Yer. 22:10 - Ebaibul

¹⁰ “Okoe ŋituŋa a Yudaya, nyigworo aŋuna a erwosit Yosia, kori nyigworo aŋuna atwania iŋes; emaikina iyes kigworo aŋuna a ŋini arikor iwace, anerae nyeboŋuni iŋes nabo akiŋolikin akwap keŋ.”

Yer. 22:10 Iomraidhean Croise

2 Ŋirw. 22:20

Aŋun, akacunakini ayoŋ iyoŋ ka atapapaa kon, ikinukio iyoŋ emam ŋace. Nyiŋolikini iyoŋ akisicanio daadaŋ ŋina alosi ayoŋ ayaun nakwap na. Epote ŋun kitwana iyoŋ kerumor.’ ” Apotu nai ikes yaasi ŋakiro ŋun neni ke erwosit.

2 Ŋirw. 23:29

Apaki ŋina epukator Yosia abu Parao ŋolo anyaritae Neko bu anakwap keŋ alo Ijipit, tolot neni ke erwosit a ŋolo ka Asiriya anaŋolol Eupurate. Acamit Neko akiŋarakin erwosit ŋolo ka Asiriya akitijiore Yosia, tolot neni keŋ pa eyeni ŋakiro ŋadi, nai ani iryamete ikes lorot aneni enyaritae Megido, abu Parao Neko toar Yosia.

2 Ŋakiro a ŋirwa 36:4

Kilunyok Neko ŋolo arae erwosit a Ijipit Eliakim lokaato a Yosia toruwor erwosit a Yudaya ka Yerusalem, kilocok tari ekiro keŋ toruwor Yeoiakim; nai ya Neko Yeoas Ijipit.

Ekal. 4:2

Abu ayoŋ otamak atemar ejokak ŋulu adaut atwakare akilo ŋulu eriŋa eyarete.

Isa. 57:1

Ani etwakete ŋituŋa ŋulu iyookino, emam ituŋanan emisit atamatam alotau keŋ. Ani earyo ŋituŋa ŋulu enupito nooi, emam ituŋanan eyeni ŋakiro ŋuna aarere ikes. Elemanaryo ŋituŋa ŋulu iyookino, anerae nyecamitae ikes toryamut ŋican,

Yer. 16:7

Mam ituŋanan elemuni akimuj aŋuna ka akisirworiun ŋini igworo; kori mam ŋini einakini idiobore ŋinimatat aŋuna ka akisirworiun ikes aŋuna ka atwanare a papa, kori a toto kec.

Yer. 22:11

“Ŋakiro nu ikes irworo Ekapolon aŋuna a Salum alokoku a erwosit Yosia a ŋolo a Yudaya, irworo Ekapolon nu neni a Salum a ŋolo abu kilunyokin lokicoloŋ a papa keŋ a Yosia ka a ŋolo aponi torikoroe anakwap a na. Nyeboŋuni nabo iŋes nakwap na,

Yer. 22:18

“Aŋun, alimu Ekapolon ŋakiro nu aŋuna a erwosit Yeoiakim a lokoku a Yosia a ŋolo a Yudaya ebe, Nyiwololoete ikes aŋuna keŋ ebasi, ‘Okoe lokaato kaŋ,’ kori ‘Okoe nakaato kaŋ.’ Nyiwololoete ikes aŋuna keŋ ebasi, ‘Okoe Ekapolon,’ kori ‘Okoe erwosit!’

Yer. 22:27

Nai nyeboŋorete ikes nakwap ŋina iitanito ikes aboŋor.

Yer. 25:27

“Ilimokini nai iyoŋ ikes ebe, ‘Alimu Ekapolon ŋolo a ŋajoresyo, Akuj a Ŋisirael atemar tomata, tomerakinos, toleka, ido kibusokinos nyinyout nabo aŋuna a ejie a ŋolo eyakuunit ayoŋ neni kus.’

Yer. 28:4

Enyakuni daŋ ayoŋ nakibois na erwosit Yeoiakim lokoku a Yeoiakim a ŋolo a Yudaya ka ŋituŋa a Yudaya daadaŋ ŋulu aponi torikoroe Babilon, anerae alemari ayoŋ apedor a erwosit a Babilon.’ ”

Yer. 42:18

“Erae nu ŋakiro ŋuna alimu Ekapolon ŋolo a ŋajoresyo, Akuj a Ŋisirael ebe, ‘Lopite ŋolo abunio aŋoit kaŋ ka anyunyura kaŋ toyakaun neni a ŋituŋa a ŋulu eboiyete alo Yerusalem, ikwaŋinapei, ebuni anyunyura kaŋ neni kus daŋ apaki ŋina ilosyoto iyes Ijipit, iruworosi iyes ŋituŋa ŋulu icenere ŋuluce ka ŋulu inyasere ŋuluce, ikijamuwarete ŋituŋa iyes ka iyanyio ŋituŋa isitiyao ekiro kus. Nyiŋolikinete iyes akibois na nabo.’

Yer. 44:14

ikotere emamukaunor ipei daŋ a Ŋiyudayan a ŋulu apotu toloto akiboi Ijipit ŋini ebucar, kori eiun, kori eboŋori nakwap a Yudaya. Tari kimuit ikes aboŋor Yudaya, nyeboŋorete ikes jik, alemar ŋikerimitok ŋidi bon.’ ”

Aum. 4:9

Apotu ŋituŋa ŋulu etwakete aŋuna ka akoro toryamut aryebo ŋina apipilan alotuŋa a ŋulu earyo alojie. Abu akoro kisirid ŋituŋa ŋul tari ŋina atwakyata aŋuna amamukar akimuj ŋina alemunito alomanikorin kec.

Esek. 24:16

“Lokoku a ituŋanan, eapi ayoŋ akinaŋ iyoŋ anaŋet apei bon tojoŋo akitere; nai nyigwori, kori nyikalouni, kori nyeleleunete ŋakiyo anakonyen kon.

Luk. 23:28

Nai toboboŋ Yesu, kiŋolik ikes tolimok tema, “Ŋaberu ŋuna a Yerusalem! Nyigworosi aŋuna kaŋ, nai kigworos aŋuna kus ka aŋuna a ŋidwe kus.