San Juan 7:39 - Wounaan Meu

³⁹ Mag sim aiguin Jesuu i iek ʉkhabarm khʉʉnaun Ẽwandam Akhaarta auju a sim ajim. Pari maagwai chan agtha chi Ẽwandam Akhaar beeba sĩejim, ich Jesujã agtha ich Aai aar ʉ̃gthar maba sĩerr aawai.

Woun Meu

³⁹ Mag sim haiguin Jesuu hi hiek hʌ̈k'abarm k'ʌʌnaun Hẽwandam Hak'aarta hauju ha sim hajim. Pari maagwai chan hagt'a chi Hẽwandam Hak'aar bëeba sĩejim, hich Jesujã hagt'a hich Haai haar hʌ̃gt'ar maba sĩerr haawai.

San Juan 7:39 Iomraidhean Croise

San Mateo 16:14

Magbaawai marau irig, —Am iek pʉ Juan chi õor por choomie aajem; deeum khʉʉnau jaauwai pʉʉta Elías aajem, warrgar Ẽwandam i jaaujerr; wa magba Jeremías khabam khai, dewam khãijã aajem, agjo Ẽwandam i jaaujerr.

San Mateo 21:11

Magbaawai mag i dʉi õor pom wenʉrrʉm khʉʉnau, —Ẽwandam i jaaumie Jesús khabahab aajeejim, Galilea durr Nazaret phobor ee bãautarr.

San Lucas 24:49

Mag jaaumamua ich Jesuucha amag, Pari magaagan mʉgtarr khur jopcha murua pãar athee pʉijugui ajim anʉm Ẽwandam Akhaar, ich mʉ Ayaucha deeju a jaautarr. Mamʉ mʉig Jerusalén phobor eepai nʉisit ajim anʉm, mag Akhaar bee nʉm ora. Ʉ̃gtharmua ich Ẽwandamau pʉibapʉim edta pãar gaai phẽs sĩeichejugui ajim anʉm, pãachdeu ootarr thumaam khʉʉnag jaau khaphʉ jaau wenʉrramkhĩir.

San Lucas 3:16

Amau mag iekha nʉm Juanau ag nawe ũr wai sĩerr aawai thumaam khʉʉn jʉ̃g daar magjim anʉm: —Mua pod pãar thãar ajaug paa aubam. Muan sĩi dodamaupaita pãar por choo chirʉmgui ajim anʉm. Mamʉ ẽudee ãb urumta mʉ khãyaujã jua theeg ʉ̃rcha sim. Jãguan chad ich Akhaarjã pãrag deewia pãar khaibagjã õtdau ee warre orbapʉimjota aju. Mʉ chan mʉg chirʉm aig sĩi i chogkhaagpaijã serbiibata chirʉmgui ajim anʉm.

San Lucas 7:16

Magbaawai thumaam khʉʉn jãphierr nʉm iekhau Ẽwandamag jeeumamua, “Chadcha Ẽwandam, ʉu pua maar eeg oo chirʉm. Ʉu pua jãg chaai chi meem arr phiriu atham” ajierram anʉm. Magnaa ĩchab amach wir aigpai, “Keena, ĩsin chadchata maach ee jooingarmjo Ẽwandam i jaaumie sĩeichechem” khajierram aajem.

San Juan 1:21

Magbaawai deeu amachdeupai, —Magan ¿pʉ khaíuma? ¿Pʉ Elías khabá? abaawai, jũrr ichdeu, —Mʉ chan Elías khabamgui ajim amag. Magbaa deeu amachdeupai, —¿Wa pʉ warrgarwe ich Ẽwandamaucha ich i jaaumkhĩir jʉr auju a jaaujerráwa? a jeeubaawai, jũrr amag, —Ʉ̃hʉ̃, mʉ majã khabamgui ajim.

San Juan 1:25

—Pʉ iek mag warrgarwe ich Ẽwandamau pʉiju a jaaujerrjã khaba, Elíajã khaba, Ẽwandam i jaaujerrjã khabam anʉmta, magan ¿jãgwi pua õor por choo simma? ajierram irig.

San Juan 1:33

Ag nawe chan mua khaugba chirajimgui ajim, iita warrgarwe Ẽwandamau pʉiju a jaaujerrkha sim. Mamʉ mʉg õor por choomkhĩir mʉch pʉitarrauta mʉchigcha, “Ar pʉch dakhĩraa chi Akhaar ʉ̃gtharmua beewia woun ãb sim gaai jupbaicheewai pua khaphʉ aju, mag wounauta ich Ẽwandam Akhaarcha õrag deemaju” a jaautarr aawai,

San Juan 12:16

Eeu i mamag khabaadeewai chan maach chi dʉi wenʉrraajerr khʉʉnau chan marau bʉ̃ʉrjã khaugba naajim, jãgwiata mamag khajĩ. Maimua ya nassi pawia ich Aai aar ʉ̃gthar petarr khurta marau khaphʉ aphobaadejim, ya ag nawe i jãgju Ẽwandam iek phã sĩsidʉm gaai jãg jaau sim aawai juaujo jãgtarr.

San Juan 12:23

Mag wetwia judionaan khabam khʉʉnau ich jʉr wenʉrrʉm a jaaubaicheewai amjã peerdʉ awaag ʉdʉraa ich thõopiju jaaubaademua magjim: —Ya ĩsta chadcha mʉch chi Emkhooi Iewaa chikhamnau thõoju gayaa pamamgui ajim, mag amau mʉ thõobarmua mʉchta Ẽwandamau thumaam khʉʉn khãaijã ʉ̃rpai apieg.

San Juan 14:13

Pãar chadcha mʉch denkha naawai pãrau pãachdeu nem khõsim thum mʉ Ayagta mʉ iek gaai thʉwiata jeeumʉn, mua pãar dʉi mag pãachdeu jeeu nʉmjo ajugui ajim, mʉchdeu pãar dʉi mag chirʉm gaaimua ich mʉ Aaita chi jua thierriu a khap amkhĩir.

San Juan 14:26

Pari mʉ jũrr mʉ Ayau ich Akhaar pãar khĩir jãsenkhamkhĩir pʉibaawai maguata jũrr pãrag nem thumaa jaaunaa mua pãachig jaaujerrjã deeu thumaa pãrag khĩir eyaa apijugui ajim.

San Juan 16:14

Iruata mʉ jaauju aai chirʉm aawai ichdeuta mua jaaujerr iekjã mʉchdeu jaaujerrjo ũwaai pãrag khĩir eyaa apinaa wajapcha khap apiju. Mag sim aig chan ichta tho iekhapiba, mʉʉta irua pãrag tho iekhapi simgui ajim.

San Juan 16:7

Pari mag mʉ maju a chirʉmʉn, chadcha pãach wajapcha amkhĩraugui ajim. Mʉ maba akhiin, Ẽwandam Akhaar mag pãar khĩir jãsenkhajujã beebaju. Magarrau mʉ petaawain chadau mʉchdeuchata mʉch jũrr mag pãar khĩir jãsenkhajujã pʉijugui ajim.

San Juan 17:1

Maimua mag jaau dichwia ʉ̃gthaag eerpanaa ich Ayag magjim: “Tata, ya ag ora pabaadem. Mʉg pʉch ipierraa chirʉm gaaimua chadcha pʉch Iewaakha chirʉm õrag khaphʉ apibá ajim, magbaawai muajã ĩchab pʉchta amag tho iekhapieg.

San Juan 17:5

Nau mʉgtarr khur deeu mʉ pʉch aar pabaimaawai, warr mʉg durr ompaaju nawe mʉchta pʉch dʉi ãba nem iek theeg chi Porkha chirarrjo, ũwaai mʉrʉg agjo iek theeg apinaa chi Porkhapibá a jeeumajim ich kõitpai.”

San Juan 20:22

Magnaa “Ẽwandam Akhaar athat” anaa maar ohoodo nʉmʉg phuasirjim. Mag phuasirbarmua Ẽwandam Akhaar marag deebarm ajim.

San Juan 6:14

Õor pom mag thʉnarr khʉʉnau amach daúacha Jesuu ich iiu aawai mag ag na amau mag ooba aajerrta mag waubarm oobaawai jũrr amach eepai, “Chadcha mʉg wounta ich Ẽwandamaucha ich i jaaumkhĩir jʉr auwi pʉiju a jaaujerrauwai” aajeejim.

San Juan 7:12

Mag nʉm dʉi ĩchab sĩi bigaaum khʉʉnaujã i igwia, “Jãg wounan ãba nem wajaphampaita wau khitaajem” a iyʉʉ aawai, jũrr ãaur khʉʉnau, “Ʉ̃hʉ̃, ¿jãga õor wajapham abarju jãg sĩi õor khũgur nʉrraajem?” aajeejim aajem jũrram khʉʉnau.

San Juan 8:54

Magbaa Jesuu, —Mua mʉchdeupaita mʉch tho iekhakhiin, mua mag mʉch tho chirʉmjã bʉ̃ʉrjã baleeba simgui ajim. Pari chadcha chi mʉ tho iekhanaa mʉchta thumaam khʉʉn khãaijã ʉ̃rpai api simʉn ich mʉ Ayaugui ajim. Wajapcharan ar pãrau i igwia pãar Ẽwandam aajemma, jãguata thumaam khʉʉn khãaijã mʉchta ʉ̃rpai api simgui ajim.

Hechos 19:2

—¿Pãrau Jesús iek ʉkhaawai ĩchab ich Ẽwandam Akhaarjã aujierrá? a jeeujim anʉm. Magbaawai jũrr irig, —Ʉ̃hʉ̃, marau chan mag Ẽwandam Akhaar sim anʉmjã ũrba nʉmgui ajierram aajem.

Hechos 2:17

“Ya mʉg atag mʉchdeu mʉg jẽb opʉiju gayaa paawai mua mʉch Akhaar thumaam khʉʉnag deemajugui” ajim aajem. “Mag mua amag mʉch Akhaar deebaawai chaain chi emkhooinau chi ʉʉinaupa warrgar mʉ iek jaaujerr khʉʉn denjo mʉ iek jaaujugui” ajim aajem. “Maimua chaainaam khʉʉn dʉi jooiraam khʉʉnpa mua mʉch aar khãaipi aumajugui” ajim aajem.

Hechos 2:33

Mag jaaumamua ichdeupai, —Jãan Ẽwandamau ich jua theegauta chadcha i phiriu autarr aawai ĩs ʉ̃gthar ich Ẽwandam dʉi ãba thumaam khʉʉn Porkha simgui ajim anʉm, ich Jesús igwia. Magta ĩchab ich chi Ayaucha ich Akhaar deeju a jaaujerrjã irig deejimgui ajim aajem. Mag ichig deebaawai jũrr ich Jesuu ĩsta õrag deebarmgui ajim anʉm. Magua cha pãrau pãach daúacha oonaa pãach jʉ̃gʉucha pãach meu ũr nʉmjã mag sĩi khech naawai khaba, thum ich Jesús gaaimuata jãg thʉnʉmgui ajim anʉm, chadcha ichta ʉ̃gtharjã maach thumaam khʉʉn Porkha sĩewai.

Hechos 2:38

Magbaawai Pedroou amag magjim aajem: —Thum agdaujo pãach mor ewag khĩirjuwia Ẽwandamag pãach khaibag chugpaapi jeeubat ajim anʉm. Magnaa chadcha Jesucristo iek ʉkhanaa pãach por choopibat ajim anʉm. Pãrau magmʉn, Ẽwandamau pãar khaibag chugpaapʉiwia jũrr ich Akhaarta pãrag deejugui ajim aajem, ichdeu deeju a jaautarrjo.

Hechos 2:4

Mag õtdau khĩirjo simta õor por ʉ̃r dʉrjopkhabarmjo arrau Ẽwandamau ich Akhaarta thumaam khʉʉn gaai phẽs deebarmua agdaujo deeum meu amachdeu bʉ̃ʉrjã iekhaba aajerrta waa iekha nʉrrjee aphobaadejim anʉm, ich chi Ẽwandam Akharau iekhapimampierr.

Hechos 3:13

Jãan ar Ẽwandamau ich Iewaa pʉitarrta ar khabam awi pãachdeu thõotarr ag jua theegauta jãg i monaaubapʉimgui ajim anʉm. Ich jãg Jesuuta i chogkha beetarr aawai, maach Ẽwandam anaa ĩchab maach jooin Abrán Isá maimua Jacob am Ẽwandamaupai thumaam khʉʉn Porkhapinaa nem jua theeg apijim. Ich ag Jesupai khabajieb ajim anʉm, ar Pilatoou pʉapäaig abaawai pãachdeu warag thõopʉipi jaautarr.

Hechos 4:31

Maimua ya amau mag Ẽwandamag jeeu obaadem ee, ich Ẽwandamaupai am narr di sĩi sõsõi athajim anʉm. Mag di sõsõi atham dʉi Ẽwandam Akhaar am gaai phẽs aicheewai magtarr aigmua atagta warag bʉ̃ʉrjã ogkhaba, ich mag Ẽwandam iek jaau nʉisijim aajem.

Romanos 8:9

Pari pãar magba nʉm. Pãrau agtha mag sĩi pãach khõchagpierr nem wau wenʉrraba, ich Ẽwandam Akharau nem waupi jaau simjota nem waaujem; majã chadcha mag i Akhaar wai nʉm khai mamʉ. Pari ãbmua mag Akhaarta chukhu sim chan magan ma chan Cristo den khabam.

2 Corintios 3:8

jãgwia ag khãyau atcha wajaug abaju sĩ ich Ẽwandamau ich Akhaar gaaimua õor dʉi deeu iek deebarmua am peerdʉ auju jaau nʉm.

Efesios 4:30

Nem khaigba wau nʉm gaaimua chan oob Ẽwandam Akhaar okhĩirjuu apimiet. Ich jãg Akhaarta Ẽwandamau pãrag deebajieb, ich iek ʉkhaawai chadcha ich denkha nʉm a khap amkhĩir. Mag i Akhaar wai naawaita mʉg atag mʉig eegar wenʉrrawi ich aarcha phe atham edjã chadcha ich denkham iek ich denkha wai sĩsiju.