Cabakkuk 1:8 - NABUWWA KEE MALIKWA

⁸ Ken faaris sissikaaneh kabqik laftele. Satqitte suulak aban cunxok fuli cunxo keenik abelon. Faariisa keenik kaqoh fayxih inki aracal mataseehedaay, xukcunoh baaxo dub heele. Qawi tu bukkusam faxa waqdi sissikuk elle yamaate innal, a mari kaadu xer baaxok marin baaxo yabbixe'gidih, faaris xoxbisak amaatelon.

Cabakkuk 1:8 Iomraidhean Croise

Yasaqya 11:14

Oson titta geyya heenih ayrô-culma le kabul tan Filistiin-ummattat qeebi abeloonuuh; ayrô-mawqa le kabul tan ummatta kaadu buubelon. Edom kee Mooyab-ummattak qeebil ayseloonuuh; Qammon-ummatta ken yab oggolelon.

Ermiyaas 4:13

Naqboytit, qamburre qaraanal elle tamaate innal, tamaateh tan! Oson qeebi edde aban faaris, baaxok bagul fuluk axcuk gexxa caacoh innal, yamaate. Ken faras sissikaaneh qawiytak umah. Too saaku ummat: «Ahaysa baati nee tibbixeh! Nim tekkeh!» axcelon.

Ermiyaas 48:40

YALLI iyyeemih, «Qawi qawtam faxxa waqdi raarisak elle tamaate'nnal, Mooyab marat buuba abu waa mari raarisak yamaate.

Ermiyaas 5:6

Ta umaanek gexxaamah, garboh addak tewqe lubookah gadda akkelon. Bacaril tan suula ken kitittifele. Kabqi oson elle yanin magaaloolih dariifal ilaalisak suggu 'yeh; yawqen waqdi ken kitittifele. Toh keenit akah takku waytam, aban dambi keenik yemeggeh. Ayrok ayro uma taamat qagitak maacisan.

Ermiyaas 50:42

Tikyah macaxu kee gaysê-baxa loonuuh; racmatta kee xuwaawah loonum malon. Faarisit gacca 'yeenih gexan way, haffo baaha badih xaw lon. Baabelon maraw, siinit qeebi abaana'gidih, roorul gacca 'yeenih yamaaten.

Yacedkel 17:12

«Ama yabti-cina-leela a ceelalloy baahehiyyak maqna yaaxigeenim keh ken esserey. Baabelon malik Yarusalaam fanah amma 'yeh, malik kee kay maray kay gubal abbootan luk sugehiyya Baabelon fan beem keenih waris.

Yacedkel 17:3

Keenik intaamah, ‹YALLAY Mulki lehiyya siinik iyyaamah: Dumah yan saaku kaxxa qawiy nabam qaxa-meqe xagor leeh kaxxa galwa lehiyya tene, iyyen. Ayrok teena too qawi Lubnaan fanah haaddeeh; tokkel *sarid-caxah amol nookteeh sariidik ludda tiggile, iyyen. Sarrak woo qawi woo caxah ludda bahha hayteeh mango badaaqat elle aban baaxo fanah beyteeh; tellemmo aba mari mangom elle yan magaalal hayte.

Yacedkel 26:11

Faariisat qeebi aba mari magaalak kulli gital ummat seefit qidelon. Kaxxa-kaxxa qamidwa bututtukka heeloonuuh ballaaqeh gacissa heelon.

Hosiqa 8:1

YALLI kaadu qagseh iyyeemih, «Baanta nagay kaayisa. Qawi qaraanak raarisak elle yamaate'nnal, naqboytit baaxol raarisak yi marat tamaate. Yi ummat anu ken lih hee bica yol makteeh, anu aba keenik exceemit darre cabte.

Naacum 2:5

Qaskar-abba qaskarah seeco aba. Too seecol enketta 'yeenih, ardah andafoofoluk, magaala maroh edde tan gasoh yamaaten. Gaysê-baxak isinni edde waasan kaxxa mansaf bicsen. Sarrak, culmah afa edde yaggilen gurmudda baahen.

Xafanya 3:3

Tet addal tan doolatat taamitta abbobti, qulule lubaakih innah, baaxo meekitan. Tet addal tan cokmi abeenit, maaci edde maacise barugak cayye wayte suulah innah gacan.