Sakar 10:6 - Ebaibul

⁶ “Eturuwori ayoŋ ŋituŋa a Yuda ŋulu egogoŋ, aiuni ayoŋ ŋituŋa a Isirael. Esyoni ayoŋ ikes, ido enyaku ikes daadaŋ nakwap kec; ikwaanikin ikes ka ŋituŋa ŋulu sek pa aŋerit ayoŋ. Arae ayoŋ Ekapolon Akuj kec; aboŋokini ayoŋ ŋuna iŋitasi ikes.

Sakar 10:6 Iomraidhean Croise

Ŋikiru. 89:21

Erubakini agogoŋu kaŋ eyai neni keŋ jwi jwi itogogoŋi apedor kaŋ iŋes.

Isa. 11:12

Eyauni Ekapolon akitoodikinet aŋuna a ŋituŋa a ŋakwapin, ecunakini iŋes ŋituŋa a Isirael ŋulu ielara, ecunakini iŋes ŋituŋa a Yudaya ŋulu eelar; ecununi iŋes ikes alowaetin a ŋuluomwon a akwap a daadaŋ.

Isa. 14:1

Nai isyoni nabo Ekapolon ŋiletok a Yakob ka eseuni nabo Ŋisirael, iwuakini ikes nabo nakwap kec, epote ŋituŋa ŋulugelae akiboi kaapei ka ŋiletok a Yakob.

Isa. 41:10

nyikuryaketa, anerae ikirukit ayoŋ ka iyes, nyikuryaketa, anerae arae ayoŋ Akuj kus, eketogogoŋi ayoŋ iyes ka ekeŋarakini ayoŋ iyes. Akaiuni ayoŋ iyes a apedor kaŋ a ŋina elounan.

Isa. 54:4

Nyikuryaketa, anerae nyikisirumyo iyes ŋileec nyikikadanak, anerae nyikijamuwaryo iyes. Nyitamunete nabo iyes ŋileec ŋulu iyakatar iyes eriŋa isorokaka, nyitamunete nabo iyes ŋiyany ŋulu iboiyoto iyes isibito ŋapuseru.

Isa. 54:8

Abu ayoŋ ananyunyura kaŋ a ŋina alalan ewua ereet kaŋ aneni kon, nai anamina kaŋ a ŋina a ŋikaru ka ŋikaru, ekesyoni ayoŋ iyoŋ.

Yer. 23:6

Alorwa keŋ eiunio ŋituŋa a Yudaya ka iboikinosi ŋituŋa a Isirael emam ŋace. Enyarao iŋes a ekiro a lo, ‘Ekapolon iŋes erae akiyookino yok.’ ”

Yer. 3:18

Alorwa a ŋul, imorikinosi ŋituŋa a Isirael ka ŋituŋa a Yudaya, epote ikes kaapei anakwap a ŋina alo Kuju a ŋina arikoritae ikes, epote nai ikes nakwap ŋina abu ayoŋ oinak atapapaa kec toruwor ŋina kec.

Yer. 30:18

Alimu Ekapolon ŋakiro nu ebe, “Enyakari ayoŋ ŋituŋa kaŋ nakwap kec, ido esyoni ŋikalya daadaŋ, edukokinio Yerusalem nabo, inyakakinio akai ŋina ka apukan nakibois ŋina pei sek ayai.

Yer. 30:20

Iboiyete ŋidwe kec lopite ŋolo koloŋ sek eboiyoto, etogogoŋi ayoŋ atukot kec alokiŋaren kaŋ, ido esicani ayoŋ ŋulu isicanete ikes.

Yer. 31:1

Alimu Ekapolon ebe, “Apaki ŋin aruwor ayoŋ Akuj a ŋikalya a daadaŋ a ŋulu a ŋituŋa a Isirael, ido eruworosi ikes ŋituŋa kaŋ.

Yer. 31:20

Erae mono Epuraim lokoku kaŋ ŋolominat a? Erae mono iŋes ikoku ŋini alakara ayoŋ aŋuna keŋ a? Ŋapakio daadaŋ ŋuna eruworor ayoŋ neni kus eketoroniyarit, akatamunit ayoŋ iyes. Aŋun, iyakasi iyes lotau kaŋ, kire jik, ekesyoni ayoŋ iyes.

Yer. 31:31

Alimu Ekapolon ebe, “Kire jik, eponito ŋirwa ŋulu ewuakinia ayoŋ acamunet ŋinakitete ŋina ikicamunor ayoŋ ka ŋituŋa a Isirael ka ŋulu a Yudaya.

Esek. 36:11

Etalalauni ayoŋ ŋituŋa kus ka ŋibaren kus. Iyatakinosi ka epitunete. Ilalakunete iyes nooi akilo neni paaran sek ka etiyae ayoŋ neni ŋuna ajokak nooi iloito ŋuna ke ekiŋaren. Iyenunete nai iyes atemar arae ayoŋ Ekapolon.

Esek. 36:37

“Alimu Ekapolon Akuj atemar, acamakini daŋ ayoŋ Ŋisirael ekeŋita ayoŋ etiya nu aŋuna kec; akiyatakin ekimar kec tolalaar nooi ikwa esipan a ŋamesekin.

Esek. 37:16

“Lokoku a ituŋanan, tolemu ebela kigir ŋakiro nu lobela, ‘Erae ŋolo a Yuda ka ecamuna Isirael daŋ ka iŋes;’ Tolemu nabo ebela ece kigir ŋakiro nu lobela ŋol, ‘Erae ŋolo a Yosepu (ebela a Epuraim) ka ecamuna Ŋisirael daadaŋ ka iŋes.’

Esek. 39:25

“Aŋun, alimu Ekapolon Akuj atemar, enyakuni tokona ayoŋ ŋapiya a Yakob anakwapin a ŋuna aponi torikoroe, esyoni ayoŋ Ŋisirael daadaŋ ka euryari ayoŋ ekiro kaŋ ŋolo asegan nyituruwor ekoŋinait.

Osea 1:11

Imorikinosi nabo ŋituŋa a Yudaya ka ŋulu a Isirael, eseunete nai ikes ekarikon kec epei, ikamarete ikes akwap kituruwosi ŋina kec. Kire, eruwor akoloŋit ŋina itiyakinotor ŋakiro ŋun alo Yesireel akoloŋit ŋina apolon nooi.

Osea 1:7

Nai esyoni ayoŋ ŋituŋa a Yudaya aiuni ayoŋ ikes, nyaiuni ayoŋ ikes a akau a ŋina a ŋikaleŋeleŋe, kori a ekileŋ, kori a ŋiboro a ŋulujiet; nyaiuni ayoŋ ikes a ŋaŋolei, kori a ŋasigarya a ŋuna edokito ŋaŋolei nai aiuni ayoŋ ikes a apedor a Ekapolon Akuj kec.”

Osea 14:9

Emaikina ŋituŋa ŋulu aosok toyenut ŋakiro nu, emaikina ŋituŋa ŋulu epiiryaka toyenut ŋakiro nu, anerae iyookino ŋirotin ŋulu ke Ekapolon, iwuapito ŋulu iyookino ŋirotin ŋul, nai ibusonokinosi ŋulu nyitiyaete ŋuna iyookino alorotin a ŋulu ke Ekapolon.

Osea 2:23

Tosodi ewuakini ayoŋ ŋituŋa kaŋ nakwap ka ainakini ayoŋ ikes arereŋu. Etoodikini ayoŋ amina kaŋ neni a ŋini sek anyaritae ebe, ‘Lo-Ruami,’ ido atemari neni a ŋini sek anyaritae ‘Lo-ami’ ebe, ‘Irae iyoŋ ŋini kaŋ’. Etemari iŋes ‘Irae iyoŋ Akuj kaŋ.’”

Obad. 1:18

Ededeŋiar ekal a Yakob ikwa akim, ededeŋiar ekal a Yosepu ikwa arira, ido eruwor ekal ke Esau ŋolo icunyo; icunyarete ikes ekal ke Esau kitoŋopiyasi, mam ituŋanan idoŋi eyari alokal ke Esau, anerae adau Ekapolon alimun ŋun.

Mika 4:13

Ebala Ekapolon ebe, “Ŋituŋa a Yerusalem, toloto kisicana ŋimoe kus, eketogogoŋi ayoŋ iyes ikwa emaanik ŋolo egogoŋ ŋamomwar ikwa ŋasuwa ka togogoŋ ŋimolokony ikwa eburonis. Ireunete iyes ŋakwapin ŋuna alalak, ikiinakinete iyes ayoŋ ebari kec ŋolo kepotu ikes toŋatut anaryenyeo. Iyaunete iyes ebari ŋol neni kaŋ ke Ekapolon a akwap a daadaŋ.”

Mika 4:6

Alimu Ekapolon ebe, “Ani edoli akoloŋit ŋin, acunakini ayoŋ ŋikaŋwalak, acunakini ayoŋ ŋulu ealar nakwapin ka ŋulu eteryamu ayoŋ ŋican.

Mika 5:3

Aŋun, imyekini Ekapolon ŋituŋa keŋ mono a lomoe kec, akitodol ŋina idounio aberu ŋina emaikina kidou lokoku keŋ, ŋolo erae ekepukan. Apaki nai ŋin iŋes eboŋunioto ŋikaitotoi keŋ ŋuluce kimorikin ka Ŋisirael.

Mika 5:8

Alokidiŋ ŋakwapin eyakaun ŋipiya a Yakob, eyakaun ikes kidiŋ ŋituŋa ŋulu alalak, ededeŋiata ikwa eŋatuny alokidiŋ ŋityaŋ ŋulu ka amoni, ikwaanikin ka iŋatuny ŋini eyai kidiŋ esipan a ŋamesekin, ŋini ani eporokini amesek, iimakini kwap toryeta ka tonyilinyiliya, todaun ikaiunan amesek.

Mika 7:16

Iŋolikinete ŋakwapin ŋakiro ŋuna itiya iyoŋ, ido kiruma ŋileec, tari sek daŋ kerae ŋakwapin ŋun ŋuna egogoŋ, ebunete ikes ŋakituka kec ka erapete ŋaki kec.

Sakar 1:16

Aŋun ŋakiro ŋuna irworo Ekapolon ikes nu, ‘Aboŋuni ayoŋ Yerusalem esyoni iŋes, ido edukokinio nabo Akai kaŋ nen. Ebutari etaun Yerusalem daadaŋ.’

Sakar 10:12

Etogogoŋi ayoŋ ŋituŋa kaŋ; ilipete neni kaŋ ka iwuapete ŋakiro kaŋ.” Adau Ekapolon alimun ŋakiro ŋun.

Sakar 13:9

Ekatakini ayoŋ ŋituŋa ŋulu idoŋete, ekatakini ayoŋ ikes oliu ikwaŋina eliyere esilipa, ekatakini ayoŋ ikes, ikwaŋina ipoere egolid toanyunere erae kejok. Enyaraete ikes ekiro kaŋ, ido aboŋokini ayoŋ ikes. Alimokini ayoŋ ikes ebe, ‘Irae iyes ŋituŋa kaŋ,’ ido elimunete ikes ebe, ‘Erae Ekapolon Akuj kosi.’ ”

Sakar 8:11

Nai tokona nyetiyae ŋuna aronok neni a ŋipiya a ŋituŋa a Yerusalem lopite ŋolo abunio etiyaa neni atapapaa kec.

Sakar 9:16

“Ani edoluni akoloŋit ŋin, eiuni Ekapolon Akuj ŋituŋa keŋ lopite ŋolo eiunia ekeyokon ŋamesekin keŋ alocan. Ileereunete ikes anakwap ke Ekapolon a Akuj ikwa ŋasuwa ŋuna amilimilak ŋuna inaminamitae lobokot.