Apocalipsis 5:6 - Wounaan Meu

⁶ Mʉchig magbaa mua oo nʉʉ aawai, chadcha mag sĩi khanjo dau jayap ich paar sĩsidʉm bigaau jooin ohood wejom jãrr, ar corderodamjo ʉdʉraa ich thõopiwia deeu iiutarrta oothẽu kherajim; ajapcharan ich Jesuma. Amau i thõo naawai pa gaai meerphetarr agtha merag chukhu sĩejim. Mag khitʉmʉn sĩi kach khapan sietenaa dau khapanjã agjo siete phuphup sĩejim. Makhʉʉn dau khapanag siete nʉmua chi Corderoou Ẽwandam Akhaar gaaimua nem thum khaphʉnaa durrpierr oo phe wai sĩejemta jaau sim.

Woun Meu

⁶ Mʌchig magbaa mua hoo nʌʌ haawai, chadcha mag sĩi k'anjö dau jayap hich paar sĩsidʌm bigaau jöoin hohood wëjöm jãrr, har corderodamjö hʌdʌraa hich t'õopiwia deeu hiiutarrta hoot'ẽu k'ërajim; hajapcharan hich Jesuma. Hamau hi t'õo naawai pa gaai meerp'ëtarr hagt'a merag chuk'u sĩejim. Mag k'itʌmʌn sĩi kach k'apan sietenaa dau k'apanjã hagjö siete p'up'up sĩejim. Mak'ʌʌn dau k'apanag siete nʌmua chi Corderoou Hẽwandam Hak'aar gaaimua nem t'um k'ap'ʌnaa durrpierr hoo p'ë wai sĩejemta jaau sim.

Apocalipsis 5:6 Iomraidhean Croise

San Lucas 1:69

Warrgar pʉ chog David khakhitarr ag chaain ewagam khʉʉn eemta pua chi jua thierr maar athee pʉibapʉim, maar peerdʉ aumkhĩir,

San Juan 1:29

Mag ichig jeeuchetarr khʉʉn dʉi iyʉʉ sĩerr noram Juanau oowai, mag irua amag jaau sĩerr Jesuuta i aig ur nʉrrajim. Mag ich aig urum oo athaawai ich aig narr khʉʉnag, —Pãade oobat ajim: Ẽwandamau pʉitarr ar ur khitʉm. Jãguata corderodamjo ʉdʉraa ich thõopibarmua õor thumaam khʉʉn pekau chugpaa aujugui ajim.

San Juan 1:36

Mag maig maar nʉmta, Jesús dich nʉrrʉm oobaawai maar maestroou, —Pãade oobat: Jãata Ẽwandamau pʉitarrauwai ajim, corderodamjo ʉdʉraa ich thõopibarmua õor peerdʉ aumkhĩir pʉitarr.

Hechos 8:32

Mag chadcha jupimawi irua Ẽwandam iek thʉ̃r jorrarr gaai oowai mag sĩejim aajem: “Ovejadam chi thõojem di aar arrjemjo thõopäain arrjierram. Mamʉ jãg ovejadam khĩeb ich khaar thar arrumjã khĩuu kheraajemjo, ich jãg bʉ̃ʉrjã i ãaba khitajim iek chigaa iekhaag.

Apocalipsis 1:4

Mʉʉn Juanau. Muata mʉg ẽsap phã deepʉi chirʉm Asia durr phobor siete nʉm ee Ẽwandam iek ʉkha nʉm khʉʉnag. Mua pãar kõit jeeu chirʉm, ichta warrgarwe ich mag sĩerranaa mʉg atagjã ich mag sĩerraju igwia, ich khu juupjem khĩirphee ich Ẽwandam Akhaar sĩerrʉm igwia, maimua Jesucristo chadam iek chaarcha jaauchetarr igwiajã jeeu chirʉm, pãar dau ee aug khaug paraanaa pãar ʉu wai nʉm dʉi ĩchab pãar khõinaa wai wenʉrramkhĩir. Mag Cristota meeba arrjo nacha iiu phiidʉwia mʉg reinaan thʉnʉm khãaijã iek theeg ʉ̃rcha sĩerrʉm. Ich ag Cristota maach daupigau ʉdʉraa ich thõopijim. Magbarmua maach khaibag chugpaapʉiwia

Apocalipsis 12:11

Maimua jẽb gaaijã maach khodamnaanau amach garmuata mag mepeer podbapʉim, corderodamjo ʉdʉraa ich thõopitarr iekta ʉkhawia ag bagauta Ẽwandamag amach khaibag ʉpi nʉmua. Mag nʉm dʉi ĩchab amach dau aphʉʉ khechjujã igba, warag ogkhaba i iekta jaau durrarr gaaimuapata chadcha amach garmua i podpʉijierram.

Apocalipsis 13:8

Mag mepeer khumjo jojothor simʉgta mʉg atag paawai Ẽwandamagamjo jeeuju, ar thum Corderodam ʉdʉraa maach kõit ich thõopitarrau warr mʉg jẽb ompaabarwe ich ẽsap gaai am thʉ̃r phãkha auba arr khʉʉnau. Makhʉʉnta mag mepeer igar naaju aawai makhʉʉnauta maach chi Ẽwandam iek ʉkha nʉm khʉʉn dau aug wauju.

Apocalipsis 14:1

Magtarr khur mua oo nʉʉ aawai ich Jooi chi Cordero chaarta durrsĩ Sión anʉm gaai oodʉnʉm mua oojim; ajapcharan ich Jesuma. I dʉi õor khapan ciento cuarenta y cuatro mil naajim. Mag Cordero dʉi nʉm khʉʉnan ĩchab thumaam khʉʉnau i thʉ̃rta i Aai thʉ̃r dʉi amach dag gaai phãkhanaa ag panhappha sĩsid ajim.

Apocalipsis 17:14

Mamʉ chi Corderoou ich garmuata amach thum podpʉiju, ichta mʉg durr gaai chi thierrnaan thum thʉnʉm khʉʉn Por anaa reinaan Rey aawai. I dʉi thʉnʉm khʉʉnan, ich Ẽwandamaucha jʉr auwi amachdeu ʉkhatarr iek thãraucha ʉkha wenʉrrʉm khʉʉnau.

Apocalipsis 21:22

Mag phobor ee mua bʉ̃ʉrjã Ẽwandamag jeeujem di oobajim, ich maach Por Ẽwandam thumaam khʉʉn khãaijã jua theeg ʉ̃rpai sĩerrʉmpaita Ẽwandamag jeeujem di anaa ĩchab ichpaita chi Cordero aawai.

Apocalipsis 21:23

Ich Ẽwandamaupaita ich mor gaaimua arar wʉʉ jẽer wai sĩewai mag phobor chan mʉg ãsdawam edaujã chukhu ni edaram edaujã chukhu sim. I lamparaan ĩchab chi Corderodampaiu.

Apocalipsis 22:1

Mag oopitarr khur chi Ẽwandam chogau mʉrʉg dosĩg dau bʉ̃ʉ khitʉmjã oopijim, õor iiupiejem dosĩg. Mag dosĩg sĩi vidriojo sim Ẽwandam khu juupjem Cordero dʉi sim aarmuata ober sĩejim.

Apocalipsis 22:3

Mag phobor ee chan Ẽwandamau khõch khaba aajem nem wau nʉm gaaimua irua mas deeju ayaam khʉʉnjã chukhum aajem. Ich Ẽwandamta Cordero dʉi mag phobor ee chi Porkha nʉisiju anaabá. Maagwai chi chognaan mag irig jeeu nʉm khʉʉnaun,

Apocalipsis 4:8

Mag sĩsidʉmʉn amach jayapwe sĩi nem ich khapan agdaujo seis wai sĩsid ajim, amachpierr. Ierr jãgarm magwe dau phuphupnaa ʉ̃rjã sĩi dau khapan phuphup sĩsid ajim. Amach makhʉʉnau bʉ̃ʉrjã ijeeuba edaram magwe Ẽwandam tho iekhamamua, “Ẽwandam, pʉjo bʉ̃ʉrjã pekau chukhum khʉʉn chan ooba aajem” anaajim. “Pʉchta thumaam khʉʉn Por anaa thumaam khʉʉn khãaijã chi jua thierriu. Pʉchta warrgarwejã ich mag sĩerranaa mʉg atagjã ich mag sĩerraju” a tho iekhamajierram.

Apocalipsis 5:11

Maimua mua oowai, mag porkhau bigaau mag khanjo ich paar sĩsidʉm dʉi jooin ohood wejom eugar, Ẽwandam chognaan pooma sĩi sereu phʉʉrdʉ wejoojim. Mag thʉnʉmʉn chi khapanag millones y millones thʉnarr aawai, khapaana sĩi maach dau warpta pos pʉʉrthʉ, pod maadeu chi beerjujã khaugba thʉnaajim.

Apocalipsis 5:12

Mag thʉnʉm khʉʉnau thet meukhaar au nʉmua mag naajim: “Jãg Corderodam õor gaaimua ʉdʉraa ich thõopitarrauta jua theeg thʉnʉm thum auwia nem ajapham thʉnʉmjã thum auju aai sim. Ãba ichpaita thumaam khʉʉn khãaijã nem khĩirjug khaugnaa juapa theegjã ichdeupaita auju aai sim. Magnaa irig eenaa, i ooimʉgjã tho iekhanaa, irigpaita thumaam khʉʉnau jeeuju aai nʉm” a thumeukhar majierram.

Apocalipsis 5:13

Ẽwandam chognaanau mag meukhaar au dichdimaawai, ĩchab thumaa ich Ẽwandamau nem wautarr edjã ee thʉnʉm khʉʉnau, mʉg jẽb gayam khʉʉnau, khechwia ya jẽb ee nʉm khʉʉnau, maimua nem thum phũas ee thʉnʉm khʉʉnaupa ĩchab o ãba meukharau ʉ̃ʉrbabapʉimjã mua ũrjim. Mag amau ʉ̃ʉrbapʉitarr meukhaar mʉg ajim: “Ar porkhau gaai Jooi jup simʉg maimua Corderodamagjã agjo ãba pãragpaita mʉg atag paawaijã ich mag thumaam khʉʉnau jeeunaa ee aju aai nʉm” ajierram. “Pãar wajaugpaita thumaam khʉʉnau tho iekhaju aai nʉm. Magnaa, ‘Pãachta mʉg atag pawiajã thumaam khʉʉn khãaijã ich mag jua theeg nʉm’ aju aai nʉm” ahaug majierram meukharaupai.

Apocalipsis 5:14

Magbaawai mag khanjo ich paar sĩsidʉm khʉʉnau ĩchab amach paarmua o ãba, “Jãan chadcha ich magau” aajeejim. Makhʉʉnau magbarm dʉi ĩchab mag jooin veinticuatro narr khʉʉnaujã deeu jĩepor phõbkhanaa am wajaug tho iekhajierram amag jeeumamua.

Apocalipsis 6:16

Mag daumer nʉmua durrsĩigta wounaanagamjo chaigpanaa, “Jãg porkhau gaai oo simʉg maar oom ugua, maar ʉ̃r dʉrbagkhawi pãach eegar maar meer athat” anaajim.