14 Etya nai ai Yob epite ŋolo nyiirarya Akuj ŋakiro kon erae kirworo iyoŋ ebe, ‘Nyete ayoŋ Akuj, eyakasi ŋakiro kaŋ kiŋaren keŋ ka edarit ayoŋ iŋes eketuruwo ayoŋ ŋolo eyookino.’
Tari kegwor ayoŋ eoroe abala, ‘Toiunae!’ Mam ŋini ebuni aiun; tari kanyaraanar ayoŋ acela, mam ŋini itiyae ŋuna iyookino aŋuna kaŋ.
Okoe kerae ca oyeni neni aryamunia iŋes ka epite ŋolo adolio neni iboiyo iŋes,
“Okoe, kerae ca oyakar ayoŋ ipei ŋini iirari ŋakiro kaŋ! (Erae nu ŋakiro ŋuna alimu ayoŋ etogogoŋit, emaikina Akuj ŋina etiron okoboŋok ayoŋ.) Okoe kerae ca kigiritetei ŋakiro ŋuna ekesiitakinitor ayoŋ emoit kaŋ.
Ibala daŋ iyoŋ ebe, ‘Nyisicani Akuj ŋituŋa anaŋoit keŋ, ka nyemisit iŋes nooi ŋakiro ŋuna ebilibiliyata ŋituŋa ŋikisila.’
Kiirasi, epedori Akuj akitor diyete kaŋ, ido nyapedori akiŋolikin iŋes, etubonor iŋes alodiyete kaŋ, nai nyapedori ayoŋ ayenun.
Ani katema ayoŋ akisinda ka Akuj anagogoŋu kaŋ, iŋes eruwor ŋina egogoŋ; ani kerae aŋuna ka akiyookino, ŋae akanyarakini ayoŋ Akuj?
Nyiŋayaŋayata anakikinyomit Ekapolon, kidara iŋes alotooma atitinyikinit ikiŋarak iyes; tocoito nyenepu ekibure aneni kus, iŋolikinete ŋituŋa ebarete anakitiya ŋuna aronok; nyenepu ekibure aneni kus iŋolikinete ŋituŋa itiyaete ŋuna aronok ŋuna eyeto ikes akitiya.
Akuj bon edarit ayoŋ atitinyikinit, anerae neni keŋ aryamunitor ayoŋ aiuno.
Okoe ŋituŋa kikinyoma Akuj; anerae Akuj iŋes erae akaiunan yok.
Eyakasi nawaetin keŋ ŋidouwon ka akiryonut ŋina iryono cuc ipukat iŋes alotooma akiyookino ka ŋuna a kire.
Kikote neni daŋ ecamit Ekapolon akitiya ajokis neni kus, aŋun ebuni iŋes akisyon iyes; anerae erae Ekapolon Akuj ŋina ka akiyookino, erereŋ daadaŋ ŋulu idarito iŋes.
Ŋae alokidiŋ kus itopoloorit Ekapolon ka ŋini iwuapit ŋakiro a eketiyan keŋ? Ŋae elosi anakiryonut ka ŋini emamukar akica? Emaikina ŋin kikinyom ekiro ŋolo a Ekapolon ka toyarikinite neni ka Akuj keŋ?
Mam eborosit a ejie ŋolo ikimanitere iyoŋ ŋolo epedori akiwan iyoŋ, ilouni iyoŋ aloikiiko daadaŋ ŋulu ikisitakinito iyoŋ. Erae ŋun ŋajokisya ŋuna eryamunete ŋiketiyak a Ekapolon ka erae ŋun ŋuna isiyookinito ŋuna alimu ayoŋ.”
Edarit ayoŋ Ekapolon ŋolo iwuait ereet keŋ aneni a ŋituŋa a Yakob ka egenokin ayoŋ neni keŋ.
“Okoe Ekapolon, ibu iyoŋ towo aŋuna kaŋ, ibu iyoŋ tolaku akiyar kaŋ.