Apocalipsis 20:2 - Wounaan Meu

² Mag beewia, mag nem pom õoirjo sim pʉr athaichejim. Mag õoirjo simta warrgarwe “nemkhõr” a thʉ̃ʉrjem; ich arpai ĩchab mepeer a thʉ̃rnaa Satanás a thʉ̃ʉrjem. Mag pʉr auwi mil años sĩi ibʉʉr sĩujim.

Woun Meu

² Mag bëewia, mag nem pöm hõoirjö sim pʌr hat'aichëjim. Mag hõoirjö simta warrgarwe “nemk'õr” ha t'ʌ̃ʌrjem; hich harpai hĩchab mepeer ha t'ʌ̃rnaa Satanás ha t'ʌ̃ʌrjem. Mag pʌr hauwi mil años sĩi hibʌʌr sĩujim.

Apocalipsis 20:2 Iomraidhean Croise

San Mateo 19:29

Maimua ar thum chi mʉ gaaimua wa mʉ iek jaaum khõchgau khãijã amach di, amach naamkhʉʉn, amach eeugpeen, amach aai, amach ãd, amach chaain wa sĩi amach jẽb khãijã khaugba pʉa nʉm khʉʉnagjã amach nem okhootarr khãyaujã ʉ̃r ag atcha deewi mʉch dʉita ich mag wenʉrramkhĩir mʉch aarcha phe aujugui ajim.

San Mateo 8:29

Mag i dakha beewi i thʉ̃rcha thʉ̃rthʉ̃rnaa irig, —Jesús, Ẽwandam Iewaa, ¿khantheeta pʉ maar dʉi mʉgbaichema? Mʉʉgwaiwe chan oob maar chig a chiram ajierram anʉm, mag chi dosãt ben wai narr khʉʉnau.

San Marcos 4:15

Maagwai mag chi nemjĩir dau õor bʉ diichjem ee burrtarr, sĩi ar Ẽwandam iek jaau nʉm ũurjem khʉʉnta jaau simgui ajim anʉm. Mag ũrnaa bʉchkhun khaugtarrdam meperau beewia por eem warre khĩir akhoopibapäaiwai ũrba arrjoo thʉba nʉmgui ajim anʉm.

San Marcos 5:7

Mag phõbkhachenaa thet wiiu anaa irig, —¡Jesús, cha Ẽwandam ʉ̃gthaa phuu nʉm Iewaa! ¿Khantheeta pua mʉ mʉg khaibag waubaichema? ajim anʉm.

San Juan 12:31

Ya ĩsta chikhamnau mʉ thõoju gayaa pamam. Mag mʉ isegwi mʉ thõobarm gaaimuata khaigbam khʉʉn thumaam khʉʉn dʉi Ẽwandamau ichdeu khap ajugui ajim. Mag õor kõit mʉ thõobarm gaaimuata ĩchab mepeer mʉg durr gaai ichta chi porkha sĩerrʉmjã Ẽwandamau podpʉim iek podpʉijugui ajim.

San Juan 16:11

Maigta ich ag Ẽwandam Akharaupai ĩchab mag dosãt mʉg durr gaai chi porkha sĩerrʉmjã ich igar nʉm khʉʉn dʉi Ẽwandamau ich garmua ya podbapʉimjã khaphʉ apijugui ajim.

Romanos 16:20

Pãrau magta amʉn, mag parhoob nem jaau sĩerrjeem khʉʉnau amach khĩirjug pãach ee jaaucheewaijã, Ẽwandam maach khõinaa apiejemuata pãrag am iek ʉkhapiba abarmua chi mepeer Satanás mag õrag seukha nem jaaupiejemjã pãrag bʉʉu o jʉ̃athʉg deebarmjo aju. Maach Por Jesuu pãar dʉi ʉu amkhĩir mua pãar kõit jeeu chiraajem.

Hebreos 2:14

Mag mʉig eegar chi chaainkha thʉnʉm khʉʉnjã wounaanta mag i chaainkha thʉnaawai ich Jesujã mʉig eegarm khʉʉnjo wounkhata sĩeichejim, wounjo meeg; mag ich meebarmua mʉig eegar ichta chi durr khʉ awi õor dajẽk wai sĩerrta iek theeg chukhu apäaig; ajapcharan mepeerta ich garmua podpäaigma.

1 Pedro 5:8

Khĩir khaphʉ abat: Meperan khumau nem pʉr aum ig sim aig sĩi jĩerrbʉgthʉ aadephʉmjota sim maach bigaau, maach pekau ee burrpiju ẽkhaawai.

2 Pedro 2:4

Am khãai ich chognaan ʉ̃gthar ich dʉi ãba naajerr khʉʉnjã irua perdonaabajim aajem, pekau ee burrwai. Perdonaaju khãai warag ich aarmua khĩmie durr barkhʉʉipʉiwi ich mam khĩchag eeta cadenau jʉ̃kha wai sim anaabá, ichdeu mʉg durr i agkham ed “Mam ich mag nʉisiju” amachigcha jawaag.

Judas 1:6

Maimua agjo khĩir eyaa abat ĩchab, jãga ich Ẽwandam chognaan ich Ẽwandam dʉicha naajerrta ich khãai ʉ̃rpai aju ẽkhatarr gaaimua ich chognaan arr ãba ich aarmua barkhʉʉipʉijĩ. Pãade khĩirjubat ĩs am jãga nʉ: Ẽwandamau jʉ̃khanaa khĩchag ee am preso phe wai sim, ich maig oberaajã khaugba, ichdeu mʉg durr i agkham edta warag am khaibag wauwi ich mag wenʉrraju jawaag.

Apocalipsis 12:13

Ya mag chi meperau ich mʉg jẽb gaai barapʉim oobaawai khĩir machgau jũrr mag ʉʉi chaai emkhooi ootarr ẽudeeta ẽkhabaadejim.

Apocalipsis 12:15

Magbaawai chi nemkhõriu waa doota soo abarmʉn, ich i eemua nem pom dosĩgjo bau jĩerrau joisijim, magbarmua dokhierr chʉug pogbar joisiewai ag ee chi ʉʉi khẽu khuurbʉ thõmkhĩir.

Apocalipsis 12:17

Magbaawai chará chi mepeer mag õoirjo sĩerr warag chi ʉʉi dʉita meeukha sĩsiwi, jũrr chi chaain ewagam khʉʉn gaaita jua machag deeju awi, warag am dʉi werbʉan petajim. Mag chi chaain ewagam khʉʉn anʉmʉn, ar Ẽwandamau nem jaau sim thum ipierraanaa Jesucristoou chadcharam iek jaautarrjã ʉkhawi agtha ogdʉba ich mag ʉkha wenʉrrʉm khʉʉnau.

Apocalipsis 12:3

Mag ʉʉi oberchetarr khur deeum ijaaur edjã ee oberjim. Mag ijaaur jũrr mʉg ajim: Õoirjo nem pooma sĩi phurii simta ãbam gaaipai por khapan siete nener simpierr porsir panhappha sĩejim. Mag simʉn ĩchab kach khapanjã jʉjʉrʉr diez wai sĩejim, phak kachjo sĩsidʉm.

Apocalipsis 12:4

Mag simua dur phis a thũaphebaraau warre edjã eem phĩdagjã jãrrchapaím mʉg durr ʉ̃r thũphãau sĩujim. Magwi mag ʉʉi chaai awaag bi machkha sĩerr khĩirphee nʉ sĩsijim, ich dakhĩir athaawai ag bʉrre chi chaaidam khopʉyaag.

Apocalipsis 12:9

Magta chadcha chi mepeer mag õoirjo sim ich khapeen ich igar thʉnarr khʉʉn dʉi ãba ʉ̃gtharmua mʉg jẽb gaai barkhʉʉipʉijim. Ich mag mepeerpaita warrgarwe nemkhõr gaai thʉ̃rnaa ĩchab Satanás a thʉ̃ʉrjem, durrpierr õor thumaam khʉʉn khũgurmie, ajapcharan dosãtma.

Apocalipsis 13:2

Mag mepeer phũas eemua oberbaichem mua ootarr, sĩi khum chi jojothorjo sĩejim. Mamʉ mag simta jũrr chi bʉ, jos bʉkhanaa, i i, león ikha sĩejim. Mag simʉg mag ãbakhai sĩi õoirjo sĩerrau ich jua theeg deebaawai ichjo iek theeg apijim.

Apocalipsis 13:4

Magphobaademua warag mag õoirjo simʉgta Ẽwandamagamjo jeeujierram, mag ãbakhai phũas eemua oberchetarrag ich jua theeg deetarr jũrr. Mamʉ mag khumjo simʉgjã ĩchab Ẽwandamagamjo jeeumamua, “¿Khaita magan jãg mepeerjo jua theegnaa emkhooikha sĩ, i dʉi jãwaag?” a iekhamajierram.

Apocalipsis 20:10

Magbaawai ĩchab chi mepeer mag õor khũgur sĩerrjã jũrr warm khʉʉn numí mag khum chi jojothorjo sĩerr dʉi ãbakhai chi seukha nem jaaumie dʉi narr aar barpʉijim, thʉrrdo ee õtdau khĩirta azufre dʉi waaureu uu wejom ee, mʉg atag pawiajã ich mag õtkhierr machgau dau aphʉʉ idawaa wenʉrramkhĩir.

Apocalipsis 20:7

Mag amachta chi pornaankha nʉm ee mil años dichdimaawaita mag mepeer Satanás ibʉʉr wai narrjã deeu ẽerpʉiju aajem.

Apocalipsis 9:11

Mag langosta pom durrpierr aaidʉ thʉnʉm por ĩchab ich mag ierr ithurm wejom ee thʉrrdo sim aar chi porkha sim ag mepeerpaiu. Mag mepeer thʉ̃r Abadón aajem hebreonaan meúa. Maagwai griegonaan meúata Apolión aajem. Mag sim aig maach meúan “õor pom khechmie” a simʉu.