉkha wenʉrrʉm khʉʉn dʉi ãba Ẽwandam chaainkha nʉisijugui” ajim. Maga maach Por Jesuu mʉrʉg iekhajimgui ajim anʉm Pabloou Agripaag, mag Damasco phoborog mamua khʉd ee Jesuu ichig iekhatarr jaaumamua.

Hechos 4:21

Magbaawai chi thethem khʉʉnau sĩi am ajap dakhãunaa chig aba pʉapʉijierram aajem, õor pom thʉnʉmuajã warag am kõit iekhamjo Ẽwandamta tho iekha nʉrrjee thʉnarr aawai. Mag bʉ ãkhãraa khitarr monaautarr paar, thumaam khʉʉnau Ẽwandamag, “Ẽwandam, pʉjom chan mʉg jẽb gaai chukhumgui” anaajim aajem irig.

Gálatas 1:24

Pari amachdeu mag ũr nʉm gaaimua warag Ẽwandamagta ʉu ajim aajeejim aajem.

1 Pedro 2:9

Pari pãar chan Ẽwandamau mag isegbam. Pãran ich Ẽwandamauchata ich chaain khamkhĩir ich garmua jʉr autarr khʉʉnau. Pãarta phadnaanau aajemjo õor kõit jeeujem khʉʉn khabahab, maach Rey Cristoou sĩi ich atheepai nem waumkhĩir jʉr autarr khʉʉn. Pãarta warr khĩchag eemjo naajerr khʉʉn Ẽwandamau ich iek ʉkhapi athamua araragag obeer autarr khʉʉn khabahab, mag pãach ararag ee obeer autarr Ẽwandam chadcha õor dʉi ajapha khitʉmta jũrr deeum khʉʉnagjã jaaumkhĩir ich õorkha autarr khʉʉn.