Yer. 4:16 - Ebaibul

¹⁶ Tolimokisi ŋituŋa a ŋakwapin ebe, “Eyakasi ŋikiyakitono ŋul ne!” Kiserata ŋakiro nu neni a ŋituŋa a Yerusalem ebe, “Eponito anakwap a ŋina alwanan; ŋituŋa ŋulu ikirikaunete iyes, ecelasi ikes imanito ŋitaunio a Yudaya.

Yer. 4:16 Iomraidhean Croise

Isa. 34:1

Okoe ŋituŋa a ŋakwapin, toapuutu kiirasi, okoe ŋituŋa topupokisi! Emaikina akwap kiira ka ŋinibore daadaŋ eyai nakwap; emaikina akwap kiira ka ŋinibore daadaŋ ŋini elomununui alokwap.

Isa. 39:3

Bu nai ekadwaran Isaya neni a erwosit Esekia, kiŋit tema, “Ŋakiro a nu irworosi ŋituŋa ŋul? Ai aponiata ikes neni kon?” Toboŋok Esekia tema, “Eponito ikes neni kaŋ anakwap a ŋina alwanan nooi, a ŋina enyaritae Babilon.”

Yer. 1:15

Anyaraunit ayoŋ tokona ŋituŋa a ŋikabilae daadaŋ a ŋapukasinei a ŋuna alo Kuju, tosodi epote ikes, ido iwuakinete ŋirwosi kec daadaŋ ŋikicoloŋo kec ŋulukipukaet lopukei a Yerusalem imanito ŋarwatatain ŋuna ewuato iŋes daadaŋ ka imanito ŋitaunio a Yudaya daadaŋ.

Yer. 16:6

Etwakete ŋituŋa daadaŋ a akwap a na, ŋikapolok ka ŋulucaryo. Nyenukyo ikes, mam ituŋanan iwololoe aŋuna kec, mam ŋini egeri akuwan, mam akibany ŋitim aŋuna kec.

Yer. 2:15

Erurumata ŋimoe kec neni kec esibito ŋiŋatunyo, erurumata ŋimoe kec ecelasi nooi. Eturuwosi akwap a Ŋisirael acaryoit, enyasun ŋitaunio kec, mam ituŋanan iboi alotooma kec.

Yer. 31:10

Iyes ŋituŋa a ŋakwapin, kiirasi ŋakiro a Ekapolon, tolimosi ŋakiro ŋun anakwapin a ŋuna alodiyete anam, anakwapin a ŋuna alwanak. Temasi iyes, “Ecunakini nabo Ŋisirael ŋolo sek eelari ikes, iyoki ikes lopite ŋolo iyokiyo ekeyokon ŋamesekin keŋ.

Yer. 39:1

Alokaru a ŋolo a ŋitomon elap ŋolo a ŋitomon ipukat erwosit Sedekia ŋolo a Yudaya, abu erwosit Nebukadinesar ŋolo a Babilon kaapei ka ŋasigarya keŋ daadaŋ potu Yerusalem kirikaut.

Yer. 4:17

Irikaunete ikes Yerusalem lopite ŋolo irikaunitotor ŋiketeok emanikor, anerae akaŋero ayoŋ ŋituŋa a Yerusalem.

Yer. 5:15

Okoe ŋituŋa a Isirael, eyakuuni ayoŋ neni kus ŋituŋa ŋulu ka akwap a ŋina alwanan, erae ikes ŋituŋa ka akwap a ŋina agogoŋon ka ŋinaŋorot, erae ikes ŋituŋa ŋulu nyiyenete iyes aŋajep kec, kori nyipedorete iyes ayenun ŋakiro ŋuna irworosi ikes.

Yer. 5:6

Aŋun, eari eŋatuny ŋolo ebunit anamoni ikes, emunyari epeot ŋolo ebunit analoŋisat ikes. ite eris ŋitaunio kec eremokino; ituŋanan daadaŋ ŋini elomuni kiŋa alotaunio kec, enyilinyiliyaryo, anerae elalak ŋasecisya kec ka epol nooi epite ŋolo aŋeryoto ikes akiwuap ŋuna ebookoi.

Yer. 50:2

“Tolimosi anakwapin a daadaŋ ka kiserata, kikyaasi abendera ka kiserata, nyimunono ŋakiro nu, temasi iyes, ‘Ekamar Babilon, esirumi Bel ŋileec, akadaki Merodak. Esirumi ŋitorubei a ŋakujo kec ŋileec, akadaki ŋakujo kec.’

Yer. 6:18

Aŋun, kiirasi okoe ŋituŋa a ŋakwapin, toyenutu okoe ŋatukon a ŋituŋa, ŋakiro ŋuna etakanunuyete neni kec.

Yer. 6:19

Tolimu nai Ekapolon tema, ‘Okoe ŋituŋa a akwap, kiirasi, ayauni ayoŋ ŋican neni a ŋituŋa a lu, ŋakiro ŋuna a eropit aŋuna eyete ikes akitiya, anerae awout ikes akiirar ŋakiro kaŋ ka aŋero akitatam kaŋ.’”

Yer. 6:22

“Kiirasi, eponito ŋituŋa anakwap a ŋina alo Kuju, ecunasi ŋituŋa a ŋakiboisyo a ŋuna alwanak nooi anakwap.

Yer. 6:23

Etiŋito ikes ŋakwaaras ka ŋakawo a ŋikaleŋeleŋe, ededeŋ ikes nooi, nyisyoniyoko, epol eruye a ŋakejen kec ikwaan ka eruye a ŋakipi anam, emeto ikes ŋaŋolei ka eyakatar ŋiboro daadaŋ ŋulujiet, okoe ŋituŋa a Sion eponito ikes akirem iyes!”

Yer. 8:19

Kiirasi akigworo a ŋituŋa kaŋ, igworosi ikes aneni eapi ka aneni alwanan ebasi, “Emam mono Ekapolon alo Sion a? Emam mono erwosit a Sion alotaun keŋ a? Kaanukiro eketoŋoeta ikes ayoŋ a ŋitorubei kec, kaanukiro eketoŋoeta ikes ayoŋ a ŋitorubei a ŋakujo kec a ŋuna egelaaka?”

Esek. 21:22

Ikamuni iŋes aloteten keŋ ekaleŋeleŋet ŋolo igiritae ekiro a Yerusalem. Apolou keŋ atemar elimokinitae iŋes alosit akiwuakin Yerusalem ŋiboorei ŋulu ebwaŋere arwatata ka alimokin ŋituŋa keŋ akiar ŋituŋa a Yerusalem, acelun aŋuna ka akisimukekin ŋikajiok, akiwuakin lopukei a Yerusalem ŋiboorei ŋulu ebwaŋere ŋipukei, adukokin akititis narwatata a Yerusalem ka arekin Yerusalem ŋaduketa ŋuna aoyak ŋuna irikaunitere iŋes.