Ŋirom. 16:26 - Ebaibul

²⁶ Nai tokona esileereun ŋakiro ŋun a Nakigireta a ŋikadwarak ka eteyenikin lotuŋa a ŋibukui a daadaŋ lopite ŋolo icikakinitor Akuj ŋina nyesaluni; ikotere tonupa ka kiwuapa daadaŋ ŋakiro ŋuna ka Akuj.

Ŋirom. 16:26 Iomraidhean Croise

Akisy. 21:33

Todupak Aburaam ekitoe ŋolo ikwaan ka ekwaakwaa Beeriseba, ido tonyara a nen ekiro ŋolo ke Ekapolon, Akuj ŋina a ŋikaru ka ŋikaru.

Isa. 40:28

Nyeyenuna iyes a? Nyiirara iyes a? Erae Ekapolon Akuj ŋina a ŋikaru ka ŋikaru, ekasuban akwap ka ŋinibore eyai nakwap. Nyilelenyenene iŋes, kori nyeupenene; mam ituŋanan epedori ayenun ŋuna eyeni iŋes.

Isa. 9:6

Edoun ikoku aŋuna yok, ikiinakin iwon ikoku ŋinisapat, eruwor iŋes ekepukan, enyarao iŋes, “Ekesirworiunan ŋolo ajokan nooi, Akuj ŋina etiron, Papa ŋolo a ŋikaru ka ŋikaru, Ekapolon a ekisil.”

Mika 5:2

Abu Ekapolon tema, “Betelem, etaun ŋolo eyai Epurata, tari kerae iyoŋ idit nooi alotaunio a ŋulu ka ateker a Yuda, alemuni ayoŋ ekepukan aneni kon, ekepukan ŋolo ebuni akipuka Isirael, ekepukan ŋolo eponito ŋakiro keŋ ananyameta a ŋuna a koloŋ.”

Mar. 16:15

Tolimok Yesu ikes tema, “Apesi nakwapin daadaŋ, kitatama ŋituŋa daadaŋ Ŋakiro ŋuna Ajokak ŋuna ka Akuj.

Ŋitic. 10:43

Iteyenunito ŋikadwarak daadaŋ aŋuna keŋ atemar, ŋini daadaŋ enupi Yesu, isyoniyo ŋasecisya keŋ alokiro a Yesu.”

Ŋitic. 6:7

Kielakin nai akirot ka Akuj nen, kiyatakin nooi ekimar a ŋikasyomak alo Yerusalem. Apotu daŋ ŋisacaradotin ŋulu alalak kiwuapa Ŋakiro ŋuna Ajokak, tonupa Yesu.

Ŋirom. 1:2

Kebu koloŋ sek Akuj kiik Ŋakiro keŋ ŋuna Ajokak neni a ŋituŋa ikwapei egiritotor ŋikadwarak Nakigireta.

Ŋirom. 1:20

Emam ituŋanan epedori akiŋolikin Akuj. Nai ŋinapei koloŋ asubunia Akuj akwap, epedorete ŋituŋa ayenun apedor keŋ ŋina nyedaun ka akujuwuanut keŋ aloboro a ŋulu esubunit iŋes. Aŋun, emam epite ŋolo erimakinere ikes.

Ŋirom. 1:5

Akainaki Akuj ayoŋ arereŋu aneni a Yesu Kristo; arereŋu ŋina ruworet ekiyakia, ikotere etunupya ka esiwuapya ŋituŋa a ŋakwapin a daadaŋ ŋakiro keŋ, ido kitopolooroe ekiro a Kristo.

Ŋirom. 15:18

Erwori ayoŋ emam akuryanu, ido alimuni ŋuna etiya Kristo aneni kaŋ, ŋuna ka akirik ŋituŋa ŋulu nyerae Ŋiyudayan tokera Akuj. Apotu ŋun kitiyakinos alotooma alimonokin ka ŋiticisyo,

Ŋirom. 15:4

Ŋakiro daadaŋ ŋuna igiritae Nakigireta, aponi kigirae aŋuna ka akitatamya iwon, ikotere ikiryamuni akigeno anatitinyu ka anakimukekin ŋuna ikiinakinete Ŋakigireta iwon.

Ŋirom. 3:21

Nai tokona adaun akisileereun epite ŋolo elimorya Akuj atemar iyookino ituŋanan alokiŋaren keŋ, ikwapei iteyenunitotor Ŋikisila ka ŋikadwarak. Nai nyikamunito ŋun Ŋikisila.

Ŋigal. 3:8

Apotu Ŋakigireta koloŋ todwara atemar elimori Akuj atemar iyookinosi ŋituŋa ŋulu nyerae Ŋiyudayan aŋuna ka anupit kec. Aŋun apotu Ŋakigireta tolimokis Ŋakiro ŋuna Ajokak neni ka Aburaam temasi, “Iterereŋi Akuj ŋakwapin daadaŋ aŋuna kon”.

Ŋiep. 1:9

ikitaanyu iŋes iwon alosikinet keŋ ŋina imunono ikwapei araakar acamit ka alakara keŋ ŋin.

Ŋiep. 2:20

Isikwaanitae Ŋikristo ka aduketait: aŋun, adaun iyes adukokin nakisyakinet ŋina ka aduketait a ŋina esyakinete ŋikiyakia ka ŋikadwarak. Yesu Kristo elope iŋes erae amoru ŋina itogogoŋit akai alokoona.

Ŋikis. 33:27

Akuj ŋinaruba iŋes erae akaiunan kus, abu iŋes tomunya anakwap ŋajorei ŋunakoloŋ, abu kirita ŋimoe kus alokiŋaren kus, ido tema, “Tomunyasi!”

Ŋikol. 1:26

Ŋakiro ŋuna ka Akuj ŋun arae ŋuna emunonitae, ŋuna abu iŋes kiwua alotuŋa a daadaŋ ŋikaru ŋulu alunyarosi, nai tokona esileerek neni a ŋituŋa keŋ.

1 Tim. 1:17

Toyai akerit ka apolou ŋina nyedaun neni ke Erwosit a ŋolo ipukae ŋikaru ka ŋikaru, ŋolo nyetwani, ŋolo erae iŋes bon erae Akuj! Amen.

1 Tim. 3:16

Ikilimorit iwon ebe, epol kire jik akimunono ŋina ke edin yok: “Abu iŋes totakanu erae ituŋanan, abu Etau kitoodiu iŋes erae ŋolo iyookino, apotu ŋimalaikan kiŋolikis iŋes. Aponi tolimonokinae ŋakiro keŋ lobukui, apotu ŋituŋa ŋulu alalak anakwap tonupa iŋes, aponi yaarae iŋes kidiama napolou ŋina ka Akuj.”

2 Tim. 1:10

nai tokona adau akisileerekin neni yok anabunore a ŋina ke Ekaiunan yok Yesu Kristo. Adau Kristo akiloun atwanare ka adau akisileereun alotooma Ŋakiro ŋuna Ajokak akiyar ŋina nyetwakere.

Ŋibur. 13:8

Nyiloconokin Yesu Kristo jik, ikoni nenipei ayakar bien, nakoloŋit na ka rwanu daŋ.

Ŋibur. 9:14

Ikwaŋina eraakatar ŋakiro ŋun ŋuna a kire, etya nai ai ŋakiro ŋuna erikakis ŋaokot ŋuna a Kristo! Alotooma Etau ŋolo Asegan, abu iŋes inak akeekuwan neni ka Akuj ikwapei amuronot ŋina asegan. Itesegete ŋaokot keŋ ŋitai yok alotalyo a ŋulu ikirikorete natwanare, ikotere ejaanakisi iwon Akuj ŋina eyari.

1 Yoa. 5:20

Ikiyeni daŋ iwon atemar, adau Lokoku ka Akuj abunore ka ikiinak iwon ayenut, ikotere oyenuniata ŋolo a kire. Ikiyari iwon anakimorikina ka Akuj ŋina erae ŋina a kire ka anakimorikina ka Lokoku keŋ Yesu Kristo. Kristo iŋes Akuj ŋina a kire, iŋes akiyar ŋina nyedaun.

Akis. 1:17

Ŋinapei eŋolikinia ayoŋ iŋes, abu oramakin nakejen keŋ ekok ituŋanan ŋini atwan. Abu nai iŋes kiwuak akan keŋ ŋina aloteten neni kaŋ tema, “Nyikuryaniar! Arae ayoŋ ŋolo Eŋarenon ka ŋolo Esidyon.

Akis. 19:10

Abu oramakin kwap nakejen keŋ akilip, nai abu iŋes tema, “Nyilip neni kaŋ! Arae ayoŋ daŋ eketiyan ikwa iyoŋ ka ikwa ŋikaitotoi kon, ŋulu erae ŋisuudae a Yesu. Kilip neni ka Akuj!” Anerae ŋuna iteyenunit Yesu ikes isirworete ŋikadwarak.