Apocalipsis 12:9 - Wounaan Meu

⁹ Magta chadcha chi mepeer mag õoirjo sim ich khapeen ich igar thʉnarr khʉʉn dʉi ãba ʉ̃gtharmua mʉg jẽb gaai barkhʉʉipʉijim. Ich mag mepeerpaita warrgarwe nemkhõr gaai thʉ̃rnaa ĩchab Satanás a thʉ̃ʉrjem, durrpierr õor thumaam khʉʉn khũgurmie, ajapcharan dosãtma.

Woun Meu

⁹ Magta chadcha chi mepeer mag hõoirjö sim hich k'apeen hich higar t'ʌnarr k'ʌʌn dʌ̈i hãba hʌ̃gt'armua mʌg jẽb gaai bark'ʌʌipʌ̈ijim. Hich mag mepeerpaita warrgarwe nemk'õr gaai t'ʌ̃rnaa hĩchab Satanás ha t'ʌ̃ʌrjem, durrpierr hõor t'umaam k'ʌʌn k'ũgurmie, hajapcharan dösãtma.

Apocalipsis 12:9 Iomraidhean Croise

San Mateo 13:39

Maagwai chi patrón kha ukhur i nemjĩir ee mag phũak dau phothurtarr, jã chi meperaugui ajim. Maimua chi trigo phur joisiewai thʉʉju a jaautarr, Ẽwandamau mʉg durr i agkhajuuta jaau sim. Chi trigo thʉʉ nʉmjo õor dajẽk aju khʉʉn, ich Ẽwandam chognaanaugui ajim, angelnaan.

San Mateo 24:24

Mua mag chirʉmʉn, amach iiupaita amta Ẽwandamau pʉijim anʉm khʉʉn dʉi Ẽwandam i jaaumien anʉm khʉʉn khapan sĩi seukha chikham khũgur wenʉrraju aawaita mag chirʉmgui ajim, khap amkhĩir. Makhʉʉnaun chadcha Ẽwandamauta amach pʉijim amkhĩir, ag na õrau ooba aajempa õor dauderraa wau wenʉrraju. Mag nem wau wenʉrrʉmua ich Ẽwandamaucha jʉr auwi ich iek ʉkhapi autarr khʉʉnpa khũgur ẽkhaju ajim.

San Mateo 25:41

Warm khʉʉnag mag iekhawi ichdeupai jũrr mag chi khaigbam khʉʉn ich juawe gar nʉm khʉʉnag, “Jopai mʉ aigmua chawag ereubaadet” aju anʉm. “Pãar mʉ Ayau chi maldisiem khʉʉn aawai pãadeu khĩmie durr mepeer ich chognaan dʉi sĩemkhĩir wautarr aarta ereubaadet” aju anʉm, “õtdau uu wejom thõojã khaugba ich mag sĩerrʉm ee naaimaag.”

San Mateo 4:1

Maimua ich Ẽwandam Akharaupai Jesús warp õor chukag chʉʉi warrjim aajem, ich garmua mepeer podju khaphʉ sĩerr aawai juau ogthom mam chi dosãtag ich khũgur auju ẽkhapieg.

San Mateo 4:10

Mamʉ mag nʉʉ paawaita Jesuu irig, —Ẽwandam iek phã sim gaai jaauwai, “Pãar Poron Ẽwandamau; ãba irigpaita jeeubat, maimua ãba i iekpaita ipierraa abat” a sim. Magnaa mag sĩebnaa pʉdeu pʉchta jopkhaa mʉ aigmua sĩiubaad a chirajim aajem irua. Mag, bʉ̃ʉrjã i ipierraa abajim anaabá Jesuu.

San Mateo 4:5

Mag ijẽjẽb naawi, chi dosãtagta Ẽwandam Akharau ʉdʉraa Jesús arrpijim aajem, Jerusalenag. Mag athaadewi, Aai i jeeujem diheu ʉ̃r ʉ̃gthaa arrnaa,

San Mateo 4:8

Maimua ãbmiecha paawai deeu chi dosãtaupai durr pooma sim gaai i arrjim aajem. Mag durrsĩ gaaimua dawaa durr warpham magwe thum ag gaai nem thʉnʉm dʉi irig oopinaa,

San Lucas 10:18

Magbaawai Jesuu amag magjim aajem: —Pãrau mag obeerpi jaauwai dosãt jua theeg chukhu sĩi jẽkhʉt phʉphʉrg petaphʉm mua khaphʉ chirajim. Jãguata irua mʉ okho sĩerrʉmgui ajim anʉm, ichdeu mʉ jua jʉmbaju khap.

San Lucas 13:16

Pãrau pãach nemchaainjã mag do dopi khʉrrkha nʉmta, ¿khan jãgwia mʉg ʉʉi ĩchab warrgar jooi Abrán khararrau ʉkhaajerr ag Ẽwandam gaai ʉkha simta pod i monaauju khaba sĩ, jua ʉ̃ʉijem ed awia? Jãg sim aig ijã ĩchab dieciocho años meperau i pʉrnaa o jʉ̃ wai simjo simta ẽerpʉi nʉm khabahab ajim anʉm, jãg beneu i ogdʉpʉimkhĩir.

San Lucas 22:3

Amau mag khĩirju nʉm ee, woun ãb Judas a thʉ̃r sim sĩejim aajem, ibʉʉr wauwia ĩchab Iscariote a thʉ̃ʉrjerr. Mag woun ĩchab ich Jesús dʉi i bʉ ogdʉba wenʉrraajerr khʉʉn eem ajim aajem. Mag Jesús dʉi ãba nʉrraajerrta meperau por meubaadeewai phadnaan chi porkha nʉm khʉʉn dʉi ĩchab guardianaanjã chi porkha nʉm khʉʉnpa ãba nʉm aar majim anaabá, jãgata ichdeu amag i pʉr deeju khap jawaan.

San Lucas 22:31

Maimua ĩchab magjim aajem maach Por Jesuu Simonag: —Simón, dosãtau Ẽwandamag jeeu wai simgui ajim anʉm, pʉ dʉi ichdeu ampierr awia pʉ dau aug waupieg.

San Lucas 8:12

Maagwai chi nemjĩir dau khʉdjã ee burrmarr, õor Ẽwandam iek sĩi par jʉ̃gʉupai ũurjem khʉʉnaugui ajim anʉm. Amau Ẽwandam iek jaau nʉm ũr nʉm, mamʉ meperau beewia khũgurbaicheewai ũrba arrjo thãar ee Ẽwandam iek chukhu thʉba nʉm, khʉdjã eem nemjĩir dau nemchaainau khopʉitarrjo.

San Juan 12:31

Ya ĩsta chikhamnau mʉ thõoju gayaa pamam. Mag mʉ isegwi mʉ thõobarm gaaimuata khaigbam khʉʉn thumaam khʉʉn dʉi Ẽwandamau ichdeu khap ajugui ajim. Mag õor kõit mʉ thõobarm gaaimuata ĩchab mepeer mʉg durr gaai ichta chi porkha sĩerrʉmjã Ẽwandamau podpʉim iek podpʉijugui ajim.

San Juan 14:30

’Mepeerta mag mʉ khãai ʉ̃rpai sĩewai khabam, pari mʉg jẽb gaai ichta chi porkha sĩerrʉmua ich õor pʉiwia mʉ pʉr awaan wedurum aawai ya pomcha pãar khĩir chitabajugui ajim.

San Juan 16:11

Maigta ich ag Ẽwandam Akharaupai ĩchab mag dosãt mʉg durr gaai chi porkha sĩerrʉmjã ich igar nʉm khʉʉn dʉi Ẽwandamau ich garmua ya podbapʉimjã khaphʉ apijugui ajim.

San Juan 8:44

Magnaa amag, Pãar aai mepeer khabahab ajim. Maguata pãar i denkha naawai irua nem jajaaukhamta waum khõchkhaajerram. Mepeer warrgarwe õor thõomie khabahab ajim. Irua nem jaau sim chan bʉ̃ʉrjã chadam iek khabamta jaau sĩerrʉm. Irua chadcha nem jaautarr chukhum. Jãg irua seukha nem jaauwai ich khapta jaauba aajeeb ajim, seunem sĩerraawai. Magua ichta seu paraam khʉʉn aaikha sĩerrabahab ajim amag.

Hechos 26:18

Mua am ee pʉ pʉi chirʉmgui ajim, am sĩi dau khĩsumjota naawai; pua mʉ iek jaaubaadeewai, dau egdʉtkha phobaademjo wajapha oophobaadeewai, tag amach pekau eepai khĩchag eemjo ich mag wenʉrram ugua. Mua pʉ pʉi chirʉmʉn, jãg sĩi dosãt ipierraa wenʉrraju khãai, Ẽwandamau khõsi simjota wenʉrramkhĩrau. Mag mʉ iek ʉkha phobaadeewai, Ẽwandamau amach khaibag chugpaabapäaiwain chadau, amjã judionaan chi ʉkha wenʉrrʉm khʉʉn dʉi ãba Ẽwandam chaainkha nʉisijugui” ajim. Maga maach Por Jesuu mʉrʉg iekhajimgui ajim anʉm Pabloou Agripaag, mag Damasco phoborog mamua khʉd ee Jesuu ichig iekhatarr jaaumamua.

Hechos 5:3

Mag amach aar deebaimaawai Pedroou chi Ananiaag magjim anʉm: —Ananías, ¿Jãgwi jẽb pertarr param phatkhon pua thum deecheba, ag eem pãach athee autarrta, “Thum deechejim” a chirʉ́? ajim anʉm. Pʉch jãg seukha simua Ẽwandam Akhaarpata pua khũgur auju ẽkha sĩebahab ajim anʉm.

Romanos 16:18

Jãg nʉrrjeem khʉʉn chan chadcha maach Por Jesucristo athee phidkham khõsi aawaita mag wenʉrraba, sĩi amach khõchagpierr nem waum khõchgaupaita jãg nʉrrjeem. Aman chadcha nem iekhaa khaug khĩir ee bebedomjo nem jaau sĩerrjeem, pari mag wenʉrrʉmʉn sĩi õor khĩirjug meraam khʉʉndam imeraa khũguraagpaita jãg nʉrrjee aajem.

Romanos 16:20

Pãrau magta amʉn, mag parhoob nem jaau sĩerrjeem khʉʉnau amach khĩirjug pãach ee jaaucheewaijã, Ẽwandam maach khõinaa apiejemuata pãrag am iek ʉkhapiba abarmua chi mepeer Satanás mag õrag seukha nem jaaupiejemjã pãrag bʉʉu o jʉ̃athʉg deebarmjo aju. Maach Por Jesuu pãar dʉi ʉu amkhĩir mua pãar kõit jeeu chiraajem.

2 Corintios 11:14

Chadcha ich dosãt chaarjã Ẽwandam chog khĩir thegwia jãg nʉrraajeewai, chi wounaanjã jãg wenʉrrʉm oowai maach dauderraa aju khaba nʉm.

2 Corintios 11:3

Mua chan warrgarwe nemkhõriu Evaag seukhawia khũgur autarrjo pãarjã agjo sĩi parhoobam khʉʉnau nem jaau nʉm ʉkham khõchgau ʉdʉraa pãach khũgurpiwia jũrr pãach khĩirjug ãba Cristo gaai khĩirju nʉmta isegpimapha chirʉm.

2 Corintios 12:7

Mag Ẽwandamau ichdeu mʉchig nem oopitarr gaaimua wir aig mʉchdeupai mʉch thom uguata juau ogthomjo ʉdʉraa dosãtag mʉ dʉi mʉgpiwi miuta khagthʉgpʉpʉikhamjo agua dau aphʉʉ chitaajem.

2 Corintios 2:11

Mag i perdonaaba akhiin, dosãtta jũrr maach gaai ʉ̃rpaju; ya maadeu i khaphʉm, í jãga sĩerrʉ́.

2 Corintios 4:4

Ich chi dosãt mʉg jẽb gayam khʉʉn ẽwandamkha sĩerrʉmuata am dau khĩpi wai sim dʉi am khĩirjug ʉ̃rjã putiu borr wai simjo sim, maach Cristo thumaam khʉʉn khãai ʉ̃rpai sim iekta ʉkhapimaaugau. Mag Cristo iekhaupaita õtdau bʉʉg nem oowai khaphʉ aajemjo maachig khaphʉ api sim, Cristo gaaita ich Ẽwandam khĩir theg sim.

Efesios 4:14

Mag khai magan ya tag chaain amachig sĩi bʉ̃ʉr mag abaawai parhoobam khʉʉn iek ʉkhakharrso amach khũgurpiejem khʉʉnjo khaba, chikham khũgur aum khõchgau khĩirjug khaug sĩerrjeem khʉʉn beewi Ẽwandam iek chaar khabam maachig jaauchewiajã ʉdʉʉr maadeu dich khũgurpibaju.

2 Tesalonicenses 2:3

Ãbmua khãijã pãachig mag jaauwai maan seukhaawaiu. Ich Jesucha beeju na ichiita woun ãb chi khaigbam mʉg jẽb gaai sĩeicheju. Mag wounauta õor Ẽwandam dʉi meeukhapiju. Mamʉ mʉg atag paawai Ẽwandamau jũrr i gaaita jua khʉaba ich mag i gaai mas wai nʉrraju.

1 Timoteo 2:14

Maimua ĩchab khĩir eyaa abat khaita nacha dosãtau khũgurjĩ: Adán khabajim. Chi nacha khũgurwia pekau ee burrtarran Eva ajim.

2 Timoteo 3:13

Mamʉ ĩchab ar jãg õor khũgurnaa khaigba nem wau wenʉrrʉm khʉʉnan mʉg atag paawai warag athuucha paaukhamaju, amachpata dosãtau khũgur wai sĩewai.

Hebreos 2:14

Mag mʉig eegar chi chaainkha thʉnʉm khʉʉnjã wounaanta mag i chaainkha thʉnaawai ich Jesujã mʉig eegarm khʉʉnjo wounkhata sĩeichejim, wounjo meeg; mag ich meebarmua mʉig eegar ichta chi durr khʉ awi õor dajẽk wai sĩerrta iek theeg chukhu apäaig; ajapcharan mepeerta ich garmua podpäaigma.

1 Pedro 5:8

Khĩir khaphʉ abat: Meperan khumau nem pʉr aum ig sim aig sĩi jĩerrbʉgthʉ aadephʉmjota sim maach bigaau, maach pekau ee burrpiju ẽkhaawai.

1 Juan 5:19

Maadeu khaphʉ nʉm, maach chadcha Ẽwandam denkha nʉm; pari khaphʉ nʉm ĩchab, mʉg jẽb gaai õor pom sĩi dosãtauta ich jua eegar phe wai sim.

Judas 1:9

Pari am khãai Ẽwandam chognaan por Arcángel Miguel aajemuajã, Moisés meebaadeewai, i mor athee mepeer dʉi jũrr chikham ipeer ahau khaawaijã bʉ̃ʉrjã irig khaigbajã iekhaba, sĩi warag “Pʉch mʉ dʉi jãg chirʉm paar nau Ẽwandamauta pʉrʉg meeurrau sĩujugui” ajim.

Apocalipsis 12:12

Magbarm gaaimua edaujãjã wounaanjo onee abat. Maimua pãach chi ag ee thʉnʉm khʉʉnjã thumaa onee abathʉ̃. Mamʉ ¡eh, apdurr, pãar jẽb gaai jooba durrum khʉʉn dʉi phũas ee jooba durrum khʉʉnjã agjo! Ya ich ũjãrr barapäaiwai meperan ĩsin meeukhata sĩsim thumaam khʉʉn dʉi. Irua ya khaphʉ sim, mʉigmua jopcha ya tag ichdeu ampierr abaju” a serereu khajierram.

Apocalipsis 12:3

Mag ʉʉi oberchetarr khur deeum ijaaur edjã ee oberjim. Mag ijaaur jũrr mʉg ajim: Õoirjo nem pooma sĩi phurii simta ãbam gaaipai por khapan siete nener simpierr porsir panhappha sĩejim. Mag simʉn ĩchab kach khapanjã jʉjʉrʉr diez wai sĩejim, phak kachjo sĩsidʉm.

Apocalipsis 12:7

Maimua magtarr khur edjã ee juurhi phiidʉjim. Ʉ̃gtharm Ẽwandam chog Miguel anʉmta tagam ich khapeen agjo Ẽwandam chognaan dʉimua jũrr mag mepeer õoirjo simta sĩi por khapan sim dʉi werbʉ naajim. Mag õoirjo sim igar nʉm khʉʉnjã agjo khapan thʉnaajim.

Apocalipsis 12:8

Mamʉ chi angelnaanau amach garmua chi mepeer podbapäaiwai chi mepeer warre ich khapeen dʉi ʉ̃gtharmua jʉr werppʉijim.

Apocalipsis 13:14

Mag mepeer por pom thoop sim phũas eemua oberchetarr dakhĩir mag nacha õoirjo sĩerrau warm mepeer corderojo sĩerrag õor dauderraa nem waupijim, mag nem wau simua õor khũgur aumamkhĩir. Mag õor khũgur auwi chi corderojo sĩerrau warm mepeer ich khapeer khĩirkha waupijim; ajapcharan mag sĩi por pom thuthuíu thoop simjo sĩerrta deeu monaautarr khĩirma.

Apocalipsis 16:14

Mag jʉcheumiejo sĩsid arr, chi mepeer akhaar ajim. Makhʉʉnaun ĩchab ag na õrau nem ooba aajempa wau wenʉrrajim. Mag wenʉrrʉmʉn mʉg jẽb gaai reinaan sĩsidʉm khʉʉn dʉi iekta dee wenʉrrajim, thumaa ãba biirdʉnaa Ẽwandam ichta thumaam khʉʉn khãaijã chi jua thierr dʉi amach werbʉju edam athee khĩir khaugaag.

Apocalipsis 18:2

Magua thet ähäagmamua mag sĩejim: “¡Ya Babilonia phoboron eegar pajim! Ĩsin ya sĩi pabʉ ee sĩerrjeem khʉʉn diiu; mepeen khaigbam khĩirpierr naajem di anaa pabʉ eem nem maach khoojem khʉʉn diigta pabaadebahab” a sĩejim.

Apocalipsis 18:23

“Pʉʉta jãgbarm chan mʉg atag pawiajã pʉ ee õtdaudam phuu dʉnʉmjã ooba, ni õor jua pʉʉrwai onee serereu aajerr iekjã ũrbam. Pʉ eem nem jua paraam khʉʉnan, chadcha mʉg durr gaai chi jua thierrnaan ajim. Maimua pʉchdeujã pua durrpierram khʉʉn sĩi khũgur wai sĩejim, pʉchdeu nem khaigba wau simta õrau khaugbam gaaimua. Pari mag sĩerrta, ya pʉʉn chadchata eegar pabaademgui” ajim.

Apocalipsis 19:20

Mamʉ magbaadem ee chi mepeer mag phũas eemua oberchetarr preso sĩsijim. Mag preso sĩsim dʉi ãbakhai chi seukha nem jaau nʉrraajerrjã agjo pʉr auwi, dʉi ĩchab preso sĩsijim. Ich mag seukha nem jaaumieuta mag khumjo sim phũas eemua oberchetarr dakhĩir õrau nem ooba aajempa wau nʉrrʉm gaaimua õor khũgur aumaawai, ʉdʉraa amach gaai mag phũas eemua oberchetarr ag dauchachjã amach gaai phãpiwi i khĩirkha wau simʉgjã Ẽwandamagamjo jeeujierram. Mag amach numwe pʉrkha auwi, ich jãg thõojã thõoba iiu sĩsidʉmta thʉrrdo ee azufre õtdau dʉi waaureu uu wejom ee barkhʉʉipʉijim.

Apocalipsis 2:13

I iek pua nem waaujem thumaa irua khaphʉ chirʉm aajem. Pʉ sim phobor dosãt phobor anaabá. Mamʉ irua khaphʉ chirʉm aajem, magʉm ãba pua ich kha ogdʉba khitʉm. Irua khaphʉ chirʉm aajem, ar Antipas khararrau ich daúacha oowia ich iek jaau khitʉm athee chi dosãt igar thʉnarr khʉʉnau i thõo nʉm jaarjã, pua ãsie pʉchdeu ich iek ʉkhatarrjã isegba chadcha ĩsjã agtha ich mag ich kha ogdʉba khitʉm.

Apocalipsis 2:24

Mamʉ i iek pãar ar dosãt iekta õrau amachdeupain chadcharam iek awi agʉg ee thʉnarr khʉʉn igar bʉ̃ʉrjã wetba arr khʉʉnag chan irua tag atcha nem waupi jaaubam aajem.

Apocalipsis 2:9

I iek pua nem wau sim thum khaphʉnaa, pʉ wajappha i gaaimua phithurg au khitaajemjã irua khaphʉ chirʉm aajem. I iek irua khaphʉ chirʉm aajem, pʉʉn chadcha dau aphʉʉ khitʉm. Mamʉ ʉ̃gtharin pʉʉn nem wajapham paraam aajem. Ar amach iiupain amta judionaan aawai Ẽwandam chaainau aajem khʉʉnau pʉ eugar parhooba iekhaajemjã ĩchab irua khaphʉ chirʉm aajem. Mamʉ pʉrʉg am iek asekaspiba sim. Jãkhʉʉnan sĩi dosãt igar naawaita jãg thʉnʉm anaabá.

Apocalipsis 20:10

Magbaawai ĩchab chi mepeer mag õor khũgur sĩerrjã jũrr warm khʉʉn numí mag khum chi jojothorjo sĩerr dʉi ãbakhai chi seukha nem jaaumie dʉi narr aar barpʉijim, thʉrrdo ee õtdau khĩirta azufre dʉi waaureu uu wejom ee, mʉg atag pawiajã ich mag õtkhierr machgau dau aphʉʉ idawaa wenʉrramkhĩir.

Apocalipsis 20:8

Mag ich ẽerbapäaiwaita, durrpierr õor khũgur nʉrrʉmua, Gog durram khʉʉn dʉi Magog durram khʉʉnpa ãbam aig biirdʉ auju anaabá, mag biirdʉnaa Ẽwandam igar nʉm khʉʉn dʉi werbʉag. Mag chi werbʉju anʉm khʉʉnan, khapaana sĩi phũas igaau mosdau thʉnʉmjota thʉnaajim, chi khapanag.

Apocalipsis 3:9

Ar dosãt igarnaa judionaanjã khaba nʉmta nem seunem amach iiupain amta judionaan aawai Ẽwandam chaainau a nʉrrjee aajem khʉʉnag, irua ajués pʉ khĩirpheeta jĩepor phõbkhapiju aajem, ichdeu chadcha pʉ khõsi chirʉm amag khap amkhĩir.

Apocalipsis 9:1

Maimua chadcha chi Ẽwandam chognaan sirju waaur narr eem ãbmua ich trompeta tẽee aadejim. Mag siram cincoom gaai, Ẽwandam chogta edjã eemua phĩdagjo phug beem mua oopʉijim. Magʉg, sĩi jẽbdijo ierr maach dau warp ithurm jaaba wejom ee thʉrrdo sim den chi yabme deepijim ich Ẽwandamau.

Apocalipsis 9:20

Mamʉ mag õor pom odubtarr ee chi iiu nʉisierr khʉʉnau amach daúa mag ootarrjã amachdeu mag nem khaigba waaujerr chan bʉ̃ʉrjã pʉabajierram. Mag khãai warag meperagta Ẽwandamagamjo jeeunaa, sĩi nem parhoob phĩr den, phatkhon den, bronce den, mokdau den maimua pa denpa nem oob waunaa, ni iiujã iiuba sĩsid aawai dʉrdʉrjã aba ni amachig jeeu nʉmjã khaugba sĩsidʉmʉgta warag jeeu nʉisijim.