Apocalipsis 2:2 - Wounaan Meu

² I iek pua nem wau sim thumaa irua khaphʉ chirʉm aajem. Irua khaphʉ chirʉm aajem, pʉ phidag chadcha nem theeg sim, mamʉ pua magʉmjã igba ich mag jua jeeuba phidkha khitaajem. Pʉch khapeenau nem khaigba waauwaijã pua sĩi khĩuu ãwatba aajemjã irua khapphʉ chirʉm aajem. Ar amach iiupai amta Ẽwandamau ich i jaaumkhĩir jʉr aujim aajem khʉʉn seu pʉr awaagjã am dʉi jãau nʉmjo par iekhaupai juapá chach oowia chadcha am seunemeg pʉr autarrjã irua khaphʉ chirʉm aajem.

Woun Meu

² Hi hiek pua nem wau sim t'umaa hirua k'ap'ʌ chirʌm haajem. Hirua k'ap'ʌ chirʌm haajem, pʌ p'idag chadcha nem t'eeg sim, mamʌ pua magʌmjã higba hich mag jua jeeuba p'idk'a k'itaajem. Pʌch k'apeenau nem k'aigba waauwaijã pua sĩi k'ĩuu hãwatba haajemjã hirua k'app'ʌ chirʌm haajem. Har hamach hiiupai hamta Hẽwandamau hich hi jaaumk'ĩir jʌr haujim haajem k'ʌʌn sëu pʌr hawaagjã ham dʌ̈i jãau nʌmjö par hiek'aupai juapá chach hoowia chadcha ham sëunemeg pʌr hautarrjã hirua k'ap'ʌ chirʌm haajem.

Apocalipsis 2:2 Iomraidhean Croise

San Mateo 7:23

Pari magbaawai mua amag, “Mua chan bʉ̃ʉrjã pãar khaugba chitʉm. Pãach sĩi pãach khõchagpierr nem khaigbampai wau sĩerrjee arr khap, pãade warag pãachta mʉ aigmua ereubaadet” aju a jaaumajim anʉm, ich Jesuu.

San Juan 6:6

Pari ichdeu Felipeeg mag sĩerran, daau irua khan abarju khai awiata mag sĩejim. Mamʉ ich Jesuu ichdeu khap nem wauju khĩirju sĩejim.

Gálatas 1:7

Mamʉ mʉ iek ũrbat: deeum iek maach peerdʉajem chan tag chukhum; pãrag jãg nem jaau wenʉrrʉm khʉʉnaun sĩi warag pãrau ʉkhajujã khaugba apijuuta ẽkha wenʉrrʉm khabahab, magʉm gaaimua Cristoou chadcha maach peerdʉ aaujem iekta jũrr ag eyaajã khaba parhoob amachdeu jaaum aig jawaag.

Efesios 4:14

Mag khai magan ya tag chaain amachig sĩi bʉ̃ʉr mag abaawai parhoobam khʉʉn iek ʉkhakharrso amach khũgurpiejem khʉʉnjo khaba, chikham khũgur aum khõchgau khĩirjug khaug sĩerrjeem khʉʉn beewi Ẽwandam iek chaar khabam maachig jaauchewiajã ʉdʉʉr maadeu dich khũgurpibaju.

1 Tesalonicenses 1:3

Mag pãar igwia irig ʉu ajim anʉm aig ĩchab marau khĩir eyaa aajem, jãga pãrau pãachdeu ʉkhatarr iek gaai bʉ̃ʉrjã iekcheba warag phidkham khõsi phidkha nʉ, maimua jãga mag maach Por Jesucristo beejujã khõsi nʉ nʉm gaaimua chikhamnau pãach dʉi khaigba aadep aawaijã ichdeu pãar eeg oojẽ, magʉm iekjã igba ãwat wenʉrramkhĩir. Marau khaphʉ nʉm, pãrau chadcha dich khapeen kha khõsinaa Ẽwandamjã khõsi naawaita jãg phidkha nʉm. Mag gaaimuata irig ʉu ajim a durraajem pãar kõit.

1 Tesalonicenses 5:21

Amau jaau nʉm thum wajapha ũrnaa chi wajaphampai por ee athat.

2 Timoteo 2:19

Par amau mag amach iphithur amach khõchagpierr jaau wenʉrrab mamʉ, Ẽwandam iek chan cambieba ich mag sĩerrʉm. Mag sĩewai ich iek gaai, “Maach Por Ẽwandamau ich chaainan thum wajapha khaphʉ sĩerrʉm” a phãnaa ĩchab, “Thum maach Por Ẽwandamag jeeu wenʉrraajem khʉʉnan amach khaibag isegju aai nʉm” a phã sim.

Hebreos 6:10

Ẽwandamau thumaam khʉʉn dʉi nem agchata waaujeewai pãrau Ẽwandam khõsi nʉm gaaimua pãach hermanonaan juag oojemjã irua par sĩi ich jãg okhoopibam.

1 Juan 4:1

Keena Cristo gaaimua khodamnaan, ĩsin õor seunemkham khʉʉn neeme thʉnʉm; mag seukha wenʉrrʉmta amach iiupain Ẽwandamau jaaupitarr iekta jaau wenʉrrʉm aajem, sĩi magʉm gaaimua õor khũguraag. Oob jãg parhooba nem jaau nʉmta Ẽwandamau jaaupitarr iekta jaau wenʉrrʉm aajem khʉʉn iek ʉkhamiet. Amau jaau nʉm khap aag, ʉkhaju nawe ajapha khĩirjubat, chadcha Ẽwandam Akhaar chaar amach ee wai naawaita mag iekha nʉ wa sĩi dosãtauta mag iekhapi sĩ.

Apocalipsis 2:5

Magua irua pʉrʉg, khĩir eyaa abá a sim; i iek warr pʉ jãg khaba sĩejim aajem. Ãsie ewag pʉch khaibag khĩirjuwia iseg jeeubá, warr pʉchdeu i khõsi aajerrjo i khõsi aag. Mamʉ pua magbamʉn, pʉ aar mawia i iek irua warre pʉ iglesia lámpara sorjo isegpʉiju aajem, tag igba aag.

Apocalipsis 2:6

Mamʉ jãg irua Nicolás igar nʉm khʉʉnau nem jaau wenʉrrʉm ichdeujã khõchkhaba simjo puajã am igar khaba sĩewai ʉu sim aajem. Pua jãg sim aig i iek ichjã pʉ igar chirʉm aajem.

Apocalipsis 2:9

I iek pua nem wau sim thum khaphʉnaa, pʉ wajappha i gaaimua phithurg au khitaajemjã irua khaphʉ chirʉm aajem. I iek irua khaphʉ chirʉm aajem, pʉʉn chadcha dau aphʉʉ khitʉm. Mamʉ ʉ̃gtharin pʉʉn nem wajapham paraam aajem. Ar amach iiupain amta judionaan aawai Ẽwandam chaainau aajem khʉʉnau pʉ eugar parhooba iekhaajemjã ĩchab irua khaphʉ chirʉm aajem. Mamʉ pʉrʉg am iek asekaspiba sim. Jãkhʉʉnan sĩi dosãt igar naawaita jãg thʉnʉm anaabá.

Apocalipsis 3:1

Sardis phobor eem pastor: Maach Por Jesucristoouta ich imeerba jaaupitarr aawai muata pʉrʉg mʉg ẽsap phã chirʉm. Mamʉ chi iekhan ar Ẽwandam Akhaar ich gaai wai sĩenaa phĩdagjã siete wai sĩejemuata pʉrʉg ich imeerba mʉg iek jaaupʉipijim. Magtarr aawai chamʉ́ pʉ atheem iek pʉrʉg jaaupitarrau: I iek pʉʉn chadcha thʉ̃rphoo sim aajem, Ẽwandam i jewaag. Mamʉ mag simʉn pʉʉn pʉch pekau eepai sĩi chi thõmjo simta jãg sim anaabá.

Apocalipsis 3:15

I iek pua nem wau simjã thumaa irua khaphʉ chirʉm aajem. Irua khaphʉ chirʉm aajem, pʉ jãga sĩ: Pʉ chan nem pechagjã khaba ni nem khukhunagjã khábata sim anaabá. Ajapcharan puan ʉkhabaaderrau ʉkhaba aadepta sim aajem. Jãgbanaa pʉ warag khukhuna khãijã sĩekhiin, i iek ʉucha akham aajem; wa magbam khai nem pechag khãijã akhiin, ʉucha sĩekham anʉm ĩchab.

Apocalipsis 3:8

I iek pua nem wau simjã irua thumaa khaphʉ chirʉm aajem. Irua khaphʉ chirʉm aajem, chadcha pʉ chan magcha nem jua theeg khaba khitʉm; mamʉ magʉm ãba, pua i ipierraa khitaajem aajem. Pua ãsie i igwi, “Mua chan tag i iek ʉkhabamjã” aba, ich mag ogdʉba ʉkha khitʉm aajem. Pʉch mag khitʉm gaaimua irua pʉ na puertdi weeu wai chirʉm aajem, ich iek jaauju ayaa amkhĩir. Mag puertdi chan ni ãbmuajã pod phãar aubam aajem.