19 Ŋikilyok, tominas ŋaberu kus ka nyidedeŋikinito ikes.
Yau nai Isaka Rebeka loeema neni ayai toto keŋ. Tosodi ya Isaka Rebeka toruwor aberu keŋ, tominak iŋes nooi. Apotu ŋun nyisiyaloloŋ Isaka kedaun toto keŋ.
Emaikina ŋinituŋanan elelyani anakwap keŋ kaapei ka aberu keŋ ŋirwa ŋulu erae ŋikoŋinae lu daadaŋ ŋulu adau Akuj ainakin ŋituŋa akiboiyo anakwap a na.
“Ŋinituŋanan ebuni neni kaŋ, nyeruwor ekaakewuapan, mati kakaminaki iŋes ayoŋ nooi akilo papa keŋ, toto keŋ, aberu keŋ, ŋidwe keŋ, atalokaato keŋ, atanakaato keŋ ta akiyar keŋ a ilope.
Ileleba ŋilam ka adedeŋu nakituka kec.
Tojoŋoto arakao, anyunyura, aŋoit, ecelet ka akiyany Akuj.
Ŋikilyok, tominas ŋaberu kus, ikwaŋina aminar Kristo Ŋikristo, ido tojal akiyar keŋ aŋuna kec.
Nai ikikamunito iyes daŋ ŋakigireta ŋun: itemokino ŋolokile tomina aberu keŋ, ikwaŋina eminar iŋes akuwan keŋ ke elope; itemokino ŋinaberu tokerite lokile keŋ.
Atapapa, nyitoŋoa ŋidwe kus, ikotere nyeluŋakin ikes.
Nai ani kiyakatar iyes arakao ŋina aronon nooi ka akitojoka lotai kus, nyiturokinotor aosou ŋin, ido torapa ŋuna a kire aŋuna ka alyokonu kus.
Ikwaŋinapei, iyes daŋ ŋikilyok, itemokino kiboiyete ka ŋaberu kus ejok, toyenete atemar epalag ikes. Tokerito ikes, anerae einakini Akuj ikes daŋ ikwa iyes akiyar ŋina nyedaun. Kitiyata ŋun, ikotere tomam ibore isigukini akilip kus.
