Yer. 2:7 - Ebaibul

⁷ Abu ayoŋ okoyau iyes nakwap ŋina ileleba ibore daadaŋ, ikotere inyamete ŋaraito keŋ ka ŋiboro keŋ ŋulu ajokak. Nai ani ilomarete iyes nakwap ŋin ipotu iyes tomunaasi akwap kaŋ kituruwosi akwap kaŋ ŋina asiilyanan.

Yer. 2:7 Iomraidhean Croise

Neem. 9:25

Apotu Ŋisirael kikamanasi ŋitaunio ŋulu adukitoe ŋaduketa ŋunajiet, kikamasi akwap ŋina ajokan a ŋalup, kituruwosi ŋakais ŋuna elelebitae ŋiboro ŋulu ajokak daadaŋ ŋuna kec, ŋakare, ŋimanikorin ŋulu a ŋikito a epiini, ŋulu a ŋikito ka Olipa ka ŋulu a ŋikito a ŋaraito ŋulu alalak; aŋun apotu ikes kimuja kimwoko ka totuma, tolelyana aŋuna ka ajokis kon a ŋina apolon.

Neem. 9:26

“Kikote neni daŋ, apotu ikes nyiwuapa ŋakiro kon ka apotu itoŋero iyoŋ tojamuwasi ŋikisila kon ka toara ŋikadwarak kon ŋulu apotu tolimokis ikes akimyekin ŋuna aronok ŋuna etiyaete ikes ikotere eboŋunete neni kon, apotu daŋ ikes ikiyanya iyoŋ nooi.

Isa. 19:25

eruwor ikes ŋakwapin ŋuna eterereŋ Ekapolon ŋolo a ŋajoresyo ebala, “Erereŋ ŋituŋa kaŋ ŋulu a Ijipit ka ŋituŋa ka Asiriya ŋulu asubuni ayoŋ ta Ŋisirael ŋiseuna kaŋ.”

Yer. 16:18

Aboŋokini ayoŋ akisican ikes nabo aŋuna ka aronis kec ka aŋuna ka asecit kec, anerae apotu ikes kitoroniyasi akwap kaŋ a ŋalyalin, a ŋamuja, a ŋakujo kec a ŋuna nyeyarete, ido elelebikis nakwap kaŋ asiilyo.

Yer. 3:1

Ŋakiro ŋuna irworo Ekapolon ikes nu, “Ani kelak ekile aberu keŋ, ido tolot aberu ŋin aneni keŋ toruwor aberu a ekile a ece eboŋori mono iŋes neni a aberu a ŋin a? Nyeruwor mono ŋun ŋuna emunaarete akwap ŋin a? Itiyata iyes amalao ka ŋulu iminatar ŋulu alalak; ipedorete nai iyes aboŋun neni kaŋ a?

Yer. 3:2

“Kirereosi kidiama kiŋolikis ŋikamukumukui epite ŋolo aororunioto! Eyai mono akibois ne ŋina nyitiyatotor iyes ŋuna ka amalao a? Iboiyonokinosi iyes nawaetin a ŋirotin a ŋulu iminasi, lopite ŋolo iyokiunitotor ŋikeyokok ŋibaren analoŋisat. Imunaasi iyes akwap aŋuna ka amalao ka aronis kus.

Yer. 3:9

Aŋuna atakania aneni a Ŋisirael esibit ŋakiro ŋuna ka akilip neni a ŋakujo ŋacaryo, apotu ikes tomunaasi akwap kec, apotu ikes kilipa neni ka amoru ka neni a ekitoe.

Yer. 32:23

Apotu ikes tolomut nakwap na kituruwosi ŋina kec, nai apotu ikes nyiwuapa ŋakiro kon, kori ŋikisila kon, apotu nyitiyata ŋuna ilimokinit iyoŋ ikes akitiya. Aŋun, ibu iyoŋ iyau ŋican lu daadaŋ neni kec.

Yer. 32:30

Mam ŋakiro ŋuna ajokak ŋuna etiyata ŋituŋa a Isirael ka ŋulu a Yudaya, nai ŋakiro ŋuna aronok bon etiyata ikes alokiŋaren kaŋ, ameun ŋina pei erae ikes ŋisorok, mam ŋakiro ŋuna ajokak ŋuna etiyata ŋituŋa a Isirael, nai eketoŋoa ayoŋ a ŋiboro a ŋulu itiyaete ikes a ŋakan kec.

Esek. 20:24

Abu ayoŋ etiya ŋun, anerae apotu ikes toŋero akiwuap ŋuna alimokinit ayoŋ ikes akiwuap, apotu toŋero akiwuap ŋikisila kaŋ ka apotu tojamuwasi akoloŋit kaŋ ŋina a Sabato, toloto akilip ŋakujo atapapaa kec.

Esek. 20:28

Ani kadau ayoŋ ayaun ikes nakwap ŋina sek eiikinit ayoŋ ainakin ikes, apotu ikes inakis ŋamuronisya neni a ŋakujo anakiboisyo ca a daadaŋ a ŋunamukur aŋuna apotu ikes kiŋolikis, kori alokito ca a daadaŋ a ŋulu alibak a ŋulu apotu ikes kiŋolikis. Apotu ikes eketoŋoa ayoŋ a ŋamuronisya a ŋuna apeyete ikes ka a ŋainakineta a ŋuna ke epiini aŋuna ayeneneete ikes nen.

Esek. 20:6

Akoloŋit ŋin, iŋes abunio ayoŋ ekoŋ neni kec atemar ayauni ikes anakwap a Ijipit ewuak nakwap ŋina adau ayoŋ akiwarun aŋuna kec, nakwap ŋina elelyaata ŋakile ka ao, nakwap ŋina ibus nooi akilo ŋakwapin ŋunace daadaŋ.

Esek. 23:35

Ŋuna tokona irworo Ekapolon Akuj ikes nu, aŋuna ikimuryakinia iyoŋ ayoŋ ka aŋuna nyeriŋa iyoŋ ikimitakinit ayoŋ, emaikina iyoŋ ikitir ŋakiro kon ŋuna ka aleeco ka amalao.”

Esek. 36:17

“Lokoku a ituŋanan, apaki ŋina eboiyoto Ŋisirael anakwap kec, apotu ikes tomunaasi akwap kec alopitesyo kec ka aloticisyo kec. Apotu ŋipitesyo kec kikokis eketisiilyanete ayoŋ ŋulu ka aberu a ŋina eyai lolap.

Osea 9:3

Nyidoŋete ikes iboiyete anakwap a ŋina ke Ekapolon, nai eboŋorete ŋituŋa a Epuraim Ijipit, imujete ikes anakwap ka Asiriya ŋamuja ŋuna italeo ikes akinyam.

Mika 2:10

Tonyoutu, toloto, meere akibois na ŋina emaikina iyes kiboiyoto, anerae adaun amunaar, adau asecit kus akinyasun akibois na jik, mam ibore ipei daŋ epedori akitojokun iŋes jik.

Ekim. 13:27

Tolimokis ikes Moses temasi, “Adoli isua nakwap ŋina ikiyakiyarit iyoŋ isua; eleleete ŋakile ka a ao anakwap a ŋin, ŋaraito keŋ ikes nu.

Ŋikis. 21:23

nyemaikina kimyekinae akuwan keŋ ineno alokitoe akuwar kia, emaikina iyes tonuka iŋes akoloŋit ŋinapei earere iŋes, anerae ituŋanan ŋini inenekinio lokitoe, ilamit Akuj iŋes. Nyemaikina iyes tomunaasi akwap ŋina ikiinit Ekapolon Akuj kus iyes aruwor ŋina kus.

Ŋikis. 32:9

Erae ŋituŋa a Isirael ŋulu keŋ, eturuwo iŋes ŋiletok a Yakob ŋulu keŋ.

Ŋikis. 6:18

Kitiyata ŋuna ejokak ka ŋuna iyookino alokiŋaren Ekapolon kus, ikotere ejokak ŋakiro aneni kus ka ikotere ilomarete ka ituruworete akwap ŋina ajokan ŋin ŋina kus, akwap ŋina abu Ekapolon kikoŋ neni atapapaa kus ainakin iyes.