Efesios 5:2 - Wounaan Meu

² Ich jãg Cristoou maach khõsi simjo pãraujã agdaujo pãach khapeen kha khõsi abat. Cristoou mag maach khõsi arr aawai maach daupigau pakuls gaai ʉdʉraa ich meerphe thõopijim. Ẽwandamau irua magbarm oowai ʉu sĩejim.

Woun Meu

² Hich jãg Cristoou maach k'õsi simjö pãraujã hagdaujö pãach k'apeen k'a k'õsi habat. Cristoou mag maach k'õsi harr haawai maach daupigau pakuls gaai hʌdʌraa hich meerp'ë t'õopijim. Hẽwandamau hirua magbarm hoowai hʌ̈u sĩejim.

Efesios 5:2 Iomraidhean Croise

San Mateo 20:28

Mʉ pãar khãai Emkhooi Iewaakha chirʉmjã mag sĩi mʉch garmua chikham chogaagjã beebajim. Mʉ beetarran sĩi chikhamnag mʉch chogamkhĩirta beejimgui ajim, mag chitʉmua chikham jua machgau thõowi mag thõobarm gaaimua õor pom sĩi amach pekau ee preso sĩsidʉmjo nʉm khʉʉn obeerkhapäain.

San Juan 13:34

pãrag iek iiurta jaau pʉakhim. Ma, mʉgaugui ajim: Jũrr agdaujo chikham kha khõsi abat. Mua jãg pãach khõsi wai chitʉmjo, pãraujã agjota pãach khapeen kha khõsi abat.

San Juan 6:51

Mʉchta mag pan ʉ̃gtharmua beetarr õor iiupiejem khabahab ajim. Mag panta kho simʉn ich magta iiu sĩsiju. Mamʉ mag panjo mua pãrag deeju a chirʉmʉn, thumaam khʉʉn iiu wenʉrraju aai amkhĩir am kõit ʉdʉraa mʉch thõopijuuta jaau chirʉmgui ajim.

Romanos 15:16

Jesucristo chogkhapinaa judionaan khabam khʉʉnag ich iek jaaumkhĩirta mʉ jʉr autarr aawai. Magtarr aawai mʉ phidagan judionaan khabam khʉʉnagta maach peerdʉajem iek jaau nʉmʉu. Mag jaau chitʉmua ʉu ʉkhapi athaawai ich jãg Ẽwandamag ofrenda deejemjo muajã mag chi ʉkhamam khʉʉnta irig dee chirʉm. Pari mua mag ofrendajo Ẽwandamag dee chirʉm a chirʉmʉn, Ẽwandamau am aum khõsi aaujem igwiata mag chirʉm, ya chi Akharauta i athee wajaug paa wai sĩewai.

Romanos 4:25

Mag maach Por Jesuuta Ẽwandamau maach pekau paar õrag ʉdʉraa thõopijim, mag thõotarrta deeu phiriu athamua maach pekau chugpaapäaig.

Romanos 8:3

Wajapcharan mʉgta ajim: Moiseeu phã pʉatarrau pod pekau jua eemua maach khaigper aubajim, mag pekau maach dʉi thaabatarr gaaimua pod mag ley ʉʉrkha auba arr aawai. Pari Ẽwandamau magbajim. Ẽwandamaun ich Iewaachata maach wounaan khĩir thegwia pʉijim. Mag ich mʉg maach chi pekaupanjo khitajieb mamʉ, bʉ̃ʉrjã pekau waubajim. Mag pʉiwia maach khaibag kõit thõopibarmua, maach gaai aju arrta warag ich Chaai gaaita ʉdʉraa mas apijim, magbarmuata jũrr mag pekau maach dʉi jua theeg sĩerrta warre jua theeg chukhu apäaig.

Romanos 8:37

Pari phithurg au wenʉrrawiajã mag maach daupigau ʉdʉraa ich thõopitarr gaaimuata magʉmjã podpʉpʉi aajem; wajapcharan Cristo gaaimuama. Mamʉ mag appaijã khaba, mag phithurg ãwat nʉm gaaimuata ĩchab ich Cristoou maach khõsi aajemjã warag khapcha pamam.

1 Corintios 16:14

Pãach eepai nem waauwaijã, thumaa dich khapeen kha khõsinaa am ʉu apiegta nem waubat.

1 Corintios 5:7

Pãrau khaphʉm, phiesta Pascua ee paawai levadura thum barkhʉʉijem. Ich agjo khabahab Cristo meetarr gaaimua maach khaibag chugpaa athamjã. Mag sĩewai mag levadura denjo pãach thumaam khʉʉn ãrpi sim woun warre pãach eemua chawag jʉrbapʉit. Mag jʉrbapäaiwain chadau Pascua ee khoog pan levadura chukhu wau simjo pãar eejã mag khaigba nʉrrjeem gaaimua levadura denjo bigaaum khʉʉnpa ãrpiju khʉʉn chukhu aju.

2 Corintios 2:14

Pari ʉu ajim a chirʉm Ẽwandamag, Cristo dʉi khapeerkha naawai nem phithurm nemjã i gaaimuata ʉu maach garmua podpʉpʉi aajem paar. Maguata ĩs maach wenʉrrʉmpierr Ẽwandam iek jaauwaijã, warpham magwe jʉ̃gdee thʉ̃ap wejomjo, jũrr maach gaaimuata õrag ich khaugpi sim.

2 Corintios 2:15

Ẽwandamau oowai maach i iek jaau wenʉrrʉm khʉʉnan incienso warpham magwe thʉ̃ap wejomjota oojem, mag i iek aaidʉmkhĩir jaau wenʉrrʉmua. Mag nʉm gaaimuata chi peerdʉju khʉʉnan peerdʉ nʉm, maagwai chi peerdʉbaju khʉʉnan amachdeu khõs ʉkhaba awia sĩi okhoo thʉnʉm.

2 Corintios 8:9

Pãrau ni ãbmuajã meraa khaba nʉm, jãga maach Por Jesucristojã Ẽwandam dʉi ãba sĩerr aawai dau aphʉʉ khaba sĩerrta ich khĩrau mʉg jẽb gaai beewia dau aphʉʉ ajĩ maach gaaimua. Pari juau ogthom mag ich dau aphʉʉ apitarran, ich magbarm gaaimua jũrr Ẽwandamau maachta ich Cristo dʉi ãba wenʉrramkhĩir ajim. Magua Cristo gaaimua maach khodkha nʉm khʉʉn dau aphʉʉ oowai am dau aug khaug paraa abat.

Gálatas 1:4

Pãrau khaphʉ nʉm, Jesucristo khurau khabamuan maachin agtha maach pekau eeta wenʉrraajeekham. Mamʉ magba maach Ẽwandam anaa maach Ayau ichdeu khĩirju wai sĩerrjo Jesucristoouta ʉu ʉdʉraa ich thõopijim maach kõit, magbarmua pekau jua eemua maach peerdʉ awaag.

Gálatas 2:20

Maguata nem khaigbam wawaagan mʉʉn nawe Cristo thõo naawai i dʉi ãba pakuls gaai thõrrjota chirʉm, magʉm ley ʉʉrkha nʉmuata tag mʉch peerdʉjujã khĩirjuba. Pari tag warramjo mag khĩirjuba chirʉmʉn mʉch khĩraupai khaba, Cristo mʉ thãar ee sim ag juapaauta mʉrʉg magpi sim. Maguata Ẽwandamau khõsimjo wawaag ich Iewaa Cristoou mʉchig juapá deeju khĩirju chirʉmuata nem wau chitʉm, chadcha ichdeuta ich garmua mʉ khõsi awi mʉ kõitjã ichta thõopitarr aawai.

Efesios 1:4

Pari mag maach dʉi ajapha sim chan sĩi eeupemjo khĩirju auwi khaba, warr mʉg jẽb ompaaju nawe Jesucristo gaaimua ich Ẽwandamau ya maach ich denkha auju khĩirju wai sĩerr aawaita maagjem, ich dau na tag kulpjã chukhu sĩi ich atheepaita ichdeu khõsimjo wenʉrramkhĩir. Mag warrgarwe ich garmua maach khõsi arr aawaita

Efesios 3:17

pãachdeu ʉkha nʉm gaaimua Cristojã pãar thãar eeta sĩepim khõsi chiraajem; irigta pãar kõit jeeu chiraajem, mag Cristo gaaita ubʉ naawai agdaujo dich khapeen kha khõsi ajujã khaphʉnaa,

Efesios 3:19

Mua khaphʉ chirʉm, chadcha mag irua maach khõsi sim chan pod maadeu thumaa khaugbam. Pari ichiita pãar kõit jeeu chirʉm, Cristoou maach thumaam khʉʉn khõsi aajem a khap amkhĩir, maagwai ĩchab Ẽwandamta pãach gaai phẽs wai naawai ichdeu pãach dʉi ajapha am ig simjo aju ayaa amkhĩir.

Efesios 4:15

Mag ʉdʉraa parhoobam khʉʉnag dich khũgurpiju khãai, warag Cristo iek chaar maachdeu khaugtarr gaaita ubʉ naaju aai nʉm. Pari magaag atheyan dich khapeen kha khõsinaa am dʉi chadam iekpaita ig wenʉrrʉm dʉi Cristota maach Por aawai i khĩirjugta aumamua warag dau thethe paaukhamaju aai nʉm.

Efesios 4:2

Pãachta warm khʉʉn khãaijã chi serbiibacharamjonaa khĩir thũu abat; chikhamnau dich dʉi parhooba aawaijã sĩi khĩu ãwatpʉinaa jũrr agdaujo dich khapeen kha khõsita abat.

Efesios 5:15

Maguata muan pãragan agpierraata wenʉrrathʉ̃ a chirʉm, Ẽwandamau khõsimjo. Sĩi jãg nem jaau nʉmjã ũrba wenʉrraju khãai khĩirjugdam paraata aajeethʉ̃.

Efesios 5:25

Ich jãg Cristooujã ich iek ʉkha phobaadeewai ich iglesiakha nʉisiju khʉʉn daupigau am kõit ichta thõopitarrjo, pãach chi emkhooinaujã pãach ʉʉin daupii abat.

Filipenses 4:18

Ʉu ajim keena. Ar pãrau mʉ athee Epafrodito gaau phatkhon deepʉitarr thum ʉu agcha kherajim. Ajapcharan mʉchdeu ig chirarr khãyaujã ʉ̃rʉʉchata pãrau deepʉijierram. Jãg pãrau mʉrʉg phatkhondam deepʉitarran Ẽwandamau oowaijã ʉu kherʉm, ichigchata deebarmjo aawai.

Colosenses 3:14

Pari mag mua jaau chirʉmjo wenʉrraagan, pãach khapeen daupii aju khĩirjugta ʉdʉraa pãach gaai ʉ̃rpapibat. Magta amʉn, pãachjo dʉi ʉkha durrum khʉʉn thum Ẽwandamau oowaijã i dawagaa wenʉrraju, o ãba.

1 Tesalonicenses 4:9

Mʉg Ẽwandam iek ʉkha nʉm gaaimua khodkha thʉnʉm khʉʉn aphajã warag chikham kha khõsi amkhĩir chan mua tag pãrag bʉ̃ʉrjã jaaupʉibam, ich Ẽwandamauchata ya pãar mag khõsi wenʉrraa khaugpi sĩewai.

1 Timoteo 2:6

Mag thumaam khʉʉn peerdʉ awaagta ʉdʉraa ich thõopijim, magbarmua Ẽwandam dʉi mag pekau gaaimua iekkhõr pom narr thum ichdeupai phag obeerpʉyaag. Mag Jesús thõotarr gaaimua maadeu khaphʉ nʉm, chadcha thumaam khʉʉnta Ẽwandamau peerdʉ aum khõsi sim.

1 Timoteo 4:12

Pʉch ẽwanaa chiraawai jooinagpa pod mag jaauju khaba chirʉm awia, oob ʉdʉʉr amag pʉch kha isee apim. Mag pʉch kha isee apim ugua, thumaam khʉʉn daar agpierraa chitá; maagwai chi ʉkha durrum khʉʉn eejã jooinaupa pʉch mag oowai ĩchab jãgata amjã wenʉrraju aai nʉ a khap aju. Magnaa thumaam khʉʉn kha khõsinaa Ẽwandam iek pʉchdeu ʉkha chirʉmjã ogdʉba ʉkha chitá. Ĩchab pʉch iekhaawaijã, nem agchata iekha chitʉm dʉi pʉchdeu nem jaau chirʉmjã sĩi par iiupai khaba pʉchdeu jaau simjota abá thumaam khʉʉn dakhĩir. Oob pʉchdeu nem jaau chirʉm ichaaur nem bʉ̃ʉr abarm gaaimua khãijã pekau paarpa chitam.

Tito 2:14

Ich mag Jesucristota maach kõit ʉdʉraa ich thõopijim, magbarmua maach khaibag thum chugpaapʉiwia maach peerdʉ awaag, mag peerdʉ auwia ya ich den chaarkha nʉisiewai jũrr ãba ich atheepaita nem ajapha waum khõsi wauju khĩirju wenʉrramkhĩir.

Hebreos 8:3

Ich jãg phadnaan poroujã Ẽwandamag nem inagdam deenaa nemchaain khechnaa õor kõit Ẽwandamag jeeumkhĩirta jʉr aaujeewai, Jesucristooujã ĩchab am denjo Ẽwandamag nem inag deeju aai sĩejim, mag phadkhanaa maach kõit iekhaajem khaag. Maagjerr aawai iruajã chadcha deejim; mamʉ irua ichpaita nem inagdamjo deejim.

Hebreos 9:14

Mag nemchaain bagaupai deeu Ẽwandamag jeeuju ayaa apiejerr khai, magan Cristo bag chará ag khãaijã ʉ̃rcha jua theeg sim, maach thãarpa Ẽwandam dau na ajaug paapäaig. Pari magaagan, Cristo meejã meeba ich mag sĩerrʉmta wounag pawi ichdeupai ichta nemchaai chi ajapcharamdamjo ʉdʉraa ich thõopijim maach kõit. Magtarr aawai i bagauta dich khĩirjug khaibag gaaimua maach okhoopijojoomjã warre chugpaapäaijem, ãba Ẽwandam chadcha ich mag iiu sĩerrʉmʉgta jeeu wenʉrramkhĩir.

Hebreos 9:23

Mag, sĩi ʉ̃gthar Ẽwandam khĩircha Jesuu maach kõit iekhaajemjota aju ẽkha durrarr aawai ichiita amau mag nemchaain khechnaa ag bagauta Ẽwandamag jeeuju aai naajim. Mamʉ ʉ̃gthar chan mag mʉig eegarmjo sĩi nemchaain bagpai khaba ag khãaijã ajapcharamta ig sĩejim.

Hebreos 9:26

Maataa, mag biek ãbpai ich thõopibarmua nemchaain bag denjo pod õor pekau chugpaa auba arr amuan chad, phadnaanau biek khapan nemchaain kheechjerrjo mʉig jẽb gaai õor nʉisierr aigmua agjo biek khapan õor pekau paar ich thõopienjã udkhʉrrkhakha aajeekham. Pari magba ĩsta ya Cristo udthurwi biek ãbpai warrgarm khʉʉn kõitpa ich thõopibarm. Mag ich thõopibarmuata mag nemchaain kheechjerr tiempojã opʉiwi ya jũrr õor peerdʉju ayaam jaar khabapʉim.

1 Pedro 4:8

Pari ʉ̃rcha dich khapeenta daupii abat. Mag chadcha am daupii wai nʉm chan, maach dʉi biek khapan khaigba awiajã, am dʉi magʉm iek igba sĩi warag am perdonaaju.

1 Juan 3:16

Jesucristoou maach kõit ich thõopitarr gaaimuata maadeu khaphʉ nʉm, khan agá dich khapeen kha khõchag. Mag maach daupigau ich thõopitarr aawaita maachdeujã agjo Cristo gaaimua dich khodkha durrum khʉʉn kõit am daupigau dich thõopiju akhiinjã agjo ʉdʉraa dich thõopiju aai nʉm.

1 Juan 3:23

Irua maachig waupi jaau simʉn ãba ich Iewaa iekta ʉkhapi simʉu; mag nʉm dʉi ĩchab ich Jesucristoou waupi jaautarrjo agdaujota dich khapeen kha khõsi api sim.

Apocalipsis 5:9

Makhʉʉn jooin mag thʉkhokhood thʉnʉmua chi Cordero thumeukharmamua meukhaar iiurta au naajim. Amau meukhaar au narr mʉg ajim: “Pʉchdeupaita ãba jãg ẽsap jua ee auwi chi khaar sĩsidʉmjã thʉrreu werbaju aai sim, pʉchta thumaam khʉʉn kõit ʉdʉraa pʉch thõopitarr aawai. Pʉch thõo nʉm aig bag ãrtarrauta pua õor durrpierram khʉʉn amach meupierr Ẽwandam athee perkha aujim.