1 Juan 2:2 - Wounaan Meu

² Jesucristota maach pekau kõit ʉdʉraa ich thõopijim, mag ich thõopibarmua maach pekau appaijã khaba thum ich iek ʉkha nʉm khʉʉn denpa Ẽwandamau chugpaapʉimamkhĩir.

Woun Meu

² Jesucristota maach pekau kõit hʌdʌraa hich t'õopijim, mag hich t'õopibarmua maach pekau happaijã k'aba t'um hich hiek hʌ̈k'a nʌm k'ʌʌn dënpa Hẽwandamau chugpaapʌ̈imamk'ĩir.

1 Juan 2:2 Iomraidhean Croise

San Lucas 14:22

Mag jaaubaawai chi chogau mawia, ichdeu jaaupʉitarrjo awia, deeu barchewia magjim aajem, ich patronag: “Mua thum pʉchdeu jaautarrjo abarm. Mamʉ magʉmjã agtha õor khapaana dʉrr aju simgui” ajim anʉm.

San Juan 1:29

Mag ichig jeeuchetarr khʉʉn dʉi iyʉʉ sĩerr noram Juanau oowai, mag irua amag jaau sĩerr Jesuuta i aig ur nʉrrajim. Mag ich aig urum oo athaawai ich aig narr khʉʉnag, —Pãade oobat ajim: Ẽwandamau pʉitarr ar ur khitʉm. Jãguata corderodamjo ʉdʉraa ich thõopibarmua õor thumaam khʉʉn pekau chugpaa aujugui ajim.

San Juan 12:32

Pari ĩchab mag ʉ̃gthaa õor khapanag dakhĩir mʉ jiirjop sĩuwia thõobarmuata mʉch iek ʉkhamam khʉʉnan mua thumaa mʉchig paa aumajugui ajim.

San Juan 4:42

Mag amachdeucha Jesuu jaau sim ũrwia ʉkhatarr khʉʉnau chi ʉʉirag, —Ya ĩs chan sĩi pua jaau sim ũrwiapai khaba, maach jʉ̃gʉucha i iek ũrwiata marau ʉkha nʉmgui aajeejim. Ya chadcha marau khaphʉ nʉm, jãguata chadcha durrpierr ich iek ʉkha nʉm khʉʉn thum peerdʉ auju khabahab aajeejim jũrram khʉʉnau.

Hebreos 2:17

Pari mag maach peerdʉajemkhanaa ĩchab ichta warrgarm phadnaan porou aajerrjo Ẽwandam dʉi maach kõit iekhaajem khaagan, ichiita ich Jesujã nem thumaam athee maach ich eeugpeenkha nʉm khʉʉnjo wounkhaju aai sĩejim. Mag sĩewai phadnaanau õor khaibag paar nemchaain kheechjerrjo, jũrr ichta maach kõit ʉdʉraa ich thõopibarmua maach khaibag thum chugpaa aujim.

1 Pedro 2:24

Maachta maach pekau gaaimua Ẽwandamau khechpʉiju aai naajim; mamʉ mag narrta Cristoouta jũrr maach kõit ʉdʉraa pakuls gaai ich meerphe thõopijim, magbarmua maach ich athee peerdʉ auwi ya tag pekau waujujã khaugba sĩi ich dʉipaita nem agcharam appai wau wenʉrramkhĩir. Magta Cristo dau aphʉʉ õor jua machgau bag kha ʉ̃ʉipa khitajim, maach pekau ee narrta ʉu peerdʉ awaag.

1 Pedro 3:18

Pãrau khaphʉ nʉm, Cristojã maach khãai ajapha khitarrta, jũrr maach Ẽwandam dʉi iekkhõr pom narr khʉʉn kõit ʉdʉraa ich dau aphʉʉ apijim. Pari mag i meetarran, warr õrau amach pekau athee ʉ̃iba nemchaain thõojerr khĩir khaba arr aawai, mag biek ãbpai meebarmua maach chi khaibagnaan Ẽwandamau ʉu maach auju ayaa amkhĩir ajim. Í woun arr aawai chi meen chadcha meejim; mamʉ í ĩchab ich Aai gaaimua Ẽwandam arr aawai mag meetarrjã ich mag iiu sĩsijim.

1 Juan 1:7

Pari ich jãg Ẽwandamjã pekau chukhu ararag eeta sĩejemjo maachjã ĩchab pekau wauba nʉm gaaimua ararag eeta wenʉrrʉmjo nʉmʉn, magan Ẽwandamau dich khapeen dʉijã õor ãbamjo o ãba apinaa ĩchab ichdeu ich Iewaa Jesucristoog ich bag maach kõit ãrtarrauta maach khaibagjã thumaa chugpaapiejem, ich jãg doou memerkhog ʉawai chugpaajemjo.

1 Juan 3:5

Pãrau khaphʉ nʉm, Jesucristo mʉg jẽb gaai beewai mʉig eegarm khʉʉn pekau chugpaaju jʉraanta beejim, ichjo pekau chukhu paapʉimaag. Maadeu khaphʉ nʉm, í bʉ̃ʉrjã pekau chukhu khitʉm.

1 Juan 4:10

Mag Ẽwandamau maach khõsi sim chan mag maachdeuta nacha maach garmua i khõchkhatarr aawai khaba, ich garmuata maach daupigau ich Chaai pʉijim, maach kõit ʉdʉraa ich thõopimkhĩir, mag ich thõopibarmua maach khaibag chugpaapʉyaag.

1 Juan 4:14

Mag nʉm dʉi ĩchab chi Ayau ich Iewaag õor peerdʉ aumkhĩir pʉitarrjã marau maach daúacha ootarr aawaita mag khaphʉ jaau nʉm, chadcha Ẽwandam maach dʉi khapeerkhaju aai sim õrag khap amkhĩir.

1 Juan 5:19

Maadeu khaphʉ nʉm, maach chadcha Ẽwandam denkha nʉm; pari khaphʉ nʉm ĩchab, mʉg jẽb gaai õor pom sĩi dosãtauta ich jua eegar phe wai sim.

Apocalipsis 12:9

Magta chadcha chi mepeer mag õoirjo sim ich khapeen ich igar thʉnarr khʉʉn dʉi ãba ʉ̃gtharmua mʉg jẽb gaai barkhʉʉipʉijim. Ich mag mepeerpaita warrgarwe nemkhõr gaai thʉ̃rnaa ĩchab Satanás a thʉ̃ʉrjem, durrpierr õor thumaam khʉʉn khũgurmie, ajapcharan dosãtma.