Sakar 10:8 - Ebaibul

⁸ “Anyarauni ayoŋ ŋituŋa kaŋ, ido ocunak ikes daadaŋ nakwap kec. Aiuni ayoŋ ikes, ido etipituni ikes, tolalata ikwapei sek ayakatar.

Sakar 10:8 Iomraidhean Croise

1 Ŋirw. 4:20

Apotu ŋituŋa ŋulu atutubet a Yudaya ka ŋulu ka atutubet a Isirael tolalata nooi kikwaanikin alalau kec ka asinyon ŋina eyai nawae a anam; emujete ikes ka amasete ejok, ido alakara.

Awos. 1:7

Nai apitaka Ŋisirael, ido apotu topitut nooi, toruworos ŋituŋa ŋulu alalak, kilelebunos nakwap a Ijipit.

Isa. 44:22

Alema ayoŋ ŋasecisya kus, lopite ŋolo eakarya edou, alema ayoŋ ŋasecisya kus, lopite ŋolo eŋopiyarya ekuno. Toboŋutu neni kaŋ, anerae akalaku ayoŋ iyes.

Isa. 48:20

Towotokisi alo Babilon, toema alo Babilon tolimosi ŋakiro ŋun ke ecelet a ŋolo ka alakara, kiserautu ŋakiro ŋun. kitodolo ŋakiro ŋun nakisaleta ka akwap, temasi iyes, “Alaku Ekapolon ŋiketiyak keŋ ŋiletok a Yakob.”

Isa. 5:26

Iwuakini Ekapolon akitoodikinet ŋina enyaraa ŋituŋa a akwap a ŋina alwanan, ekutakini iŋes ekapiriicit tonyarau ŋituŋa anakisaleta a akwap, ido epote ŋul iwonyete atipei ka ekerete!

Isa. 51:11

Aŋun, eboŋunete ŋituŋa ŋulu elakakinit Ekapolon, epote Sion eosi, eyakaunotor ikes alelyanu ŋina nyedaun, eryamunete ikes alelyanu ka alakara, emamukaun aneni kec akiyaloloŋ ka akisuta.

Isa. 7:18

“Akoloŋit ŋin, ekutakini Ekapolon ekapiriicit anyaraunia Ŋijipitian, potu anakisaleta a ŋaŋololin a Ijipit elalak nooi esibito ŋicuc ka enyarauni ŋituŋa ka Asiriya potu elalak nooi esibito ŋicuc a ao.

Isa. 7:19

Epote ikes daadaŋ kiboiyoto anayona a ŋuna eya nakadipaalae, aneni etyakatyaka anatabab, anamon a ŋuna a ŋikukwa ka neni daadaŋ edakasi ŋibaren.

Yer. 33:22

Ikwaŋina nyepedorotor ŋiboorei ŋulu alokidiama akimarun ka nyepedorere asinyon ŋina ka anam akipimun neni etya, ikwaŋinapei etalalauni ayoŋ ŋiletok a eketiyan kaŋ a Daudi ka ŋilepi ŋulu eketiyanakinete ayoŋ.”

Osea 1:10

Kikote neni daŋ, elalakiata ŋituŋa a Isirael ikwa asinyon ŋina ka anam, ŋina nyipimun, kori nyimarun, ido anakibois a ŋina abookore ikes “Meere iyes ŋituŋa kaŋ,” elimokinio ikes ebe, “Irae iyes ŋidwe ŋulu ka Akuj a ŋina eyari.”

Mika 2:12

“Okoe iyes ŋituŋa a Yakob, kire jik, akacunakini ayoŋ iyes daadaŋ iwapei, acunakini ayoŋ ŋipiya a Ŋisirael; acunakini ayoŋ ikes kaapei ikwa iudere ŋamesekin nanok, acununi ayoŋ ikes ikwa ecunere esipan a ŋamesekin anadakar; ilelebun ŋituŋa nakibois kus nooi.

Sakar 9:11

“Aŋuna ka acamunet kaŋ ka iyes, a ŋina ikicamunor iwon anakisitiya ŋaokot ŋuna a ŋamuronisya, alacakini ayoŋ ŋituŋa kus ŋulu eenitae, nyerubakinete ikes eenen anapanya a ŋuna emam ŋakipi.

Mat. 11:28

“Potu neni kaŋ iyes daadaŋ ŋulu ikiupit aloticisyo kus ka aŋuna ka akiwokit ŋigogoso; ekesieŋuni ayoŋ iyes.

Akis. 22:17

Ebasi Etau ka Ateran, “Bua!” Itemokino ituŋanan daadaŋ ŋini iirari nu tema, “Bua!” Itemokino iŋes ŋini enyamit akure bu, itemokino iŋes ŋini ecamit ŋakipi ŋuna ka akiyar, ya pa egyelit.

Akis. 7:9

Ani kelunyar ŋun, abu oanyuwa asepic a ŋituŋa a ŋulu pa apedori idiotuŋanan akimarun. Arae ikes ŋulu a ŋibukui, a ŋikabilae, a ŋakwapin ka a ŋaŋajepa a daadaŋ. Apotu ikes towua alokiŋaren ekicoloŋ ŋolo a Imesek; tonapito ŋilowi ŋulu akwaŋak ka toyakatar ŋaten ŋuna a ŋaŋolya nakan kec.