Nacmiya 3:1 - NABUWWA KEE MALIKWA

¹ Magaalak gasoosa elle xisnem annak ten. Eliyaasib deqsita num kee kaal luk tan seeka taama qimbisak, Illi-Afa deqsitta afa xisen. Too afah xisnek gaba kalen saaku, afa Yallah taahirroyseeniih; culmah alifih edde haan coox edde heen. Seeka, sahda akak yabloonuh xisen Bool-Qari deqsita qarik xabba haanamaay sahda akak yabloonuh xisen Cananal-Qari fanah amma 'yaanam, a gaso Yallah taahirroysen.

Nacmiya 3:1 Iomraidhean Croise

Nacmiya 12:10

Yaasuwa, Yoyaakim xale; Yoyaakim Elyaasib xale; Elyaasib Yoyaadaq xale;

Nacmiya 12:30

Tohuk lakal seeka kee Leewih yooboke mari, isinni nabsi taahirroyseeniih; sarra kaadu ummatta kee Yarusalaam magaalat maroh sugte gasoy xiseenihiyya kee woo gasoh afoofi taahirroysen.

Nacmiya 12:39

Tokkeek Efrayim-Afa deqsitta afa kee Yasaanah Afa deqsitta afaay, Kullum-Afa deqsitta afaay, sahda akak yabloonuh xisen Cananal-Qari deqsitta qari kee, sahda akak yabloonuh xisen Bool-Qari deqsita qaril taturra inneh, Illi Afa deqsitta afah nemeete. Ta gexoy rooruh gacca 'yeenih abak sugeenihiyyak, Dacayrih Marih Afa gufen waqdi yeeden.

Nacmiya 13:28

Yoyaadaq kaxxa seekih yen Elyaasib baxak yen. Takkay immay kay baxi Sanballat deqsita numuy Beet-Coron deqsitta magaalal yoobokehiyyah baxál digibe. Tohuk gexxaamah Yoyaadaq Yarusalaam magaalah addak eyyeeqeh.

Nacmiya 13:4

Sek Elyaasib deqsita sek Toobiya deqsita num lih qalla luk yen. Eliyaasib Yallih Qibaadah-Qarik duyye edde daanisan golittek abbah yeneeh; tonna leemiik Toobiyah kaxxa goli yecee. Kaah yecee goli, sadgatah baahan daro kee qaydarusuuy, Yallih Qibaadah-Qarih duyyeey, seekah mattacoh yeceen duyyeey, dakaatah baahen daro kee qinabak bicsen kamri kee, tonnah kaadu, zeyti (saliid) duma daanah elle haak sugen golik ten. Too dakaatah gaaboysen duyye, Yallih xinto elle inta'nnal, Leewih yooboke mara kee Yallih Qibaadah Qaril saare aba mara kee, tonnah kaadu, Yallih Qibaadah-Qarit dacayrih yan marah yeceen duyyek ten.

Nacmiya 3:20

Dabbáy-Baaruk wohul katayta exxa bicseeh, Elyaasib deqsita kaxxa seekih yen numih buxah culma fan xisak baahe.

Nacmiya 3:21

Uriyyá-Mareemot deqsita numuy Hakkox deqsita numuk baxi baxah yenehiyya tokkeek Elyaasib qari edde yaade exxa fanah bicse.

Nacmiya 3:32

Dahab bicisak yen mara kee tellemmo abak yen mari ellecaboh exxa bicsen. Gaso akak makkinta aracay amol qari akak yanihiyyaak, Illi-Afa deqsita arac fan bicsen.

Nacmiya 6:1

Sanballat kee Toobiya kee Gesam kee kalah yan maray naqboytiitih nek yenehiyya yakkeemiik, a gasoh xisnek gaba kallem yoobbeeniih, mango gasoosak gudet ten faxo duudusnem kaadu yoobbeenih. Takkay immay akak culan afoofi edde haan coox uxih edde hayneh manannino.

Nacmiya 7:1

Gasô-xisne gaba kalteeh, gasoh afoofit haan coox kaadu le aracat akak hayne. Sarrak culmah afat dacayrih gacu waa mara kee, Yallih saare abu waa mara kee, gersi Leewih yooboke marah inkih, aboonu waan taama warisne.

Ermiyaas 31:38

YALLI qagseh iyyeemih, «Yarusalaam magaala yi migaaqal edde xissintu wayta ayroora amaatele. Sahda akak yabloonuh xisen Cananal-Qariy amo-xeerik xabba haanamaay, Rukni-Afah deqsita aracah amma 'yaanam edde xisoonu waan wakti amaatele.

Daaniyel 9:25

Taaxigem meqemii, Yarusalaam nammayhaak xisoonuuy, elle sugte'nnal tet gacsoonuh amri yeceenim kee, Yalli doore mirac yamaateemik fanat, waktik malcina waqdi malciin-gide kee, lactam kee namma waqdi malciin-gide tatrele. Gititte kee qande le megdeb luk tet xiseloonuh immay too waktil kaxxa gadaama akkele.

Zakariyya 14:10

Gabaq deqsita aracay kilbat le kabut raaqak xabba haanamaay, Rimmon deqsita aracay gabbi le qaxat raaqahiyyah amma 'yaanam fan booxa akkele. Yarusalaam magaala dariifal teetik tan baaxok fayya axcuk raaqele. Magaalak exxa Benyam-Culma deqsitta afak xabba haanamaay, duma magaala akak culak sugen af elle suge arac fan gexak, Rukni-Afah deqsita arac fan gufele. Sahda akak yabloonuh xisen Cananal-Qariy amo-xeerik, malik buxah marih qinab kamri axmuumuk elle bicisak yenen arac fan gufele.