Osea 3:4 - Ebaibul

⁴ Erae ŋun anerae epote Ŋisirael akiboi ŋirwa ŋulu alalak emam erwosit, kori ŋini emaikina kilunyokin lokicoloŋ a erwsoit, emam ŋamuronisya, kori ŋipirin ŋulu italeoritae, kori ŋitorubei a ŋakujo, kori ŋiboro ŋulu isitiyao ayenunia ŋakiro ŋuna ecamit Akuj.

Osea 3:4 Iomraidhean Croise

Akisy. 31:19

Apaki ŋin, alosit Laban akitub ŋajul a ŋamesekin keŋ. Aŋun, abu Rakel kisitiya apaki ŋin akokoiyarya ŋakujo ŋuna a ekal a papa keŋ.

Akisy. 31:34

Kerae Rakel kelemunit ŋakujo ŋuna a ekal a Papa keŋ, kiwuakinit iŋes ikes nisaaja ŋini a ekaal ŋini eboiyo iŋes. Kiwar Laban ŋakujo keŋ loboro daadaŋ aloeema, nai nyeryamu jik.

Akisy. 49:10

Mam ŋini elemari apukan aneni a Yuda, ipukaete ŋiletok keŋ jik, elemianakinete iŋes ŋituŋa a ŋakwapin ocur, ka itopoloorete ŋituŋa a ŋakwapin iŋes.

2 Sam. 6:14

Kidoŋa Daudi itopoloorit Ekapolon ka agogoŋu keŋ a daadaŋ enapit anacir elou ŋolo amilimilan.

2 Ŋirw. 23:24

Abu Yosia tolema ŋimurok, ŋikapilak, ŋakujo ŋuna a ŋikalya ŋuna ayeunitae ta asiilio daadaŋ ŋina ayai nakwap a Yudaya ka Yerusalem. Abu Yosia kitiya ŋun, ikotere isiyookini ŋuna a ŋikisila a ŋulu egiritae lokitaabo ŋolo abu Ilikia esacaradoti torukau alotooma Akai ke Ekapolon.

2 Ŋakiro a ŋirwa 15:2

Tolot Asaria neni ka Asa tema, “Kiirasi ŋakiro kaŋ, iyoŋ Asa ka ŋituŋa a Yudaya daadaŋ ta ŋulu a Benjamin. Irukito iyes ke Ekapolon erae ca kirukito iyes ka iŋes. Ani kiwara iyes iŋes, ikimyekini iŋes iyes toryamut iŋes, nai ani kimyekis iyes iŋes, ikimyekini iŋes daŋ iyes.

Awos. 28:4

Ŋilowi lu ikes emaikina ŋituŋa ŋul kitiyaut: Eboli ŋolo ka atorobu, arapet, ekaaso, esati ka akopiya ta arokoba. Emaikina ikes kitiyaut ŋilowi ŋul aŋuna ka Aron alokaato kon ka ŋidwe keŋ ŋulusapa eketiyanakiniata ayoŋ ikwapei ŋisacaradotin.

Awos. 28:6

“Emaikina ikes kiwuakis narapet egolid, kitiyaut a ŋanaŋgae a ŋunapusiyek, a ŋunakipura-areŋak ka a ŋuna areŋak, torae ŋuna amilimilak ŋuna edonyunit ituŋanan ŋini eyeni akidony ejok nooi.

Aum. 2:9

Aritaar ŋipukei a arwatata emuleleiyasi ŋamoru, amunaiya ka abilibilaa Ekapolon ŋasuwa ŋuna sek ilorere ŋikekya. Arikor nakwapin erwosit a Yerusalem ka ŋikapolok ŋulu epukatotor iŋes. Adaun ŋikisila. Nyisileerekino Ekapolon ŋikadwarak ŋakiro keŋ anakirujaeta.

Esek. 19:14

Amyaa akim ŋinapei anatorom keŋ, anomiya ŋaten keŋ ka ŋaraito keŋ. Emam nabo atorom keŋ ŋina agogoŋon ŋin neni idoŋit, neni emaikina tolemunae ebela a erwosit. “Erae lo eete ŋolo ka aumonokin ka emaikina kisitiyae erae eete ŋolo ka aumonokin.”

Esek. 20:32

“Nyitiyakinosi jik ŋakiro ŋuna itamete iyes ebe, ‘Ecamitae isua kikwaanikinetei ka ŋakwapin ŋunace, ecamitae kikwaanikinetei ka ŋikabilae a ŋakwapin a ŋunace, ŋulu ilipete neni a ŋakito ka ŋamoru. ’”

Esek. 21:21

Apaki ŋina ebunio erwosit a Babilon, ewoi aneni iwuakinitae akitoodikinet ŋina itoodiunit etaun, anakikicaret a ŋirotin, ikotere eanyuni erot ŋolo emaikina kiwuapak. Iikikokini iŋes ŋikaleŋeleŋe a nen, iŋisi iŋes ŋakujo ŋakiro a nen ka isyeme iŋes ŋamoliteny a ajulot keŋ a nen.

Esek. 21:31

Abukuni ayoŋ neni kus anyunyura ka akakutakini ayoŋ iyes anyunyura ŋina amwanan pe. Ekepotokini ayoŋ iyes nakan a ŋiryenyaanotin a ŋulu eyenete nooi epite ŋolomunaaret.

Dan. 11:31

Epote ŋasigarya ŋuna iyakuunit iŋes, ido toloma nen, tomunaasi ŋaduketa ŋunajiet, itojoŋoete ikes ŋituŋa ayaunun ŋamuronisya ŋuna a ŋinakoloŋit ka eyaunete ikes nen asiilyo ŋina eyauni ekasile.

Dan. 12:11

Ameun anakoloŋit a ŋina ajoŋoere ayaunun ŋainakineta ŋuna epeyo, akoloŋit ŋina etiyaere asiilyo ŋina abu yau ekasile, eyakaun ŋirwa aliput ka ŋamiae ŋaarei ka ŋatomoniomwon.

Dan. 9:27

Iwuakini nai ekarikon ŋol acamunet ŋina agogoŋon ka ŋituŋa ŋulu alalak, acamunet ŋina iboi ŋikaru ŋikanikaarei, ani elunyar atutubet apei ŋina a ŋikaru a ŋul, elemari iŋes ŋamuronisya ka ŋainakineta. Iwuakinio neni sek eayeneneo ikes etorube ŋolo aronon ŋolo asiilyanan ŋolo eyauni ekasile. Erubakini iŋes eyai nen akitodol ŋina emunaarya Akuj ŋini abu kiwuak etorube ŋolo nen, itiyakin ŋun lopite ŋolo etubunitor Akuj.”

Osea 13:10

Ai bo tokona eyai erwosit kus ikotere ikiuni iyes? Ai eya ŋikapolok alotaunio kus a daadaŋ, ŋulu sek ibasi iyes ayoŋ, “Inakinae isua erwosit ka ŋikepukak.”

Osea 13:11

Abu ayoŋ okoinak iyes erwosit anaŋoit kaŋ, ido abu olema iŋes ananyunyura kaŋ.

Osea 2:11

Etasaluni ayoŋ alelyanu keŋ, ŋasuban keŋ ŋuna a ŋolokaru, ŋasuban keŋ ŋuna a elap a ŋolokitete, ŋasuban keŋ ŋuna a ŋirwa a ŋulu a Sabato ka ŋasuban keŋ daadaŋ ŋuna emaikina iŋes kitiya.

Ŋilep. 8:7

Kitanapik Moses Aron esati, toenik arokoba nacir ka Aron, kitanapik ekaaso, ido kitanapik arapet, kimijak arapet nacir ka Aron a arokoba a ŋina adonyunitoe isibusitae ejok nooi.

Sakar 10:2

Eminasi ŋituŋa alosenen akiŋita akiru nakujo, kori lomurok. Isilereununeete ŋice apolou a ŋakiro a ŋuna kirujatae, nai nyiyookino ŋakiro kec ka erae ŋakoŋinae. Aŋun, itwaŋaete ŋituŋa esibit ŋamesekin ŋuna eolito, eyakasi ikes locan, anerae emam ekarikon.

Sakar 13:2

Ebala Ekapolon ŋolo Etiron ebe, “Akoloŋit ŋin, ekisari ayoŋ anakwap ŋirorwa a ŋakujo, ido nyetamunio nabo ikes jik. Alemari ayoŋ anakwap ŋulu itusubuna ŋikadwarak kaapei ka ŋulu ilipete ŋakujo.

Luk. 21:24

Earyo ikes ŋice ka atum, ŋice eruworosi ŋirikon nakwapin ŋunace; ipudaete ŋituŋa ŋulu nyerae Ŋiyudayan Yerusalem, akitodol ŋirwa ŋulu esalunia apukan a ŋituŋa a ŋulu nyerae Ŋiyudayan.

Yoa. 19:15

Tocelut nabo temasi, “Toar! Toar! Kibubuk iŋes lomusalaba!” Kiŋit Pilato ikes tema, “Icamito iyes ebubuki ayoŋ erwosit kus lomusalaba a?” Toboŋokis ŋisacaradotin ŋulu apolok temasi, “Emam isua erwosit ece, mati ekepukan a Roma bon.”

Ŋibur. 10:26

Emam nabo amuronot ace ŋina elemari ŋasecisya erae kikiredak iwon ikirubakinit ikisecenene, tari kedaun akiteyenikin iwon ŋakiro ŋuna a kire.

Ŋikat. 17:5

Ayakar ekile ŋolo anyaritae Mika ŋol akibois ŋinakilipet, tosodi kitiyau arapet ka ŋitorubei a ŋakujo, ido kituruwo lokoku keŋ epei esacaradoti keŋ.

Ŋikat. 18:14

Apotu nai ŋikilyok ŋulukan, ŋulusek alosito akireb akwap (iŋes Lais) tolimokis ŋirukitos kec temasi, “Iyenete iyes atemar eyakasi nakais nu arapet ka ŋitorubei a ŋakujo ka etorube a akuj ŋolo itiyaunitae anasuwat a? Aŋun, totamatamata tokona ŋuna ilosete akitiya.”

Ŋikat. 8:27

Abu Gideon kitiyau etorube a akuj a egolid a ŋol, kiwuak lotaun keŋ Opura, ido apotu Ŋisirael daadaŋ kilipa neni a etorube. Apotu ŋun kitojamakis Gideon ka ekal keŋ akikinyomit Akuj.

1 Sam. 14:3

alokilyok a ŋul, ayai Aija lokoku ka Aitub a ŋolo arae lokaato a Icabod. Arae Aitub lokoku a Pineas a ŋolo arae lokoku ke Eli a esacaradoti alo Silo, arae Eli esacaradoti ŋolo ke Ekapolon, mam ituŋanan ayeni atemar kelot Yonasan neni eboiyoto Ŋipilistin.

1 Sam. 15:23

anerae ikwaan akiŋer Ekapolon ka asecit ŋina ka akikukuja. Ikwaan akituro ka aronis ŋina ilipere neni a ŋakujo. Aŋuna iŋerio iyoŋ akirot a Ekapolon, ikiŋer daŋ iŋes iyoŋ anaraakau erwosit.”

1 Sam. 2:18

Apaki ŋin, etiyanakini Samuel Ekapolon, tonapite arapet ŋina amilimilan anatorobu.

1 Sam. 21:9

Tema esacaradoti neni a Daudi, “Ekileŋ a Golias, a Epilistait a ŋolo ibu iyoŋ toar anakadipaalat a ŋina ka Ela iŋes eyai ne. Eyai yaaye arapet, itukakinitae elou. Ani kicamit iyoŋ alemar, tolema, anerae mam ekileŋ ece eyai mati ŋol bon.” Tema Daudi neni keŋ, “Yau, mam ekileŋ ece ejok akilo ŋol.”

1 Sam. 22:18

Tosodi nai erwosit tema neni a Doeg, “Doeg, ape toar ŋisacaradotin.” Abu nai Doeg ŋolo arae Edomait tolot toar ŋisacaradotin. Toar Doeg akoloŋit ŋin ŋisacaradotin ŋatomonikanikauni ka ŋikan ŋulu anapito ŋarapeta ŋuna amilimilak.

1 Sam. 23:6

Apaki ŋina alosyo Abiasar lokoku ka Aimelek Keila neni ayai Daudi, kebu iŋes ya nen arapet.

1 Sam. 23:9

Ani eyenuni Daudi atemar itemonokin Saul akitiya aronis neni keŋ, tema neni ka Abiasar a esacaradoti, “Yau arapet laalo.”

1 Sam. 30:7

Tema Daudi neni ka Abiasar a esacaradoti a ŋolo arae lokoku ka Aimelek, “Inunae ayoŋ arapet.” Yau nai Abiasar arapet neni a Daudi.