Apocalipsis 1:4 - Wounaan Meu

^4-5 Mʉʉn Juanau. Muata mʉg ẽsap phã deepʉi chirʉm Asia durr phobor siete nʉm ee Ẽwandam iek ʉkha nʉm khʉʉnag. Mua pãar kõit jeeu chirʉm, ichta warrgarwe ich mag sĩerranaa mʉg atagjã ich mag sĩerraju igwia, ich khu juupjem khĩirphee ich Ẽwandam Akhaar sĩerrʉm igwia, maimua Jesucristo chadam iek chaarcha jaauchetarr igwiajã jeeu chirʉm, pãar dau ee aug khaug paraanaa pãar ʉu wai nʉm dʉi ĩchab pãar khõinaa wai wenʉrramkhĩir. Mag Cristota meeba arrjo nacha iiu phiidʉwia mʉg reinaan thʉnʉm khãaijã iek theeg ʉ̃rcha sĩerrʉm. Ich ag Cristota maach daupigau ʉdʉraa ich thõopijim. Magbarmua maach khaibag chugpaapʉiwia

Woun Meu

^4-5 Mʌʌn Juanau. Muata mʌg hẽsap p'ã deepʌ̈i chirʌm Asia durr p'öbör siete nʌm hee Hẽwandam hiek hʌ̈k'a nʌm k'ʌʌnag. Mua pãar kõit jëeu chirʌm, hichta warrgarwe hich mag sĩerranaa mʌg hatagjã hich mag sĩerraju higwia, hich k'u juupjem k'ĩirp'ee hich Hẽwandam Hak'aar sĩerrʌm higwia, maimua Jesucristo chadam hiek chaarcha jaauchëtarr higwiajã jëeu chirʌm, pãar dau hee haug k'aug paraanaa pãar hʌ̈u wai nʌm dʌ̈i hĩchab pãar k'õinaa wai wënʌrramk'ĩir. Mag Cristota meeba harrjö nacha hiiu p'iidʌwia mʌg reinaan t'ʌnʌm k'ãaijã hiek t'eeg hʌ̃rcha sĩerrʌm. Hich hag Cristota maach daupigau hʌdʌraa hich t'õopijim. Magbarmua maach k'aibag chugpaapʌ̈iwia

Apocalipsis 1:4 Iomraidhean Croise

San Juan 1:1

Warrgar bʉ̃ʉrjã nem ompaaba nʉwe Ẽwandam sim dʉi chi Iewaajã sĩejim aajem. Ich mag chi Iewaapai ĩchab Ẽwandamau.

Hechos 19:10

Ich mag jaau simua año numí sĩsijim aajem, Efeso phobor ee. Maguata thum judionaan maimua judionaan khabam khʉʉnpa Asia durr joobaajerr khʉʉnau maach Por Jesuu õor peerdʉ aaujem iek Pabloou jaau sim ũrjierram aajem.

Hechos 2:9

Mʉig maach nem meu khapan iekha wejomgui aajeejim anʉm, durr chaauram khʉʉn pom thʉnaawai. Mʉig nʉm: Partiapien, Mediapien, Elampien maimua maach chi Mesopotamia durr joobaajem khʉʉn; Judea durram khʉʉn, Capadociapien, Pontopien maimua Asiapien.

Romanos 1:7

Mag pãar Romapienjã Ẽwandamau jãsene aajem khʉʉn aawai pãragta mʉg ẽsap phã deepʉi chirʉm, pãarjã i õor aawai. Muan maach Aai Ẽwandamagjã jeeunaa maach Por Jesucristoogjã pãar kõit jeeu chiraajem, pãar ʉu eeg oonaa pãar khõinaa phe wai wenʉrramkhĩir.

1 Corintios 1:3

Muan maach Aai Ẽwandamagjã jeeunaa maach Por Jesucristoogjã jeeu chiraajem, pãar ʉu wai nʉm dʉi ĩchab khõinaa wai wenʉrramkhĩir.

2 Corintios 1:2

Maach Aai Ẽwandamagjã jeeunaa maach Por Jesucristoogjã jeeu chirʉm, pãach ʉu wai nʉm dʉi ĩchab khõinaa wai wenʉrramkhĩir.

Hebreos 13:8

Pãade ũrbat: Jesucristoon warrgar ich sĩerrarrjo mʉg atag pawiajã cambieba ich mag sĩerraju. Í mag cambieba sĩerraawai i iekjã agjo cambieba sĩerrʉm.

Santiago 1:17

Ẽwandam edjã ee nem thʉnʉmpa wautarraun maachig nem thum nem ajapham appaita deejem. Ich chan maach mʉig eegarm khʉʉnjo cambibierrso khaba sĩerrʉm. Mag sĩewai prueba ee nʉm aigjã iruata magʉm khĩirjug deejim awi i gaai thʉju khaba nʉm.

Apocalipsis 1:1

Mʉʉn Juanau, Jesucristo chog. Muata pãrag mʉchdeu ootarr jaaum ig chirʉm. Mʉg mua jawaagpam iekhan ich Ẽwandamaucha Jesucristoog jaautarrau. Mag ichig jaaubaawaita mʉ khãaipi auwi mʉrʉg jaaujim, jũrr mua ich iek ʉkha durrum khʉʉnag jaaumkhĩir. Mʉg iek thum ich jaaubarmjo chadcha jopcha aju khap amkhĩir, Jesucristoou ich chog ãb ʉ̃gthar ich dʉi sĩejemʉgta jaaujim, mag mʉ khãaipi atham ee jũrr magua mʉrʉg jaaumkhĩir.

Apocalipsis 1:11

“Nau mua pʉchig nem oopibarm thumaa ẽsap gaai phãnaa Asia durr phobor siete nʉm ee mʉ iek ʉkha nʉm khʉʉn aar deebapʉi” ajim: “Efesopienag, Esmirnapienag, Pérgamopienag, Tiatirapienag, Sardipienag, Filadelfiapienag maimua Laodiceapienagjã agjo.”

Apocalipsis 1:17

Mag oobarmʉn mʉʉn sĩi chi meemjota thʉbepjã chukhu i bʉkhʉrr buju aimajim. Mamʉ magbaawai ichdeu mʉ gaai pʉrnaa, “Oob jãphierram” ajim. “Mʉchta nem thum ompaaju nawe chirajim; mʉg durr thum owiajã mʉchta ich mag chirsiju khabahab” ajim mʉrʉg.

Apocalipsis 1:20

Maimua mʉrʉg, “¿Pua khaphʉ chirʉ́” ajim “khani jaau sĩ ar mua mʉch juachaar gar phĩdag siete wai chirarr, maimua lámpara ausĩiujemjã phĩr den siete wai chirarr?” Magnaa ichdeupai, “Ar phĩdag siete narr, jã mag siete iglesia nʉm ee agjo pastornaan siete nʉm khʉʉnta jaau simgui” ajim. “Maagwai mag chi lámpara ausĩiujem agjo siete narr, jãkhʉʉn Asia durr mag iglesia siete nʉmta jaau simgui” a jaaujim mʉrʉg ich Cristooucha.

Apocalipsis 1:8

Ich Ẽwandamauta ich igwia, “Mʉchpaita nacharam ẽsapdau Ajonaa chi ãbmiecharam Zetajo chitʉm” a iekhaajem, ich warrgarwejã ich mag sĩerrawi mʉg atagjã ich mag sĩerraju Jooirau. Ichdeu mag sim aawai oob khĩirjumiet. Ichta Ẽwandamau, thumaam khʉʉn Por; i athee chan phithurm nem chukhum.

Apocalipsis 1:9

Mʉʉn pãach khod ar Jesús iek gaaimua pãachjo phithurg au pʉʉrba khitaajemuata pãrag mʉg ẽsap phã deepʉi chirʉm. Mag phithurg aaujeeb mamʉ, ich Jesucristoouta magʉm ãwataagjã juapá deejeewai, magʉmjã igba, phithurg jẽedʉ khitʉmua i aar barwi i khĩir wajaug oo wai chitaju. Ẽwandam iek jaau chitʉm dʉi Jesuu nem wau nʉrrarr mʉch daúacha oojerrta jaau chitʉm gaaimua, mau dojãrr phʉram Patmos anʉm gaai preso chirʉm.

Apocalipsis 16:5

Magnaa mag dosĩgpierr do ãrpi sĩerraupai iekhamamua, “Ẽwandam, pʉchta bʉ̃ʉrjã pekau chukhu khitʉm; pʉchta warrgarwejã ich mag khitaawai ĩsjã ich agtha sĩerrʉmgui” a sĩejim. “Pʉchdeu am dʉi chachbarm aig, pua am dʉi nem agchata abarmgui” ajim, “amachdeu nem waumarrpierr.

Apocalipsis 2:12

Pérgamo phobor eem pastor: Maach Por Jesucristoouta ich imeerba jaaupitarr aawai muata pʉrʉgjã mʉg ẽsap phã chirʉm. Mamʉ chi iekhan mag ich i ee espaar khẽu mii khitʉm phõpá garm magwe dee khitʉm wai sĩejemuata pʉrʉg ich imeerba mʉg ẽsap gaai mʉg jaaupʉipijim. Magtarr aawai pʉrʉg jaaukhim, chamʉ́ pʉ atheem iek pʉrʉg jaaupitarrau:

Apocalipsis 2:18

Tiatira phobor eem pastor: Maach Por Jesucristoouta ich imeerba jaaupitarr aawai muata pʉrʉg mʉg ẽsap phã chirʉm. Mamʉ chi iekhan Ẽwandam Iewaa ar dau sĩi õtdau uu thʉnʉmjonaa bʉjã sĩi broncejo phuunaa bʉpá theeg sĩerrʉmuata pʉrʉg mʉg iek jaaupʉipijim. Magtarr aawai chamʉ́ pʉ atheem iek jaaupitarrau:

Apocalipsis 2:8

Esmirna phobor eem pastor: Maach Por Jesucristoouta ich imeerba jaaupitarr aawai muata pʉrʉg mʉg ẽsap phã chirʉm. Mamʉ chi iekhan ich chi Nacharam anaa chi Ãbmiecharam aajemuata pʉrʉg ich imeerba mʉg ẽsap phã deepʉipijim; ajapcharan ar meewi deeu iiu phiidʉtarrauma. Magtarr aawai pʉrʉg jaaukhim, chamʉ́ pʉ atheem iek pʉrʉg jaaupitarrau:

Apocalipsis 22:16

Mag mʉchdeu jaau chirʉm chadcha aawaita, ich Jesuujã ich igwi, ichdeuchata ich chog pʉijimgui ajim, magʉm thumaa ar ich iek ʉkha durrum khʉʉnag jaaumkhĩir. Magnaa ichdeupai ich igwi, “Mʉchta sĩi khajap nemjĩirjo David khararr chaain ewagam khʉʉn eemua sũrkha phiidʉtarr anaa ĩchab edaupherr garm phĩdag wʉʉ obeerjemʉugui” ajim Jesuu, ich beeju igwia.

Apocalipsis 22:8

Mʉch chi Juanauchata cha mʉchdeu nem jaau dichdimam thumaa mua mʉch daúacha oowi mʉch jʉ̃gʉucha ũrjim. Mag mʉchdeucha oowi ũr dichtarr khur, mua chi Ẽwandam chog mag mʉchig nem thumaa oopitarr bʉkhʉrr kanieu phõkhabaimajim, irig jewaag awia.

Apocalipsis 3:1

Sardis phobor eem pastor: Maach Por Jesucristoouta ich imeerba jaaupitarr aawai muata pʉrʉg mʉg ẽsap phã chirʉm. Mamʉ chi iekhan ar Ẽwandam Akhaar ich gaai wai sĩenaa phĩdagjã siete wai sĩejemuata pʉrʉg ich imeerba mʉg iek jaaupʉipijim. Magtarr aawai chamʉ́ pʉ atheem iek pʉrʉg jaaupitarrau: I iek pʉʉn chadcha thʉ̃rphoo sim aajem, Ẽwandam i jewaag. Mamʉ mag simʉn pʉʉn pʉch pekau eepai sĩi chi thõmjo simta jãg sim anaabá.

Apocalipsis 3:14

Laodicea phobor eem pastor: Maach Por Jesucristoouta ich imeerba jaaupitarr aawai muata pʉrʉg mʉg ẽsap phã chirʉm. Mamʉ chi iekhan ar chadam iekpaita iekha sĩerrʉm iekhau. Ichdeun ich daúa oonaa ich jʉ̃gʉucha ũrtarrjã ich agjoota jaaujem. I gaaimuata warrjã Ẽwandamau nem thum ompaa aujim. Mag sĩerrʉmuata pʉrʉg ich imeerba jaaupʉipitarr aawai pʉrʉg jaaukhim:

Apocalipsis 3:7

Filadelfia phobor eem pastor: Maach Por Jesucristoouta ich imeerba jaaupitarr aawai muata pʉrʉg mʉg ẽsap phã chirʉm. Mamʉ chi iekhan Cristo iekhau, ar ichta bʉ̃ʉrjã pekau chukhunaa seu chukhu khitʉm iek. Ichdeuta warr rey David khararr yabmejã wai chirʉm aajem. Iruata mag yabmeeu puertdi weeu sĩubarm chan ni ãbmuajã pod phãar aubam aajem; wa iruata warag khãijã phãar sĩubarm chan ãbmuajã pod weeu aubam aajem. Ich mag sĩerrʉmuata pʉrʉg ich iek jaaupʉipitarr aawai pʉrʉg jaaukhim:

Apocalipsis 4:5

Mag porkhau warm khʉʉn jãrrcha sim aarmua pagthʉm dau phʉr jẽjẽer khabaadem dʉi ĩchab phiphis khabaademua sĩi iyʉʉmjo aadep sĩejim. Mag porkhau pom sim khĩirphee õtdau siete paakhanaa dʉnʉnʉid thʉnaajim. Makhʉʉn ich Ẽwandam Akhaar ajim.

Apocalipsis 4:8

Mag sĩsidʉmʉn amach jayapwe sĩi nem ich khapan agdaujo seis wai sĩsid ajim, amachpierr. Ierr jãgarm magwe dau phuphupnaa ʉ̃rjã sĩi dau khapan phuphup sĩsid ajim. Amach makhʉʉnau bʉ̃ʉrjã ijeeuba edaram magwe Ẽwandam tho iekhamamua, “Ẽwandam, pʉjo bʉ̃ʉrjã pekau chukhum khʉʉn chan ooba aajem” anaajim. “Pʉchta thumaam khʉʉn Por anaa thumaam khʉʉn khãaijã chi jua thierriu. Pʉchta warrgarwejã ich mag sĩerranaa mʉg atagjã ich mag sĩerraju” a tho iekhamajierram.

Apocalipsis 5:6

Mʉchig magbaa mua oo nʉʉ aawai, chadcha mag sĩi khanjo dau jayap ich paar sĩsidʉm bigaau jooin ohood wejom jãrr, ar corderodamjo ʉdʉraa ich thõopiwia deeu iiutarrta oothẽu kherajim; ajapcharan ich Jesuma. Amau i thõo naawai pa gaai meerphetarr agtha merag chukhu sĩejim. Mag khitʉmʉn sĩi kach khapan sietenaa dau khapanjã agjo siete phuphup sĩejim. Makhʉʉn dau khapanag siete nʉmua chi Corderoou Ẽwandam Akhaar gaaimua nem thum khaphʉnaa durrpierr oo phe wai sĩejemta jaau sim.

Apocalipsis 8:2

Mag khĩu thʉnʉʉ arr khur mua oowai Ẽwandam chognaanta siete i na dʉnʉnʉid thʉnaajim. Makhʉʉnag siete trompetas deejim, amach pipied ãhãbdo auwi okhar ichdeu jaaumam aig sirmamkhĩir.