Ŋikis. 31:3 - Ebaibul

³ elosi Ekapolon elope adokar ekekwaye Yorodan ikiŋarenik iyes, emunyari iŋes ŋituŋa a ŋakwapin a ŋun alokiŋaren kus ka iritarete iyes ikes. Edokari Yosua daŋ ekekwaye ikiŋarenik iyes, lopite ŋolo abunio Ekapolon kiikinia.

Ŋikis. 31:3 Iomraidhean Croise

Akisy. 48:21

Tema nai Isirael neni a Yosepu, “Aapuu ayoŋ atwanare, nai eyakaun Akuj kaapei ka iyoŋ, ikiyai iŋes iyoŋ nabo nakwap atapapaa kon.

Ŋitic. 7:45

Ani kijaut ŋipapae kec Eema, apotu ikes kaapei ka Yosua yaut iŋes tari nakwap ŋina ekamarete ikes, apaki ŋina eritarya Akuj ŋituŋa ŋulu ka akwap a ŋin aŋuna kec. Kiboi Eema anakwap a ŋin akitodol ŋirwa ŋulu a Daudi.

Ŋikis. 1:30

Ekapolon Akuj kus ŋolo ikiŋarenikini iyes, iŋes ebuni ajiore aŋuna kus, lopite ŋolo abunio kitiyaa aŋuna kus alo Ijipit iteete iyes

Ŋikis. 3:28

Nai kicik Yosua, kisimukek iŋes ka kitogogoŋ etau keŋ, anerae iŋes etubor ekekwaye iŋarenikinit ŋituŋa lu, iŋes eryamikini ikes akwap ŋina ibuni iyoŋ akiŋolikin.”

Ŋikis. 31:14

Kirwor Ekapolon neni a Moses tema, “Aapuu apaki ŋina itwania iyoŋ, tonyarau Yosua, ido toloto kaapei ka iŋes tooma eema ŋolokilipet, ikotere olimok ayoŋ iŋes ŋuna emaikina kitiya.” Aŋun, apotu Moses ka Yosua toloto tooma eema ŋolokilipet.

Ŋikis. 31:23

Tolimok nai Ekapolon Yosua lokoku a Nun ŋakiro nu tema, “Togogoŋ ka totitiny, anerae iyai iyoŋ Ŋisirael nakwap ŋina abu ayoŋ eik ikes, ikiruki ayoŋ ka iyoŋ.”

Ŋikis. 31:4

Itiyae Ekapolon neni kec ŋuna abu kitiya neni a Sikon ka Og, a ŋulu arae ŋirwosi a Ŋiamori ka nakwap kec apaki ŋina amunyarya ikes.

Ŋikis. 34:9

Kilelebun etau ŋolo ka aosou neni a Yosua a lokoku a Nun, anerae abu Moses kidokok ŋakan keŋ neni keŋ ka apotu Ŋisirael kiwuapa ŋakiro keŋ itiyaete lopite ŋolo ecikitor Ekapolon Moses.

Ŋikis. 7:1

Ani ikiyauni iyes Ekapolon Akuj kus nakwap ŋina eapi iyes alomar ka akituruwor ŋina iboiyoto iyes, ido kirita ŋituŋa a ŋakwapin alokiŋaren kus, kirita Ŋiitaiti, Ŋigiragasi, Ŋiamori, Ŋikanaani, Ŋiperisi, Ŋiipi ka Ŋiyebusi, ŋituŋa a ŋakwapin a ŋakanikaarei ŋulu egogoŋ ka elalak akilo iyes

Ŋikis. 9:3

Toyenutu nai nakoloŋit na atemar Ekapolon Akuj kus iŋes edokari ekekwaye ikiŋarenik iyes eryenyaana esibit akim ŋina enomi akwap, emunyari iŋes ikes, ido ilouni ikes alokiŋaren kus, ikotere iyes iritarete ikes ka imunyarete ikes atipei, lopite ŋolo ikiikinia Ekapolon iyes.

Ŋibur. 4:8

Kerae kitodolite Yosua Ŋisirael nakwap ŋina ka akieŋunia a ŋina eikinit Akuj ikes, pa nabo kirworit Akuj ekaku ŋakiro ka akoloŋit ka ace.

Yos. 1:2

“Atwana eketiyan kaŋ Moses. Aŋun, tonyoutu tokona ka Ŋisirael todoka aŋolol Yorodan, tolomasi nakwap ŋina ainakinit ayoŋ Ŋisirael.

Yos. 11:15

Arae epite ŋolopei sek ecikitor Ekapolon Moses eketiyan keŋ, abunio Moses kicikia Yosua, tosodi Yosua kitiyak ŋun. Nyeesikina iŋes akitiya idiobore daadaŋ ŋini ecikit Ekapolon Moses.

Yos. 3:7

Kirwor nai Ekapolon neni a Yosua tema, “Akoloŋit na, esyakini ayoŋ akitopoloor iyoŋ alokiŋaren Ŋisirael daadaŋ, ikotere toyenuniata ikes atemar ikiruki ayoŋ ka iyoŋ lopite ŋolo abunio orukioto ka Moses.

Yos. 4:14

Akoloŋit ŋin, abu Ekapolon Akuj kituruwo Yosua ekarwon alokiŋaren Ŋisirael daadaŋ, tokera ikes iŋes ŋirwa daadaŋ ŋulu ayarya Yosua, tokera lopite ŋolopei sek kekeritotor Moses.