Apocalipsis 3:5 - Wounaan Meu

⁵ Ar ogkhaba ʉu magʉm thum ãwatpʉi nʉm khʉʉnagan irua khajũa bäphämta jũapiju aajem. I iek magʉm khʉʉn thʉ̃r chan irua ich aar auju khʉʉn thʉ̃r phãajem ag ẽsap gaaimua borraapʉibam aajem. Magju khãai warre irua ich Aai dakhĩir maimua ich chognaan dakhĩirjã, “Chamʉ khʉʉnan mʉ deneu” a jaauju aajem.

Woun Meu

⁵ Har högk'aba hʌ̈u magʌm t'um hãwatpʌ̈i nʌm k'ʌʌnagan hirua k'ajũa bäp'ämta jũapiju haajem. Hi hiek magʌm k'ʌʌn t'ʌ̃r chan hirua hich haar hauju k'ʌʌn t'ʌ̃r p'ãajem hag hẽsap gaaimua borraapʌ̈ibam haajem. Magju k'ãai warre hirua hich Haai dak'ĩir maimua hich chognaan dak'ĩirjã, “Chamʌ k'ʌʌnan mʌ dënëu” ha jaauju haajem.

Apocalipsis 3:5 Iomraidhean Croise

San Mateo 10:32

’Ãb khãijã mʉ igar sĩewai õor dakhĩirjã meerba mʉ iek ʉkhaajem a jaau sim wounan, muajã ĩchab mʉch Aai ʉ̃gthar sim dakhĩir, “Jãan chadcha mʉ garmʉu” ajugui ajim.

San Lucas 10:20

Mamʉ mag mepeenjã pãach garmuata jʉmpiba nʉm awiapai chan oob onee amiet. Magarrau pãach thʉ̃rta ya ʉ̃gtharm ẽsap gaai phã sĩsim gaaimuan chadau pãar onee aju aai nʉmgui ajim anʉm, ya pãach Ẽwandam aarcha oberju aawai.

San Lucas 12:8

Mag jajawagmamua ich Jesuupai magjim anʉm: —Ar õrau ichig jeeuwai ich imeerba mʉ iek ʉkhaajem a jaau sim wounan, mʉg mʉch chi Emkhooi Iewaaujã ĩchab ʉ̃gthar Ẽwandam chognaan thʉnʉm dakhĩir, “Jãan chadcha mʉ garmʉu” ajugui ajim anʉm.

Filipenses 4:3

Maimua pʉjã, mʉch khapeer ajapham, ĩchab maach peerdʉajem iek eemua bʉ̃ʉrjã ogdʉba nʉrraajeewai pʉrʉgjã jãkhʉʉn ʉʉin wawibá a chirʉm, tag ich jãg wenʉrram ugua. Mua õor ee maach peerdʉajem iek jaau chitaawai jãkhʉʉn ʉʉinauta Clemente dʉimua tagam khʉʉn agjo mʉ dʉi ãba wenʉrrarr khʉʉnpa mʉ bʉ ogdʉba dʉi mʉ ipierr jaau durraajeejim. Mag mʉ dʉi wenʉrrarr khʉʉn thʉ̃r ya ʉ̃gthar Ẽwandamau ichdeu peerdʉ aumam khʉʉn thʉ̃r phãkhamaajem ẽsap gaai ĩchab phãkha thʉnʉm.

Judas 1:24

Pari pãar chadcha maach Ẽwandam ãbpai khitʉm den aawai oob khĩirjumiet. Ichdeuta maach Por Jesucristo gaaimua maach peerdʉ auwia, ich jua theegauta maach pekau ee burrpiba thʉanaa, maach i agkham edjã oneeta bʉ̃ʉrjã pekau chukhu phe auju, ich mag ich dʉi naamkhĩir.

Apocalipsis 13:8

Mag mepeer khumjo jojothor simʉgta mʉg atag paawai Ẽwandamagamjo jeeuju, ar thum Corderodam ʉdʉraa maach kõit ich thõopitarrau warr mʉg jẽb ompaabarwe ich ẽsap gaai am thʉ̃r phãkha auba arr khʉʉnau. Makhʉʉnta mag mepeer igar naaju aawai makhʉʉnauta maach chi Ẽwandam iek ʉkha nʉm khʉʉn dau aug wauju.

Apocalipsis 17:8

Maimua chadcha mʉrʉg jaaumamua magjim: —Jãg meperan warran mʉg jẽb gaai nʉrrajim; mamʉ meewi ya tag ooba aajem. Pari mʉg atag Ẽwandamau ierr thʉrrdojo sim eemua ʉdʉraa oberpibaawai deeu nʉrraichejugui ajim. Magbaawai ar ich mag iiu wenʉrraju khʉʉn thʉ̃r phãkhamaajem ẽsap gaai warr mʉg jẽb ompaaju nawe phãba awi ag gaai thʉ̃r chukhu nʉm khʉʉn wajap dauderraa ajugui ajim, mag meetarrta deeu nʉrraichem oowi. Mag deeu iiu nʉrraichejup mamʉ, ich Ẽwandamauta warre i jua khẽgkhapʉijugui ajim, ich mag okhoom iek okhoomkhĩir.

Apocalipsis 19:8

Irig jũapijim khajũa wajapham, lino den. Maan sĩi memerkhogjã chukhu, ich bäpgau sĩi bʉ̃ʉmjo sim. Mag ich bäpgau bʉ̃ʉmjo simua Ẽwandam chaainkhanaa i dau na wajapha wenʉrraajerrta jaau sim. Magua mag khĩirta irig jũapijim” anaajim.

Apocalipsis 2:11

Magnaa ichdeupai, “Ar jʉ̃g ʉ̃rʉʉ nʉm khʉʉnau Ẽwandam Akharau mʉkhʉʉn iglesiaag jaau sim ũrbat” a sim. Ar ogkhaba ʉu magʉm thum ãwatpʉi nʉm khʉʉnan, warm khʉʉn khĩmie durr wet thʉnʉm daar, Ẽwandamau jũrr ich aarta phe auju aajem.

Apocalipsis 2:7

Magnaa ichdeupai, “Ar chi jʉ̃g ʉ̃rʉʉ nʉm khʉʉnau Ẽwandam Akharau mʉkhʉʉn iglesiaag nem jaau sim ũrbat” a sim. Ar phithurg au wenʉrrawiajã ich mag i khõsi wenʉrrʉm khʉʉnan ʉ̃gthar ich Ẽwandam dʉicha wenʉrraju aajem. Makhʉʉnag irua Ẽwandam nemjĩir gayam nemjõ jõpiju aajem, õor ich mag iiu wenʉrrapiejem nemjõ.

Apocalipsis 20:12

Õor nawe khechmarr khʉʉnjã Ẽwandam khĩirphee bʉjãaupai dʉnʉnʉid thʉnʉm mua oojim, mʉg jẽb gaai aawai chi thierrnaan arr khʉʉnpa. Mag ich khĩirphee õor phʉʉrbaadem dʉi, aig libro thʉnarr gaai eeureutkha oopijim. Mag eeureutkha oopiwiata mag libro thʉnarr gaai phã sĩsid arrjo thumaa mʉg jẽb gaai aawai amachdeu nem waumatarrpierr am dau aphʉʉ aju jaaumajim. Pari magaagan, khech nʉm khʉʉn akhaar naajem aarmuajã thumaa Ẽwandam dakhĩir oberchejierram, phũas ee khãijã okhoowi khechtarr khʉʉnpa. Mag thum ãbam aig nʉisiewaita, chadcha am dʉi Ẽwandamau amachdeu nem waumaajerrpierr ajim. Mamʉ deeum libro sĩejim ĩchab; mag gaaita thʉnʉm, õor ich mag iiu wenʉrraju khʉʉn thʉ̃r.

Apocalipsis 21:27

Mag phobor ee chan ĩchab bʉ̃ʉrjã maach inaam nem chan dubbam. Nem maach dawag khabam waaujem khʉʉnjã dubba, ni sĩi chikham khũguurjem khʉʉnjã pod dubbam. Ãba chi dubju khʉʉnan, Cordero ẽsap gaai thʉ̃r phãkha thʉnʉm khʉʉnpaita dubwi ich mag i dʉi iiu wenʉrraju aajem.

Apocalipsis 22:19

Wa magba ãbmua khãijã mʉg mʉch i jaaumienag jaaupitarr iek phã sĩsidʉm igba sĩsidʉm awi bʉchkhun khãijã isegpʉimamʉn, Ẽwandamaujã jũrr irig õor iiupiejem gayam nemjõ jõpiba, ni mʉg ẽsap gaai jaauwai chi ʉ̃gthar ober nʉm khʉʉnag nem deeju a jaau simjã deebaju.

Apocalipsis 3:12

Ar ogkhaba ʉu magʉm thum ãwatpʉi nʉm khʉʉnan irua ich Aai Ẽwandam iglesia ee dibʉ jãrramjo chi thierrnaanag paapʉiwi ich mag bʉ̃ʉrjã isegaajã khaugba wenʉrrapiju aajem. Ichdeuta am gaai Ẽwandam thʉ̃rjã phãnaa i sĩejem phobor thʉ̃rjã phã sĩuju aajem. Mag phobor thʉ̃r Jerusalenau, Ẽwandam sĩejem aarmua beeju phobor. Ĩchab am gaai irua ich thʉ̃r iiurjã phã sĩuju aajem.

Apocalipsis 3:4

Mag naab mamʉ jãig Sardiim iglesia ee ʉu agtha nʉm aajem, ãaur khʉʉn ʉdʉʉr pekaúg amach ʉ̃rpapiba durrum khʉʉn. Makhʉʉnta khajũa bäphä jũanaa i dʉi wenʉrraju anaabá, am amachdeu ich ipierr wajapha arr gaaimua chadcha mag wenʉrraju aai naawai.

Apocalipsis 6:11

Amau magbaawai amag khajũa bäphä sĩsidʉm phedeewi sĩi warag, “Pãar khodnaanjã pãach khechtarrjo Cristo ipierraa i iek jaau durrum gaaimua khechpʉiwia pãach aig ãba paaukhache nʉm ora, ideu bʉchkhun oo athat” ajim.