San Juan 14:26 - Wounaan Meu

²⁶ Pari mʉ jũrr mʉ Ayau ich Akhaar pãar khĩir jãsenkhamkhĩir pʉibaawai maguata jũrr pãrag nem thumaa jaaunaa mua pãachig jaaujerrjã deeu thumaa pãrag khĩir eyaa apijugui ajim.

Woun Meu

²⁶ Pari mʌ jũrr mʌ Hayau hich Hak'aar pãar k'ĩir jãsenk'amk'ĩir pʌ̈ibaawai maguata jũrr pãrag nem t'umaa jaaunaa mua pãachig jaaujerrjã deeu t'umaa pãrag k'ĩir heyaa hapijugui hajim.

San Juan 14:26 Iomraidhean Croise

San Mateo 1:18

Mag Jesucristo thaabatarran mʉgta ajim aajem: Chi María, ewag pawi i ãdpaju, ya Joseeu iek dee wai sĩejim aajem, ag dʉi paag. Pari mag sĩi iek dee wai sĩewai agtha ag dʉijã khaba nʉmta bi ee pabaadejim anaabá. Pari ma chan chikham denjã khaba, ich Ẽwandam Akharauta ich iiu aawai mag i bi ee papijim anaabá.

San Mateo 1:20

Ya irua mag pʉaju khĩirjubaademta, Ẽwandam chog ʉ̃gtharmua beewi irig, —José, David khararr chaain ewagam khʉʉn bi eem, oob pʉch ʉʉi pʉaju khĩirju chiram ajim anʉm. Jãg chaai irua bi ee wai sim chan deeum den khaba, ich Ẽwandam Akharauta jõorpitarr khabahab ajim anʉm.

San Mateo 28:19

Magua mua pãragan, mʉ matarr khur pãach ap paaukhabaadee durrpierr aaidʉbaadet a chirʉmgui ajim; magnaa thumaam khʉʉnag amach meupierr mʉg pãach peerdʉtarr iekta jaaunaa chi ʉkhamam khʉʉnagjã pãach denjo mʉchta amach Porkhapibat ajim. Magnaa ĩchab Ẽwandam chi Aai thʉ̃r gaai, chi Iewaa thʉ̃r gaai maimua ich Ẽwandam Akhaar thʉ̃r gaai por choopetat ajim, mag chi ʉkhamam khʉʉn.

San Mateo 3:11

Mua chan pod pãar thãar wajaug paa aubam. Ẽwandamagta pãach khaibag chugpaapi jeeubaawai muan sĩi dodamaupaita pãar por choo chirʉmgui ajim anʉm. Pari mʉ ẽudee ãb urumʉn chadau mʉ khãaijã jua theeg ʉ̃rpai sĩewai, jãguan chad Ẽwandam Akhaarjã pãrag deewi pãar khaibagjã õtdau ee warre orbapʉimjota aju ajim anʉm. Mʉ chan mʉg chirʉm aig sĩi i chogkhaagpaijã serbiibata chirʉmgui ajim anʉm.

San Marcos 12:36

Ich Daviiuchajã Ẽwandam Akharau ichig iekhapibaawai ich ag Mesías igwiapai “maach Por” abajieb. Ante irua phã pʉarr gaai mag simgui ajim anʉm: “Maach Por Ẽwandamau maach Porog ‘Mʉch iek theeg chirʉmjo aag mʉ dʉi ãba mʉ juachaar gar jupbá ajim, pʉch oomapha aajem khʉʉn thum mua pʉch jua ee pʉrkha dee nʉm ora.’ ” (Sal. 110:1)

San Marcos 13:11

Mag pãach pʉr aauwai, thethemnaan khĩirphee iekhaagpaawai, oob pãrau, “¿Khan ata mʉ iekhajuuta mʉgbaadema?” a khĩirjumiet ajim anʉm. ¿Khan jãgwi mua mag chirʉ́? Ya maig chan pãar pãach khĩirjugdamaupai iekhabam; magbaadem aiguin ich Ẽwandam Akharauta pãrag iekhamkhĩir khĩirjug deeju aawaita mua mag chirabahab ajim anʉm.

San Lucas 1:15

Mag chaairau bi eewe Ẽwandam Akhaar ich gaai phẽs wai khitajugui ajim anʉm. Mag chaairau ich erraawe vinojã doba, ni nag deeum khĩir awia khãijã bʉ̃ʉrjã ich i ee auba ich mag khitajugui ajim anʉm.

San Lucas 1:35

Magbaawai chi Ẽwandam chogau magjim anʉm: —Jãan ich Cha Ʉ̃gthaa Phuu Nʉm ag Akhaar pʉ gaai sĩeicheewaita pʉ jõorjugui ajim anʉm, ich iiu aawai. Mag gaaimua mʉg chaai pua oobarm bʉ̃ʉrjã khaibag chukhu auwia ich mag khitaju. Ich Ẽwandamauta ich iiu pʉ bi ee papi sim den aawai i thʉ̃r Ẽwandam Iewaa a thʉ̃rjugui a jaaujim aajem.

San Lucas 1:41

Mag Mariaau ichig iekhabaichem ũrbaawai warre ũan Elizabed bi eem chaaita pogogor khabaadejim anaabá. Magbarm dʉi ich ũan Elizabed gaaijã Ẽwandam Akhaar phẽs aicheewai onegau Mariaag,

San Lucas 1:67

Ich ag ed agtarr khur nʉʉpai awia jooi Zacarías gaai Ẽwandam Akhaar phẽs aicheewai Ẽwandam i jaaujem khʉʉn denjo iekhamamua María chaai igwia magjim anʉm:

San Lucas 11:13

Pãar o ãkhãraa khitheem khʉʉnaujã pãach chaainau nem jeeuwai ¿nem ajaphamjã ĩgkhaba deeba aajẽ? Ich jãgta aajemgui ajim anʉm maach Aai ʉ̃gthar chiraajemuajã agjo. Chadcha thãrau ichig jeeu simʉgan irua ich Akhaarjã deeb khaba deejugui ajim anʉm.

San Lucas 2:25

Maagwai Jerusalén phobor ee woun ãb Simeón a thʉ̃r sim sĩejim aajem, Ẽwandam dau na ajapha khitanaa i ipierraa khitaajerr. Ich mag jooirau ĩchab nʉajeejim aajem, warrgarwe Ẽwandamau jooinag jaauwai irua ich Chaai pʉibarmuata israelnaan peerdʉ auju a jaaujerr Chaai. Mag jooi gaai Ẽwandamau ich Akhaar phẽs wai sĩejim anaabá.

San Lucas 24:49

Mag jaaumamua ich Jesuucha amag, Pari magaagan mʉgtarr khur jopcha murua pãar athee pʉijugui ajim anʉm Ẽwandam Akhaar, ich mʉ Ayaucha deeju a jaautarr. Mamʉ mʉig Jerusalén phobor eepai nʉisit ajim anʉm, mag Akhaar bee nʉm ora. Ʉ̃gtharmua ich Ẽwandamau pʉibapʉim edta pãar gaai phẽs sĩeichejugui ajim anʉm, pãachdeu ootarr thumaam khʉʉnag jaau khaphʉ jaau wenʉrramkhĩir.

San Lucas 3:22

Ẽwandam Akhaar duburjo khitʉmta dau daau beewia i ʉ̃r jupchejim anʉm. Mag jupbaichem dʉi edjã eemua woun iekjo, “Iewaa, pʉʉta mʉ Chaai mʉchdeu jãsehne wai chitʉmʉu, pʉ gaaimua mʉ onee chiraajem” abarmjã ũrjim anaabá.

San Juan 1:33

Ag nawe chan mua khaugba chirajimgui ajim, iita warrgarwe Ẽwandamau pʉiju a jaaujerrkha sim. Mamʉ mʉg õor por choomkhĩir mʉch pʉitarrauta mʉchigcha, “Ar pʉch dakhĩraa chi Akhaar ʉ̃gtharmua beewia woun ãb sim gaai jupbaicheewai pua khaphʉ aju, mag wounauta ich Ẽwandam Akhaarcha õrag deemaju” a jaautarr aawai,

San Juan 12:16

Eeu i mamag khabaadeewai chan maach chi dʉi wenʉrraajerr khʉʉnau chan marau bʉ̃ʉrjã khaugba naajim, jãgwiata mamag khajĩ. Maimua ya nassi pawia ich Aai aar ʉ̃gthar petarr khurta marau khaphʉ aphobaadejim, ya ag nawe i jãgju Ẽwandam iek phã sĩsidʉm gaai jãg jaau sim aawai juaujo jãgtarr.

San Juan 14:16

Pãrau magmʉn, mʉch Aai aar paawai mua irig pãar athee dewam mʉch jũrr pʉipi jaaujugui ajim, pãar dʉi ogdʉba ich mag pãar khĩir jãsenkha wai nʉrramkhĩir. Ma ich Ẽwandam Akharaugui ajim.

San Juan 14:25

Pãar dʉi agtha chirʉwe ya mua pãrag thumaa jaaubarm.

San Juan 15:26

’Pari õrau mag pãar oomapha nʉm ee, mʉchdeu jaau chirarrjo, mʉch ipaarmua mʉch Ayag ich Akhaar pʉipi jaaujugui ajim, pãar khĩir jãsenkhamkhĩir. Mag pierrwain chadau ichta mʉ destigkhajugui ajim, ichdeuta pãrau õrag chadam iek jaaupimamua ĩchab mʉjã jãga chitʉ́ a khaugpimaju aawai. Pari wajapcharan pãachjã mʉ destignaanaugui ajim, mua warrcha mʉch Aai iek jaaubaaderr aigmua pãachta mʉ dʉi ogdʉba wenʉrraawai.

San Juan 16:7

Pari mag mʉ maju a chirʉmʉn, chadcha pãach wajapcha amkhĩraugui ajim. Mʉ maba akhiin, Ẽwandam Akhaar mag pãar khĩir jãsenkhajujã beebaju. Magarrau mʉ petaawain chadau mʉchdeuchata mʉch jũrr mag pãar khĩir jãsenkhajujã pʉijugui ajim.

San Juan 2:22

I mag iekhatarr aawaita, amau i thõowia deeu iiu phiidʉtarr khurjã maach chi i dʉi ogdʉba wenʉrrarr khʉʉnaun i iekhatarr khĩir eyaa naajim. Mag warag warrgarwe Ẽwandam iek phã sĩsidʉm gaai Jesús igwia phã sĩsidʉmjã wajapcha khaphʉnaa ich Jesuu ich iiucha maachig nem jaaujerrjã warag marau khaphʉ nʉisijim.

San Juan 20:22

Magnaa “Ẽwandam Akhaar athat” anaa maar ohoodo nʉmʉg phuasirjim. Mag phuasirbarmua Ẽwandam Akhaar marag deebarm ajim.

San Juan 6:45

Ẽwandam i jaaujerr khʉʉnau ẽsap phã pʉarr gaai jaauwai, ich Ẽwandamauta ich õorkha nʉm khʉʉnag jaaukhamaju a sim, ich iek khaugmamkhĩir. Ichdeucha magtarr aawaita ar thum i iek ũrnaa ʉu i khaugphomam khʉʉnaun mʉjã igjuraugui ajim.

San Juan 7:39

Mag sim aiguin Jesuu i iek ʉkhabarm khʉʉnaun Ẽwandam Akhaarta auju a sim ajim. Pari maagwai chan agtha chi Ẽwandam Akhaar beeba sĩejim, ich Jesujã agtha ich Aai aar ʉ̃gthar maba sĩerr aawai.

Hechos 1:2

Mua pʉrʉg jaau chirajim ĩchab, mag ich Jesuu ʉ̃gthar maju nawe, Ẽwandam Akharau ichig jaaupibaawai, jũrr irua ich dʉi ogdʉba wenʉrramkhĩir ichdeucha jʉr autarr khʉʉnag, jãga amau nem wau wenʉrraju a jaau pʉatarr.

Hechos 1:4

Mag ichdeu doce jʉr autarr khʉʉnag ich oopipikham jaarta ĩchab amag Jerusalén phobor eemuajã chawag wetpiba jaaumamua amag, —Mua pãrag jaaujeejimgui ajim anʉm, mʉ Ayau pãar athee ich Akhaar pʉiju. Magtarr aawai mʉg phobor eemua chawag wetba, mʉigpai nʉbat ajim anʉm, ichdeu chadcha pãrag ich Akhaar dee nʉm ora.

Hechos 1:8

Mag khãai Ẽwandam Akhaar pãach gaai phẽs sĩeichejuun chad pãrau khaphʉ aju aai nʉmgui ajim anʉm. Mag pãach gaai phẽs sĩeichem ed pãar jua theeg aphobaademua mua nem waaujerr pãach daúacha oonaa mʉ iek pãach jʉ̃gʉucha ũurjerrjã pãrau õrag jaau nʉrrjee aju. Nacha mʉg Jerusalén phobor ee, maigmua Judea durr, Samaria durr, ich mag khĩeb durrpierr jaau wetumua warp durr chaauram magwe pãrau jaau wenʉrrajugui ajim anʉm amag.

Hechos 11:16

Magbaawaita mua khĩir eyaa aadejimgui ajim anʉm Pedroou, maach Por Jesuu mʉchig, “Juan chi por choomieun chadcha dodamaupai pãar por choojieb mamʉ, mʉgtarr khur ich Ẽwandam Akhaarchata pãrau pãach gaai phẽs wai nʉisiju” a iekhatarr.

Hechos 13:2

Ich makhʉʉn biek ãb thachjã khoba maach Por Jesuug jeeu nʉm ee, Ẽwandam Akharau amag, “Bernabé Saulo dʉi ideu sĩi sĩubat, mua am athee ya phidag jʉr wai chirʉmgui” ajim anʉm chi Ẽwandam Akharau.

Hechos 13:4

Mag, ich Ẽwandam Akharau amachig wetpi jaaubaawai Bernabé Saulo dʉi Seleuciaag wetwi maigmua jũrr dojãrr phʉram Chipre anʉmʉg dʉrbajierram aajem.

Hechos 15:28

Ich Ẽwandam Akharaucha marag jaauwai pod pãrag judionaanagamjo nem phithurm nem waupi jaauju khaba nʉm. Mag nʉm dʉi maachdeu khĩirjuawaijã ʉucha sim, chadcha ichdeu jaau simpierrpai nem jawaag. Mag pãrag jaaupʉim ig nʉmʉn mʉgau:

Hechos 15:8

Ich Ẽwandam thumaam khʉʉn khĩirjug khaphʉ sĩerrʉmuata ĩchab amagjã ich Akhaar deejimgui ajim anʉm, ich jãg maachig deetarrjo. Jãg sim aig irua amag, “Mua pãarjã ig chirʉm mʉch chaainkha awaag” a sim khabahab ajim anʉm.

Hechos 16:6

Mamʉ Ẽwandam Akharau amag Asiapienag chan ich iek jaaupiba arr aawai sĩi warppai phʉʉrdʉ wetumua Frigiapien ee dichwi, Galacia eejã dichwi, Misia durr barimajierram aajem.

Hechos 2:33

Mag jaaumamua ichdeupai, —Jãan Ẽwandamau ich jua theegauta chadcha i phiriu autarr aawai ĩs ʉ̃gthar ich Ẽwandam dʉi ãba thumaam khʉʉn Porkha simgui ajim anʉm, ich Jesús igwia. Magta ĩchab ich chi Ayaucha ich Akhaar deeju a jaaujerrjã irig deejimgui ajim aajem. Mag ichig deebaawai jũrr ich Jesuu ĩsta õrag deebarmgui ajim anʉm. Magua cha pãrau pãach daúacha oonaa pãach jʉ̃gʉucha pãach meu ũr nʉmjã mag sĩi khech naawai khaba, thum ich Jesús gaaimuata jãg thʉnʉmgui ajim anʉm, chadcha ichta ʉ̃gtharjã maach thumaam khʉʉn Porkha sĩewai.

Hechos 2:4

Mag õtdau khĩirjo simta õor por ʉ̃r dʉrjopkhabarmjo arrau Ẽwandamau ich Akhaarta thumaam khʉʉn gaai phẽs deebarmua agdaujo deeum meu amachdeu bʉ̃ʉrjã iekhaba aajerrta waa iekha nʉrrjee aphobaadejim anʉm, ich chi Ẽwandam Akharau iekhapimampierr.

Hechos 20:28

Magua mua pãrag mag chirʉmgui ajim: Pãar ar chi ʉkha durrum khʉʉn porkha nʉm khʉʉn, pãach mor ʉʉrkhanaa ĩchab pãach khapeen chi ʉkha durrum khʉʉnjã wajapha thʉa wai nʉisit. Magaag magamkhĩirta Ẽwandam Akharau pãar jʉr aujimgui ajim, maach Por Jesuu ich bagau phag autarr khʉʉn ajapha thʉa wai wenʉrramkhĩir.

Hechos 20:35

Mʉchjo mag phidkhamkhĩirta mʉch chitʉmpierr mua ich mag pãrag jaau chitaajem, mag phidkha nʉmua ĩchab dau aphʉʉ amachdeu nemdam ig nʉmjã pod auba durrum khʉʉn juag oo wenʉrramkhĩir. Pãade maach Por Jesuu iekhatarr khĩir eyaa abat ajim: Iin chadcha i iekhõoin “Dich garmua chikhamnag nemdam deewaita maach oneecha aajemgui ajim, chi au sim khãaijã.”

Hechos 28:25

Mag o ãba khaba, ãaur khʉʉnau ʉkhanaa tagam khʉʉnau ʉkhaba aadephʉm gaaimua, warag khĩeb ereumaawai Pabloou amag magjim: —Jãg mʉgju khapta chadcha Ẽwandam Akharau warrgarwe jooi Isaías khararrag jaaupibaawai pãar igwia maach jooinag,

Hechos 5:3

Mag amach aar deebaimaawai Pedroou chi Ananiaag magjim anʉm: —Ananías, ¿Jãgwi jẽb pertarr param phatkhon pua thum deecheba, ag eem pãach athee autarrta, “Thum deechejim” a chirʉ́? ajim anʉm. Pʉch jãg seukha simua Ẽwandam Akhaarpata pua khũgur auju ẽkha sĩebahab ajim anʉm.

Hechos 7:51

Maimua warag iekhamamua ich dʉi ijẽjẽbkharr khʉʉnag magjim aajem ich Estebanau: —Pãrau mag khaphʉ nʉmta, bʉ̃ʉrjã iekhaawaijã ũrba, jʉ̃g khĩchagnaa thãar theegjã sĩerrjee khabahab ajim anʉm, Ẽwandam khaugbam khʉʉnjo. Magnaata warag Ẽwandam Akhaar ichaaur ʉkha sĩerrjeemgui ajim anʉm, warrgar pãach jooinau aajerrjo.

Hechos 7:55

Mamʉ Estebanau ich gaai Ẽwandam Akhaar phẽs wai sĩerr aawai ĩchab magʉmjã igbajim aajem. Mag nʉm ee irua ʉ̃gthaag oowai, Ẽwandamta edjã weeudʉ wejom ee ich wajaugau bʉ̃ʉmjo sim oo athajim anaabá. Maagwai i bigaau Jesuuta ĩchab ich Ẽwandamjo nem jua theeg oo dʉnʉmjã oojim aajem.

Romanos 14:17

Wajapcharan Ẽwandamag dich Porkhapi nʉm chan, sĩi nem khĩirpierr thach kho nʉm khaba, ni nem khĩirpierr do nʉmjã khabam. Ẽwandamag ʉdʉraa dich Porkhapi nʉmʉn, irua nem khõsimjo waunaa dich khapeen dʉijã khõinaa nʉm dʉi ich Ẽwandam Akhaar gaaimua onee wenʉrrʉmʉu.

Romanos 15:13

Judionaan khabam khʉʉn, maguata muan mag ichdeu maach dʉi wajapha ajujã khaphʉ apiejem ag Ẽwandamagta pãar kõit jeeu chirʉm, pãrau chadcha ʉkha naawai onee apinaa khõinaa nʉm dʉi warag mag ichdeu maach dʉi wajapha aju a simta pãragjã ich Akharauta ʉ̃rcha khĩirjupimkhĩir.

Romanos 15:16

Jesucristo chogkhapinaa judionaan khabam khʉʉnag ich iek jaaumkhĩirta mʉ jʉr autarr aawai. Magtarr aawai mʉ phidagan judionaan khabam khʉʉnagta maach peerdʉajem iek jaau nʉmʉu. Mag jaau chitʉmua ʉu ʉkhapi athaawai ich jãg Ẽwandamag ofrenda deejemjo muajã mag chi ʉkhamam khʉʉnta irig dee chirʉm. Pari mua mag ofrendajo Ẽwandamag dee chirʉm a chirʉmʉn, Ẽwandamau am aum khõsi aaujem igwiata mag chirʉm, ya chi Akharauta i athee wajaug paa wai sĩewai.

Romanos 5:5

Mag i khĩircha ooju khĩirju nʉmʉn, ich Akhaar maachig deetarraujã chadcha ichdeu maach daupii wai sim khaphʉ api sĩewai ichiita i oob khaba ooju khaphʉ nʉmʉu.

1 Corintios 12:3

Magua ĩs khĩirjuawai, ãbmua khãijã chadcha Ẽwandam Akhaar jua theegauta i iek jaau nʉrrʉm khai, pod Jesús thʉ̃r thʉ̃rnaa khaigba iekhaju khaba sim. Maimua ich Ẽwandam Akharauta iekhapibam chan, pod ãbmua, “Jesuuta thumaam khʉʉn Porou” a iekhabaju.

1 Corintios 6:19

¿Pãrau khaugba nʉ, mʉg maach Cristo iek ʉkha nʉm khʉʉn mor ĩchab Ẽwandamau maachig ich Akhaar deetarr ag sĩejem dikha sim? Ẽwandam Akharan chadcha maach eeta sĩejem. Mag í maach ee sĩejeewai maach mor chan maach den khabam.

2 Corintios 13:14

Muan ãbmiecha paawai maach Por Jesucristoogjã pãar ʉu wai chitapim khõsi, maach Ẽwandam thumaam khʉʉn kha khõsi aajemʉgjã pãar eeg oopim khõsi, maimua ich Ẽwandam Akhaar maach dʉi ogdʉba khitaajemʉgjã ich jãg pãar daumaai nʉrrapim khõsita chiraajem. Ayoo keena, Pablo

2 Corintios 6:6

Ĩchab chadcha mʉchta Ẽwandam chogkha chitʉmjã õrag khaphʉ apiejem: mʉch bʉ̃ʉrjã ʉʉin wauba chirʉm gaaimua, chadcharam iekta mʉchdeu khaphʉ chitʉm gaaimua, maach khapeen dʉijã khĩir thũunaa thumaam khʉʉn dʉijã o wajapha chitʉm gaaimua, mʉch gaai Ẽwandam Akhaar wai chirʉm gaaimua, chadcha thãraucha mʉchdeu pãar khõsi chitʉm gaaimua,

Efesios 1:13

Maguata pãraujã ĩchab chadcha Ẽwandam iek chaar mʉg maach peerdʉajem iek jaau nʉm ũrwi ʉu Cristo iek ʉkhabaawai, Ẽwandamau ag nawe ichdeu deeju jaautarrjo pãragjã ĩchab ich Akhaar deejim. Mag ich Akhaar deetarran, pãarjã chadcha ich denkha wai sim khap amkhĩir ajim.

Efesios 1:17

Ʉu pãrau bʉchkhun Ẽwandam khaphʉ naab mamʉ, warag ʉ̃rʉʉchata i khaphʉnaa jãgata Cristo gaaimua pãar athee nem ajapham pom waaujẽ a khap apim khõsi chirʉm. Maguata muan maach Por Jesucristo Ayagta jeeu chiraajem, ajapcharan ich Jooi ʉ̃gthar chiraajemʉgma, pãrag ich khĩirjug deebarmua magʉm khap amkhĩir.

Efesios 4:30

Nem khaigba wau nʉm gaaimua chan oob Ẽwandam Akhaar okhĩirjuu apimiet. Ich jãg Akhaarta Ẽwandamau pãrag deebajieb, ich iek ʉkhaawai chadcha ich denkha nʉm a khap amkhĩir. Mag i Akhaar wai naawaita mʉg atag mʉig eegar wenʉrrawi ich aarcha phe atham edjã chadcha ich denkham iek ich denkha wai sĩsiju.

1 Tesalonicenses 4:8

Magtarr aawai chamʉg nem wajapha wau nʉmta iseg sim wounaun chi jaau wenʉrrʉm khʉʉnta isegba, ich Ẽwandam ichdeu maachig ich Akhaar deejemchata iseg sim, chamʉg maachdeu jaau wenʉrrʉm iekjã i den aawai.

2 Timoteo 1:14

Ẽwandam Akhaar maach ee sĩejem ag jua theegau Ẽwandamau ich iek pʉchig jaaupitarr wajaphata jaaubá; chikhamnagjã oob chaauraa jaaupim.

Tito 3:5

Mag irua maach peerdʉ autarr chan nem ajapha wau wenʉrrarr gaaimuajã khabajim; irua maach peerdʉ autarran, sĩi ich garmua maach dau aug khaugwi ajim. Mag maach dau aug khaug nʉm aig, ich Ẽwandam Akharau maach pekau do badag barbapʉimjo thum chugpaabapäaiwaita, ya tag warr dich wenʉrraajerrjo khaba, jũrr maach khĩirjugta chi iiurig paapʉijim.

Hebreos 10:15

Mag irua õor ajaug paapʉimaajemʉn chadcharau a khap apieg, Ẽwandam Akharaujã nawe ich Ẽwandamaucha iekhatarr igwi,

Hebreos 2:4

Mamʉ magpaijã khaba, mag maach peerdʉajem iekhan chadcharau a khap amkhĩir, ich Ẽwandamaucha mag ich iek jaau durrum khʉʉnag õorjã dau daau monaaupi maajeejim. Mag nʉm dʉi ĩchab ĩs ewag pawiajã ichdeupai ich Akhaar jua theeg gaaimua maachigjã nem khĩir pogkhe waupiejem, magʉm gaaimua mʉg i iek jaau nʉmʉn chadcharau a khap apieg. Magua mʉg maach peerdʉajem iek jaau nʉm ũurwai par jʉ̃gʉupai ũrba ʉkhaju aai nʉm.

Hebreos 3:7

Magua oob thãar theeg amiet, eeu pãach dʉijã Ẽwandamau israelnaan dʉi arrjo adukham. Magju khãai Ẽwandam iek phã sim gaai ich Ẽwandam Akharaucha jaau simjo, “Ĩs pãachdeu Ẽwandam iek jaau nʉm ũurwai

Hebreos 9:8

Mag sim aig, ĩs Ẽwandam Akharau jaauwai, mag phadnaan dudub aajerr aigta agtha Ẽwandamag jeeu nʉwe chan Lugar Santísimo gar dubaag put parrg eu wejorr agtha weeudʉba sĩerr aawai, pod parhoobam khʉʉn Ẽwandam aarcha dubju khaba naajim a simʉu.

1 Pedro 1:12

Mamʉ mag nʉm ee ich Ẽwandamau amag khaphʉ apiejeejim ĩchab, mag amau woun beeju jaau nʉmjã amach daúa oobaju; ajapcharan maach ĩs ewagam khʉʉn athee beejuuta mag jaaujeejim. Maagjerr aawai ĩs maach peerdʉajem iek jaau nʉm khʉʉnaujã, ich ag Ẽwandam Akharauta maachig jaaupibaawai, ich mag woun beeju jaaujerr iekta maraujã jaau wenʉrrabahab. Ĩsin mag õor peerdʉ aaujem iek maadeu khaphʉ nʉm ee, Ẽwandam chognaan angelnaanaujã agtha khaugba naawai, amau khaugam khõchaaga aajem, jãga mag Ẽwandamau õor peerdʉ aaujẽ.

2 Pedro 1:21

¿Jãgwi? Warr phãawaijã ich Ẽwandam Akharau jaaumamta phãtarr aawaima. Ẽwandam i jaaumienau bʉ̃ʉrjã sĩi amach khõchagpierr phãm khõchgauta phãbajierram. Amaun ich Ẽwandamau amachig khĩirjug deemampierrta phãmaajeejim.

1 Juan 2:20

Pari pãragjã Cristoou ich Ẽwandam Akhaar chaar deetarr wai naawai mua khaphʉ chirʉm pãrau jãgbaju. Mag pãrau chadam iek khaphʉ naawai jãg warm khʉʉn denjo i ichaaur abaju.

1 Juan 2:27

Pari pãrau ich Ẽwandam Akhaarta pãach thãar ee wai naawai muata pãrag jaauju khaba chirʉm, mag pãar thãar ee simuata ichdeu khap pãrag jaaumaawai. Irua nem jaau sim chan seukhaa khaba chadcharau. Maguata ich chi Ẽwandam Akharau pãachig jaaujemjo Cristo dʉita ogdʉba ich jãg nʉisit.

1 Juan 5:7

Aragan biek numí ich Chaai iche sim õrag ich iekcha ũrpijim ʉ̃gtharmua: i por choo naawai maimua ya thõopʉyaag pakuls gaai i wai naawaijã agjo ũrpijim. Maimua ĩs ewag pawiajã ich ag iekpaita Ẽwandam Akhaar maach thãar ee simuajã khaphʉ apiejem, í chadcha Ẽwandam Iewaakha sim.

Judas 1:20

Hermanonaan, pari pãrau ʉkhatarr iek ich Ẽwandamauta khaugpitarr aawai bʉ̃ʉrjã mʉg eegarm khĩirjugjo khaba sim. Magua muan pãragan ag iek gaaita pãach khapeenjã agdaujo bãaupiju ẽkhabat a chirʉm. Pãach Ẽwandamag jeeuwaijã ich Ẽwandam Akharau jeeupi simjota jeeubat.

Apocalipsis 2:11

Magnaa ichdeupai, “Ar jʉ̃g ʉ̃rʉʉ nʉm khʉʉnau Ẽwandam Akharau mʉkhʉʉn iglesiaag jaau sim ũrbat” a sim. Ar ogkhaba ʉu magʉm thum ãwatpʉi nʉm khʉʉnan, warm khʉʉn khĩmie durr wet thʉnʉm daar, Ẽwandamau jũrr ich aarta phe auju aajem.