Osea 7:14 - Ebaibul

¹⁴ Nyekegworokinete ikes ayoŋ a ŋitai kec, nai iwololoete alokitaadae kec, ecunakin ikes iitanito ŋikinyom ka epiini, akaŋero ikes ayoŋ.

Osea 7:14 Iomraidhean Croise

Awos. 32:6

Aŋun, apotu ŋituŋa tonyout taparacu sek akoloŋit ŋina atupakini ŋin, yaut ŋainakineta kec ŋuna apeyo ka ŋamuronisya ŋuna ke ekisil. Kiboikinos ŋituŋa nen kimuja ka tomata, ido tonyout tobolyata.

Isa. 29:13

Alimu Ekapolon ebe, “Eapiyete ŋituŋa lu aneni kaŋ anakiro aŋuna irworosi ka eketopoloorito ayoŋ anakiro aŋuna irworosi, nai elwaka ŋitai kec aneni kaŋ, erae akilip kec neni kaŋ ŋina iwuapitere ŋikisila ŋulu etatamyo ikes eboonokin alimunun.

Isa. 52:5

Anukiro tokona etiyae ayoŋ a ne ete ŋituŋa kaŋ eyaaryo emam ŋuna esecito? Ejamuwarito ŋikepukak kec ikes ka a ŋinakoloŋit erubakinito ejamuwarito ekiro kaŋ.

Isa. 65:14

Eokinete ŋiketiyak elakara alotai kec, nai igworete iyes aŋuna ka aryeba a ŋitai kus ka iwololoete aŋuna ka akiyaloloŋ a ŋitai kus.

Yer. 12:2

Idupakini iyoŋ ikes, toruba ŋataagor kec, epolounete ikes toraut ŋaraito. Irworosi ikes ŋuna ajokak aŋuna kon, nai nyikimisito ikes iyoŋ alotai kec.

Yer. 3:10

Kikote neni daŋ apotu ŋituŋa a Yudaya nyeboŋut neni kaŋ a ŋitai kec a daadaŋ, nai anakitusubuna ŋulu kaŋ nyerae bo.”

Aum. 2:18

Okoe ŋituŋa a Yerusalem, kigworonokisi Ekapolon, kimyekisi ŋakiyo kus tolelyata ikwa ŋaŋololin nakwaare ka naparan. Torubakisi igworosi ŋapakio daadaŋ, nyitubo ŋakiyo anakonyen kus.

Osea 13:16

Isicanio ŋituŋa a Samaria aŋuna ka asecit kec anerae aŋero ikes Akuj kec, earyo ikes a ekileŋ, enyilinyiliyaryo ŋawat a ŋidwe kec ka epunonoryo ŋakookyes a ŋaberu kec a ŋuna epotiyete.

Osea 13:6

Ŋina esimuja ayoŋ ikes, apotu ikes kimwoko, nai apotu ikes kiturokinos, tosodi tojoŋoto atamunit ayoŋ.

Osea 13:9

Okoe ŋituŋa a Isirael, akamunyari ayoŋ iyes, ŋae nai ikiuni iyes?

Osea 3:1

Okolimok nabo Ekapolon ayoŋ tema, “Ape, kitoodik nabo amina kon neni a aberu aŋina aruwor ŋina a ekile a ece ka aruwor akaloman. Emaikina iyoŋ tominak iŋes lopite ŋolo aminar ayoŋ ŋituŋa a Isirael tari keminasi ikes ŋakujo ka tominas aayenen neni a ŋakujo ŋaboboryo ŋuna erukitoe esibit ŋamugati.”

Osea 8:2

Ekegworonokini ayoŋ Isirael ebala, “Okoe Akuj, ikinupit isua iyoŋ.”

Amos 2:8

eperete ikes alodiyete ŋamuroeta daadaŋ enapito ŋilowi ŋulu ijaunitae ituŋanan aŋuna a ŋamicae, ido emasete alo Kai ka Akuj kec epiini ŋolo itelemunio ituŋanan ŋini esecit.

Amos 8:3

Akoloŋit ŋin, iwololoete ŋituŋa eeosi alo kai a ŋina ilipyata; ilelebun ŋawat a ŋituŋa ŋiwaetin daadaŋ ŋulu ka akwap, imasaryo ŋawat a ŋituŋa kiŋa ekililiŋat.”

Mika 2:11

Ani kebu ekalyokonon, kori emodiyanot, ido tema, ‘Akadwarakini ayoŋ iyes epiini ŋolo alalan ka ŋagwe ŋuna alalak,’ eminakinete ŋituŋa ŋul ekadwaran ŋol.”

Sakar 7:5

“Kiŋit ŋituŋa ŋulu ka akwap kon ka ŋisacaradotin ebe, ‘Ani mono apaki ŋina iponiata iyes kiredakis akiron ka kigworo elap ŋolo a ŋikan ka ŋolo a ŋikanikaarei ŋikaru ŋatomonikanikaarei ŋulu alunyarosi, arae mono kire aŋuna kaŋ iredakinitotor iyes akiron a?

Ŋirom. 16:18

Anerae nyerae Kristo itiyanakinete ŋituŋa ŋulu ikote ŋul, nai itiyanakinete etic ŋolo ka akiwarit akimuj. Irworosi ikes ŋakiro ŋuna abobok, kirapirapete ŋituŋa alorwor kec ecamito amodikin ŋituŋa ŋulu epalag!

Ŋipil. 3:19

Inyasunio ikes, anerae ekibure ŋolo a ŋawat kec iŋes erae akuj kec; iturosi ikes kan ibore ŋini itemokino kirumyata ŋileec ikes, ka eyakasi ŋatameta kec loboro ŋulu ka akwap a na bon.

Yak. 4:3

Tari ŋina iŋisyata iyes iŋes, nyiryamunete, anerae iŋitasi erono; iŋitasi iyes ŋiboro ŋulu isitiyaete aŋuna ke ekibure kus.

Yak. 5:1

Topupokisi tokona ŋakiro kaŋ, iyes ŋikabarak! Kigworo ka kiwololoto aŋuna a ŋican a ŋulu eponito neni kus!

Ŋikat. 9:27

Toloto ŋituŋa a Sekem lomanikorin kec togerut ŋaraito a epiini, tocuut epiini ido kitiyata ŋasuban. Tosodi toloto kai ŋina ka akuj kec kimuja ka tomata, ido kirworo ejamuwarito Abimelek.