Ŋirom. 12:8 - Ebaibul

⁸ Ani kerae akisimukekin ŋuluce, itemokino iwon esimukekisi. Ituŋanan daadaŋ ŋini ipotonori ka arimao neni a ŋuluce, itemokino kitiya ka alakara. Ituŋanan daadaŋ ŋini erae ekarikon, itemokino kitiya ka alelakinit.

Ŋirom. 12:8 Iomraidhean Croise

Akisy. 18:19

Nyemunoni, anerae adau ayoŋ aseun iŋes ikotere iciki ŋidwe keŋ ka ŋituŋa a ekal keŋ ŋulu iwuapete iŋes, kiwuapa erot ŋolo ke Ekapolon anakitiya ŋuna iyookino ka ŋuna ecamakinitae; ikotere nai isiyookini Ekapolon ŋuna adau akiikin Aburaam.”

Ŋikiru. 112:9

Adaut ikes akoranar ŋiboro kec emam akitac, adaut ikes ainakin ŋiboro kec neni a ŋikulyak; erubakini akiyookino kec ŋikaru ka ŋikaru; itopolooritae nooi apedor kec.

Ŋikiru. 37:21

Eminasi ŋulu aronok akiden, ido nyetaceneneete, nai ipotonorete ŋulu iyookino ŋiboro kec, ido erubakinito ipotonorete;

Ŋakit. 22:9

Eryamuni ituŋanan ŋini emorete ka ŋuluce ŋiboro ŋulu eyakar arereŋu, anerae emorete iŋes ka ŋikulyakanotin akimuj keŋ.

Ekal. 11:6

Kita ŋikinyom kon taparacu, ido nyijamak akitare ŋikinyom kon tari ŋisaae ŋulu ka ataboŋo, anerae nyiyeni iyoŋ atemar a lu elomunete ejok tokoko ejok, kerae ŋulu ka taparacu, kori ŋulu ka ataboŋo, kori elomunete daadaŋ ejok tokoko ejok ikwaan.

Ekal. 9:10

Etic daadaŋ ŋolo itiyaete iyes kitiyata anagogoŋu kus a daadaŋ, anerae emam etic, kori atamatam, kori ayenut, kori aosou anakibois a ŋikatwak a ŋina ilosete iyes alomar.

Isa. 32:5

Nyenyarao nabo ebaŋ atemar ekapolon, kori nyitopolooryo ekasyaat;

Isa. 32:8

Nai eyeete ŋikapolok ŋakiro ŋuna apolok, ido anakiro aŋuna apolok a ŋun, erubakinete ikes erae ŋikapolok.

Isa. 64:5

Ibunene iyoŋ akiŋaranakin ŋulu itiyaete ŋuna iyookino, ŋulu etamunito akiwuapit ŋakiro kon. Nai ibu iyoŋ toŋo, ido aponi isua tosecae, aŋuna ibunio iyoŋ kiwua ereet kon, aponi isua tobilae ŋikisila.

Mat. 25:40

Eboŋokini nai Erwosit ikes tema, ‘Akalimokini ayoŋ iyes kire atemar, ŋinapaki daadaŋ iponiata iyes kitiyata nugu neni a ipei a ŋikaitotoi kaŋ a ŋulu caryo, ipotu iyes kitiyata neni kaŋ.’

Ŋitic. 11:23

Ani edoluni iŋes ka iŋolikini epite ŋolo kebunio Akuj kiterereŋio ikes, tolakar iŋes. Kicikak ikes arubakin anupit Ekapolon a ŋitai kec a daadaŋ.

Ŋitic. 13:12

Ani iŋolikini ekepukan ŋuna apotu kitiyakinos, tonup, anerae abu iŋes toumok nooi aŋuna ka akitatam a ŋina a ŋakiro a ŋuna ke Ekapolon.

Ŋitic. 13:15

Ani kesyomi ekitaabo ŋolo a Ŋikisila a Moses ka ŋakigireta ŋuna a ŋikadwarak, kiyakikis ŋikapolokinitok esinagoga ikes akirot ebasi, “Ŋikaitotoi, ani keyai iyes akirot ŋina isimukekini ŋituŋa, tolimutu.”

Ŋitic. 15:32

Apotu Yuda ka Silas ikwapei araakatar ŋikadwarak, kisimukekis ŋikanupak a ŋakiro a ŋuna alalak, kitogogoŋo ikes.

Ŋitic. 20:2

Ani kedau akirim ŋitela ŋul daadaŋ, kisimukek ŋikanupak a nen, ido tolot Akaia.

Ŋitic. 20:28

Kimukeuna make ka kiyoko esipan daadaŋ ŋolo ecikak Etau ŋolo Asegan nakan kus. Toraakas ŋikeyokok ŋulu ka atukot a ŋina a ŋikanupak Akuj, ŋina abu iŋes kituruwo ŋina keŋ a ŋaokot a Lokoku keŋ.

Ŋitic. 4:36

Ayai daŋ ekile ŋolo anyaritae Yosepu ŋolo anateker a Lepi ŋolo edounitoe alo Kupuro. Anyarito Ŋikiyakia iŋes Baranaba (iŋes atemar “Ŋolo esimukekinan”)

Ŋirom. 12:13

Tomora ŋiboro kus ka ŋikanupak ŋuluce ŋulu ekulyakaka ka toŋaununutu ŋituŋa ŋulugelae lorerya kus.

Ŋirom. 13:6

Erae ŋakiro ŋunapei ŋun itacata iyes ocur daŋ, anerae itiyaete ŋikapolok aŋuna ka Akuj, apaki daadaŋ ŋina itiyaata etic ŋolo itemokino ikes kitiyata.

1 Ŋikor. 12:28

Anatukot a Ŋikristo, adau Akuj akiwuakin ŋituŋa loticisyo kec: ŋulu esyaunak erae ŋikiyakia, ŋulu a ŋiarei erae ŋikadwarak, ŋulu a ŋiuni erae ŋiketatamak, totupakis ŋulu etiyak ŋakujuwuanisya ka nabo ŋulu einakinitae apedor akitaŋaleunun ŋidekesyo; ŋice akiŋarakin ŋuluce, ŋice apolokinit ŋuluce ka ŋice daŋ akirworo ŋaŋajepa ŋuna egelaaka ŋuna ke Etau.

1 Ŋikor. 14:3

Nai ituŋanan ŋini edwari, irworo lotuŋa aŋuna ka akitogogoŋ, akisimukekin ka akimaima ikes.

2 Ŋikor. 1:12

Erae akituro kosi na akiteyenunet ŋina a ŋatameta kosi ebe: ikitiŋ isua jwi jwi ŋituŋa daadaŋ akilo nooi iyes, anakerit ka anapatanu a ŋina ebunit aneni ka Akuj ka aŋuna ka ajokis a ŋina ka Akuj, ikidau isua akitiya nu emam aosou ŋina a ŋituŋa.

2 Ŋikor. 11:3

Nai akuryanit ayoŋ ebe ikwaŋina abunio emun tomodikinia Epa ka aosou keŋ, itooliyoryo ŋatameta kus anakikinyomit ka ananupit Kristo.

2 Ŋikor. 8:12

Ani kiitanito iyes ainanakin, ecamuni Akuj ainakinet kus alotyae a ŋolo iyakatar iyes ŋiboro kus, meere alotyae a ŋolo nyiyakatar.

2 Ŋikor. 9:11

Ikitabari iŋes iyes jwi jwi, ikotere toruworos ŋulu irimaaka ŋarwa daadaŋ, ikotere nai tolakaros ŋikalalak neni ka Akuj aŋuna a ŋainakineta kus a ŋuna eryamunete ikes aneni kosi.

2 Ŋikor. 9:13

Itoodiuni etic kus ŋol akiyar kus a Ŋikristo ka epote ŋituŋa ŋulu alalak akipuro Akuj aŋuna ke epite a ŋolo ilimoritotor ka iwuapitotor iyes Ŋakiro ŋuna Ajokak ŋuna a Kristo, ŋuna iseraete iyes. Ipurete daŋ ikes Akuj aŋuna imoryata iyes ka ikes ta ŋikanupak ŋuluce daadaŋ ibore ŋini iyakatar iyes.

2 Ŋikor. 9:7

Itemokino nai ŋinituŋanan inak ikwapei etubunitor iŋes elope, meere ka alejeo kori ka akitiŋakinit, anerae emina Akuj ŋini einanakini ka alakara.

Ŋiep. 6:5

Ŋipi, topupete ŋikapolok kus ŋulu ka akwap a na anakuryanu ka anamaran ka kitiyata ŋun ka ainakina lopite ŋolopei itiyanakiniata iyes Kristo.

Ŋikis. 15:14

Inakisi iŋes emam akitiŋakinet adio daŋ ibore idio alotooma ŋamesekin kus, ŋikinyom kus ka epiini kus, inakis iŋes idiobore alotooma abaru ŋina ikiterereŋitor iyes Ekapolon Akuj kus.

Ŋikis. 16:11

Tolelyana alokiŋaren Ekapolon Akuj kus, iyes kaapei ka ŋidwe kus ŋulusapa ka ŋulupesur, ŋipi ka ŋapi kus, ŋilepi ŋulu iboiyete alotaunio kus ta ŋigelaanotin, ŋikokyok ka ŋapuseru ka ŋituŋa ŋulu iboiyete kaapei ka iyes. Kitiyata ŋun anakibois a ŋina eseuni Ekapolon Akuj kus kilipere enyaritae ekiro keŋ.

Ŋikol. 3:22

Ŋipi, topupete ŋikapolok kus ŋulu ka akwap a na alopitesyo a daadaŋ, meere apaki ŋina ikiteoto ikes iyes bon, anerae icamito iyes ikitojoka ikes iyes; nai kitiyata ka ainakina aŋuna ka akerit Ekapolon Yesu.

1 Ŋites. 2:3

Apaki ŋina ekatakinitere isua akitacamun iyes Ŋakiro ŋuna Ajokak, pa adyakaritae isua, kori pa erworoe ŋakiro ŋuna ka asiilyo ka daŋ pa arae ŋuna modikinet idiotuŋanan.

1 Ŋites. 2:8

Aponi isua ikiminakin iyes nooi, ido aponi toryamunae alakara, meere ŋinamoret Ŋakiro ŋuna Ajokak bon ka iyes, nai tari akiyar kosi a ŋilopeyek; anerae ipotu iyes toruworos ŋuluminan kosi.

1 Tim. 4:13

Kiwuak ŋatameta kon daadaŋ ka agogoŋu kon daadaŋ nasyomanakin ŋituŋa ŋakiro ŋuna ka Akuj, nalimonokin ka nakitatam akitodol ŋina abunio ayoŋ.

1 Tim. 5:17

Itemokino ŋikatukok ŋulu idarito ejok atukot a Ŋikristo etacio ŋarwa ŋaarei, akilo nooi ŋulu elimonokinete, kitatamete ka alelakinit.

1 Tim. 6:18

Tolimok ikes kitiyata ŋuna ajokak, tobarito aloticisyo a ŋulu ajokak ka totenito akimor ŋiboro kec ka ŋuluce anarimao.

Ŋibur. 10:25

Nyikipalik acunanakin iwapei ikwaŋina apalikiniata ŋice. Nai orubakisi ikisimukekina make, nooi anapaki a na a ŋina aapuunia Akoloŋit ŋina ke Ekapolon.

Ŋibur. 13:17

Tokerito ŋikarikok kus ka kiwuapito ŋakiro kec; anerae itemokino ikes tolimosi neni ka Akuj epite ŋolo ikiyokiyoto ikes iyes. Kitiyata ŋun alopite a ŋolo italakari ikes, meere alopite a ŋolo isiyaloloŋi ikes, anerae iyes pei ŋilopeyek itwakiyarete.

Ŋibur. 13:22

Ekemaimai ayoŋ iyes ŋikaitotoi kaŋ atemar topupokis alotooma akidaŋidaŋakinit ŋakiro nu ŋuna ka akitumunikin, anerae nyeoya abaruwa na ŋina ekegirak ayoŋ iyes.

Ŋibur. 13:24

Kimalata ŋikarikok kus daadaŋ ka ŋituŋa ŋulu ka Akuj daadaŋ. Ikimalaete iyes ŋikaitotoi ŋulu eponito alo Italia.

Ŋibur. 13:7

Totamutu ŋikarikok kus ŋulu koloŋ, ŋulu ikilimonokinete iyes ŋakiro ŋuna ka Akuj. Totamutu epite ŋolo ayakar akiyar kec ka ŋolo atwakyata; torokutu anupit kec.