San Juan 13:1 - Wounaan Meu

¹ Ya phiesta Pascua anʉm burrju khãai ãbpai waaur sĩejim. Maagwai Jesuu khaphʉ sĩejim, ya ichdeu mʉg durr werpʉawi deeu ich Aai dʉi ãba sĩeimaju ed pabaadem. Thum mʉg jẽb gaai maar ich denkha durrarr khʉʉnan bʉ̃ʉrjã chig aba jãsehne aajeejim. Maagjerr aawai ya ãbmiecha amau i thõoju ed paawaijã agtha ichdeu maar khõsi sim khaphʉ apijim.

Woun Meu

¹ Ya p'iesta Pascua hanʌm burrju k'ãai hãbpai waaur sĩejim. Maagwai Jesuu k'ap'ʌ sĩejim, ya hichdëu mʌg durr werpʌawi deeu hich Haai dʌ̈i hãba sĩeimaju hed pabaadëm. T'um mʌg jẽb gaai maar hich dënk'a durrarr k'ʌʌnan bʌ̃ʌrjã chig haba jãsehne haajeejim. Maagjerr haawai ya hãbmiecha hamau hi t'õoju hed paawaijã hagt'a hichdëu maar k'õsi sim k'ap'ʌ hapijim.

San Juan 13:1 Iomraidhean Croise

San Mateo 26:45

Maimua ũwaai oon beewaijã agtha ich khapeen khãidʉtkha thʉnʉm oobaichee amag, —¿Agtha pãar sĩi khãi gaaita nʉ? ajim anʉm. Ya pekau pom sĩsidʉm khʉʉnag mʉch chi Emkhooi Iewaa pʉr deeju ora pabaichebahab.

San Mateo 28:20

Mag nʉm dʉi ĩchab mua pãachig jaaujerrjo Ẽwandamau nem waupi jaaumamta i ipierraa waupi jaaubat ajim, ich jãg pãachdeujã mʉ ipierr wenʉrrʉmjo. Mʉʉn mʉchin Jooirau mʉg durr i agkha nʉm aar ich mag ed eepierr pãar dʉi chitajugui a jaau pʉajim maachigcha.

San Lucas 22:53

Ẽwandamag jeeujem deg ed eepierr pãar dʉi mʉ chiraawai, bʉ̃ʉrjã pãrau mʉ chig aba aajerrta, ĩsta Ẽwandamau pãrag ʉdʉraa mʉ pʉr aupiju ed ajim. Maagwai ĩsta ĩchab chi dosãtjã pãar ʉ̃rpaju ed ajimgui ajim anʉm, mʉ pʉr aumkhĩir.

San Lucas 9:51

Ya Jesús deeu ʉ̃gthar ich Aai aar maimʉʉ aadeewai warag thãar phĩiuwia ogkhaba Jerusalenag petajim aajem.

San Juan 11:55

Mag phobor Efraín anʉmʉg weetwai judionaan phiesta Pascua aajem burrju dakpapa khajim. Amach i arr aawai, mag phiesta ʉ̃rʉʉ arr aawai, õor pom Jerusalenag erereu khajim, Pascua burrju nawe khĩir khaugaag, amach jooinau jaaujerrjo domer nʉmua amach khaibag barpäain.

San Juan 12:23

Mag wetwia judionaan khabam khʉʉnau ich jʉr wenʉrrʉm a jaaubaicheewai amjã peerdʉ awaag ʉdʉraa ich thõopiju jaaubaademua magjim: —Ya ĩsta chadcha mʉch chi Emkhooi Iewaa chikhamnau thõoju gayaa pamamgui ajim, mag amau mʉ thõobarmua mʉchta Ẽwandamau thumaam khʉʉn khãaijã ʉ̃rpai apieg.

San Juan 13:29

Ich chi Judaauta maar thumaam khʉʉn phatkhon dijã wai nʉrraajerr aawai maraun sĩita irig phiesta ee nem igjuuta per awaan mamkhĩir jaau simpii naajim; wa magbam khai, aphʉʉm khʉʉndamag khãijã ag eem deepi jaau sim khãijã anaajim.

San Juan 13:3

Jesuu khaphʉ sĩejim, ich Ayau ichigta nem thum jaaunaa ʉ̃gtharmua ich pʉitarr aawai deeu i aar maju.

San Juan 13:34

pãrag iek iiurta jaau pʉakhim. Ma, mʉgaugui ajim: Jũrr agdaujo chikham kha khõsi abat. Mua jãg pãach khõsi wai chitʉmjo, pãraujã agjota pãach khapeen kha khõsi abat.

San Juan 14:28

Pãrau mʉ iek ũrjierramgui ajim, mʉ mʉch Aai aar mawia deeu pãach aig beeju a chirʉm, pãar dʉi chitaag. Pãrau chadcha mʉ khõsi nʉm akhiin, mag mʉ mam a chirʉm ũrwiajã pãar onee naakhamgui ajim, mʉch Aai mʉch khãaijã ʉ̃rpai sim dʉita chiraimaawai mʉch Aai dʉi ãba mʉchpata õrau tho iekhaju aawai.

San Juan 14:31

Pari ichiita ich mag ʉdʉraa mʉch thõopiju aai chirʉmgui ajim, mʉch iek ʉkha nʉm khʉʉnau mua chadcha mʉch Aai khõsi chitaawai ichdeu mʉchig jaautarrpierrta wau chitʉm khap amkhĩir. Mag iekhapʉiwia warag, —Maachta mʉigmua wettarraugui ajim.

San Juan 16:28

Mʉʉn chadcha mʉch Aai aar i dʉi ãba chirawiata mʉg durr gaai beejim. Magtarr aawai mʉg durr pʉawia ũwaai mʉch Aai aar maagpamgui ajim.

San Juan 17:1

Maimua mag jaau dichwia ʉ̃gthaag eerpanaa ich Ayag magjim: “Tata, ya ag ora pabaadem. Mʉg pʉch ipierraa chirʉm gaaimua chadcha pʉch Iewaakha chirʉm õrag khaphʉ apibá ajim, magbaawai muajã ĩchab pʉchta amag tho iekhapieg.

San Juan 17:16

Tata, pua khaphʉ simgui ajim, mʉ mʉig eegarm khaba chirʉm. Magua mʉ khapeenjã ya sĩi mʉig eegar parhoobam khʉʉnjo khaba thʉnʉm, am mʉ dʉita wenʉrraawai.

San Juan 17:26

Ya mua amag jaaujim, pʉ jãga sĩerrʉ́. Pari ichiita warag mua amag ich jãg jaau chitajugui ajim, ich jãg pʉchdeu mʉ daupii wai simjo amaujã jũrr agdaujo amach khapeen kha khõsi amkhĩir. Amag magamkhĩran, mʉchta am dʉi chitajugui” a iekhamajim ich Ayag maar kõit.

San Juan 17:5

Nau mʉgtarr khur deeu mʉ pʉch aar pabaimaawai, warr mʉg durr ompaaju nawe mʉchta pʉch dʉi ãba nem iek theeg chi Porkha chirarrjo, ũwaai mʉrʉg agjo iek theeg apinaa chi Porkhapibá a jeeumajim ich kõitpai.”

San Juan 18:4

Pari mag beewia amau ich dʉi magcheju ich Jesuu khaphʉ sĩerrjã, warag am khĩirphee mawia amag, —¿Pãar khaita jʉr wenʉrrʉ́? a jeeujim amag.

San Juan 19:28

Mʉg jẽb gaai ichdeu nem wauju arr thumaa ya ichdeu waubarm khaphʉ sĩerr aawai mag mʉrʉg ich ãd mʉch dʉi wai joothʉmkhĩir jaautarr khur nʉʉ awia, —Mʉ obichaaga thʉnʉmgui ajim chi Jesuu. Pari magtarran ag nawe Ẽwandam iek phã sim gaai jaau simjo ich mag iekhaju atarr aawai ajim.

San Juan 2:13

Judionaan phiesta Pascua aajem burrju gayaa arr aawai Jesús Jerusalenag majim.

San Juan 6:4

Maagwai judionaan phiesta Pascua aajem ya burrju ʉ̃rʉʉ sĩejim.

San Juan 7:30

Amachig magbapäaiwai warag i pʉr auju khĩirjujierram. Pari agtha Ẽwandamau i pʉr aupiju ora khaba arr aawai ni ãbmuajã i pʉr auba, sĩi ich magpai sĩujierram.

San Juan 7:6

Ich eeugpeenaupai ichig magbaawai Jesuu amag, —Pãragan ora thum wajaphamgui ajim, phiesta ee maag. Pari agtha mʉch maju ora khaba sĩewai mʉʉgwaiwe chan mʉ mabamgui ajim.

San Juan 8:20

Jesuu mag iekhamarr, Aai i jeeujem deg ofrenda phewi ag ãkhaajem aigta mag iekhamajim, ichpai jaau simua. Pari agtha i pʉr auju ed khaba arr aawai mag ichpai jaau sĩerr gaaimua i pʉr aum ig narrjã ãbmuajã i pʉr aubajim.

Romanos 8:37

Pari phithurg au wenʉrrawiajã mag maach daupigau ʉdʉraa ich thõopitarr gaaimuata magʉmjã podpʉpʉi aajem; wajapcharan Cristo gaaimuama. Mamʉ mag appaijã khaba, mag phithurg ãwat nʉm gaaimuata ĩchab ich Cristoou maach khõsi aajemjã warag khapcha pamam.

1 Corintios 1:8

Mag maach Por Jesucristo beem ed ni ãbmuajã pãachdeu nem khaigba wautarr igwia pãach khĩir iekham ugua, ich mag Ẽwandamauta pãar ich dʉi ubʉ phe wai nʉrraju.

Hebreos 3:14

Pari mag Cristo dʉita khapeerkhanaa ichdeu jaautarrjo chadcha maach dʉi ʉu apim khõsi nʉm khai, magan warrcha i iek ũurwai chadcharam awi ʉkha nʉisierrta ich mag dich thõm aar ogdʉba ʉkha wenʉrraju, warrcha ʉkhatarrjo.

Hebreos 3:6

Mamʉ Cristo Jesús chan magba, Jesuun ich Iewaa chaar ichdeu pʉitarrau. Magtarr aawai ichdeuta maach ich Aai õorkhaju khʉʉn thum peerdʉ auwi ichdeuta khap sim, ichig jaautarrjo. Maata i phidag aawai i gaaimuata maach mʉg Ẽwandam denkha nʉm. Majã chadcha mag i õorkha naawai parta i iek ʉkhaba nʉm khaphʉnaa onee irua maach ich aar phe auju khĩirjugta ogdʉba wenʉrrʉmʉn mamʉ.

Hebreos 6:11

Muan ich jãgta pãrag pãach hermanonaan pãach denjo ʉkha nʉm khʉʉndam daupii wenʉrrapim khõsi chirʉm, ich jãg pãachdeu am dʉi nʉmjo, mag wenʉrrʉm gaaimua pãach i dʉi naaimaawai Ẽwandamau pãachig deeju khĩirju nʉmjã ich ag ee chadcha pãachdeu khĩirju nʉmjo obermkhĩir.

1 Pedro 1:13

Maach Por Jesucristo mag chi jua thierr aawaita muan pãragan, ichdeu pãachig nem mag aawai i ipierraa aagta khĩir khaug nʉisit a chirʉm, ichdeu pãach jʉraan beem ed Ẽwandamau pãach dʉi ajapha aju khĩirjugjã ogdʉba, ni Ẽwandamau waupiba aajem nemjã wauju khĩirjuba.

1 Juan 4:19

Ich garmuata nacha maach khõchkhatarr aawai ĩsin maachdeujã maadeu i khõsi nʉm.