Osea 4:12 - Ebaibul

¹² Eloseneneete ŋituŋa kaŋ akiŋita ŋakiro aneni ka akuj a ŋina erae akitoe, elimonokini ikes ebela ŋolo ke etal ŋakiro ŋuna emaikina kitiyata, anerae etooliyo ikes etau ŋolo ka amalao, etiyata ikes ŋuna ka amalao emyekis akikinyomit Akuj kec.

Osea 4:12 Iomraidhean Croise

2 Ŋirw. 17:7

Apotu ŋun kitiyakinos, anerae asecito Ŋisirael aneni ke Ekapolon Akuj kec a ŋina ayauni ikes tolomunia anakwap a Ijipit, yau ikes anapedor a Parao a ŋolo epukat Ijipit. Kepotu Ŋisirael tolomakis akilip neni a ŋakujo,

2 Ŋakiro a ŋirwa 21:13

Nai iwuap iyoŋ ŋuna itiyaete ŋirwosi ŋulu a Isirael ka ituruwo iyoŋ ŋituŋa a Yudaya ka ŋulu iboiyete alo Yerusalem ŋulu nyikinyomito Akuj lopite ŋolo aponiata ŋituŋa a ekal ka Aab kitiyata ka daŋ aŋuna iarya iyoŋ ŋikaitotoi kon, ŋituŋa a ekal a papa kon ŋulu ajokak akilo iyoŋ,

Ŋikiru. 106:39

Aŋun, apotu ikes toruworos ŋulu emam ajokis alotooma ŋuna etiyaete, apotu ikes toŋero Akuj aloticisyo kec kilipa neni a ŋakujo.

Ŋikiru. 73:27

Kire jik, edaunosi ŋulu ikiŋerito iyoŋ, imunyari iyoŋ ŋulu nyiwuapito ŋakiro kon.

Yer. 10:8

Imasimasit ka ebaŋaaka ikes daadaŋ; emam akitatam ŋina ejok ŋina eryamunete ikes aneni a ŋakujo a ŋunacaryo.

Yer. 2:27

ŋulu ebasi neni a ekitoe ebe, ‘Irae iyoŋ papa kosi’ ka neni a amoru ebe, ‘Iyoŋ ikiuruuni isua’ Irworosi ikes ŋun, anerae akamuleno ikes ayoŋ ka nyeketeete ikes ayoŋ. Nai apaki ŋina eyakatar ikes locan elimunete ikes ebe, ‘Bua, toiunae isua.’

Yer. 23:13

“Eŋolik ayoŋ alokadwarak a Samaria ibore ŋini asiilyanan, edwarete ikes aŋuna a Baal ka etooliyosi ŋituŋa kaŋ Ŋisirael.

Esek. 20:32

“Nyitiyakinosi jik ŋakiro ŋuna itamete iyes ebe, ‘Ecamitae isua kikwaanikinetei ka ŋakwapin ŋunace, ecamitae kikwaanikinetei ka ŋikabilae a ŋakwapin a ŋunace, ŋulu ilipete neni a ŋakito ka ŋamoru. ’”

Esek. 21:21

Apaki ŋina ebunio erwosit a Babilon, ewoi aneni iwuakinitae akitoodikinet ŋina itoodiunit etaun, anakikicaret a ŋirotin, ikotere eanyuni erot ŋolo emaikina kiwuapak. Iikikokini iŋes ŋikaleŋeleŋe a nen, iŋisi iŋes ŋakujo ŋakiro a nen ka isyeme iŋes ŋamoliteny a ajulot keŋ a nen.

Osea 14:3

Nyepedori Asiriya aiun isua, nyikime nabo isua ŋaŋolei, nyeriŋa nabo isua ikitemari neni a ŋiboro a ŋulu ikitiyauni isua a ŋakan kosi ebe, ‘Ŋakujo kosi.’ ”

Osea 5:4

Nyepedorete ŋiticisyo kec akitoboŋor ikes neni ka Akuj kec, anerae ileleba neni kec etau ŋolo ka amalao ka nyeyenete ikes Ekapolon.

Osea 6:10

Eŋolik ayoŋ ŋakiro ŋuna aronok alotuŋa a Isirael, eyai amalao Epuraim, adau Isirael amunaar.

Osea 9:1

Okoe Ŋisirael, nyilelyana! Nyicelut ilakara, lopite ŋolo itiyaata ŋituŋa a ŋakwapin, anerae imalaaka iyes, imyekis iyes Akuj kus, iminakis iyes eropit ŋolo iryamununeete analosin a daadaŋ.

Ŋilep. 17:7

Nyemaikina Ŋisirael yaasi ŋainakineta kec inakis neni a ŋipyan a ŋulu esibito ŋamee a ŋulu ituruwosi ikes ŋimalaanotin. Emaikina ŋakiro ŋun toruwor etal ŋoloruba aŋuna kec ka aŋuna a ŋanyameta a ŋuna eponito.’

Ŋilep. 20:5

Aŋoikini ayoŋ ituŋanan ŋin kaapei ka ŋituŋa a ekal keŋ, ido eritari ayoŋ ituŋanan ŋin alotuŋa keŋ kaapei ka ŋulu daadaŋ apotu kiwuapa ŋuna keŋ, tomalaaniyasi neni a Molek.

Mika 2:11

Ani kebu ekalyokonon, kori emodiyanot, ido tema, ‘Akadwarakini ayoŋ iyes epiini ŋolo alalan ka ŋagwe ŋuna alalak,’ eminakinete ŋituŋa ŋul ekadwaran ŋol.”

Abak. 2:19

Ekaŋ iyes, ŋulu ibasi neni ka akitoe ebe, “Tonyou!” Kori neni ka amoru ebe, “Tonyou!” Epedori mono akuj ŋina itiyaunitae alimokin iyoŋ ŋakiro ŋadi a? Epedoryo akuj ŋin bon akitiyaun ke esilipa, kori ke egolid, nai mam akiyar eyai tooma keŋ.

Ekim. 15:39

Erae abilet ŋin ŋina ani iŋolikinete iyes iŋes totamut ŋakiciketa daadaŋ ŋuna ke Ekapolon ka kiricakis ikes, ido nyiwuapa ekibure a ŋitai kus, kori ekibure a ŋakonyen kus,

Ŋikis. 31:16

Kirwor Ekapolon neni a Moses tema, “Alotooma apaki ŋina ewuruana, itwani iyoŋ ikwapei atapapaa kon. Egeikinete nai ŋituŋa lu akilip neni a ŋakujo a ŋunagelae a ŋuna eyakasi kidiŋ kec, ŋakujo a akwap a ŋina elosete ikes alomar, akeŋerete ikes ayoŋ, nyiwuapete acamunet kaŋ ŋina ikicamunor ayoŋ ka ikes.

Ŋikat. 18:5

Tolimokis nai ŋikilyok ŋulu alosete akireb akwap esorokit ŋolo arae Elepait temasi, “Kiŋit Akuj, aŋuna kosi ikotere isua ikiyenuni kiyookin ŋakiro ŋuna elosere isua, kori kemam.”